Mazmur 25:3 - Eipomek

³ Bukni, na kele, yatanye birye do nirya, ninye arye anti, diba tenepkikirye, ‘Allah elcuk melibuka lyepnamnil’ tenen, an si deice moropkikcopura, an adiparyuk dipkoprob melibuka lyelonamsilyame. Bukni, yata nang do nirya, deiyok kum upmalibuk, tilila yupu deice arye, talye-talye nyapkikce nang ara, ance anang wenepminba, sik anang nirya ara, alye dakanamake.

Mazmur 25:3 ပူးပေါင်းရင်းမြစ်များ

Kejadian 49:13

Zebulon, an yala ninye ara, weik laut mekwen kup-kup binuka unamake. Weik mok piripna doplye talak ara, laut mekwen deice balamle mek lia yo ara, ‘Piripna arye opsilyak’ tenen, sik unamak mutuku wekelbikirye, tia ati yanuka unamake. Sik unamak mutuku sirya ara, Sidon mutuku dam anyapce sekropnamle.

1 Tawarikh 10:13

Saul dibuka deiyok ara ani. Ara, Saul birye Allah ati, “Winipnamne,” nyamuk ning ara dukdongobuka kum winilamukce, batakuk. Aning ara, Allah Yahweh nyamuk yupu ati, dukdongopra kum ulamuka deice arye dibuk. Tonda, Allah Yahweh arye, “Wininamlume, aning ara, pia kum wininamlume,” nyapdeiamuk mem yupu ati ara, Saul birye ayupu kekebuka kum ulamuka deice arye dibuk. Aninguk kum bukni, Saul bira, Allah ati, “Na walwal upnil ning ara, ance lake nyapnilyame, aninguk unamne,” nyabuka, kum moryamuk bukni, elda ninye diamik nang, sik kanya ap, yupu nyana kel nang, sik dam bin morobuk. Elce, ‘Aning winipnamne do, aning winipnamne do?’ tenena kum arye, walwal ulamuk talak ara, amalye pil dobuka ulamaik nang, sik dam binuka, morobuka ati, Allah Yahweh arye Raja Saul el wenen ati, arebukba dibuk. Dibukopura, el pununa ati, Allah Yahweh arye Saul elce Israel nang ati, ninye deiyok kibuka, Raja kiamukce, amutuku nirya talilamuk ning pununa ati, aning nirya dobuka, Isai el mi Daud ati arebuk.

Mazmur 109:3

Anang nirya arye nati, ‘Anye, nun pia like,’ tenekirye, pia malye yupu, na deice nyaninyake. Deiyok ning, pia ton kum upmalibuk, malye yupu nyabikirye, ‘Anye opnuyabe’ tenen, na dam yanuka, warikininyake.

Mazmur 119:78

Deiyok kum upmanile bukni, nati, ‘Anye bira nun like,’ tenepnikirye, sik talima erebuka, kwalibuka unyak nang arye, nati malye kililamnilce, ikin ning, na nong deice delilamnik. Ati ara, ‘Ance sikti, wenepminyebuk, alye daknamak’ tenen, moropkine. Ance sik anang ati, wenepminba, alye dakdanamak bukni, nara ance, “Aning wininamlulume. Teleb winina ara ani,” nyalisilyam yupu nirya ara, ‘Deiyok noutam ning dan do?’ tenen, narye pia moubuka tenepnirye, talinauk unamne.

Mazmur 123:2

Ara, nun ikin unyaba ati, ance nunti dipdebuka melipsilyame na nio. Nun nirya arye, ‘'Nun ni Allah, elcuk melinamsil’ tenen, an atibuk patapsilyeba, anti morokinyabe. Winipmanto ara, bona talin nang, sik amu tam talye pil donyak nang arye, ‘Na deiyoknye birye, yata yupu nyapnamasil do?’ tenen, el dam dinauk unyak touk, nunce an dam dina ap, kekena ap unyabe. Diba winipmanto ara, talye pil dolamlye kil arye, el deiyok kil dam yanuka, ‘Yata yupu nyapnunil do?’ tenen, ebuka dina ap, kekena ap, ulye touk, nun babye, an dam yanuka kekenauk unamabe. Aning ati ara, nun urasin erebibirye, ‘'Nun ni Allah, el si Yahweh ara, dan sukum ulul do? Dan talak yalirye, teleb yupu nyapsilirye, melibuka lyepnamsil do?’ tenebuka unyabe. Tonda, anti dipdebuka kekenauk unyabe na nio. Ara, nunda malye wininyak nang unyap bukni, Allah arye aning namin kipsilirye, el kanye aryuk bico tenepsilirye, teleb kibuka melinamsil talak ara, min kum yanmalye talak nirya ara, nunce el dam yanuka, dinauk unamabe.

Mazmur 132:18

Daud biti, ‘Anye nun lik’ tenen, mal pinamak nang nirya ati, na Allah arye, wenebuka, sik anang nirya, amu tam kipdeipyeura, sik pia alye weik dakdanamake. Bukni, narye wipdeipsinye Daud bira, el ninye deiyoknye kina ati, lak kin ning, el si mahkota ara, ninye arye aning dobuka, Daud el kisok deice deibikceura, el mahkota deice ara, dirina pia weik upnamle! Allah arye ayupu nirya nyabukba, sik mot nyana deiyok nang arye sekik.

Mazmur 22:6

Bukni, nara ninye kume. Nara, pia malinye ati ara, kuluma atonunye wininune. Wininuna ati, yuk nang nirya arye nati, “Elda malye wininanye,” nyabuka, yep-yep nyabuka nalilamnikce, akutulamnike. Yuk ninye nirya arye nati, ‘Anye nun like,’ teneninyake.

Mazmur 27:14

Ati ara, narye Allah antibuk diba tenen, ‘Moubuka mikip arye talinamne. Ilil kum deice aniryuk ulamnirye, dilamnirye, Allah el si Yahweh arye, pia melinamnile,’ nyabuka, Daud birye nyabuk.

Mazmur 31:17

Ati na nio anda, ‘Weik tonun bico tenepnutumce, an amu tam pil donanye, nati, kanye deipnutumce, lyepnutum’ tenen, moropkine. Ance, nati, ‘Bico tenyamnulumce, tuba-tuba melinamkine,’ nyabuka, ‘Nyalin yupu deice arye, nyapdeipnulum ning nirya ara, anyapnulum touk winibuka, lyepdopnutum’ tenen, moropkine.

Mazmur 31:18

Se, na ni Allah Yahweh! Narye anti, ‘Naio melibuka lyepnilyame!’ nyabuka, engepnirye, anti morokununa ati, ‘Na on nang arye, yanuka opnikcopura, alye dakdanyak’ tenen, moropkine na nio. Bukni, sik malye ninguk talibuka, malye-malye winin ning atibuk, weik tonun wininyak nang nirya ara, ‘Ance sikti, wenepminba, alye weik dakdanamak’ tenen, moropkine. Tonda, sik yu nang ati, weik tonun wenepminyopura, sikce, ‘Se, yata wiripmasil do?’ tenen, teninauk ubikirye, imun kanye bobuka, uku bisik binamak mutuku, el si Sheol bitinge’ tenen, moropkine.

Mazmur 33:20

Ati ara, nun nirya arye, ‘Nun ni Allah Yahweh arye, melibuka lyelonamsil talak ara, dan talak arye yanuka lyepdopnamsil do?’ tenen, kintinibuka, dinauk unamabe. Winipmanto ara, ninye arye mal olalbalamak talak ara, ‘Yuk nang mal dobikiba, opsilyak’ tenen, kelapye dobuka lelipdakirye, olbalamaka atonun, nun ni koproba Allah arye, nunti melibuka lyesulule.

Mazmur 35:26

Diba na ni Allah, yata nang do nirya, sikce nati, “El ikin weik unmala ara, nunce kanye deipmabe,” nyabuka, akutuninyak nang nirya ara, ‘Ance anang wenebuka opminyopura, sikda kanye teninauk ukirye, alye weik dakanamak’ tenen, moropkine na nio. Tonda na ni Allah, yata nang do nirya, sikce nati, “Anye obuka, nun amu tam kipdeiptibirye, nunuk ara, erepdabirye, amutuku nirya nuncuk talibuka, ninye deiyok nang unamabe,” nyabuka, nati, ‘Lik’ teneninyak nang nirya ara, ‘Ance anang wenebuka opminyopura, sikda alye weik dakikiba, yuk nang nirya eibikirye, anang ati, ‘Dauaplye, sikda pia malye nang uka,’ tenebikirye, ‘Anang ati, tonap si erebuka, kum kinamak’ tenen, moropkine na nio.

Mazmur 37:34

Ati ara, ‘Allah Yahweh elcuk melinamnile,’ tenepmunce, el nyapdeiamsuk yupu, anyuk moubuka talimunce, pia pi dobuka dukdongobuka wininamlulume. Winipmunyopura, Allah arye anggun erebuka deipsiliba, anggunce amutuku nirya talibuka unamlume. Tonda, aminyan talak, Allah arye, sik malye winin ninguk, talibuka wininyak ninye ati, weneplirye opliba, pia kum kipdeipnamle talak ara, anggun asing arye eipnamlume.

Mazmur 6:10

Narye, “Se, na ni Allah, ance melibuka lyepdopnilyame!” nyabuka moronun yupu ara, Yahweh arye akunum kekenulule. Tonda, narye Allah ati moronun ning nirya ara, Yahweh arye akunum kekeplirye, melipnamnile.

Mazmur 62:1

Raja Daud birye, Mazmur mot sekuk. Ara, ‘Allah yupu mot, el si Jedutun lelim nyalamle touk nyanamak’ tenen, sekukce, Allah yupu mot nyana deiyoknye biti, arebuk.

Mazmur 62:5

Sik yu weik nang ara, ‘E, yuk nang arye, aninye deiyok nang ati, ‘Telebe,’ nyabuka, si erebuka kinyaka ati, ‘Aning ara nun likʼ tenen, ‘Ati ateleb nanguk opnamabe,’ tenebikirye, pia tenenauk unyakce, yupu talinyake. Tonda, talye yupu nyana ap, kwinisa don yupu ap ara, sikce, ‘Aning ara, telebe uka,’ tenebikirye, kanye deibuka, pin-pin kanye bonyake. Sik si bambol arye nyakce yupu ara, tenepce arye, kekena teleb yupu nyanyak bukni, dipkoprob sik kanye talima noutam ara, ‘Anang ara, nun pia lik,’ tenebikirye, lik yupu nyanyake.

Mazmur 69:4

Wininilye talak ara, narye, “Na ni Allah, ance na yanuka melipnilyame,” nyabuka, moronmakinibuk, na din korokna, pia sekuka mitang unulule. Tonda, ‘Na ni Allah, dan talak arye, na yanuka melipnamanil do?’ tenen, atalak ara, dipra unmanibuk, na asing uk pia weik dinulule.

Mazmur 69:6

Aning ara, na ni Allah an kele. Na malye wininun ning nirya ara, an dam ton, pia kum duknunune. Tonda, na malye wininun ning nirya ara, na ni Allah, ance dinauk unilyame. Ati, kum duknupkitinye.

Mazmur 71:13

Tonda, deiyok kum upmalibuk, nati, “El malye kibuka ati, opnuyabe,” nyabuka, minin yupu nyaninyak nang nirya ara, ‘Ance anang ati malye kipdeipminyeura, alye dakdanuka unamak’ tenen, moropkine. Tonda, ‘Ance sik yu nang nirya ati, wenebuka opmince, sirya daknalam’ tenen, moropkine na nio. Tonda, aning atonun, yata nang do nirya, sikce nati, ‘Anye malye kibibyak arye, opnamabe,’ tenenyak nang nirya ara, ance wenebuka opminyeura, alye dakdakceba, yuk nang nirya eibikirye, anang ati, yep-yep abikirye, anang deice malye yupu weik nyanamak’ tenen, moropkine.

Yesaya 25:9

Atalak ara, nunda el ‘Naʼ tenen, nang arye, “Anggun nirya dilulume! Dipkoprop Allah Yahweh, elda nun ni koproba Allah ulule. El siuk erenyabe. Minop talak arye, dipdongobuka atalak noutam babye, nunce, ‘Se, Allah atibuk, dan talak yalirye, nunda lepnamsil do?’ tenen, pia dinauk ulamupu bukni, wini talak ara, akunum yale! Dib Koprop el atibuk, ‘Dan talak melilyanamsil do?’ tenen, dilamupu. Bukni, wini talak ara, el akunum yanmasile. Elda, nun Lyena Deiyoknye usulula anya arye, adiparyuk pin-pin kanye bobuka upbibirye, elti, buk si erebibirye, kil-kil asa unamabe. Ara, elce nun akunum lyepsuka atia.” Aning nyanamabe. Kanye deibuka unamaba ara, talye ati kum bukni, Allah Yahweh, el taruk mikip, amutuku dup, Sion mutuku dup deiplirye, nun lyepdopnamsila ati nyapsine!

Yesaya 40:31

Bukni, yatanye do, yata kil do, ninye nirya sik ni koproba Allah Yahweh atibuk, ‘Allah aniryuk melinamsil’ tenen, el uk talibuka unyak ninye ara, diba tenebicopura, narye arepneba, sikda winiryuk mikip dopropnamake. Winiryuk mikip doprobice ninye ara bip maka pol mikip deice arye lakuka erebuka balamle touk, kanam asa aniryuk unamake. Sikda mikip kum daliba, bikbik abuka banamake. Sikce bisik banyak talak ara, sik mikip kum upliba, kisok kum birbir apnamle. Mikip aryuk, talye lukparabuka banamake. Ati ilil una meme. Na Allah Yahweh ati, diba tenenamnulume. Allah arye Israel ninye nirya ati nyabuk.

Yesaya 49:23

Yuk mutuku ninye arye, sik mapu ap, sik kilmapu ap dobuka delilyanganamak talak ara, yuk pera mutuku, sik ninye deiyok kibuka taleamik Raja nang arye, Israel yala ninye sik mapu ati, melibuka kalikinamake. Tonda, aRaja nang sik kilapu, weik deiyok kilapu kibuka ulamik bukni, wini talak ara akilapu arye, Israel yala ninye sik mapu ati, melibuka kalikinamake. Sik yuk mutuku Raja nang ap, sik kilapu ap, sik Israel yala ninye sik amutuku tam uk unamake. Winipsikirye anggun, Israel ninye si erena ati, anggun dam yakirye kanupdongobuka si erenamsiake. Sik yuk mutuku weik deiyok ninye, mambul nang ulamik bukni, wini talak ara, talye ninye uk unamake. Anggun Israel ninye dam yakirye, anggun si erena ati, kisok kanupdongobuka tuku deice mabikiba, anggun yan deice upmalye tuku butbuta sik sitang deice palinamle. Sik ninye deiyok nang arye anggun Israel ninye ati, anggun amu tam ubikirye, si erenamsiake. Aning winipsikca deice arye, anggun Israel ninye ara kel biknamnulume. Ara, na si Allah Yahweh nati kel biknumunce, ‘Se, dipkoprob Allah el dem arye apil dopmasile,’ tenenamnulume. Tonda, ‘Allah elcuk melinamsile,’ tenen, natibuk moropnikirye, na si ereninyak ninye ara, malye kanye kum bonamake. Narye aninye ati, dipkoprob melipnamna anya arye, alye kum dakdanamake.

Yeremia 20:11

Nyaninyak bukni, na ni Allah Yahweh, mikip weiknye umince, nati kalikuka melinilyame. Winipmanto ara, Allah elda, mikip weik yin talinanye atonun ulula ati, ninye nirya arye elti, ilil asa unyake. Aning ati ara, nati, ‘Ikin ning el nong deice delinamabe,’ tenenyak ninye sik nirya ara, mikip kum mitang kipliba, nati kum malye kipnamniyake. Ati, sik aninye arye, ‘Winipnamepe,’ tenenyak ning ara, kum upliba, aning eibikirye, tuba tamubuka tenekirye, pia alye unamle. Tonda, sik alye unamle ning ara, pia aupnamle. Min kum upnamle ati, ninye nirya arye kum lopdeipnamake. Tuba tenenauk unamake.

Ratapan 3:25

Yata ning do nirya, anggunce, Allah elti, ‘Elcuk melinamsilarya,’ tenebuka, el tonok dip tenebuka, tenenauk unyak nang ara, anggunti teleb kilisulule. Tonda, anggun kanye talima noutam, el tonok enyak nang ati ara, elce pia teleb kililule.

Mika 7:7

Sik malye-malye wininyak ninye nirya ara, wininamak bukni, na nabi Mika binyuk ara, aning kum wininamne. Nun ni koproba Allah Yahweh, el tibuk, dib tenenuna ati, ‘Elcuk melibuka lyelonamnile’ tenen, el tibuk dib tenebuka kintinip deibuka dinamne. Winipnirye, Allahuk pia moronamne. Moropnyopura, kekeplirye, lyelonamnile.

Yohanes 15:25

Bukni, aninye arye na batakaninyaka deice arye, minop talak Allah yupu laka nyalamik ninye sekuka deiamik yupu ara, nong akunum laka uple. Minop sekik yupu ara ani. ‘Deiyok kum ubuk bukni, deiyok kum ubuk babye, nati, ‘Nun lik,’ tenelamnike.’ (Mazmur 35:19) “Ayupu aubuk touk, dipkoprop deiyok kum upmal bukni, sik anang arye na Yesus ati, ‘Nun lik,’ tenenyaka deice arye, minop talak nabi nang arye nyalamik ning ara, nong akunum upmale.” Yesus arye nyabuk. Nyabukce, ayupu ton nyabuk.

Roma 8:25

Bukni, nun min kum doprobupu ning ati, ‘Dan talak arepnamsil do?’ tenen, kintinibuka dinauk unamap talak noutamak nirya ara, kanye bokoltona ap, ‘Se,’ tenena ap kum diparyuk, teleb kanye bobuka, batakna kumce, pia talibuka unamabe.