Mazmur 3:7 - Eipomek

⁷ ‘Aning ati ara, na mal olan nang arye, nati, ‘Optibyeʼ tenen, na dam yanganyak ninye ara, yupa pia weik kum nukmanto sepuluh ribu (10.000) nang ton unmatinga babye, anang ati ara, ilil kum unamnile. Sik anang ara, ‘Anye Daud opnuyabe,’ tenebikirye, na dam dana-dana tam nirya, yanuka kalikmanikirye, wariknica babye, nara ilil kum unulule.

Mazmur 3:7 ပူးပေါင်းရင်းမြစ်များ

2 Samuel 18:8

Amutuku noutam nirya asum oldanmek. Olanmek ara, mal olan dam dibinmek ara, ninye mitiktobuk, amutuku yo kan-kan noutam ara, ninye pia weik dibik. Tonda, Daud el yin talin nang arye, sik parang ya arye, ninye mitik weik obik bukni, ayo noutamak noutam dibik ning ara, pia weik.

Ayub 16:10

“Pia ikin weik ununa ati, yuk nang nirya ara, eipnikirye, ‘Se, el ikin ulul ning ara, weik mambul’ tenen, lukdanuka, nati malye kibuka, anggun si bam bol weik tonun kibuka akutunikirye, malye yupu pia weik tonun nyanikyake. Tonda, sikce nati, ‘Elda malye weik ulamuka ati, moubuka kanye ikin kanye bolamle,’ tenenikirye, ninye weik bulubikirye, na dana-dana tam antanap dongobikirye, sik taruk kitibuka opnikirye, na katum dana-dana tam nirya ara, oltakaninyake.”

Ayub 29:17

Bukni, sik mikip arye, ikin deibuka ulamik nang ati, narye sik mikip ara, amu kibuka delilamse. Tonda, sik obuka bataklamikba, ikin asa weik ulamik nang ara, narye sikti, melibuka lyelilamse.

Mazmur 10:12

Wininyaka ara, se nun ni Allah, ance tikmince, sik malye wininyak nang ati, minop wenepnulyame! Tonda, nun ikin kanye weik bobuka, unyap nang ap, kanye namina asa ubirye, yuk nang amu tam unyap nang ati, luba kina kume na nio! Nun ti melibuka lyepsilyame!

Mazmur 12:5

Tonda, malye kanye bobikirye, anggunce, “Nun weik kel yupu arye nyapmunyeura, yuk nang nirya ati, malye kipnamabe. Sikda nun amu tamuk unamake,” nyabuka nyanyake. Tonda, sik kanye erepdakirye, “Nun kanye aryuk tenenyap yupu nirya ara, talye lukdanuka nyanamabe. Yata deiyoknye birye, ‘Ance aning ara, winiplyame, aning ara, pia kum winipnalame,’ nyabuka, yupu nyapdeipsutu do? Kume, nun kanye aryuk tenebupu touk unyabe,” nyabuka, maknya kintilanmakirye, nyanyake.

Mazmur 27:3

Tonda, ‘Na yanuka warikuka opnamap’ tenen, yin nang yanamake. Tonda nati mal olyanamniake. Winipnica babye, ilil kum upnamnile. ‘Allah ancuk melipnunilca,’ tenepnirye, ilil kum unamnile.

Mazmur 35:23

Ati, minop bukmince, na lyena ati, mining dam anyuk yamince, kalikinamnilyame na nio. Ara, talye ati kum bukni, anda na si erekunun Allah, anda aning-aning nirya talimince, Pia Mikip Weik Deiyoknye ulyama ati, na melibuka lyelona ati, minop yanulyame na nio.

Mazmur 44:23

Kume na nio, nun Israel nang arye, antibuk tuba diba tenekinyaba ati, sik yuk-yuk mutuku nang arye, nunti, ‘Anang olbinamabe’ tenen, tuba tenesikirye, nun dam mal olyangasikirye, nun tam nang, weik tonun osinyake. Se, nun ni Allah, ance akunum bataksuluma ati, sik yuk karin mutuku nang arye, talye parapkabuka yanuka osinyake. Winipmanto ara, domba basam weina deiyok nang arye, ‘Adomba basam obuka dipnuyap’ tenen, sik domba basam ara, opmanto ning ati wibuka, domba ona deiyok nang dam bobalamak touk, ance akunum winibuka tenesimince, bataksiminyeba, yu nang arye, talye parapkabuka osinyake.

Mazmur 58:6

Diba, sikda pia malyeuk wininyaka ati, kel weik nang arye, ‘Winipnamlume, winipnamlume,’ nyaptinga babye, anang arye, pia kum kekeptinge. Diba, kel weik nang arye, yupu nyabikiba, kwatima ara, teleb kilinyak bukni, amalye winina deiyok ning, kel weik nang arye, ‘Winipnamlume,’ nyabuka, nyaptinga babye, pia kum kekeptinge.

Mazmur 59:5

Diba, nara malye winin ning tonok babye, ton kum winilamse bukni, sik anang arye nati, ‘Anye opnamabe!” nyabuka, eninyake. Ati ara, na ni Allah, anda bukmince, na dam yanuka dinimince, nati melibuka, lyepdopnilyame na nio!

Mazmur 6:4

Tonda, na talima daksakmanilba, imun kanye bobuka unmana ati, ilil weik unulule. Se, na ni Allah Yahweh, ance akunum bataknulumba, ikin weik ununa ara, yata talak ton aning atouk pia unamne do?

Mazmur 7:6

Ara, narye yuk nang ati, dipkoprob malye ning akunum wamtinye toura, Allah ance lo areptumba, na ona ati yu nang arye, dobolyanitingce, na yanuka tomopnitinge. Yu nang arye tomopnitingce, opnitingopura, na nong ara, tuku deice deiplopnitingce, yan yaniptinge. Diba, na malye wamtinye toura, yu nang arye, opnikirye, na nong ara, tuku sung-sunga deice noutam lakauk deiplopnitinge. Bukni, narye yuk nang ati, malye kum winipse.

Mazmur 74:11

Ati nun ni Allah, yata ati, an mikip taruk arye, amalye nang kum olyam do? Tonda, yata deiyok ati, an mikip taruk ara, nunti melibuka kum talipsulumce, an taram deiceuk, taruk talipdanuka, amalye wininyak nang ara, yata ati kum oplum do?

Mazmur 76:9

Kume, nun ni Allah, anda im deice ulyamak arye, ‘Anggun tukwak nang nirya arye, malye winilulum ning ati, winibuka-winibuka wenepnamsine,” nyabuka, yupu lipsisikuka bokeipsulum talak ara, nun tukwak mutuku noutam unyap nang nirya ara, pia ilil weik upsukba, yupu nyana kumce, tunim abuka unyabe.

Yesaya 51:9

Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.

Ratapan 3:30

Aning atonun, winipmanto, yuk yu nang arye, nun katum dam yanuka bokuka opsikceura, ton tam katum babye moupdeibibiba, bokuka onamsinyake. Tonda, yuk yu nang arye nunti, akutubuka nalipsikce babye, “Dauplye, danaliplulume,” nyabuka, mangkau kinamnyabe.

Habakuk 2:19

“Aning atouk, yata ninye do nirya, sik ninye arye memamice yo ati, si erebikirye, ayo ati, ‘Kam buklyame,’ nyabuka moronyak nang ara, sikda bicoe. Narye awininyak ninye ara, wenepnamna ati nyapne. Aning atouk, kam kum ulul ning, keil ato ning ati, ‘Naio, bukdoplyame, kam unalame,’ nyabuka, si erenyak ninye ati ara, na weik arye wenepnamne. Ati, sikda bicoe. Aning ara, kat ning doprobikirye, puturubuka delinyakce, dekna weik ning emas ap, perak ap, uku dapmakibuk, mitang uplyopura, sik si erenyak ning ara, bol deice palibuka, delinyake. Wininyakba, urasin teleb ulul bukni, aning arye, ‘Teleb un ning ara, ani. Aning wininamlulume, aning ara, pia kum wininamlume,’ nyabuka, aning arye, sik melibuka petereptu do? Kume aning ara, kam ulul ning kum anya arye, kum winipmanto ulule. Tonda, aning-aning nirya ara, isin kum pulirye, kam kum ulule. Aning ara, dib kanye kum ning atibuk, si erena kume.