Mazmur 146:4 - Eipomek

⁴ Ura, yata tukwak nang do nirya, dibicopura, kam una deiyok ning ara, sik kanya ara, akunum bilyopura, akunum dibinyake. Dibicopura, sik nong dobuka, tuku lukikirye weibikiba, aminyan talak ara, tuku dananyake. Tukwak mutuku dibice talak ara, sik adibice nang arye, ‘Aning ara, winipnamne, winipnamne,’ tenelamice ning nirya ara, kum daliba, nong kum upnamle.

Mazmur 146:4 ပူးပေါင်းရင်းမြစ်များ

Kejadian 2:7

Atalak noutam arye, Weik Deiyoknye Allah, el si Yahweh arye, tukwak mikamuk tuku doprobukce, tuku pinibuka, ninye nong tonok kwepdeibukce, el u pum bisik si pito pubukba, isin ubuk. Winibuka deice arye, anye kam una deiyok ning arebukba, isin wekukce, kam bukuk.

Kejadian 3:19

Wini talak arye, dipdongobuka daulaminya ani, dipminyeba tuku dongopnamkiyak bukni, kam unamlam talak nirya ara, ikin pil weik aryuk dolaminya ani, kwisi meka panamkilya deice aryuk, din ning libuka dinalame. Ura, an kwepdeipkese talak ara, talye mikuka, kel-kel alamuk tuku butbuta arye, dobuka kwepdeipkisa ati, anda talye mikuka kel-kel alamle tuku butbuta atonun ulyama anya arye, dipminyeba, tuku pum weipkicopura, tamubuka tonap, talye tuku pumuk daunalame,” Allah arye, Adam ati nyabuka wenebuk.

Kejadian 6:17

Nyabukopura, ayupu ton dukdongopbuka nyabuk. “Ura, weik mekwen deipnyopura, im noutam eitam bukni, im amu tam tukwak mutuku im sirya, mutuku sirya nirya noutamak, kam ulye ning aning-aning nirya mekwen dipliba, dipnamake. Yata yala ning do nirya, kam ulye ning nirya ap, isin ulye ning nirya ap dipnamake. Tonok ning babye, kum bataknamne.

Ayub 14:10

Bukni, ninye tonok ara, dibibiyeba weibicopura, tonap tamubuka kum kam bunyake. Tonda, ninye akunum dibicopura, sik isin tuba kum welelule. Atalak sik dib kanye ara, dan mutuku banyak do? Nun kum elinyabe, talye tunim abuka unyake.

Ayub 14:21

Ninye akunum dipmakce nang ara, sik mapu nebikiba, ninye arye, si eren nang unamak babye, kum biktinge. Aning atouk, sik mapu ati, amu tam pil don nang kipdeiptingba, yuk nang eiptingce, sik ni yapu diamting nang ati, yanuka laka nyaptinge. ‘Nun mapu ara, aminyan talak weik nang unamak do? Talye bona utotoa talina kum ninye uk, unamak do?’ tenen, dibipyopura, aning nirya kum kel biktibye.

Ayub 17:1

Ayub birye, el kwitcapu nang winilye nang ati nyabuk. Na kanye pum tam arye tenenun ning ara, nyapnusine. Na kanye ara, na dipnamne talak ara, akunum dam upnile. Ara, na isin arepnuk ning doproplirye, dipne talak ara, akunum dam upmanile. Wini talak mitik tonun tuba aupnil ning ara, wininamne bukni, na dipnyeura weipnamniakak ara, akunum kintinip deipnike.

Ayub 17:11

Na kam tuba unye talak nirya ara, akunum kum kipdopnin yanganulule. Tonda, narye, ‘Winipnamne,’ tenyamse ning nirya ara, bataknauk ununa ati, aning nirya ara, dipkoprob nong kum upnamle. Tonda, na kanye talima noutam arye, ‘Se, aning ara, winipnamne, aning ton winipnamne’ tenen, pia patapnukba, adiparyuk, tuba teninun ning nirya ara, kum kibuka wanganauk ulule.

Ayub 27:3

Na dipkoprob nyapne. Allah el Pia Teleb, Lek Dip Kanye arye, na isin arepnuka deice arye, kam tuba unune. Na nong kam tuba unamne talak nirya ara, na si bambol deice arye tilila yupu ton kum nyanamne. Tonda, na si tang deice arye, talye yupu ton kum nyanamne.

Mazmur 104:29

Bukni, nun ni Allah, ance nun nirya ati, lik ukilye talak ara, bataksimince, nun ton kum dilyasiminye talak ara, nun ilil weik upsiliba, imun kanye bobuka unyabe. Tonda, ninye do, yuk kam ulul ning do, ance nun isin dopropsiminye talak ara, adiparyuk dibinyabe. Akunum dibipyopura, ninye babye, yuk talye kam ulul ning babye, tuba tamubuka tuku uk dongolbanyabe.

Mazmur 33:10

Ninye im sirya, mutuku sirya nirya arye, ‘Nun mikip aniryuk wininamabe,’ tenenyak ning nirya ara, Allah arye kum kibuka delilule. Dan mutuku ninye do nirya, ninye tukwak ninye ayala-ayala nirya arye, ‘Winiptibye,’ tenenyak ning nirya, Allah arye kum kibuka delilule.

Mazmur 90:3

Na ni Allah, ancuk ninye isin arelamsulum ning ara, tuba tamubuka dopropsiminba, dibinyabe. Dibipyopura, nun nong bobuka, kwepdeiamsulum tuku deiceuk, binuka deipsicopura, atuku atonun dananyabe.

Penghotbah 12:7

Aning atonun, nun ninye nong ara, tamubuka tukwak min kum danmapye talak ap, nun kanya tamubuka el arepsuknye Allah dam min kum binmapye talak ara, nunce Allah atibuk tenenamabe. Ayupu nirya nyapmakina ara, talye ati kume. Ara, ‘Na wisi daniryuka’ tenena meme, kam tuba unmaminye talak aniryuk, Allah diba tenebuka el si erepmince, ‘Allah atibuk tenebuka kentinilinamlyame’ tenen, nyapkine.

Penghotbah 9:6

Tonda, sik akunum diamik nang ara, tuba kam ulamik talak ara, bico tenelan ning ap, yuk nang ati, ‘Na likeʼ tenen ning ap, akunum kum dayuke. Tonda, sikce yuk nang talinyak ning ap, wininyak ning ati, ‘Se, naryuk aning taliptinye, aning ara, naryuk winiptinye tenelamik ning nirya ara, akunum kum dayuke. Aning ara, akunum diamika ati, tukwak mutuku noutam ara, yuk nang arye wininyak ning ap, talye dawinipnamle ning ap ara, Sikda neika pia kum uptinge. Tukwak mutuku noutam ulye ning nirya ara, sik ap pia kum uptinge. Na kanye ara, aning ara pia malye tenenune.

Yesaya 2:22

Ati ara, anggun Israel yala nang ap, tukwak mutuku im sirya, mutuku nirya ululum nang ap, ninye sirika arye, deiamikce nang ati, ‘El anye birye, nun ikin upsilye talak ara, melibuka lyepnamsilarya,’ kum tenenamlume. Tukwak unyak nang nirya ara, sik u pum bisik ara, isin deice arye kam unyake. Sikda talye tukwak nang ati, yata wiripting deice arye, anggun tukwak ululum nang ati, melibuka lyepsiting do? ‘Kume, aning ara, pia kum winipmanto ati, dauplye,’ nyapsine. Allah arye nyabukba, nabi Yesaya kekebukce, Israel yala nang ati, laka nyabuk.

Ratapan 4:20

Allah Yahweh, elce, ‘Anye bira, ninye deiyok kibuka, ‘Naʼ tenen, nang Israel nang talibuka Raja unamleʼ tenen, wipdeiamuknye bira, nun mal olan nang arye tomobik. Nun Raja ati ara, nunce, ‘Kume, elda erebuka, nun deice tam atonun kiplyeba, nunda el amu tamuk unamabe. Elcuk kalekuka melinamsile. Winipsilyeura, yuk mutuku nang yala-yala nirya, sik noutam ubibya babye, telebuk unamabe,ʼ tenelamupu. Utenelamupu bukni, el babye, nun mal olan nang arye yanuka tomobik. Ara, ninye arye tuku pum tam weik bisik palibikceba, bai tam kam ning mangkau yangalamicak, atuku pum saklyeba tomolamak touk, tomobik.

Daniel 5:23

Anda, Allah im deice ululnye dinmakukak arye, malya kibuka kanye erepdalumce, Allah ati, ‘Na like’ tenen, yaniltalamlume. Winilamlumce, Allah el si eren aik pum tam, deiamikbuk, boyanamik ning, emas arye memebuka deiamik mek makau ara, ance nyaplumba, an mutuku talibuka unyak deiyok ninye ap, an kilapu ap, an tam kili sal ap, sik nirya ara, amakau arye anggur mek kwebuka dinmalume. Winipmalumce, anggun si erelulum minop kwemdina ning, emas ap, perak ap, tembaga ap, yuk kat ning yo ap, keil ap kintinibuka deiamik ning, Isa Mutuku Dongonye urasin atonun ning ara, sik si nyabuka erepmalumce, mot nyanmalum talak ara, ‘Allah dinmasile,’ tenepmalume. Anggunce, Isa Mutuku Dongonye si erelulum minop kwemdina ning ara, asing arye, ton kum elinyake. Tonda, amul arye kum kekebuka, kel bikinyake. Allah aniryuk, dibin ning babye, kam un ning babye, elcuk, ‘Wininamak’ tenen, kintinibuka deibuknye ulul bukni, atalak ara, ance Allah ati, telebe nyabuka, si kum erepmalume. Tonda, Allah aryuk an kam unamlam ning nirya ara, kintinibuka delikulule. Awinikilye ning nirya ara, ance moubuka kum kel kilaluma ati nyapkine.

1 Korintus 2:6

Ura, nun Allah yupu peterena deiyok nang arye, dipkoprop weik kel bikne deiyok yupu peterenyap bukni, ara sik talima akunum wisibuka, dipkoprop Allah el bisikuk banyak ninye kekebikce talakuk, ato yupu deice arye, peterenyabe. “Weik kel bikne deiyok yupu,” nyapmasina ara, atalak noutamak talye-talye unyak ninye ap, atalak noutamak aning-aning nirya talibuka, weik ninye deiyok ninye ap arye, ‘E, ayupu ara, weik kel bikne yupu,’ tenenyak yupu atonun ning ati kum nyapsine. Wini talak ara, aninye weik nang unyak bukni, aminyan talak ara, Allah arye ato ninye nirya wenena ati, malye kibuka weneplirye, sik nyanyak yupu ap, sik wininyak ning ap, kum kipdeipnamle. Sikce, sik tenenyak ning babye, nong kum upnamle. Allah arye sik nirya kum kipdeiplirye, sirya daknamle.