Mazmur 16:5 - Eipomek

⁵ Na ni Allah Yahweh, aminyan talak teleb upnamnile ning ara, ancuk arenamnilama ati, an siuk erenamne. Na wininun ning ap, talinun ning ap nirya ara, ancuk kalikinilyame. Ati an siuk erenamne.

Mazmur 16:5 ပူးပေါင်းရင်းမြစ်များ

Mazmur 11:6

Ati, sik malye-malyeuk wininyak nang ara, sik nong deice, kanye ikin weik un ning arepnamle. Ati, sik tuba kam unamak talak nirya ara, sik dengna ati, pia ikin ning arenamle. Winipmanto ara, keting buppu weik deiplirye, aning-aning nirya silal lelamle touk, sikti, weik tonun wenepnamlarya!

Mazmur 116:13

Allah ance ninye lyena ati, teleb yupu nyapdeiplum ning ara, narye, ‘Yuk nang kekebikirye, dib tenenamak’ tenen, pia laka nyabuka peterenamne. Tonda, ‘Allah ance pia melipnamnilam’ tenen, an siuk kibuka moronamkine.

Mazmur 119:57

Diba, na ni Allah Yahweh, na kam tuba unamne talak nirya ara, antibuk tenepnirye, pia talibuka unamne. Ance, “Wininamlulume,” nyapdeiamsulum yupu nirya ati, pia tenepnirye, ayupu uk talibuka wininamne, nyapkine.

Mazmur 125:3

Tonda, anggun ninye deiyok nang ara, sik pia malye wininyak Raja-Raja nang nirya babye, pia asukumuk, sik kama talibuka, kum unamake. Ara, Allah arye, “Na yupu uk talibikirye, pia diksukumuk wininyak nang ati, ‘Amutuku tuku ara, arenamsine,’ nyabuka, nyalin yupu deice arye, akunum nyabuka arepsuka atia. Ati ara, nuncuk, amutuku tuku pia talinamabe. Amutuku arepnamsila deiyok ara, ‘Amutuku dobuka, sik diksukum wininyak nang, kum areplyopura, sikce teleb winin ning ap, na yupu ap yanipnikirye, ‘Malye winin ninguk wininamap’ tenen, sik taruk bibikikirye, ‘Malye winin ninguk, talibuka wininamabe,’ tenenyaka ati, nyapne.

Mazmur 132:11

Min talak ara, Allah Yahweh, ance nun deiyoknye Daud biti, nyalin yupu deice arye, “Pia dipkoprob, ninye deiyok talibuka un ning ara, arepkinirye, erepdeipnamkin,” nyabuka, nyalin yupu deice arye, akunum nyapdeiamlume. Allah ance, anyalin yupu deice arye, akunum nyapdeialum ati, aning ara, pia kum bataknamlame. Allah ance ayupu ton nyaplume. “Daud ance deipnalam mapu kan-kan arye, Israel yala nang, anggun ninye deiyoknye raja kina ati, ninye ton, pia wipdeipnamne.” Tonda, Daud ance biknulyame, Israel yala ninye deiyoknye kina ati, weik teleb bun ning, el si takhta deice ara, ance deipnalam mapu kankan arye, tonoknye ton wipdeipnyeba, atakhta deice buklirye, Israel yala nang nirya talinamle.

Mazmur 142:5

‘Yatanye birye yanuka melipnamnil do?’ tenen, na diksukumuk wininirye, anti pia dinauk unune. Aning nirya ara, patapniliba, pia dinauk unun bukni, na melipmantonye ton, na dam pia kum ulule. ‘Yu nang arye opnikca’ tenen, na duknupmanto babye, pia kum ulule. Tonda, na tam nang babye, yuk mutuku daunyak nang babye, nati, bico tenepnikirye, kum melinamsile.

Mazmur 2:6

Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.

Mazmur 23:5

Tonda, na mal olan nang wekuka dinmacak arye, Allah ance na patan ning nirya, weika arye arenilyame. Winipmanto ara, weik kwalya kwalipmince, nati arenilyame. Ara, weik mambul nang yukubikceba, din ning weika arye dilyangalamk touk, wininiminyeba, na mal olan nang eibikirye, ‘Se’ tenen, unamake. Tonda, ninye arye, ‘Anye nun ninye deiyok kibuka unamsil’ tenen, pia teleb minyak mek, anye el kisok deice likeibiceba, anye ninye deiyoknye Raja ulamle touk, ance pia teleb kibuka kipdeipniminba, pia telebuk unune. Ati ara, yata ning do nirya, na patanilye touk, weika arye tabakuka areniminyeba, na dam yanganiliba, kanye deibuka telebuk unune.

Mazmur 73:26

Na nong ap, kanye tenen ning ap nirya ara, mitanguk upra balirye, aminyan talak kum uamnilya babye, na ni Allah ancuk, na talima pum tam mikip kilinilyame. Diba na ni Allah, ancuk kalikuka dinememce, wini talak arye doryanamle talak nirya, pia ati lyelonamnilame. Ati ara, yuk ning kum bukni, an tonok pataniliba, unune.

Mazmur 89:4

Ance nyapdeiamsulum yupu ara, nun apu koproba Daud binyak, ance wipdeiamlumnye, elti, nyapdeiamlume. Ance nyapdeiamlume. “Narye wipdeipsinye, na amu tam pil dolulnye Daud biti, pia kalikuka melinamne,” nyabuka, nyalin yupu nyapdeiamlume.

Mazmur 9:4

Na mal olan nang arye, olyangalamnik talak ara, sik ilil ubukba, tuba tamubuka, bikbik abuka bindobik. An Allah arye, na mal olan nang ati opminye talak ara, bisik noutamuk banmakiba, yan dum dukliba, sakuka poulbikirye, an dam adiparyuk dibinyake.

Yesaya 42:1

Allah el si Yahweh arye nyabuk. Anggun nirya dilulume. Na amu tam ulirye, na mambul pil donamlanye bira, anggun kel bikna ati, erepdeipsine. Narye anye pia melibuka talinamne. Narye anye wibuka deiamsa ati, elti, ara, pia kanye delinamne. Na wiamsinye bira, na Dib Kanye weika arye el deice delinamne. Winipnyopura, elce sik tukwak ninye ayala-ayala nirya ati, diksukum kibuka yupu lipsisikuka bokolinamle. Winiplyopura, sik ikin weik ulamik ning kum kipdeiplirye, ninye weika arye teleb kilinamle. Winipliba, sikda kanye deibuka telebuk unamake.

Yesaya 53:12

El kanye aryuk el nong ap, el kam una ap, ninye malye winina ati talye arepsuk. Ninye mutuku-mutuku nirya, sik malye wininyak ning dobuka, el nong deice deipdayuk. Winibuka ati, na Allah arye, elti, erepdeipniba, pia weik mambulnye unamle. Mikip weik nang ap, weik mambul pil donyak nang ap ati, ninye nirya si erelamak touk, el tibuk, el si erebuka kinamake. Tonda, mikip nang arye, yuk mutuku nang ati obisibikirye, sik talilamikce ning dalubuka dololamak touk, na Allah arye elti, pia teleb ning weika tonun arenamne. Elda telebnye ulamukba, el ap ulamik nang arye elti, ‘Elda malye wininanye,’ nyabuka, el nong deice malye yupu nyalilamike. Elda, ‘Allah arye malye wininyak ninye, namin kipnamle’ tenen, morolamuk. Morolamukce, sik malye wininyak ning ara, el nong deice dobuka deipdayuk. Ati, na Allah arye na pil donanye biti, dekna arepneba, weik mambulnye unamle. Ninye nirya arye el tibuk kinamake.

Yeremia 10:16

Allah el si Yahweh arye, aning-aning nirya kwepdeibuka Deirina Deiyoknye ulule. Allah arye sik Israel yala nang nirya ati, nyabuk. “Yakub birye deibukba, deipdanin balamik nang nirya ara, ‘Naʼ tenen, nanguk unamake. Na mapu koproba unamak tenen, wipdeiamse,” nyabuk. Allah Yahweh, el si ara, “Im deice unyak yin talin malaikat nirya ara, sik deiyoknye ulule,” nyabuka nyanyabe.

Ratapan 3:24

Aning ati ara, na kanye noutam ning ara, utenebuka nyanune, “Allah Yahweh, elda na ni koproba Allah unulula ati, yuk ning ton kum patanulule. ‘Elcuk, pia melinamnilarya,’ tenenuna ati, el deiceuk na kanye talima nirya ara deipnamne,” nyanune.

Rasul 2:32

Yesus dibuk bukni, el li Allah arye Yesus erebuka kam bukibuk ak, nun nirya eibupe.

Rasul 5:31

Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.

1 Korintus 15:25

Ara, Kristus arye, aning-aning nirya deice tam ulirye, aning-aning nirya talibuka daulamlya ani, sikce, ‘Yesus ara, nun like’ tenen, elti, yaninyak ning ap, yaninyak ninye nirya ap ara, obisiblirye, malye kipnamle. Malye kibuka bisiplyoura, malye deiyok nang nirya kum kipdeiplyopura, Allah arye, aning nirya dobuka, Yesus el amu tam deipliba, Yesus arye, aning nirya yanipnamle. Aning nirya akunum winiplya deice arye, Yesus el talilye ning nirya dobuka, el Li Koprop Allah ati arepnamle. Aning nirya ara, el li Allah ati arepnamla anya arye, minopce apil nirya donamle.

Efesus 5:18

Ara, kanye wangalamak mek dibikcopura, sik kanye wangabikiba, talye yolana ap, malye-malye winina ap, wininyaka anya arye, mek dibibyeba, kanye wangapsiliba malye winina ara, meme. Aning kum wininamlum bukni, Allah El Dib Kanye arepsukbuk, nun kanye talima wekuka usilinye birye, ‘Allah El Dib Kanye arye, nun kanye talima talisilye deice arye, el mikip kipdeipnamsile’ tenen, el amutamuk unamlulume.

Ulangan 18:2

Narye yuk yala Israel ninye nirya ati, sik wa win tuku ap, yuk ayala-ayala ning nirya ap, bokuka arepnamne. Bukni, sik Lewi yala nang ati ara, aning-aning nirya bokuka, kum arenamne. Na Allah Yahweh aniryuk, sik Lewi yala nang ati, kalikuka melinamne. Sik patan ning nirya ara, na deice aryuk dolonamake. Ara, na Allah arye, sik Lewi yala nang ati, ‘Naryuk anggun patan ning kintinibuka arenamsine,’ nyabuka, nyalilamse atonun wininamake.

Ulangan 32:9

Ura, Allah arye awinibuk ning deiyok ara, el mambul tenelye ning ara, elce wibuka meliamuk ninye uka. Allah el ‘Naʼ tenen ning ara, Yakub elce deibuka, dadeipdanin balamik ninye diamuk. Ara, Israel yala nang ara, Allah elce wipdeibuk nang uka.

Yosua 22:25

Tonda, Ruben yala nang ap, Gad yala nang ap, tonda Manasye yala nang bukni, Yordan mek koubuka, keting panalyangan tam unamik nang arye, sik kayapu nang, Israel nang, yuk yala nang nirya, sik ninye deiyok nang ati nyabik. “Dipdelulume, Allah Yahweh, elce nun nirya ati, mutuku wilinak ara, Yordan mek noutam balulbuk, anggunda, otam keting panalyangan tam mutuku arepsuke. Anggunda, atam mutuku, keting kumulban tam mutuku ululume. Yordan mek ara, noutam wilipsuka deiyok ara, ‘Sik mining mamun aryuk opdakirye, bokdacakʼ tenen, Yordan mek noutam wilipsuke. Ati, anggun Israel yala nang arye, Israel nang nun Gad yala nang ap, Ruben yala nang ap, Manasye yala nang bukni, dana tam nang ap ati, anggunce kum nyapsutume. ‘Anggunda, dipkoprob Allah ap, neika yupu kum nyalulum nang arye, amesba dopmalume?’ nyabuka, kum wenepsutume. Bukni, aminyan winipnamle ning ara, dipkoprob nun kele. Ara, doyanamle talak ara, anggun mapu arye, nun mapu ati, ‘Anggunda, Allah el si erena kume. Anggunda, dipkoprob nun yala nang koproba kum ululume. Anggunda, Allah Yahweh, el mapu koproba kum ululume,’ nyabuka, yupu seknamake.

Yosua 22:27

Ara, anggun ap, anggunce deipnalum mapu ap arye, nunce deipnamap mapu ati, “Anggunda, Allah el si erena meme. Anggunda, dipkoprob nun yala nang koproba kum ululume,” nyabuka, ‘Yupu seksumunyakʼ tenena ati, amesba asukumuk deipmabe. Nunce, amesba memedeipmap ning deiyok ara, ‘Nun ap, anggun ap, nun nirya nang arye, nun bikina ap aning ati, winyamikeʼ tenena ap ati, amesba memepdeipmabe. Amesba deipmaba deice arye, nun deipnamap mapu ap, anggun deipnalum mapu ap arye, ‘Aning bikikirye kum uapdanamakʼ tenen, winipmabe. Talye ning ati kum winipmabe. Ara, nun Gad yala nang ap, Ruben yala nang ap, Manasye yala nang bukni, dana tam nang, sik keting panalyangan tam unamik nang ap, dipkoprob nun ni koproba, Allah Yahweh, el si erena ati, teleb arin ning ara, el dam deiliyanga birye, el siuk erenyabe. Nun babye, Allah el si eren asik wekibirye, el si erena ap, el arena ati, teleb ning arin pil donyabe. Tonda, nun malye unyap ning, ‘Biksilirye, aning nirya kum kipdeipturye, nun lyepsutuʼ tenen, kam ning opnarye, mesba deice uku danyabe. Tonda, ‘Allah ap, nun ap, teleb kibuka, neika ubirye, teleb kanye bobuka unamapʼ tenen, teleb ning ton, Allah ati arinyabe. Awininyab ning nirya ara, doyanamle talak ara, anggunce deipnalum mapu arye, nunce deipnamap mapu nirya ati, “Anggunda, Allah Yahweh, el si erena kume. Anggunda, dipkoprob nun yala nang koproba kum ululume,” nyabuka, yupu kum seknamsiyake. Amesba memepmaba deice arye, lake kin ning aupnamla anya arye, ayupu ara, kum nyapnamake.