Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.
Mazmur 148:13 - Eipomek13 Telebe, sik nirya arye, Allah Yahweh el siuk erebikirye, “Allah anda pia telebuk ulyame,” nyabuka, elti, si erenamake. El si erenamaka deiyok ara, ani. Ara, Allah Weik Erenanye uliba, tukwak mutuku unyak ninye nirya arye, ‘Se, el si ara, weik mambul si ulule. Elda pia mikip weiknye,’ tenenyake. Im deice ap, tukwak mutuku, im sirya, mutuku sirya ap ara, mitik teleb ulul bukni, Allah el pia teleb ubuka ulye ning ap, dirina weik ulya ap ara, aning nirya deice tamuk, erebuka ulule. အခန်းကိုကြည့်ပါ။ |
Mazmur 148:13
21 ပူးပေါင်းရင်းမြစ်များ
Amot nyanamna deice arye, sik yuk mutuku noutam unyak nang kekenamak sukum, amot nyanamna deice arye, an Allah Yahweh ati, “Telebe,” nyanamkine na nio. Tonda, sik yuk mutuku noutam unyak nang, yuk-yuk nang nirya, sik kekenak ara, narye an Allah Yahweh ati, “Anda pia telebuk ulyame,” nyabuka, an si erekinirye, nyanamne.
Nun tukwak nang, mutuku sirya, im sirya nirya noutam, unyap nang ara, amu tam atonun nang unyap bukni, Yahweh elda tukwak nang yala-yala nirya, pia deice tam ulirye, sik nirya ati, deiyok kibuka talilule. Tonda, Allah Yahweh, el mikip weik ulye ning ap, pia teleb wininyaka ap ara, pia weik ati, pia deice tamnye ulule. Ara, im deice tam ulula atia.
Tonda, Allah elce kwepdeiamukba, tukwak mutuku noutamak kam ulul ning ayala-yala nirya arye, Allah Yahweh el tibuk kanye deibuka, kibuka erebikirye, el siuk erenamake. Nun ni koprop Allah, el si Yahweh ati, “Anda pia teleb ulyame,” nyabuka, el siuk erenamabe. Akunuma. ‘Tukwak mutuku noutamak kam ulul ning nirya arye, Allah ati, “Telebe,” nyapnamak’ tenen, Haleluya nyapne. Na Sisinanye Raja Daud arye, akunuma nyapne.
Se, na ni Allah, an pia mikip weik ulyama ap, pia teleb ulyama ap ara, nukman kumto, im deice atonun ulula ati, ance aning nirya, lak kipdeipsiminba, ninye nirya arye, lukdakirye, ‘Se Allah ara, dipkoprob pia teleb ulule,’ tenebikirye, an si erenamake. ‘Ninye nirya arye, winipnamak’ tenen, moropkine na nio. Aning atonun, Allah an pia mikip weik ulyama ap, pia teleb ulyama ap ara, ‘Tukwak mutuku noutam unyak nang, mutuku sirya, im sirya nirya arye, biketingce, an siuk pia erenamkiak’ tenen, moropkine na nio.
Na ni Allah Yahweh, anda pia telebnye uminya ati ara, an si ara, weik mambul siuk ulule. Ati, ninye im sirya, mutuku sirya nirya arye, an siuk pia erenamkiyake. Winipkikiba, an si ara, pia aunamle. Tonda, ance im sirya, mutuku sirya nirya, talipminba, tukwak mutuku unyak ninye nirya arye, an siuk erekinyakba, ‘Allah an mikip weik ap, ance pia mambul pil dolulum ning ap, an pia telebuk winilyam ning ap aryuk, tukwak mutuku nirya langdipnamle’ tenen, moronyabe. ‘Aning ara, pia dipkoprob nong upnamle’ tenen, Amin nyapne. Akunuma.
Nun ni Allah Yahweh, ninye mutuku-mutuku nirya arye, an siuk erekinyake. Nun ni Allah an si Yahweh, anda nun Ninye Deiyoknye ulyame. An si ap, ance winilyam ning ap, pia teleb ulula anya arye, ninye kekebikirye, laka nyalbalamikiba, ninye im sirya, mutuku sirya nirya unyak ninye arye, kel bikinyake. Ninye arye, ‘Se, im noutamak ulul ning nirya ara, weik mambule,’ tenenyak bukni, dipkoprob aning nirya ara, mitik mambul uk ulule. Ance pia teleb winilyam ning ap, an ap, an dirin ap ara, dipkoprob pia mambul ulule.
Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.
Tonda, na akanye dopsinye birye nyalul yupu ara, kekena pia teleb yupu dem nyaplyeba, kekebibyopura, kanye pia deibuka unyabe. Ati ara, kilapu nirya arye na akanye dopsinye eibikcopura, ‘Se, elda pia telebnye ulule,’ tenekirye, kanye deibuka unyake. Ati, anggun Yerusalem mutuku noutam ululum wel kilapu nirya ati nyapsine. Akunum laka nyapmasin yupu nirya, na akanye dopsinye dipkoprob aning atonun ulula ati, elda na tamnye ulule. Ati ara, narye elti, bico weik tenepnirye, elti, kanye deipnirye, pin-pin kanye bobuka unune.
Se, amutuku noutam ara, yuk wel kilapu ton, yupa pia weik unyak bukni, akilapu nirya ara, sik urasin ap, nong ap ara, mitik teleb unyak bukni, anda an urasin ap, ance winilyam ning ap ara, pia telebuk ulyame. Aning atonun, ance, ‘Akil dopnamneʼ tenen, moun dibuka, weik tonun bico tenelyamnye bira, yata wiribuka el tonok ara, pia teleb ning winipto do? Amutuku noutam ara, yuk kilapu ton, sikce kanye delinyak nang ara, weik aunyak bukni, sik anang nirya ara, mitik telebuk unyak do? Anda weik tonun bico tenelyamnye, el tonok ara, pia teleb ulul do?’ tenen, aning nirya ara, laka nyapsutume. Yata deiyok ati, ance nun amutuku wel kilapu nirya ati, “Anggunda, na kanye deipsinye eipmunyopura, elti, ‘An kil arye, pia ekulule, nyapnamlume,’ nyabuka, moronmasilam do?” Nyapnik.
Atalak akunum kiplyopura, anggunce nyapnamlulume. “Nun nirya arye, Allah el tibuk, telebe,” nyabuka, el siuk erepnuyabe! Tonda, ‘Elcuk melibuka lyedopnamsilʼ tenen, el tibuk morobibyakarye, el siuk erenamabe. Tonda, Allah el mikip weik arye, mambul pil dolul ning nirya ara, ‘Yuk mutuku nang nirya kekepnamakʼ tenen, aning laka nyalbinamlulume. Tonda, “Nun ni koproba Allah, mambul weiknye ulula ati, el pia teleb siuk, pia telebe,” nyabuka, erenamabe. Ati ayupu nyabuka, laka nyalbinamlume.
Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.
Doyanamle talak ara, Allah arye anang ati, arepnamle mutuku noutam ara, ninye arye, wa wibuka koulamak ning, el si gandum, nong weik upliba libuka, dilamica deice arye, sik awel nang ap, wel kilapu ap, sik nong teleb kibuka nenamake. Aning atonun, anggur mek winiryuk purubikiba, pia telebuk uplye ning, sikce kwebuka dinamaka deice arye, telebuk unamake. Winibicopura, akilisal sik nong urasin nirya, pia teleb asa arye unamake. Aninye nirya ara, Allah arye, pia moubuka talipliba, unamake.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.
Allah arye, Yesus Kristus kam bukeibukura, ila tamubuka im deice welebukce, Allah el sirik taruk tam bukukce ulule. Bukukce eitamuk uplibuk, Allah el im deice pil don ninye, malaikat ap, tukwak ninye deice tam unyakce weik deiyok nang atouk, im deice unyak ninye ap, tonda tukwak mutuku noutamak unyak isa mer nirya ap, yata mikip ning do nirya, Yesus el amutamuk unyake. Yesus ara, weik mikip weik ulirye, aning yala-yala nirya deice tamuk ulula atia.