‘Aning-aning wininamsine,’ nyapmakin yupu nirya ara, talye ati kum wininamne. Deiyok ara, an ni koproba Abraham bira, narye, ‘Aning winipnamlyame, aning ara, kum winipnamlyame,’ nyapdeiamse yupu ap, ‘Aning winina mem, aning winina telebe,’ nyalilamse yupu ara, an ni Abraham bira, ayupu nirya moubuka kekelamukce, talibuka dobolbalamuk. Na yupu ara, kum yaniptamnuke. Ati, el mi anti weika arye melinamkine,” Allah arye, Isak biti nyabuk.
Mazmur 19:8 - Eipomek8 Allah Yahweh arye, ‘Wininamlulume,’ nyapdeiamsuk yupu nirya ara, diksukum winina ati, nyapdeiamsuke. Anyapdeipsuk ning ara, dipkoprop, aning moubuka kekebipyopura, nun kanye talima pum tam arye, weik kanye delinamabe. Allah Yahweh arye, “Wininamlulume. Aning ara, pia kum wininamlulume,” nyapdeiamsuk yupu ara, dirina kilina deiyok ning ulula ati ara, ayupu moubuka diba tenebibyopura, nun kanye talima pum tam, dirin kilinamsile. Tonda, aning-aning nirya eibibirye, ‘Teleb ning ani, malye ning ani’ tenen, teleb kibuka, kel kinamabe. အခန်းကိုကြည့်ပါ။ |
Mazmur 19:8
44 ပူးပေါင်းရင်းမြစ်များ
Tonda, na Allah Yahweh arye anggunti, “Aning ara, wininamlume, aning ara, pia kum wininamlume,” nyapdeiamsise. Keil pala deice arye, sekuka deiamse yupu ap, tonda, narye, “Na ap, anggun ap, neika teleb ubuka una ati ara, winibuka-winibuka unamlume,” nyalin yupu deice arye, nyapsise yupu ap, tonda, “Na si erena ati, pil donamlum ning ara, winibuka-winibuka apil donamlume,” nyapdeamsise yupu ap nirya ara, anggunce moubuka talepmunce, aninguk dukdongobuka wininamlume. Ayupu nirya ara, batakna meme. Yuk isa si ton, pia kum erenamlume.
Lewi yala nang arye nyabikopura, Israel ninye nirya kekebikce, abulupmeka batakuka, sik yuk-yuk bindobik. Bindobikce, teleb din ning ap, mek ap dilbiyik. Tonda, ateleb din ning kum kintinipmek nang ati, ton tam bokuka arelbanmek. Winipmekce, teleb kanye bobuka, pin-pin asa arye, Allah el si erelamik. Teleb kanye bobuka unmeka deiyok ara, sik Lewi yala nang arye, Allah nyalamuk yupu yinibuka, deiyok ning lak kibuka lak nyanmekba, Israel ninye nirya arye, ‘Deiyok ani’ tenen, akunum kel bikmeka ati, pia teleb kanye deibuka unmek.
Tonda, an im deice arye koulukuka, Sinai mutuku deice tikilyanmalumce, Israel ninye kekenak ati nyapdeiamlume. Atalak arye, ance, “Aning ara wininamlume, aning ara kum wininamlume,” nyabuka, im deice arye diksukum yupu uk nyapdeiamsulume. Anyapdeiamsulum yupu nirya ara, dipkoprob teleb yupu uk ulule.
Allah Yahweh arye, amambul pil dolamuk ning nirya ara, urdem ati kum pil dolamuk. Deiyok ara ani. Ara, winipniba, kel bikikirye, “Aning ara, wininamlulume. Aning ara, kum wininamlulume,” nyapdeiamse yupu nirya ara, ‘Dib nyamsuke,’ tenebikirye, ‘Aninguk talibuka dukdongobuka wininamak’ tenen, apil dolamuk. Ati ara, ninye nirya arye Allah ati, ‘Se, anda pia teleb ulyame,’ nyabuka, el siuk erenamlume. Daud arye nyabuk.
Allah, el taruk arye, pil dolul ning nirya ara, pia dipkoprob piluk dolule. Ara, elce, “Aning ara, wininamlume. Aning ara, pia kum wininamlume,” nyapdeiamsuk yupu nyamuk touk, diksukumuk pil dolule. Tonda, elce nun tukwak nang nirya ati, ‘Anye bira, na ka bukni, anye bira kume,’ tenena deice arye, kum wilosule. Aning kum bukni, pia diksukum kibuka, pil dosulule. Allah arye, “Aning ara, wininamlume. Aning ara, pia kum wininamlume,” nyalisulul yupu nirya ara, talye yupu pia kum nyalule. Ayupu nirya, nong upnamle. Allah arye nyalul yupu nirya ara, pia dipkoprob yupu nyasulule ati, aning nirya ati, ‘Diba,’ teneptibye.
Aning ati ara, na kam unamne talak nirya ara, ance, “Winibuka wininamlume. Aning ara, pia kum wininamlulume. Teleb winina ara, ani,” nyabuka, nyalisiminye touk, na babye, ‘Ayupu ara, pia dipkoprob teleb yupu,’ tenenirye, aninguk talibuka wininamne. Tonda, malye winin ning ayala-yala nirya ap, malye wininyak ninye arye, malye wininyaka ap ati, ‘Na like,’ tenebuka unamne.
Allah ance nyapdeiamsulum yupu ara, pia duknuna yupu atonun unulul bukni, ance kel bikna deiyok ning, areniminya deice arye, an dirina ara, na talima noutamak arye, laka kiliniliba, kel bikinune. Mince kum kel kipmanto ulamse ning ara, an yupu deice arye, dirina areniminya deice arye, ‘Deiyok anya’ tenen, moubuka bikinune. Tonda, aning-aning nirya kum kel bikamik nang daukirye, ‘Ayupu ara, deiyok dan do?’ tenen, tuba walwal ulul ninye ati ara, an nyasiminye yupu deice arye, laka kipdeipminba, an duknuna yupu nirya ara, sikce moubuka kel kipnamake.
Winibuka unamne talak nirya ara, na kanye deipnirye ance, “Aning ara, wininamlulume. Aning ara, pia kum wininamlulume,” nyalisilyam yupu uk, talibuka dobolbanamne. Winipmanto ara, ninye arye, ‘Ara, weik mambul ning’ tenen, sik ‘Na’ tenen ning ati, moubuka talilamak touk, narye anyapdeiamsulum yupu nirya ara, pia talibuka wininamne.
Ati ance, “Aning ara winina kume, aning ara winina telebe,” nyapdeiamsulum yupu noutamak nirya ara, na kel bikna yupu uk ulule. Winiplirye, na kanye talima noutamak nirya, teleb kilinulule. Narye, ‘Se, yata winiptinye do?’ tenen, teniltonauk unilye talak noutamak nirya ara, ance nyasiminye yupu deice arye, ‘E teleb winipnin banamne bisik ara, ani,’ tenebuka bikinune.
Dipkoprop ance, “Winibuka unamlulume. Teleb winina ara, ani,” nyabuka, nyalisilyam yupu nirya ati ara, pia pataniliba, ayupu ati narye, pia kanye delinune. Ati ara, malye ning tonok ning babye talibuka kum winimince, anda pia diksukumnye winilyama anya arye, ance nati winiryuk kam un ning arenamnilam deice arye, ‘Kam pia unamne’ tenen, morokunune.
Na kanye talima nirya, an deiceuk deipnirye, ance, “Aning wininamlulume. Teleb winina ara ani,” nyalisiminye yupu nirya ara, ‘Moubuka kekepnirye, diksukumuk wininamne’ tenen, moropkine. Tonda, malye winin ning, pia kum winipnyopura, yuk ninye eipnikirye, “El malye winibuk ning ara ani,” nyabuka, ‘Malye yupu, na deice nyapmanto kum unamake’ tenen, moropkine. ‘Winibuka melipnutumba, telebuk winitinyopura, narye ilil uniliba, alye pia kum dakdanamne’ tenen, moropkine na ni Allah.
Tonda, na imun kanye bobuka, ulamse talak noutamak arye, ikin arye dipmatinye bukni, an yupu meliamnuka deice arye, kum dipse. Deiyok ara, kam unye talak nirya ara, na kanye deipnirye ance, “Aning ara, wininalulume. Aning ara, pia kum wininamlulume. Teleb winina ara, ani,” nyalisilyam yupu nirya talinirye, na kanye talima nirya telebuk uliniliba, kanye deibuka, ayupu dobolbanune.
Ati, nun ni Allah Yahweh arye tenebuka nyasulule. Ara, yu nang arye, sik bona kum ati talye kankan nang ati, yaniltaknauk unyake. Winikirye, ikin ning pia weik arye bobuka, sik nong deice delinyaka ati, sik talye kankan nang arye, ngalukuka engenyake. Aning ati ara, na Allah Yahweh, minop tiknirye, sik akankan nang ati, melilyanamne. Sik talye kankan nang arye, ‘Se, nun ni Allah lyepsuturye, pia telebak deipsutuba, talye urdem uptibye,’’ nyabuka, ikin kanye bobuka, ukirye morolamak nang atonun kibuka, dipkoprob anggun dam yanuka lyepropsinirye, ninye yanuka kum opmanto sukum dobuka deipnamsine!
Se na nio, yata barye wala ton kunum uplyeura, na talima pum tam aryuk, ‘Yata wiriptinye deice arye, na ikin unilye ning ati, kum daneipnutum do? Aning winiptinye do, kum do?’ tenen, naryuk teniltonauk unamne do? Ara, beren tam talak arye dipdongobuka, keting noutam nirya ara, ikin kanye bopnirye, na kanye pum noutam arye, pia engenauk unamne do?
Tonda, sik babye Israel ninye sik mamun yu upliba, yupu deice arye walanamak ning nirya babye, na dam yakirye, lake nyabikiba, narye, ‘Aning ara, wininamlume, aning ara, pia kum wininamlume,’ nyabuka, yupu lipsisikuka bokolinune. Tonda Allah arye, ‘Aning ara, wininamlume, aning ara, pia kum wininamlume,’ nyabuka, el mem yupu nyapdeipsuk ninguk, narye, sik aninye kekenak lake nyalinune,” Musa birye, el yamal Yitro biti, laka nyabuk.
Anyapmasina ara, talye ati kume. Deiyok ara, pia weik kel bikna deiyok ning ara, Allah Yahweh elcuk aresulule. Winibuka arisilye ning ara, ‘Teleb una ani, malye winina ani’ tenen, moubuka kel bikna deiyok ning aresulule. Elce kel bikna deiyok ning ap, moubuka tenena deiyok ning ap, ninye nong deice arisiliba, dib tenebuka kel kinyabe.
Allah ance nyalisilyam yupu nirya ara, pia dipkoprob uk ulule. Tonok yupu babye, tilila yupu ton kum ulule. Yata mutuku ninye do nirya, anggunce, ‘Allah aryuk melibuka kalikinamsile. Nun mal olan nang arye opsicak’ tenen, nun melina ati, Allah aryuk aninye ati, obuka bisipnamle. Ati ara, ninye mutuku-mutuku nirya, Allah an damuk, bulubuka wekelyanganyake.
Ati ara, wisi nang arye, ‘Winibuka unamlulume,’ nyalilamsik yupu ara, weisa ubikiba dirina ulamle touk, wisi nang arye nyalilamsik yupu ati, moubuka tenemunce, ‘Teleb un bisik ani,’ tenebuka, kel bikinamlulume. Tonda, wenen deice arye peteresinyak yupu ara, ‘Diksukum kam un bisikuk bakirye, malye kum unamak’ tenen, peteresinyake. Ayupu moubuka kekepmunyopura, pia telebuk unamlume.
Sikce Allah an nyapsulum touk diba tenebikirye, kanye deibuka an yupu moubuka talibuka diksukumuk unyak nang ati, ance melibuka yangasilyame. Bukni, Allah ance, ‘Wininamake, aning ara kum wininamake,’ tenesiminye ning ara, nunce, ‘Nun lik’ tenen, an yupu yanilamuburye malyeuk ulamupuba, an yu ulamkuke. Winibuka yu ulamkuka anya arye, nun wenena ati ikin ning weik nun deice delilamsulume. Nunda, pia malye un ninye unyaba ati, wini talak ara, yata wiribuka lyepsutumce, ila tamubuka teleb kipdeipsutum do?
Na ni Allah an kele. Ance, nati nyapnulum yupu nirya ara, akunum kekebuka dolonune. Ance nyanilyam yupu ara, pia talinune anya arye, na pia kanye teleb upnile. Ance nyanilyam yupu kekepnirye, ayupu ati, pin-pina asa arye unune. Na ni koproba Allah Yahweh, aning-aning nirya ap, im deice yin talin malaikat ap, nirya talibuka, sik weik deiyoknye ulyame. Winilyame ati, nara, an mi unune. Ati, yuk nang arye, nati, ‘Anye bira, Allah el amu tam pil donanye ulule,’ nyaninyake.
Winibuka teleb kipdeipsiniba, na yupu kekebuka diba tenepmunce, na amu tamuk unamlume. Ara, na Dib Kanye anggun talima pum tam dongopnamsine. Dongopsinyopura, na Dib Kanye melipsilya deice arye, anggunce, ‘Se, nun ni koproba, Allah arye nyasilye yupu nirya, moubuka kekepnamabe.’ Allah arye, ‘Wininamlulume. Aning ara, kum wininamlulume,’ nyapdeipsilye yupu, ‘Pia moubuka dobolbanamabe’ tenen, kanye lamapdongobuka, telebuk unamlume.
Aning ati ara, yata ninye do nirya ati, Allah arye, “Aning wininamlulume, aning ara kum wininamlulume,” nyabuka, mem yupu areamsukba, ayupu talibuka dobolbabirye, diksukumuk winibibyopura, adeice Allah arye nunti, ‘Sikda teleb nang,’ kum tenenamsile. Nun babye mikip deice arye, diksukumuk kum winiptibya ati nyapne. Aning kum bukni, Allah el yupu kekebuka kel kinyaba deice arye, ‘Se, nunda dipkoprop kanye talima malye nanguk unyabe’ tenen, moubuka kel kinyabe.
Yuk nang arye, “Musa sekamuk mem yupu talyamupa deice arye malye winin nang kipdeipsuka ati, Allah arye mem yupu nyapsuk ning ara, malye yupu ulule,” nyapting do? Kume, aning kum nyapsitinge. Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu, kum uamtu toura, yata yupu deice arye, ‘Malye winin deiyok ning ara ani,’ tenebuka kekeptibirye, kel biktibye do? Musa birye sekamuk mem yupu deice arye, ‘Malye winin ning ara ani,’ tenen kel kiyamupe. Winipmanto ara, Musa sekamuk yupu noutamak arye ayupu ton aulule. ‘Yuk nang sik talinyak ning ap, sik wininyak ning ap ati, ‘Se, naryuk taliptinye’ tenen, patasiliba kanye talima engena pia meme.’ (Keluaran 20:17) Bukni, ayupu kum wamtopura, yata ning deice arye, ‘Aning ara malye’ tenen, kel kiyamtibye do? Kume, aning nirya babye min kel kiyamtibye.
Winipsa deiyok ara, ‘Musa sekamuk yupu talibuka dobolbanamne,’ tenepsirye, pia pi dobuka piripdemse bukni, adeice ara, akunum diamne nang atonun ulamse. ‘Ayupu nirya ara kum winipmanto ulamse ati, adeice arye Allah arye nati kanye kum deipnuturye, diksukumnye ubuka kum kipdeipnutue’ tenen, kel bikamse. Musa sekeiyamsuk yupu bataksirye, wini talak ara, ‘Allah eltibuk diba tenebuka unamne’ tenen, unune.
Ura, minyuma talak ara, Allah arye Musa ati nyalin yupu aribuk bukni, aminyan talak ara, Musa biti mem yupu ton tabakuka aribuk. Winibuka anya arye, Musa sekamuk yupu mem yupu ara, ‘Allah arye minyuma talak nyalilamuk yupu ati, yanina atonun ulul do? Musa sekamuk mem yupu ara, Allah arye nyalilamuk ning yupu sekelul do, tenepmunyak’ tenen, ayupu ton laka nyapnusine. Aning ara, tenena kume. Musa sekamuk yupu, mem yupu akunum arepsikcopura, aning moubuka kekebibirye, tonok ning babye batakna kum arye, dobolbatibiba, adeice arye kam pia una deiyok ning akunum dopropmatibyetoura, pia diksukum un ninye akunum ulamtibye. Bukni, nun kele. Mem yupu talibuka dobolbanyaba deice arye, diksukum un ninye kum kipsutue. Tukwak mutuku unyap ninye nirya ara, diksukumuk kum unyabe.
Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.
Akwalya kwalibuka dinamlum talak nirya ara, anggun ap, anggun mapu ap, anggun kilmapu ap, anggun pil don nang ap, pil don kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye ap, tonda yuwak kilapu ap, sik nin ap, sik ni ap akunum dibikba, kwaknamne mapu ap, kwangnamne nang ap, anggun nirya arye, teleb kanye uk bobuka ulamunce, kil-kil asa arye, neika unamlume. Anggun nirya arye, neika akwalina kwalibuka dinamlume.
ကြော်ငြာတွေ