Mazmur 28:7 - Eipomek

⁷ Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.

Mazmur 28:7 ပူးပေါင်းရင်းမြစ်များ

Kejadian 15:1

Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk.

Mazmur 13:5

Na nio, na mal olan nang arye, ‘E, anye nunce akunum obuka malya kiplopnamabe,’ nyapnikcak tenen, na nio anti moropkine. Tonda, ‘Sikce na opnikirye, sik amu tam deipnikiba, ikin weik upnicak’ tenen, ‘Ance moubuka lyepnutume’ tenen, moropkine na nio.

Mazmur 13:6

Bukni, na ni Allaho, narye anti pia diba tenekunune. Ati ance, “Bico tenepsinirye, narye, ‘Winipnamsine,’ nyabuka, nyalin yupu deice arye nyapdeipsise yupu nirya ara, pia dipkoprob winipnamnarya!” Anyapdeipmasulum ning ara, pia diba tenekunune. Na talima noutam nirya ara, an deiceuk deipkine. Ati ara, ance lyepnamnilama ati, na kanye deipnamkine. Narye an Allah Yahweh ati, si ereipkinirye, mot nyanamkine. Deiyok ara, ance pia teleb kibuka meliamnuluma ati, mot nyanirye, an siuk tuba-tuba pia erenamkine.

Mazmur 19:14

Tonda, na moropkin ning ara ani. ‘Na ni Allah narye nyanamne yupu ap, na talima pum tam arye tenenamne ning nirya ap, diksukumuk uptuba, ance nati kanye deipnutum’ tenen, moropkine.

Mazmur 21:1

Ninye deiyoknye, Raja Daud birye ayupu Mazmur mot nyana deice arye sekuk. Allah yupu mot nyana deiyoknye arepnamuka ati, sekuk.

Mazmur 22:4

Tonda, nun apu yapu nirya arye, antibuk ‘Elda dipkoprob aulule. Nun ni koproba Allah arye, dipkoprob melinamsilarya’ tenen, sik kanye an deiceuk delilamkikce, an si erelamkike. Winilamkik talak ara, ance sik dam ulamlumce, sikti, melibuka lyelamsulume. Ance nun apu yapu kum bataklamsuluma ati ara, sikce, ‘Se, yata ati batakasulul do?’ tenen, malye kanye bobuka, kum ulamik.

Mazmur 28:8

Allah Yahweh arye, el tenen nang, nun Israel nang nirya ati, elcuk, mikip kilisulule. Tonda, Allah arye, ‘Anye bira, Israel yala nang nirya talibuka, sik ninye deiyoknye, Raja unamle’ tenen, wipdeinuknye biti, melibuka lyelonulule. Weik mutuku yangan keil dam duknupnirye, kanye deibuka ulamne atonun, Allah arye na weipnupce, tuba kalikinulule. Raja birye, Allah el dam ulya deice arye, yuk nang arye elti, malye kum kipdeiptinge.

Mazmur 3:3

Sik anang yupa weik arye, nati nyaninyake. “Nun kele, dipkoprob an ni Allah bira, anti pia kum melibuka lyepropnamkile. An mal olan nang arye yanuka opnamkiake,” nyabuka nyaninyake.

Mazmur 3:4

Sikce nyaninyak bukni, na ni Allah na kele. An Yahweh ara, ‘Yu nang arye, Daud obicakʼ tenen, nati pia melibuka kalikinilyame. Winipmanto ara, yin talin nang arye, ‘Yuk nang arye, mal pibuka dobikirye, opnicakʼ tenen, sikce sik nong lelina ati, talinyak nang, el si ara perisai, dobuka kalikilanyak atonun, ance na nong dana-dana tam nirya, warikdongobuka lelipnimince, kalikuka melinamnilame. Anda Allah Yahweh arye, na kisok erepnimince, mikip arepniminya deice arye, nara na mal olan nang ati, obuka sirya dakanune. Tonda ancuk, na talima kwadibuka meliniminyeura, kanye deibuka, urdem unune.

Mazmur 33:21

Diba Allah ap, nun ap, kanye talima dukdongobuka unyaba deice arye, pin-pin asa deiceuk unamabe. Ara, talye ati kume. Nun ni Allah, elda malye ning tonok ning babye, kum winilirye, el si ara, pia mambul weik winilule. ‘Elcuk melibuka lyelonamsil’ tenen, el tibuk, diba tenebibirye, el talibuka unyabe. “Allah elda dipkopropnye winilule,” nyabuka, el siuk erenamabe.

Mazmur 37:39

‘Nun ni Allah ara, pia mambulnye ulule’ tenen, diksukumuk wininyak ninye ati, Allah el si Yahweh aniryuk lyesulule. Tonda, weik imun ning, sik dam yanamle talak ara, Allah arye sikti, melibuka lyepnamle. Winipmanto ara, ninye arye, ‘Nun mal olan nang arye opsicak’ tenen, keil aik pum tam duknubuka balamak touk, sik diksukumuk wininyak ninye arye, ikin ning, sik dam yalyopura, ‘Allah aniryuk melibuka lyepnamsil’ tenen, Allah el dam anyuk banyake. El amu tamuk ubicopura, Allah Yahweh arye, aninye ati pia melilule.

Mazmur 40:3

Nara, malye ning arye, bental wetepmana atonun pia ulamnuk bukni, Allah arye dobuka lyepnukce, lake deipnuke. Tonda, ikin weik ulamnuka ati ara, winipmanto ara, weik bental pum wekamsiba, Allah arye dobuka, mutuku yangan keil deice deipnuke. Melibuka lyepnukce, telebak deipnuka ati ara, winipmanto ara, wini talak ara, teleb kat tuku deice, dobuka deipnukba, teleb banune.

Mazmur 43:2

Na ni Allah, anda, ninye melina deiyoknye ulyame. Winipmanto ara, ‘Yuk nang opsicak’ tenen, kwarabuka bikirye, weik keil poka domikca dam, duknulbalamak touk, ‘Lelipdongopnamnil’ tenen, nara minopce kwarabuka, an dam duknulyanganune. Bukni, yata deiyok ati bataknulum do? Winipnulumba, na mal olan nang arye, sik yu kanye, na deice delinikiba, kanye imun deiceuk unun do?

Mazmur 46:1

Mot nyana ati deiyoknye bira, Daud deiyok kipnaba, sik Korah mutuku deipkirikdop nang nirya ara, Allah ati mot nyabuka, si erelamik.

Mazmur 46:2

Nun ikin usilye talak nirya ara, nun ni Allah ance melisimince, mikip arisilyame. Allah ance lelilongosilyame. Allah anda ninye kanye imun upsilye ning babye melisilyamnye.

Mazmur 69:30

Sik amalye wininyak nang arye, na nong deice ikin weik ning delinica deice aryuk, diniliba imun kanye unulule. Ati ara, ‘Na ni Allah, ance lyepropnimince, erepdeipnamnilame’ tenen, moropkine.

Mazmur 84:11

Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

Mazmur 91:4

Winipmanto ara, ayam mapu, sik nin birye dobuka, el pol amu deibuka irilamle tonun, Allah arye elti, dib tenenyak ninye nirya dobuka, el damak deilinamle. Tonda, sik nirya ara, Allah el mikip weik arye erebuka uliba, el amu tamuk unamlume. Winipmanto ara, el pol mikip arye, anggun nong iripdongopsiliba, kanye lamapdongobuka, nimalya asa arye, el amu tam unamlume. Winiminyeura, Allah arye, pia kum bataknamsile. Winipmanto ara, ninye arye mal oldan talak, ‘Mal biksilyak’ tenen, ting kinikikirye, kelapye dobuka, mal pibalamak touk, Allah el mikip arye, nunti, melibuka kaliksilibuk, opmanto ning, nun damak yalya babye, kum opnamsile. Aning atonun, Allah arye, ‘Ikin ning na amu tam unyak ninye damak yalyak’ tenen, el mikip arye nunti, pia melibuka kalikinamsile. Ati, el amu tamuk unamlume.

Yesaya 12:2

Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Yesaya 45:24

“Na si erebikirye, nyanamniake. ‘Teleb kibuka diksukum winina ap, pia mikip arye winina ap nirya ara, Allah Yahweh elcuk ulule.’ Na Allah ara winibuka ununa ati, nati yu tenebuka, malye yupu nyaninyak nang nirya ara, aminyan talak ara na Allah ati eibikirye, alye upliba ilil unamake.

Yesaya 61:10

Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.

Efesus 6:10

Winira na kayapu, asurat sirya dakna ati, yuk yupu ton nyapnusine. Anggun ap, nun Deiyoknye Yesus ap, talima dukdongobuka neiktoto unamlum talak noutamak arye, el mikip weik arisilya deice arye, lamapdongobuka mikip arye, unamlulume. Mikip unamlum ning ara, Allah el mikip deice aryuka.

Wahyu 15:3

Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.

Wahyu 5:9

Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.