Mazmur 2:1 - Eipomek

¹ Yata ning deiyok ati, ninye ayala-ayala nirya tukwak im sirya, mutuku sirya nirya, talibuka unyak nang nirya arye, ‘Allah ara, nun like,’ tenebuka, talye piluk donyak do? Tonda amutuku-amutuku talibuka, unyak nang arye tenebuka wininyak ning nirya ara, talye-talye urdemuk kibuka wininyake.

Mazmur 2:1 ပူးပေါင်းရင်းမြစ်များ

Mazmur 18:42

Anang ara, na ap, sik ap olanmabu talak ara, sikce, ‘Se, yatanye birye yalirye, melibuka lyepsutu do?’ tenen, an Allah ati morobik bukni, ance sikti, bataknauk winiplume. Diba, na mal olan nang ara, ‘Allah Yahweh arye yanuka melipsutu do?’ tenen, anti weik yupu deice morolamik bukni, an Yahweh ara, anang arye morolamkik yupu pia kum kekelamlume.

Mazmur 21:11

Sik malye winin ninguk talibuka, malye-malye wininyak nang babye, sikce deibikiba, dadeipdanin, banamak nang babye, wenebuka opnirye, kum kipdeipnyopura, tukwak mutuku noutam ara, tonap pia kum elinamabe. Ara, sikce delinamak mapu nirya ara, tukwak mutuku, im sirya, mutuku sirya nirya unamak nang kan-kan noutam, tonok nang babye, pia tuba kam kum unamake. Sik nirya kum daneipnalyame.

Mazmur 46:6

Allah mikip weiknye bira, amutuku noutamak pia aunamla ati, amutuku ara, pia kume kum danamle. Apia upnamle. Ara, beren tam talak babye, Allah arye, amutuku tuba melinamle.

Mazmur 46:7

Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.

Mazmur 57:9

Diba, na kanye talima noutam nirya ara, akunum kintinipnune. Na mot nyan talak lelim nyan ning, el si ara, bung-bung ana gambus ap, kecapi ap, kintinipnirye, mot nyanamne. Nara, mapmanya ani, berekliba, buknye talak ara, keting min kum yanaplye talak arye, na mot nyana ati kintinipnamnarya!

Mazmur 74:23

Tonda, sik yu nang arye, anti, ‘Allah elda nun like,’ tenekinyak nang nirya ara, weik yupu deice arye, malye-malye nyakinyaka ati, aning babye, luba kina meme na nio! Diba anti, ‘Nun like. Tonda, elti, yanipnamabe,’ tenekinyak nang ara, weik yupu arye, tuba-tuba malye nyakinyake. Aning ara, luba kum kipnamlyame na nio! Anang ara, wenebuka opnalame!

Mazmur 83:3

Deiyok ara, wini talak ara, ‘Allah ara, nun pia like,’ tenekinyak nang arye, an mapu koproba, nun Israel yala nang ati, ‘Olbinuyap’ tenen, akunum kintibuka bululamake. Sik anang nirya arye, an Allah ati, ‘Elda nun pia like,’ tenekinyak nang arye, mania kanye bobuka, maknya kintipdakirye, ‘Adiparyuk Israel nang olbinuyabe,’ nyabuka, akunum kintinibuka tikinyake.

Yesaya 8:9

Allah elcuk nyabuk. “Awinipnamle ning ati, mutuku-mutuku nirya, daumunye ninye ara, ayupu kekepmunce, kanye kum deipnamlulume. Anggunce, ‘Ninye olbinamap’ tenen, kanye deibuka, weik yupu nyabuka, kulmana lulamlum bukni, na Allah arye wenebuka opnamsin ati, kanye imun bobuka unamlume. Anggun yuk pera mutuku daumunye ninye ara, kekeplulume. ‘Ninye olbinuyap’ tenen, yin ap, mal ap, ya ap, aning-aning nirya kintinilinamlum bukni, na Allah arye wenebuka opnamsin ati, imun kanye bobuka unamlume. Narye anggun nirya obuka, sirya daknamsine.

Matius 21:38

Dopdeibukba, awa tuku tia talibuka pil dolamik nang dam yanganmokba, eibikce nyabik. “Awa tuku deiyoknye dipliba, el punupnamlanye bira, el mi koprop ayanmala atia. Aning ati ara, nunce el opnamabe. Obibyopura, awa tuku nun damanguk dobuka talipnamabe,” nyabik.

Lukas 18:32

Na yukubuka bobinicopura, Allah arena ati deiyok nang ap, Musa sekamuk yupu peterena deiyok nang ap arye, ‘Opsululume,’ nyabuka, Yahudi yala kum nang amutuku talina ninye deiyok nang ati arepnamniake. Aripnicopura, nong bol deice nalibuka lyek-lyek ana ap, si maka tuluna ap, kama nong deice ona ap, winipnikirye, na nong dobuka wanwanun yo deice arye opnamniyake.

Lukas 22:5

Nyalilbiyukopura, sik anang arye kanye deibikce, pin-pin ubuk ati, “Winipsiminyopura, yo bok weik arye arepnamkiabe,” nyabik.

Rasul 16:22

Nyabikura, talye awekmek nang kekebikce, ‘Sik malye winidurak anyak, dib nyapmasiyak,’ tenebik. Utenebikce, asum nyapmek nang yupu uk sik atalye wekmek ninye babye, Paulus ap, Silas ap, ati nyabik. Nyabik ati, amutuku deiyok nang arye nyabikura, Paulus ap, Silas ap, sik deice ongolamik cang baju kwiliklobikce, sik nong kama arye, kulabuka onmek.

Rasul 5:33

Nyabikopura, ayupu kekenmek nang nirya arye, yu weik ubukura, ‘Anang opnamabe,’ tenebik.

Wahyu 17:14

“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.