Mazmur 27:1 - Eipomek

¹ Daud birye nyabuk. Allah ance na dirina kilina ap, na lyena ap, Deiyoknye ulyame. Ara, weik kat poka cang arye erebuka dolamak touk, Allah Yahweh ance erebuka uminyeba, nara an amu tam unune. Ati ara, yuk nang nirya ati, ton birbir apnilirye, ilil kum unamnile.

Mazmur 27:1 ပူးပေါင်းရင်းမြစ်များ

Ayub 29:3

Ara, nara tuba-tuba Allah elcuk melilamnuka ati, winipmanto ara, nyapnusine. Atalak Allah ara, weisa dirina atonun upnuka ati, na balamse bisik nirya ara, dirina upnuka deice arye, teleb bisikuk balamse. Ati, Allah el dirina deice aryuk, na ban talak ara, kuna noutam nirya ara, teleb kililamnukba, balamse.

Mazmur 11:1

Raja Daud birye, Mazmur yupu sekuk. Ara, Allah yupu mot nyana deiyoknye arepnamuka ati, sekukce arebuk. ‘Ikin ning, na dam yalirye, opnilyak’ tenen, na ni Allah Yahweh, el damuk unune. Ati ara, yata ati, anggunce nati, ‘Yukak bilyame,’ nyapnutum do? Anggunce nati, “Mitik maka arye, ‘Ninye opsikcak’ tenen, ilil upliba, minopce mutuku kon lakuka balolamle touk, binulyame,” nyamnulum ning ara, yata ati do?

Mazmur 118:21

Ati nara, Allah an siuk, pia erenamkine. Ara, talye ati kume. Na ni Allah, na morokunun ning nirya ara, kekebuka melinilyama atia. Tonda, na mal olan nang nirya, obuka bisilalumce, nati pia lyelonilyama ati, “Telebe,” nyapkine.

Mazmur 118:6

Aning ati ara, na ilil upniliba, yok sirim kum talipnamnile. Ara, Allah Yahweh aryuk, pia tuba melinilyame. Ati ninye yuk nang, sik mikip deice arye, na damak yanuka, asilen ning ton kum winipnitinge. Ara, Allah arye tuba melinulula ati nyapne.

Mazmur 18:28

Aning ara, talye ati kum nyapne. Deiyok ara, sik talima mitang asa unyakce, yuk nang amu tam unyak nang ara, ance anang melibuka lyelolyame. Bukni, sik kanye erepdakirye, maknya kintininyak nang nirya ara, ance sikti, wenepmince, amu tam deipminyopura, alye dakalanyake.

Mazmur 18:29

Na kele. Allah ancuk, teleb kiliniminba, kam tuba unirye, na kam unye talak nirya ara, telebuk unune. Winipmanto ara, ancuk na weisa lapdeipniminba, telebuk tuba kam unune. Winipmanto ara, ikin weik unulul talak ara, pia kunukna noutam atonun unun bukni, na ni Allah, ancuk dirina weik arenilyam deice arye, tamubuka telebuk kilinilyame.

Mazmur 18:46

Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.

Mazmur 19:14

Tonda, na moropkin ning ara ani. ‘Na ni Allah narye nyanamne yupu ap, na talima pum tam arye tenenamne ning nirya ap, diksukumuk uptuba, ance nati kanye deipnutum’ tenen, moropkine.

Mazmur 3:8

Se, “Na ni Allah Yahweh, anti morokunune. Ara, anda adiparyuk bukmince, na dam minop yatumce, melibuka lyepnutume!” nyabuka moropkine. Na dam yaminyeura, na ikin unilye noutam arye, melibuka lyepropnilyame na nio. Ara, talye ati kum nyapne. Nati, ‘Anye nun song ati ara, elti, oplopnuyabe,’ teneninyak nang nirya ara, an Allah arye, sik katum deice bokuka opnulyame! Sik yu weik unyak nang ara, ance obuka sirya daknulyame! Winipmanto ara, sik katum deice bobuka opminyopura, sik si nirya kuruksaknamle!

Mazmur 43:2

Na ni Allah, anda, ninye melina deiyoknye ulyame. Winipmanto ara, ‘Yuk nang opsicak’ tenen, kwarabuka bikirye, weik keil poka domikca dam, duknulbalamak touk, ‘Lelipdongopnamnil’ tenen, nara minopce kwarabuka, an dam duknulyanganune. Bukni, yata deiyok ati bataknulum do? Winipnulumba, na mal olan nang arye, sik yu kanye, na deice delinikiba, kanye imun deiceuk unun do?

Mazmur 62:2

Na kanye pum tam arye, ‘Na ni Allah aryuk lyepnamnile’ tenepnirye, ilil tenena kumce, talye kanye bobuka unune. Ara, na ni Allah, elcuk melibuka lyepnamnila ati, el tibuk diba tenenune.

Mazmur 62:6

Wininyak bukni, nara, ‘Na ni Allah, elcuk lyepnamnil’ tenen, yupu nyana kumce, talye kanye bobuka, tunim anauk unune. Deiyok ara, narye, ‘Kume, Allah elcuk melibuka lyepnamnile,’ tenepnirye, el deiceuk na kanye talima deipnirye, elti, pia dib tenenune.

Mazmur 84:11

Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Yesaya 12:2

Dipkoprob, Allah elda nun Lyena Deiyoknye ulule. Nunce el tibuk, diba tenenamabe. Nunda, ilil kum unamsil bukni, wini talak ara, ‘Allah elcuk, nunti melibuka lyedopnamsilʼ tenen, diba tenenamabe. Aning ara, talye ati kum bukni, deiyok ara, nun ni koproba Allah, el si Yahweh, elce nun mikip kilisulule. Ati ara, mot sena deice nunda el siuk erenamabe. Tonda, “Nun Lyena Deiyoknye bira, Allah eluk ulule,” nyabuka, Allah el si erenamlulume.

Yesaya 2:5

Ati, se, Yakub birye deibukba, dadeipdanin yangalamlum ninye nirya ara, yamunba, nun nirya Allah el dirin deiceuk, talibuka unamabe.

Yesaya 45:24

“Na si erebikirye, nyanamniake. ‘Teleb kibuka diksukum winina ap, pia mikip arye winina ap nirya ara, Allah Yahweh elcuk ulule.’ Na Allah ara winibuka ununa ati, nati yu tenebuka, malye yupu nyaninyak nang nirya ara, aminyan talak ara na Allah ati eibikirye, alye upliba ilil unamake.

Yesaya 61:10

Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.

Yeremia 20:11

Nyaninyak bukni, na ni Allah Yahweh, mikip weiknye umince, nati kalikuka melinilyame. Winipmanto ara, Allah elda, mikip weik yin talinanye atonun ulula ati, ninye nirya arye elti, ilil asa unyake. Aning ati ara, nati, ‘Ikin ning el nong deice delinamabe,’ tenenyak ninye sik nirya ara, mikip kum mitang kipliba, nati kum malye kipnamniyake. Ati, sik aninye arye, ‘Winipnamepe,’ tenenyak ning ara, kum upliba, aning eibikirye, tuba tamubuka tenekirye, pia alye unamle. Tonda, sik alye unamle ning ara, pia aupnamle. Min kum upnamle ati, ninye nirya arye kum lopdeipnamake. Tuba tenenauk unamake.

Maleaki 4:2

Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.

Matius 8:26

Nyabikopura, Yesus arye tamubuka nyabuk. “Anggun ilil unmaluma ara, yata deiyok ati do? Nati, mitik tonunuk diba tenepmanulume,” nyabuk. Yesus nyabukopura, bukukabukce, ayenya donmoka ap, mekwen lonting-lonting nyanmoka ap ati, “Tunimaplyame,” nyabuka, yupu sekuk. Yupu sekukopura, atalak aryuk, amekwen lonting-lonting nyanmoka ap, ayenya ap, tunim abuk.

Lukas 2:30

Aning ara talya ati kum nyapne. Deiyok ara ninye lyena ati, Lyena Deiyoknye dopkwetepmasilamnye, tukwak lake yalyeura, ninye mutuku-mutuku elinnamake. Tonda na babye, akunum eipmana anya arye, wini talak ara, na dibina telebuka.

Lukas 3:6

Amenyan ara, ninye mutuku-mutuku nirya Allah lyeplirye, ninye kanye talima pia talinamsil ning deiyoknye eipnamaka” atia.’ Yesaya arye nyabuk. (Yesaya 40:3)

Yohanes 1:9

Ninye mutuku-mutuku nirya sik melina ati, dirina deiyok ning arena deiyoknye, Dib Koprop Dirina Deiyoknye yanamuka ati, Yohanes bira, kintinilina ap, laka lena ap ati yayuke.

Yohanes 8:12

Aminyan talak ara, Yesus arye amutuku ninye ati nyabuk. “Nara, tukwak mutuku im sirya, mutuku sirya unyak ninye ati, dirina deiyoknye unune. Na nyasinye yupu kekeplirye, talibuka dobolbalinye bira, kunuknak pia kum unamle. Aning kum bukni, kam una deiyok dirina ara, el talima ak unamle.” Yesus arye nyabuk.

Roma 8:31

Arup talak, “Allah arye akunum teleb kipdeipsuk ning ani,” nyabuka laka nyapmasin yupu ati ara, yata yupu ton tabakuka nyaptibye do? Kume, Allah arye akunum bico tenyamsukce, nunti wipdeipsukce, melibuka pil dosulula anya arye, yatanye ap, yata ikin ning ap arye, malye kipsutu do? Aning nirya ara, malye kum kipsutue.

2 Korintus 12:9

Morolamse bukni, Allah arye ikin unilye ning ara, kum dopropnuke. Ayupu nyapnune. “Kume. Pauluso, aning tuba upmakil ikin wapkilya ababye, na bico tenepkinirye, na kanye aryuk melibuka arekunun ning dopropmince, telebuk unalame. Akunuma. Deiyok ara ani. Na mikip aresunun ning ara, sik badamnye mikip mitang wininyak ninye ati ara, na mikip weik arye arepsitinyeura, pia teleb wininamake. Mikip mitang winimunya noutamak arye, na mikip arenamsin ning ara, laka upnamlarya,” Allah arye nyapnuke. Nyapnuka ati ara, na mikip ara mitang upniliba, ikin unilye ning nirya ati, talye kanye deibuka weik arye, “Telebuka,” nyanamne. Deiyok ara, na mikip kum upnilirye, pia mitanguk unilye talak nirya ara, ‘Kristus el mikip weik arye arepnilibuk, adeice aryuk teleb wininamne’ tenen, kanye deibuka unamne.

Ulangan 7:18

Anggunce, amutuku unyak nang ati, ilil una meme. Anggunce elilamlume. Mesir mutuku weik deiyoknye Firaun ap, el mapu nirya ap, sik wenena ati, Allah arye anang nirya oploamuk ning ara, aninguk pia teninamlulume.

Ulangan 7:21

Aning ati, anggunce mutuku-mutuku nirya unyak ninye ati, eipmunce ilil upsiliba, yok sirim talina kume. Anggun ni koproba Allah Yahweh ara, anggun noutamak aulirye mikip weik ap, weik mambulnye ulula anya arye, anggun ilil una meme. Allah elda, weik mambulnye. Elda aning-aning nirya talibuka ululnye biti, ninye tukwak nang nirya arye, elti, ilil ulule.

Pilipi 4:13

Yata winin ning do nirya, Kristus ap, kanye dukdongobuka unirye, el mikip arinilya deice arye, aning-aning nirya winiptinye.

Ibrani 13:6

Allah arye, ayupu nyapsuka ati, kanye teniltona kum arye, diba tenebuka, anyapnusin yupu talibuka unamabe. Ara, Mazmur noutam arye nyapdeiyamik yupu ani. ‘Na melinilinye ara, weik Ninye Deiyoknye Allah ulule. Ati, na ilil pia kum unamnile. Talye ninye arye, yata wiripnitingba, Allah arye kum melipnutu do? Kume, Allah arye nati, pia melinamnila anya arye, na ilil kum unamnile.’ (Mazmur 118:6-7)

Wahyu 21:23

Aning atonun, keting dirin ap, wala dirin ap, ‘Adirina lapsutuba eiptibye’ tenen, patalyeba, pia kum tenenyake. Allah el bidamang dirina ara, pia weik ulula ati ara, im deice unamak ninye ara, yuk dirin ning ton kum patalule. Tonda, Domba Mi Atonye birye, el bidamang dirin weik ululba, anyasik noutamak weik dirin atonun unamla ati ara, keting ap, wala ap ara, winiryuk im deice mutuku kum ulule.

Wahyu 22:5

Dotalak yanamle keting tamun nirya noutamak ara, lukunyan malamap atonun kum upnamle. Pia berekeltaknauk upnamle. Tonda, Yerusalem Winiryuk mutuku (Yerusalem Baru nyalamiknye) noutamak unamak ninye ara, weisa dirin ap, keting dirin ap ati, pia kum patanamle. Nun Weik Deiyoknye Allah arye, el dirin deice aryuk, dilamikirye banamake. Dotalak yanamle keting tamun nirya noutamak ara, Allah arye talilulba, amutuku noutamak unamak ninye nirya ara, el ap aning-aning nirya talibuka, deiyok ninye pia unamake.

Wahyu 7:10

Wininmekce, weik yupu deice arye nyanmek. “Weik Ninye Deiyoknye bun ning deice bululnye, nun Ni kopropa Allah ap, Domba Mi Atonye ap, sik bitinye ara Ninye Lyena Deiyok nang ururake. Sikcuk lyesururake.”