Atonun, na ni Allaho, ‘Anda, im deice tam ulumak arye, an pia mikip weik taruk arye, nara adiparyuk, lopdeipnimince, lyepropnamnilam’ tenen, moropkine. Deiyok ara, ‘Na mal olan nang arye opnikcak’ tenen, moropkine na nio! Diba, na mutuku koprop nang arye, kum bukni, yuk pera mutuku arye, ninye asik nang, yu nang arye olyanamaniak nang, ‘Sik taruk arye opnikcak’ tenen, na ni ance, “Lobuka lyepdopnilyame!” nyabuka, moropkine na nio!
Mazmur 32:6 - Eipomek6 Ati ara, Allah ance, nun kekena ati, lo tuba aupmasilye talak ara, anti, ‘Nun malye ning namin kipsimince, teleb kipdeipnamsilame,’ nyabuka moronamabe. Ara, ‘Allah arye nyasilye touk, wininamabe’ tenen, teleb kibuka, diksukum wininyak ninye arye, anti moropkicopura, ance sik morobice touk, wininamsilame. Winipmanto ara, ninye kum tenebice talak, mek weik arye oplye talak ara, mutuku kon deice unyak ninye ara, weik mek adiparyuk, sik aik nirya palibuka, kum daklamle. Aninye ara, mek kum dilule. Aning atonun, nun malye wininyap ning, akunum namin kipsimince, teleb kipdeipsiminba, aminyan talak, weik ikin wenena ning, tukwak ninye dam yalyopura, nun melipsiminba, diksukum wininamap ninye ati, kum oplonamsilame. Aning ara, nun dam kum yanamle. အခန်းကိုကြည့်ပါ။ |
Mazmur 32:6
24 ပူးပေါင်းရင်းမြစ်များ
Se anggun mikip pia weik ululum nango, dan talak tonap na ni Allah ati, yep-yep abuka nalinamlum do? Winipmunyeura, yuk nang arye ton, kekebikirye, malye yupu nyakiba, alye weik unululule. Anggun ninye deiyok nang ululum nang ara, ouku weik arye ton, nong kum upnamle yupu nyakiba, ance kanye deibuka kekenamlum do? Tonda, ouku weikto arye, tilila yupu kekepmunce, dobonmanulum do?
Nara, malye ning arye, bental wetepmana atonun pia ulamnuk bukni, Allah arye dobuka lyepnukce, lake deipnuke. Tonda, ikin weik ulamnuka ati ara, winipmanto ara, weik bental pum wekamsiba, Allah arye dobuka, mutuku yangan keil deice deipnuke. Melibuka lyepnukce, telebak deipnuka ati ara, winipmanto ara, wini talak ara, teleb kat tuku deice, dobuka deipnukba, teleb banune.
‘Na kanye talima uk dipnilyakʼ tenen ati, ance minop talak melilamnulum ning ara, ila tuba, pia tonap tenenamne. Yordan mek puak bukuk mutuku, Hermon mutuku arye dipdongobuka, Misar mutuku dam, amutuku deice nirya ara, pia teleb kibuka meliamnulum ning ara, tuba tenenamne. Na ni Allah ance nati, lyepromnulum ning ati, tuba tenepnirye, tuba tamubuka, tonap kanye deipnamne.
Atalak ara, ninye yupa weik, seribu nang auk dilamle deice arye, anggun dam dibikce babye, anggunda, auk disuta babye, anggun kum dipnamlume. Tonda, ninye yupa weik, takubarye ribu nang (10.000), anggun sirik tam yanuka dipnamak bukni, anggun Allah el amu tam unamlum ninye ara, mitik dila babye, ton kum saknamsile.
Aminyan talak, ikin ning weik anggun dam yalyopura, anggunce nati, “Se, nun melibuka lyepsilyame,” nyabuka moronamnulum bukni, nara, “Aunmana ati ara, melipnusine,” kum nyanamsine. Anggunce moropnamnulum yupu ati, kekepnirye tamubuka kum nyapnamsine. Tonda, anggunce nati, ‘Se, nunda pia weik kel bikna deiyok ning patasulula ati ara, dobuka kel kiptibye’ tenen, epra banamnulum bukni, pia kum eipnamnulume.
“Ati, anggunce weik mek koubuka banamlum bukni, mek noutam banumunye talak babye, narye melipnamsina deice arye, amek optua babye, mek koubuka banmamunye talak arye, kum dopnamsile. Tonda, weik uku buk pakanmalyak banamlum bukni, uku buk noutam banmamunye talak babye, narye melipnamsina deice arye, auku weik arye diptua babye, uku noutam bamunyeba, auku arye kum dipnamsile. Atonun ton, yuk asilen ning nirya anggun dam yangasilya babye, malye kum kipnamsine.
Na Allah Yahweh arye na mapu Israel ninye ati nyapsine. “Narye tenyamse talak akunum yalyopura, anggunce moryamnulum ning ara kekepsinirye, melinamsine. Tonda narye tenyamse talak akunum kiplyopura, anggun melibuka lyepnamsine. Winipsinirye, anggunda na amu tam ulamunyeba, narye tuba kalikuka melinamsine. Winipnamsina deice arye, doryanamle talak unamak Israel ninye babye, aning eibuka kel bikikirye, ‘Nun babye dipkoprob lyepropnamsile’ tenen, kel biknamake. Ati na pil donamsina deice arye, yuk mutuku nang arye anggun mutuku nirya alabuka dopropsik ning ara, tamubuka arepnamsine. Winipsinyopura, narye anggun minop talak aik dobuka ulamlumak bukni, aik oldemuk upsukak ara, tamubuka arepsiniba, aik dopmunce amutuku ara pia talibuka unamlume. Aning ara, na tenepse talak akunum uplyopura, winipnamle.”
Nun ikin usilye talak noutamak nirya ara, elce kanye talima kwa diprongobuka melisulule. Kanye Talima kwa diprongobuka melisilya deiyok ara, ‘Yuk ninye ton ikin uplye talak ara, na mapu arye anang ati, talima kwa diprongobuka melinamak’ tenen, melisulule. Yuk ninye kanye imun upliba, ‘Yata wiribuka deice arye melipsitibye do?’ tenena kume. Ara, Allah arye nunti, talima kwa diprongobuka melisilya mikip deice aryuk, nunce yuk nang ati melinyabe. Yuk ton kume.
Anyapsin yupu deiyok ara ani. Ara, Allah yupu noutamak ara, Allah arye Israel ninye ati nyapdeibukba, nabi Yesaya arye sekuk yupu ani. ‘Allah arye nyabuk, “Narye, ‘Aninye melipnamne’ tenen, kanye deipse talak akunum ubukba, anggunce moropnulumba, kekepsirye melipsise. Narye, ‘Ninye lyena talak atia,’ tenyamsi talak akunum ubukba, anggunti melibuka lyepsise,” nyabuk.’ (Yesaya 49:8) Ati, Yesaya arye sekdeibuk yupu nyasilye touk, na Paulus arye anggun Korintus ninye ati nyapsine. ‘Aning nirya ara, yuk talak aryuk tenenamabe’ tenen, kum unamlulume. Wini talak ara, Allah arye kanye delisilye talak akunum upsile. Wini talak ara, Allah arye lyesilye talak akunum usulula ati, adiparyuk dib tenebuka teleb ubuka wininamlume, nyapsine.
Weik malye ulamse bukni, Yesus Kristus arye nati, ‘Aweik malinye talye merekukua optinye bukni, luba kipnilirye, kanye arepnibuk, melibuka lyepnyopura, yuk nang eibikirye, Kristus ara, bico tenesululnye, dib tenepnitinge’ tenen, lyepnuke. Kristus arye, malye winin ninye ati, bico tenesilirye, ‘Se aminyan diba tenepnitinge’ tenen, minop wena kum arye, namin kisilirye, kum batakasulule. Ati, aning atonun winipnuka deice arye, yuk nang ton eibikirye, ‘E Yesus dipkoprop namin kisulule’ tenen, kel binamake. Kel bikmakcopura, Yesus ati, dib tenebikibuk, bol koplobuka pia kam una deiyok ning dopropnamake. Yesus arye, ‘Paulus ati winipse ning, yuk ninye ton eibikirye, kel biknamak’ tenen, nara winipmantonye ati, winipdeibnuke.
Nun ni Allah, el bico tenepsilirye, talye melisilya deice arye, peteresiliba kel bikinyabe. Ara, Allah yanibuka kanye talima malye winina ap, talye nang arye tukwak malye ning tenebuka kanye engena ap, ati, “Kume, aning pia kum wininamlume,” nyabuka peteresululba kel bikinyabe. Tonda, nyanamlyame. Allah bico tenesilirye, lyesulul anya arye, “Anggun patasilye ning. ‘Talye kanye bobuka winipnuyap,’ tenena kume. Anggun bidamnye ati moubuka dilanamlulume. Allah pia funguk ulirye, pia teleb ulye touk, anggun babye diksukumuk ubuka teleb nang unamlulume,” nyabuka peterepsine. Wini talak babye, aning atonun wininyabe.
ကြော်ငြာတွေ