Mazmur 28:1 - Eipomek

¹ Na ni Allah Yahweh, ‘Ance melipnunilam’ tenen, yupu weik arye yukubuka, moropkine. Winipmanto ara, weik mutuku dam bukamlye keil deiyok dam duknupnirye, telebuk ununa atonun, an dam ara, kanye deibuka telebuk unune. Ati na nio, ‘Na moropkin ning ara, kekepnulilam’ tenen, moropkine. Na nio, anyapkina ara, talye ati kume! Ance na moropkin ning ati, kum kekepniminyeura, ninye dibikceba, tuku pum palibikirye, dongolamak touk winipnicake. Min akunum diamik nang unyak sukum binuka unamne.

Mazmur 28:1 ပူးပေါင်းရင်းမြစ်များ

Ayub 33:28

Tonda, anye birye, “Nara walamnik nang unyakak binmanto uapsebuk, Allah elce nati, Anye bira akunum diplamik nang unyakak ara, bana kume,” nyabuka lyepropnuke. Winipnukba, wini talak nara kam tuba unamne. Tonda, dirina ara tuba dinauk unamne,” nyanamle.

Mazmur 142:1

Raja Daud birye, ‘Yu nang arye opnicak’ tenen, weik keil deiya pum tam duknubuk talak arye, nyabuk yupu. Ayupu ara, sik ‘Israel nang peterepnamne’ tenen, sekuk Mazmur yupu mot. Tonda, Allah morona yupu deice arye sekuk. Daud birye nyabuk yupu ara, ani.

Mazmur 142:2

Na weik yupu deice arye, “Na ni Allah Yahweh ati, “Melipnilyame,” nyabuka moronune. Moronirye, na nyanun yupu deice arye, “Se, Yahweh, ance melibuka lyepnilyame!” nyabuka moronune.

Mazmur 143:7

Na ni Yahweh, na talima pia mitang uniliba, kum winipmanto ununa ati, narye morokunun ning ati, ance minop kekepnimince, melipnamnilame na nio! Na nio, ikin unilye talak, narye anti moropkinyopura, ‘Ance luba kum kinamnilam’ tenen, moropkine na nio. Ance kum kekepnimince, luba kibuka batakniminyopura, sik akunum diamik nang unyak touk, unamne na nio!

Mazmur 18:2

Daud birye, “Se, na ni Allah Yahweh, ance na mikip arepnulumnye biti, na kanye nirya, an deiceuk delikunune,” nyabuk.

Mazmur 22:2

Na ni Allah, keting noutam talak nirya, narye anti weik arye malye nyanmane. Bukni, ance yupu ton tamubuka, kum nyapmanilamce, yupu tana kum upmanilame. Ati lukunyan talak babye, mambul kanye bobuka, narye anti, tuba-tuba morokunune. Tonda, na kanye teleb kum unmanilba, malye kanye bobuka, moronauk ukunune.

Mazmur 3:4

Sikce nyaninyak bukni, na ni Allah na kele. An Yahweh ara, ‘Yu nang arye, Daud obicakʼ tenen, nati pia melibuka kalikinilyame. Winipmanto ara, yin talin nang arye, ‘Yuk nang arye, mal pibuka dobikirye, opnicakʼ tenen, sikce sik nong lelina ati, talinyak nang, el si ara perisai, dobuka kalikilanyak atonun, ance na nong dana-dana tam nirya, warikdongobuka lelipnimince, kalikuka melinamnilame. Anda Allah Yahweh arye, na kisok erepnimince, mikip arepniminya deice arye, nara na mal olan nang ati, obuka sirya dakanune. Tonda ancuk, na talima kwadibuka meliniminyeura, kanye deibuka, urdem unune.

Mazmur 30:4

Se, na ni Allah Yahweh, na akunum dipmanto ulamse bukni, ance kwetepnuluma ati, sik akunum diamikba, tuku lukamik nang dam kum bise. Kam tuba unune. Allah ance akunum kwetepnulumce, teleb kipdeipmanilama ati, wini talak kum dipnamne.

Mazmur 30:9

Atalak noutam arye, narye anti, ‘Se, na ni Allaho, na melipnilyame,’ nyabuka, ngalukna deice arye, malye nyabuka moropkise. Ara, narye Allah ati, pia mikip weiknye ulula ati, elce aning-aning nirya talibuka, deice tam ulirye, elce teniplye touk winilula ati, narye elti, ‘Melibuka lyepnilyame,’ nyabuka moropse.

Mazmur 35:22

Ati ara, aning-aning nirya ara, Allah Yahweh ance akunum eililyama ati, yupu nyana kumce, talye tunim abuka, kum wininamlyame na nio. Nara pia ikin weik unulula ara, an akunum bikilyama ati, ‘Anda pera sukum kum unalyame, bukni, na dam yamince, melibuka lyepnamnilam’ tenen, moropkine na nio.

Mazmur 39:12

Nun tukwak nang nirya ara, malye ubibiba, ance, ‘Sik bikinamak’ tenen, wenepsimince, ikin ning aresilyame. Winisiminye talak ara, nunce, ‘Se, aning ara, pia teleb ning,’ tenen, talinyap ning ara, malye kipdeipmince, nun talinyap ning nirya ara, minopce kum danasulule. Winipmanto ara, sikce, baju deibikiba, dilirye, minop malye kipnin balamle touk unyabe. Diba, nun tukwak mutuku unyap nang ara, isin aryuk unyaba ati, nun adiparyuk dibinyabe. Winipmanto ninye isin ara, mok puru yo bok deice palipmalya ani, miklamle touk usulule.

Mazmur 42:9

Ikin weik unulul bukni, keting duk-duk noutamak nirya ara, na ni Allah ance, bico tenebuka melinilyame. Wininiminye ning ati ara, lukunyan noutamak ara, Allah an si erena ati mot nyakunune. Na ni Allah, anda na Kam Una Deiyoknye uminya ati, kanye lon mot nyapnirye, Allah antibuk morokunune.

Mazmur 5:2

Na ni Allah Yahweh, narye anti moropnukin yupu ara, moubuka kekepnamnilame. Na kanye talima daksaknil ati, narye, ‘Se, yata winiptinye do?’ tenen, ikin kanye bonuna ara, ance moubuka tenepnamnilame.

Mazmur 69:15

Ati ara, na weik bental mekwen noutamak dongolbinamnil talak ara, na yanibuka tikmantoak, ton kum upnamle ati, ance lyepnamnilyame. Tonda, weik karu mekwen deiamlya noutamak weknye talak ara, ‘Mek oplya mikip arye weleplirye, na dobuka weik mekwen deibuka, num-num noutamak dongolbinilyak’ tenen, “Lyepropnilyame,” nyabuka moropkine. Nati, yu weik upliba, mal pininyak nang arye, ‘Opnuyabe’, tenepnice talak ara, Allah ance na kum bataknamnilyame. ‘Adiparyuk lyelonamnilame’ tenen, na ni koproba Allah ati moropkine.

Mazmur 77:1

Ninye si Asaf birye, Mazmur yupu mot sekukce, Allah yupu mot sena deiyoknye biti arebuk. Tonda, Asaf birye nyabuk yupu ara, ani. Amot el leilim ara, yuk mot ara, Yedutun lelim selamlum touk kibuka, amot babye atonun senamlume.

Mazmur 83:1

Asap birye, aMazmur mot yupu sekuk. Asap birye nyabuk yupu ara, ani.

Amsal 1:12

Ninye dibikiba, tuku lukikirye, sik nong nirya dobuka atuku pum bisik dongolamak touk, talye dabakce ninye obuka, batakibiba kum unamake. Sikda, wel nang tuba unyak bukni, nunce aninye obibiba, tuku lukikcopura, dibinyak nang wekelbanyak sukumuk, binuka unamake.

Yesaya 26:4

Pia ati Allah Yahweh, el tibuk diba tenebibirye, el tibuk talibibirye, el deiceuk nun kanye deilinamabe. Ara talye ati kuma. Deiyok ara, nun ni koproba Allah Yahweh, aning-aning deice tam erebuka, Mikip Weiknye ulula anya arye, pia melibuka kalikisiliba, el amu tamuk unamabe! Winipmanto ara, weik mutuku bukamlye keil, dama duknul bitibirye, pia teleb kibuka utibye touk, Allah aryuk nunti, melibuka kalikisulule. Allah ara, pia kum bataknamsile!

Yesaya 38:18

Ance kam una lo ton arepnuluma deiyok ara, ani. Ara, ninye dibikirye, Sheol mutuku banyakak, akunum bikcopura, ninye arye anti tamubuka, ‘Naie telebe,’ kum nyapkitinge. Tonda, sik akunum diamik nang arye, an Allah ati, ‘Anda pia telebe,’ nyabuka, an si kum erepkitinge. Tonda, akunum diamikce nang tuku pum tam akunum bikcopura, sikce anti, ‘Kume, nun ni Allah ara, elce nyapsilye touk, dipkoprob aninguk wininamsululʼ tenebikirye, ‘Dan talak melibuka lyepnamsil do?’ tenen, antibuk dinauk kum unamake.

Wahyu 20:3

Tapu koupdongobukce, tuku pum karu weik uamuk noutamak dopkwetebukce, atuku pum tam buplan tirikukce, kunci dakdongobuk. Winibuka deiyok ara, ‘Keting tamun seribu tahun min kum uplye talak noutamak nirya ara, Isa Mutuku Dongonye arye, tukwak mutuku ninye ayala-ayala nirya ati, tilila yupu tonap pia kum nyanamle. Tilila yupu kum nyaptua ati ara, atalak noutamak ara tukwak kili sal mutuku-mutuku nirya, elce nyalul tilila yupu ton diba kum tenenamake’ tenen, buplan tirikdongobuk. Keting tamun 1.000 tahun akunum uplyopura, like tonok mitik anun tonap lopdongopnamle bukni, atalak ara tuku pum tam dopkwetebukba, eipse. Na Yohanes arye nyapne.