Minop talak ara, Allah arye sik imam nang ati nyabuk. “Na si eren aik pum tam wekelbinamunye talak ara, anggun nong ap, anggun talilulum ning ap, anyaik pum tam pil donamlum ning ap, aning-aning nirya teleb updeipmunce, malye winina kum nanguk upmunyopura, atalak aryuk, na aik wekna telebe. Ara, aning-aning nirya pia malye ulina ati nyapsine,” nyapdeibuk. Nyapdeibuka ati, sik imam-iman nang ap, Lewi yala nang ap ara, ‘Allah arye nyapsuk touk winipnamapca’ tenen, kintinip deibikce, aning ap, sik nong koprop ap ati, teleb kipdeibik. Aning atonun, ‘Nun amu tam ninye nirya babye, malye winina kum nanguk upnamak’ tenen, Allah arye ‘Wininamlulume,’ nyapdeiamuk touk, teleb pil dobuka kintinibik. Winibik ning ara, weik keil poka donmek ning ap, apoka bublan botopdeiamik ning babye, ‘Pia teleb, malye ton kum upnamle’ tenen, apiluk dobuka kintinibik.
Mazmur 147:13 - Eipomek13 Allah ati, ‘Anda telebe,’ nyanamluma deiyok ara ani. Ara, ‘Yuk mutuku nang arye, ‘Naʼ tenen nang dam yanuka obikcak’ tenen, anggun weik asik domlum ning nirya ara, Allah elcuk mikip kililule. Winipmanto ara, anggun weik asik wekelban bisik bublan dam ara, cang besi beton ikilamak atonun kibuka, anggun mutuku nirya kalikisulule. Tonda, anggun mutuku noutam nirya ara, Allah elcuk anggunce delimunye mapu nirya babye, mikip areplirye, telebuk kililule. အခန်းကိုကြည့်ပါ။ |
Mazmur 147:13
20 ပူးပေါင်းရင်းမြစ်များ
Ura, yuk ninye arye, “Yerusalem asik keil poka akunum dopmake,” nyabuka lak nyanmekba, yuk nang sik si Sanbalat ap, Tabia ap, tonda Arab mutukunye el si Gesyem ap, tonda, ‘Israel yala ninye nun lik,’ tenebuka olalamik nang, yuk nang ap, sik nirya arye kekenmekba, nunti, “Yerusalem mutuku weik cang keil poka akunum dobuka sirya dakmake,” nyabuka lak nyabikba kekebikce, yu ubuk. Atalak ara, nunce apala keil poka nirya dobuka sirya dakmaburye, bisik bublan nirya tirikuka kintinip deibupu bukni, wini talak ara, nunce bublan akunum tirikupu bukni, bublan talin ning el si ara, ensel arye min kum tirikupu.
Ura, Yerusalem mutuku antanap dongobuka domupu cang keil poka akunum sirya dakupopura, na Nehemia birye winipse. Keil poka bublan ati, bublan memebuburye, narye nyapdeipsiba, abublan ara bisik bublan memebuka tirikik. Winipsirye, sik bisik bublan dam kalikna deiyok nang ap, sik Allah yupu mot sena deiyok nang ap, tonda Allah el si eren aik pum tam pil dona deiyok nang, sik melin nang, Lewi yala nang ap, wipdeipse.
Ati, narye sikti, nyapse. “Yerusalem mutuku aik wekelbana ati, winiryuk memebik bisik bublan ara, keting kum deipmalirye buppu kum piripmalye talak ara, bublan kukultakna meme. Keting deiplirye, buppu piriplye talak arye, abublan kukulinamlulume. Winipmamunya ani, akunum iniplyopura, tuba tamubuka bublan tirikilongonamlulume. Ara, sik abublan kalikin nang arye sik tuba kalikinmakce talak ara, anang aryuk abublan tirikdongobikirye, bisik kin-kin botopdeiamika arye, besi arye dongopdongobuka tirikilongonamake. Ara, kanam inipnin banmalye talak arye tirikinamake. Tonda, Yerusalem mutuku unyak ninye sik kaliknak atibuk, ninye wibuka kintinip deipnamlume. Ara, anggun aik dam bisik bublan ap, keil poka dobuka botopdeiamupu bublan ap, yuk bisik bublan dam kalikinamakak ap ati, kintinip deipnamlume,” nyapse.
Yerusalem mutuku dana-dana tam, weik mutuku nirya antanadap dongobuka bukuk mutuku dup bulamle touk, Allah el si Yahweh arye, ‘Na mapu koproba ati, ikin ubikcakʼ tenen, dana-dana tam nirya, antanap dongoplirye, pia melibuka kalikisulule. Ara, wini talak arye dipdongobuka, doyanamle talak babye, pia kalikuka melinamsile.
Na ni Allah, anti moropkine. Ara, ‘Nun Israel nang arye deibibiba, dadeipdanin banamak nang nirya ara, minop nepnin bakirye, pia mikip weik nang upnin banamak’ tenen, moropkiabe. Tonda, ‘Nun Israel yala nang arye deinamap kilmapu nirya ara, urasin pia teleb upnin banamak’ tenen, moropkiabe. Winipmanto ara, sik ninye deiyok nang arye, sik pia teleb unyak aik, el si ara istana aik dam, ikilamak cang yo, urasin pia teleb ulamle touk, ‘Nun kilmapu nirya babye, urasin pia teleb upnin banamak’ tenen, moropkiabe na nio!
Ninye arye an si erena ati, asum-asum nirya, kam ning obuka, anti arekinyak ning ara, kum patakulule. ‘Kam ning obuka, na dam boyanganamlulume,’ nyapnutumba, aning obuka boyakitinye bukni, aning kum nyapnuluma ati, kam ning ap, yuk teleb ning ap, kum boyanganamkine. Aning atonun, nun malye ning kilina ati, kam ning obuka, uku dongolyanganyap ning ara, kum patakulule. Ati na babye, kam ning obuka, an si erena ati, uku kum dongolyanamkine. Aning ara, Allah an kum patakulula ati ara, aning dobuka, arepkitinya babye, ance, ‘Aning ara, telebe’ tenen, kanye deibuka kum dolonalame.
Na Allah Yahweh arye nyapsine. Aminyan talak ara, yuk-yuk mutuku unyak nang arye, amutuku eibikirye, “Se, amutuku ara, oldemuk ulule. Ninye ap, ninye arye weilamak domba ato ning ap ara, pia kum ubuka ati, kam ton pia kum unyake. Tonda, Yehuda mutuku noutam dolamik asik nirya ara, akunum kum dayuke. Atonun, Yerusalem mutuku noutam bisikak nirya ara, ninye ton yanibuka, kum banyaka ati, louk ulule. Amutuku nirya ara oldemuk ulule,” nyanamake. Aning nyanamak bukni, aminyan doyanamle talak ara, narye aning nirya, tonap teleb kipdeipnamne.
Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!
Winibuk ning ara, sik ninye deiyok talibuka, Raja-Raja ulamik nang ap, yuk mutuku nang mutuku-mutuku nirya ap, ulamikce tenelamik ning ara, ‘Kume, Yerusalem mutuku ara, ninye mal olan nang ara, tonoknye babye, Yerusalem mutuku weik asik dobuka ulamikak ara, dipkoprob pia kum wekuka bitinge,’ tenelamik bukni, aning akunum winibikce, malye kibuka sirya dakik.
Anyapkin ning ara, ance sekmince, moubuka kel biknamlyame. Allah arye nyapliba, deiyok nang arye, ‘Yerusalem mutuku noutamak, Allah el si eren aik, tamubuka teleb kibuka dopnamak,’ nyapdeibice talak arye, deiyok koubuka, anyapce nukikirye, Allah arye wipdeipliba, anggun talipnamsil weik deiyoknye ton yanamle talak ara, anoutam talak ara, tekbarye, tujuh kali tujuh (49) talak kipnamle. Winilamica ani, atalak akunum uplyopura, Allah arye wipdeipnamle ninye deiyoknye yanuka talipnamsile. Winiplirye, tonap tabakuka, lo arepnamsil ning ara, enam puluh dua kali tujuh (62 x 7) talak ton (434) kipnamle. Atalak ara, tujuh kali enam puluh dua (62 x 7), ara (434) talak noutamak ara, Yerusalem mutuku aik ap, amutuku bana ati bisik nirya ap, Yerusalem mutuku ongomkanim abuka, dana-dana tam nirya, mek sekuka palipnamak ning ap, aning nirya pil dobikirye, moulinamake. Aning nirya domikirye, moupdeipnamak bukni, apil donamak talak noutamak nirya ara, weik imun kanye deice arye unamake.