Mazmur 16:11 - Eipomek

¹¹ Tonda, Allah ancuk pia kam una ati, diksukum bisik peterepnilyamura, biknune. Winipniminyopura, an damuk yanirye, pia kanye deibuka unamne. Winipniba, an sirik tam dam unun talak nirya, pin-pin kanye dobuka un ning, pia aunamle ning ara, ance na dam tabakuka arenamnilame.

Mazmur 16:11 ပူးပေါင်းရင်းမြစ်များ

Mazmur 139:24

Malye winin ning nirya ton, na talima noutamak malye tenen ning awamniliba, eipniminyeura, na ni Allah ance, amalye winin ning nirya dobuka, diksukumuk kipdeipnamnilyame. Tonda, na banamne bisik nirya babye, ance nati, “Pia teleb winin bisik, pia diksukum kam una bisik ara, ani,” nyabuka, talibuka bobinamnilame.

Mazmur 17:15

Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.

Mazmur 4:8

Ancuk meliniminya deice arye, nara pin-pin kanye bonirye, kanye deibuka unune. Talya daunyak nang arye, wa wina lin li noutam arye, lin nin gandum do, anggur mek din ning do, aning-aning weik arye, libicopura, pia kanye deibuka unyake. Bunki, sikda mitik tonun dem, narye anti weika arye, kanye deibuka unune.

Mazmur 68:4

Bukni, Allah arye, “Aning wininamalume. Aning ara, pia kum wininamlume,” nyapdeiamsuk yupu, moubuka talibikirye, ‘Diksukumuk wininyak nang ara, kanye deipnamak’ tenen, moropkiyabe na nio. Tonda, sik telebuk wininyak nang kanye deibikirye, Allah el dam ara, kanye deibuka pin-pin asa unamak’ tenen, moropkiyabe na nio! Diba, ‘Sik anang ara, kanye deibikirye, telebuk unamak’ tenen, moropkiyabe.

Amsal 12:28

Ninye ton teleb un ninguk talibuka ukirye, diksukumuk un bisikuk banyak ninye nirya ara, pia kam una deiyok ning doprobikirye, kanye deibuka pia ati unamake. Diksukumuk unyak ninye ara, kam pia unamak bukni, malye ninguk talibuka unyak ninye ara, sik banyak bisik ara, dipna damuk banyake.

Amsal 2:19

Tonda, ninye aning-aning nirya talye yoltalamak kilapu dam binamak ninye nirya ara, pia tonok babye, ila tamubuka kum yanamake. Kam una deiyok bisik ara, pia kum binamake. Kuna bisikuk banyake.

Amsal 4:18

Wininyak bukni, sik diksukumuk unyak ninye ara, beren tam keting yalye talak ara, sika arye dawaplya ani, keting deiplirye, dirin ulamle touk unyake. Sik dib tenen ninye ara, tonok sum berekna deice arye, keting deiplirye, dirina weik ulamle touk unyake.

Amsal 5:6

Akilapu ara, ‘Kam una ati, diksukum bisik ara ani’ tenen, moubuka tenina kumce, kwanim bisik balamak touk, sik akilapu ara, diksukum bisik bana kumce, kwanim bisikuk banyake. Wininyak kilapu ara, ‘Nunda kwanim bisik banyaba,’ kum tenebikirye, talye kanye bobuka banyake.

Yesaya 2:3

Sik mutuku dana-dana unyak ninye ayala-ayala nang nirya arye, nyanamake. “Kume, amutuku ara, Allah el si Yahweh arye, wipdeiamuk mutuku anya arye, amutuku dilbinuyabe,” nyanamake. Tonda, “Se, Israel ninye, sik apu koproba Yakub biti, kalikuka melilamuk Allah ara, el aik amutuku deice domik ning ara, bulubuka dilbinamabe,” nyanamake. Tonda, “Nun nirya arye, Allah el aik domik mutuku deice welebipye talak ara, Allah arye, ‘Winina telebe, winina ara meme,’ tenelye ning peterenamsile. Ayupu kekebipyopura, elce nyasilye touk, talibuka diksukumuk unamabe. Elce melipsilyeba, el bisikuk dobolbanamabe,” nyanamake. Ati Allah arye, ‘Wininamlulume, aning ara, kum wininamlulume,’ nyabuka peteresilye yupu ara, Sion mutuku arye deiyok koubikirye, mutuku-mutuku nirya peterepra banamake. Allah arye nyasilye yupu ara, Yerusalem mutuku arye nyapsikiba, kekenamlulume.

Matius 25:33

Sik domba atonun yala ninye, teleb unyak ninye ara, na sirik taruk tam deipnamne. Ara, sik diksukum unyak ninye ati nyapne. Sik kambing atonun yala ninye ara, na kwanim taruk tam deipnamne. Ara sik malye unyak ninye ati, nyapne.

Matius 25:46

Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.

Matius 5:8

Sik kanye deibuka, telebuk un nang ara, ani. Ara, sik kanye talima bitinye bokoltona kum diparyuk, ‘Na talima ap, nonge ap nirya, Allah akunum arepsa ati, malye winin ning tonok ning babye, kum wininamne,’ tenenyakce, el yupu uk kekebuka unyak nang ara, Allah eipnamake. Ara, sik talima kanye dukdongopra, Allah ap, neika ulamikirye, Allah ap epdakirye, kanye deibuka epdanamke. Aning ati ara, sik kanye deibuka telebuk unyaka atonun, pia unamake.

Matius 7:14

Bukni, Allah arye kanye talima teleb unyak ninye taliliba, pia kam unamakak ara, el wekelban bisik ap, buplan ap ara, pia mitik dukun bisik anya arye, ninye weike, ‘Se, abuplan wektibye’ tenen, enyak bukni, ninye pia mitik anunuk eibuka wekenamake,” Yesus arye nyabuk.

Markus 16:19

Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule.

Rasul 2:28

Pia kam una ati, “Abisik binalam ning ara, anye,” nyabuka laka nyapnulume. An dam unibuk, kanye deilin ning weika arye arenamnilame.’ (Mazmur 16:8-11) “Daud sekamuk yupu ara akunum nyapsine,” Peterus arye nyabuk.

Rasul 7:56

Eibukopura, ayupu nyabuk. “Eidipdelulume! Im deice kikipdopmalbuk, Allah el Mi Koprop ara, Ninye Mi Koprop Atonunye Allah el sirik tam tikmalabuk na dinmane,” Stefanus arye nyabuk.

Roma 8:11

Tonda, Yesus dibukba, elti, kam bukdeibuknye Allah, El Dib Kanye arye, anggun talima pum tam usilye ninye ara, aminyan talak anggun dipmunya babye, Allah arye kam bukeipnamsile. Ara, Yesus dibukba, kam bukeibuknye, Allah arye anggun diba tenelulum ninye babye, aminyan talak kam bukeipsilyeba, kam pia unamlume. Anggun kam bukeipnamsila ara, anggun talima pum tam usilinye, Allah El Dib Kanye melipsilya deice arye, kam bukeipnamsile.

1 Korintus 13:12

Ayupu nyapmasina ara, deiyok ani. Mek kwen pum bisik dipdekirye, sik mining urasinuk yalyopura, kanya eibikirye, mitik teleb ubuka elilamak touk, wini talak ara, aning-aning nirya mitik anun kanya atonun elinyabe. Bukni, ninye epdanduka miningdam epdakirye, pia teleb ubuka urasin laka elilamak touk, aminyan sirya talak ara, aning-aning nirya lakak aryuk eibibirye, teleb ubuka nong noutamak ning moubuka kel kipnamabe. Wini talak ara, mitik anun bikamse, ton ning ara, kum bikamse bukni, Allah arye nati, na wininye ning ap, tenenun ning nirya ap, teleb ubuka kel bikinilye touk, aminyan sirya talak ara, na babye aning-aning nirya, moubuka kel bikuka unamne.

2 Korintus 4:17

Tonda, nun ilil arye malye kanye kum bonyaba deiyok ton ani. Ara, kanye imun kanye upsile ning nirya ara, dipkoprop tia talakuk usulule. Tonda, kanamuk usulule. Kanye imun ning usilya deice arye, aminyan pia kam unamabak ara, pia teleb unamsile. Aning ara, weik mambul anya arye, wini talak ikin usilye ning ara, nun kanye ara, ‘Aning nirya ara, dipkoprop pia kanam atonunuk usulule. Aning ara, mambul kume,’ tenenyabe. Weik mambul ning ara, Allah ap neika pia kam unyabbuk, weik mambul ning arenamsil ning ara, kum nukmanto, pia weik arye arenamsile. Ati tukwak mutuku unyap talak, ikin usilye ning ati, ‘Aning ara, mitik mambul uka,’ tenenyabe.

Efesus 3:19

Kristus arye, kanye arisilya nirya ara, moubuka kum kel kiptibye bukni, elce bico tenepsilirye, melisilye ning dolomunce, el ap, talima dukdongobuka umunyopura, aminyan ara, Allah el pia teleb winilye touk, ‘Anggun babye atonun, pia teleb wininamlum’ tenen, Allah morosunune.

1 Peterus 1:21

Yesus pil dopsukce, melisilya deice arye, Allah diba tenelulume. Yesus dibukura, Allah arye kam bukeibukce, weik dirina ap, mambul una ap deice arye, ereibuka ati, anggunce Allah ati diba teneplulume. Diba teneplumce, ‘Allah arye wininamsile’ tenen, kintinibuka dinauk ululum ning ap, ‘Allah elcuk melinamsile,’ tenena ap ara, anggun kanye talima Allah el deiceuk deililulume.

1 Peterus 3:22

Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.

1 Yohanes 3:2

Na kayapu na kanye deipsine. Wini talak ara, Allah el mapu unyabe. Aminyan nun nonge unamaba ara, min kum laka nyapsike. Bukni, nun kele. Yesus el yanamle talak ara, el nong babye, el ulul ning babye, dipkoprop ulye touk eipnamaba ati, nun babye el ulye touk unamabe.

Yudas 1:24

Allah arye anggun nirya ati, ‘Yuk malye bisik bimunyak’ tenen, talibuka balirye, melibuka disululnye ulule. Allah, el melisilirye deice arye, malye kum winiyabe. Ara, pia ati, kalikuka melisulula atia. Tonda, Allah arye el mikip arisilirye, el melisilya deice arye, pia daulamibya ani, sirya talak ara, nun nonge dopsilirye, malye ning nirya pia kum kipdeipsilyopura, el dam ara, pia teleb dirina damak deipsilyeura, kanye deibuka, pia telebuk unamabe.

Wahyu 22:5

Dotalak yanamle keting tamun nirya noutamak ara, lukunyan malamap atonun kum upnamle. Pia berekeltaknauk upnamle. Tonda, Yerusalem Winiryuk mutuku (Yerusalem Baru nyalamiknye) noutamak unamak ninye ara, weisa dirin ap, keting dirin ap ati, pia kum patanamle. Nun Weik Deiyoknye Allah arye, el dirin deice aryuk, dilamikirye banamake. Dotalak yanamle keting tamun nirya noutamak ara, Allah arye talilulba, amutuku noutamak unamak ninye nirya ara, el ap aning-aning nirya talibuka, deiyok ninye pia unamake.