Mazmur 18:18 - Eipomek

¹⁸ Diba, pia mikip weik nang arye, ‘Anye opnuyap’ tenen, na dam ona ati, piripnikba, na akunum dipmanto wamse bukni, Allah arye anang kan-kan arye, melibuka lyepnuke. Ayu nang arye nati, ‘Anye nun lik ati, adiparyuk opnuyabe,’ tenepnarye, na dam yanuka opnunik bukni, Allah arye sik dam arye, nati melibuka lyepnuke. Diba, na mal olan nang ara, pia mikip weik ulamika ati, nara mitangnye ulamsa ati, lepdanmanto kum wamse buk, Allah aryuk lyepnuke.

Mazmur 18:18 ပူးပေါင်းရင်းမြစ်များ

2 Samuel 22:1

Allah el si Yahweh arye, Raja Daud biti, akunum lyebukopura, Daud kanye delin mot senmok. Aning ara, urdem ati kume, ‘Daud optinye’ tenen, el oldan nang nirya ap, Saul ap arye, Daud dobolamikce, opterelamik bukni, Allah arye meliamukba, kum omika ati, Raja Daud birye, ayupu mot deice arye sebukce, Allah el si erebuk.

2 Samuel 22:19

Ayu nang ara, sikce nati, ‘Talye mangkau arye optibye’ tenen, dobolkiriklamnikce, pirilamnikba, ikin pia weik ulamse bukni, Allah el si Yahweh arye, nati, pia melilamnukce, lyepnuke. Na talima kwa dipnuke.

Mazmur 119:56

Minop talak arye diprongobuka, wini talak babye, ance, “Aning ara, wininalulume. Aning ara, pia kum wininamlulume. Teleb winina ara, ani,” nyaiyalum yupu nirya, ayupu uk talibuka wininune.

Mazmur 138:7

Na kele, pia ikin uniliba, imun kanye bobuka, unye talak babye, ance nati kalekuka melinilyame. Melinilyama deice arye, na mal olan nang arye, yu weik upliba, ‘Anye nun lik ati, opnuyabe,’ tenepnitinga babye, sikce kum opnamniake. Deiyok ara ani. Allah an sirik tam mikip weik ukulul taruk arye, lopdeipnimince, lyelonilyame. Ati, na mal olan nang arye, kum opnitinge.

Mazmur 46:11

Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.

Mazmur 59:16

Sik amalye unyak nang arye, ‘Yata kwaning ton ubula doproptibirye, din diptibye,’ tenen, nun mutuku noutam dana-dana tam nirya epra banyake. Din ning eibikirye, dobuka dinyak bukni, pia kum bouplirye, tuba pataplyopura, yu yupu deice arye, mur-mur abikirye dinyake.

Yeremia 18:17

Winipmanto ara, keting yangan tam arye, kumanya yangalirye, pu abuka, sung-sunga bobuka balamle touk, na mapu Israel ninye, sik on talak dam uplyopura, narye dobuka, sik oldan nang dam deipnamne. Winipnirye, ‘Aninye ara, daopnyake’ tenen, donga anipnamne. Winipnamne talak ara, sik aninye kum melinamne. Sik wenena ati, sik nong deice ikin ning weik deipnirye, kanye imun ning arepnamsin talak ara, anggun ton kum eipnamsine,” Allah arye nyabuk.

Zakaria 1:15

Tonda, nara sik yuk-yuk mutuku nang, pia dakeiam asa arye, nimalyap asa mutuku-mutuku nirya unyak nang nirya ara, ‘Nunda pia telebe,’ tenen, maknya kintinibuka, kwalinyaka ati, narye sikti, pia lik ubuka, malye kanye bopse. Deiyok ara, mince na mapu koproba, sik Israel nang arye malye winilamik ning ati, na mitik tonun talima noutam yu upnukba, ‘Anang wenepnamne,’ tenepse bukni, nati diba kum teneninyak nang, yuk-yuk mutuku unyak nang arye, na mapu koproba Israel nang ati, pia weik tonun yu ubukba, ikin ning pia weik tonun dobuka, sik nong deice delilamik. Na mapu koproba deice arye, kanye imun weik ning, pia weik tonun boyanuka delilamika ati, narye sikti, malye kanye bonune. Ati, anang wenepnamnarya!

Ulangan 32:35

Wininyak nang, sik menenga ara, na Allah arye, sik malye pil donyak atonun kiklibuka, weik arye wenepneba, sik weik imun kanye bobuka unamake. Ninye kot dam arye, sakuka olamle atonun, sik malye winilamaka ati, aminyan talak, narye anang ati, wenepnamne. Sik anang on talak ara, akunum dam upmale. Anang opnirye, sirya daknamne talak ara, minopce yanamle, akunum dam kipmale. Allah arye nyabuk.

1 Samuel 30:6

Aning nirya winipmekba, Daud el melina nang, sik yin talin nang ara, weik kanye ikin ubukce, ‘Se, nun kilapu ap, nun mapu kilmapu nirya ap, Amalek nang arye, akunum dobuka bobinmake. Winipmasiaka ati ara, nun deiyoknye Daud biti, keil dobuka, opnuyap do?’ teninmek. Utenebikba, Daud birye, ‘Se, yata wiriptinye do?’ tenen, tenipdeyukce, ikin kanye bobuk. Bukni, Allah el si Yahweh arye talima pum tam mikip arebuk deice arye, Daud el talima melibukba, Daud el mikip tuba ubuk.