Raja Hizkia engen dol-dol deice arye nyabukce, Allah ati morobuk, “Na ni Allah Yahweh, ance nati tenepnulume. Na nimalyap arye, kanye amu tam kibuka unirye, antibuk tuba talikunune. Yuk talye ning ati, si pia kum erelamse. Tonda, ance nyapdeipsulum yupu uk, moubuka talipsirye, an piluk akunum donune. Tonda, na ni Allah, yuk ning tenina kumce, an teneminye piluk, pia pi deibuka donune,” nyabuka morobukce, engenmok.
Mazmur 26:1 - Eipomek1 Raja Daud birye, aMazmur yupu sekuk. Na ni Allaho, ‘Ance na telebuk ulamseto ning ati, yupu bokeipnutumba, yuk nang arye kekebicopura, ‘E, elda malye ton kum winilule,’ tenepnitingce, bikniting’ tenen moropkine. ‘Dip do, tilila do?’ tenen, teneniltona kum aryuk, Allah Yahweh ati, pia diba tenenune. အခန်းကိုကြည့်ပါ။ |
Mazmur 26:1
30 ပူးပေါင်းရင်းမြစ်များ
Nyabukopura, Allah el si Yahweh arye tamubuka, Isa Mutuku Dongonye ati nyabuk. “Anda na pil donanye Ayub bira, elilyam do? Anyapkenanye bira, talye ati kum nyapkine. Ninye mutuku-mutuku nirya unyak nang ara, na pil donanye Ayub pung telebuk ulul atonun, ton kum unyake. Elda na siuk erenilirye, malye un ning tonok ning babye kum winilule,” nyabuk. Aning ati ara, ance elti, ‘El deiyok ton una kum diparyuk, malye kipdeiptinye’ tenen, yanuka nyapnulumba, ‘Aning ara dawiniplyame,’ nyapkisiba, winiplum bukni, kanye imun weik ubuk babye, elce nati malye yupu kum nyapnuke. Diksukumuk tuba ulirye, na siuk tuba-tuba erenulule.
Aning ati ara, anda Allah ati tuba dib tenenmalam do? Tonda diksukumuk tuba unmalam do? Aning nirya tuba ulamluma anya arye, yata ati teniltona upmakilba, mikip arye dib kum tenepmalam do? Allah arye diksukumuk unyak nang ati, ‘Dipkoprop kalikuka melinamle’ tenen, dib kum tenelyam do? Allah ati dib tenebuka, diksukumuk ulalum ninguk, talibuka ulamtumopura, adeice uk an kanye deibuka ulamtum bukni, aninguk kum unamlam do?
Diba na ni Allah, narye an siuk erekunune. Tonda, ‘Allah elcuk melinamnil’ tenen, antibuk, diba tenebuka unune. Na nio, ‘Na mal olan nang arye, malye kipdeipnikiba, na alye daknyak’ tenen, ance kaliknamnilam’ tenen, moropkine. Tonda, ‘Na mal olan nang arye, opnikcopura, weik yupu arye nalipnikcak’ tenen, ‘Allah ance kaliknamnilam’ tenen, moropkine na nio.
Na nio, ance, ‘Aning ara, wininamlume, aning ara, pia kum wininamlume,’ nyapdeiamsulum yupu ara, narye moubuka talinirye, dobolbanune. Tonda, yuk nang ati, talye yupu pia kum nyanune. Narye yuk nang nirya ati, dipkoprob uk wininuna deice arye, ‘Ancuk melibuka lyelonamnilam’ tenen, moropkine na nio. Deiyok ara, narye antibuk, ‘Allah elcuk, melibuka lyepdopnamnil’ tenen, anti diba tenebuka, dinauk unune.
Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.
Se, na on nang arye, ‘Anye opnamabe!’ nyabuka, yupu mur-mur abuka sisikinyakce, malye yupu nyakce nang ara, na ton kekenune. Ati, na dana-dana tam nirya ara, na ilil kilininyak ning nirya ara, pia weik aulule. Ara, na on nang arye, ‘Anye opnuyabe,’ nyabikirye, sikce, ‘Yata wiriptibya deice arye, anye optibye do?’ tenen, dungnubuka, yupu talinyake.
Allah ance nunti, “Aning wininamlume, aning ara, pia kum wininamlame,” nyapdeiamsulum yupu nyasilye touk, ance tuba-tuba diksukumuk winilyama ati, malye nang arye nati, minin yupu nyaninyak bukni, ance yanuka, nati yupu bokeipniminba, ninye nirya arye biknamniake. Ara, na malye kum winilamse ning ara, ance lak kipdeipniminba, sikce biknamake. Allah ance nati, tuba tamubuka teleb kipdeipnutumopura, sik yu nang arye nati, kum opnitinge. Tonda, sikce nati, kanye deibuka, kum akutupnitinge.
El anye bira, Allah arye, “Aning ara, wininamlulume, aning ara, pia kum wininamlulume,” nyapdeiamsuk yupu ara, pia moubuka, kanye talima pum tam deibukce ulule. Allah el dipkoprob yupu uk, tenebuka winilula ati ara, el winilul ning nirya, telebuk winilule. Winipmanto ara, alap arye pitikuka saknabuk, kum olamla atonun, telebuk ulule. Aning atonun, toupne dama arye, dongobikiba, kum kwirilsaklamle touk, ulule. Malye winin ning talibuka, kum winilula ati ara, elda mangkau kanye bobuka, malye kum winilule.
Ati anggun yuk ninye nirya ara, na nyapnusin yupu moubuka kekepnululume! Ilil ubuka, sirim talina meme. Anggunda yu upsilye talak ara, malye kanye bobuka, unamlum bukni, malye winin ning ara, kum talibuka wininamlume. Malye kanye bobuka umunye talak ara, anggun amsuna koprop mapmunce, anggun mining talima pum tamuk, tenenauk unamlume. Winipmunce, yupu ton nyana kumce, urdem unamlume. Yupu ton talena meme!
Na ni Allah, anti diba kum tenekinyak ninye arye, nati tilila minina yupu nyaninyaka ati ara, ance yanuka melipnilyame. Allah anda, na tam kipmince, nati, ‘Optibye,’ teneninyak ninye ap, tonda minin yupu nyaninyak ninye ap, malye winin ning weik wininyak ninye ap, nirya ara, ‘Allah ance kum daneipnamlyame’ tenen, moropkine.
Allah ance yupu lipsisikuka bokeipnamnilama ati, yuk-yuk mutuku nang arye, asukum yanuka bulubikirye, an dam dana-dana tam bulubuka antanap dongobikirye, dinamake. Ati, anda ninye deiyoknye ulyamce, ninye yupu lipsisikuka bokolina ati, deice tam erebuka bulyamak, el si ara tahkta deice bukmince, ‘Ninye nirya ati, yupu lipsisikuka bokeipnamsilam’ tenen, moropkine na nio.
Min talak ara, narye, ‘Se na mitanguk ununa ati, narye diba tenyamse ning nirya ara, akunum kum danin banmanile,’ tenepse. Aning tenepsirye, kum winipmanto unmase bukni, na ni Yahweh ance, “Nara anggunti, weik tonun bico tenesinirye, pia telebuk kilinamsine.” “Pia kum bataknamsine!” nyalin yupu deice nyapdeiamsulum yupu, tonap tenipsa deice arye, aning ara, kum batakse. Ayupu deice arye, na mikip tonap arepnuluma ati, kum batakse. Tuba kamuk unune.
Malye ning nirya bataklirye, pia diksukumuk ululnye bira, malye ning tonok ning babye, talibuka kum ulule. Teleb uk ulule. Ati ara, elce deipnamle mapu ara, teleb un ninguk talibuka unamake. Allah arye anye ap, elce delinamle mapu nirya ap ati, Allah arye sikti, teleb kibuka delilula deice arye, diksukum unyakce, telebuk unamake.
Ninye ati ilil tenebuka unyak nang ara, ikin kanye bobuka unyake. Tonda, sikce atalak-atalak nirya ara, ‘Se, yata wiripnamak do?’ tenen, ilil asa ukirye, dungnuldanyake. Bukni, yata nang do nirya, Allah Yahweh atibuk, ‘El bidamnye aryuk melibuka kalikinamnile’ tenen, el tibuk dib tenebuka ululum nang ara, anggun damak ausilirye melisiliba, kanye deibuka umunce, pia telebuk unamlume. Tuba ilil kum unamsile.
Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.
Elce, “Wininamsine,” nyabuka nyalilamsuknye, Allah ara, tilila kum nyalule. Elce nyasilye touk dipkoprop ulula ati, nunce, ‘Allah ara, dipkoprop lyenamsil’ tenen, diba tenebuka dinauk unamabe. Winibuka winibirye, laka arye nyanyap yupu ara, yuk bisik kirikuka bana kum, el yupu uk talibuka pia batakna kumce, pia talibuka unamabe.
Anggunda, Allah ati diba teneluluma ati, Allah arye, ‘Na mapu malye ubicak’ tenen, el mikip deice arye kalekuka lelilongosulule. Wini talak arye dipdongobuka, dotalak yanamle talak nirya ara, el mikip arye kalekuka lelisilyebuk, sirya daknamle talak akunum uplyopura, Allah arye lyen ning akunum kintiniyeiamsuk ati, Yesus aminyan talak tamubuka yalyopura, lyepnamsile. Atalak ara alyen ning nirya laka daneipnamsile.
Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe.
Ati ara, nun ni Allah el si Yahweh arye, an ulyam ning ap, na wininun ning ap, moubuka dipdesilirye, nun yupu lipsisikuka bokolina deiyoknye usilirye, yupu lipsisikuka bokeipnamsile. Elcuk ‘Aning telebe, aning malye,’ teneplirye yupu bokeipsilirye, nyapnamsile. Tonda, Allah aryuk na wininye ning babye, na wininamne ning babye melinamnile. Ance nati, ‘Opnamane’ tenen, piripdenilam bukni, Allah melipnilirye lyepnamnile. Winipnilya deice arye, yuk ninye nirya ara kel biknamake. ‘E dipkoprob Daud bira, diksukumuk ulule. Saul bira malye ulamuk’ tenen, kel biknamake.” Daud birye, Raja Saul biti nyabuk.
ကြော်ငြာတွေ