Mazmur 145:1 - Eipomek

¹ Na ni Allah, anda na ninye deiyoknye Sisinanye, Raja unilyame. Ati, ‘Narye an si erena ati, mot senmanirye, pia tuba-tuba kibuka, si erenamkine. Pia kum bataknamne,’ tenenune.

Mazmur 145:1 ပူးပေါင်းရင်းမြစ်များ

1 Tawarikh 29:13

Aning-aning nirya ati ara, wini talak ara, diba nun ni koproba Allah, nunce nun ni koproba anti, “Pia teleb,” nyapkiyabe. Tonda nun ni koproba an si ati, weik tonun erepkibirye kikenyabe. An pia teleb si, an siuk erenamabe.” Raja Daud birye ayupu nyabuk.

Mazmur 100:1

Nun tukwak mutuku im sirya, mutuku sirya noutamak unyap ninye nirya arye, Allah el si Yahweh atibuk, kanye deibuka mot senamabe.

Mazmur 118:28

Anda, na ni koproba Allah unilyame. Aning ara, narye na ni Allah antibuk, “Telebe,” nyabuka, narye Allah an siuk, weik arye erenamkine.

Mazmur 145:21

Ati, nara asum-asum nirya Allah Yahweh, antibuk si erenamkine. Aning atonun, Allah ance kwepdeiyalumba, kam unyak ning ayala-yala nirya arye, Allah Yahweh an si atibuk, asum-asum nirya, an siuk pia erenamkiyake. An si erepnamak ning ara, pia kum bataknamake. Sisinanye Raja Daud, el mot sena deice arye nyalamuk.

Mazmur 146:2

Tonda, na kam unamne talak nirya ara, nun ni Allah Yahweh ati, “Pia telebe,” nyabuka, el siuk pia erenamne. Tonda, na ni Allah el si erena ati, mot nyana ap, kitar obuka lelim nyana ap deice arye, Allah el si erena ati, na kam unamne talak nirya ara, mot tuba nyanamne.

Mazmur 149:2

Nun Israel nang yuk-yuk nang nirya ara, Allah arye kwepdeiamsuka deiyoknye bira, aulirye talisulula ati, kil-kil kanye bobibirye, Allah el siuk erenamabe. Ara, Sion mutuku noutam unyap nang nirya ara, nun ninye deiyoknye, Allah arye nun talisulula ati, nun deiyoknye Raja usulule. Tonda, Allah ap, neika unyaba ati, kanye deibuka unamabe.

Mazmur 30:1

Raja Daud birye, Mazmur yupu mot nyana ati, sekuk. AMazmur mot sekuk ning ara, Allah el si erena ati, lek aik bublan kukuna ap, weik kwalya kwalina ap ati, asum arye sekuk.

Mazmur 30:12

Minop talak babye, wini talak babye, na ikin weik unulule. Tonda, na imun kanye bobuka unye talak nirya ara, ancuk, na engenun ning ara, kum kipdeipnimince, aning punubuka, kanye delin ninguk arepniminyeba, kanye kil-kil asa unune. Tonda, imun kanye bobuka engena ati, lak kin ning ara, na teleb baju kwilikuka bataksirye, malye baju, el si karum koni, ongopse ning ara, ance akunum dopropnulume. Na ikin weik wamnuk ning, akunum kum kipdeipnulumce, kanye delina ap, pin-pin kanye una ap, akunum arepnulumba, akunum aninguk, talibuka teleb unune.

Mazmur 30:2

Se na ni Allah Yahweh, narye anti, ‘Anda pia teleb ulyame,’ nyabuka, an si ati erepnirye, anti pia si erebuka kinamkine. Deiyok ara ani. Ara, pia weik uk dinulul bukni, ance kwetepnulumce, lyepdopnulume. Tonda, na mitang ulamnuk talak ara, na on nang arye, ‘Anye obibyopura, kanye deipnamap’ tenen, yanuka piripnik bukni, Allah ance melipnuluma deice arye, sikce kum opnike.

Mazmur 34:1

Ayupu nirya ara, Daud birye, mot sena deice arye nyabuk. Ara, minop talak Israel ninye talibuka ulamuk ninye deiyoknye, Abimelek birye, ‘Daud opnun,’ tenebuk talak, Daud birye ayupu nyabuk. Ara, Daud talye motona talilamle nang, kanye pia moubuka tenena kumce, talye kanye bobuka unyak touk, kanye walwal asa una atonun kibuka winilamukba, Raja Abimelek birye, Daud ati, ‘Motona talinanye ulula ati, elda daunamle’ tenen, dobuka dopkwetebuk.

Mazmur 44:4

Aning ara, talye ati kum nyapne. Deiyok ara, Allah el mikip deice arye, amutuku-amutuku nirya obukabikce, alubuka doprobik. Winilamik bukni, sik taruk mikip aryuk, amutuku nirya, kum dopromik. Aning atonun, nun apu yapu, sik mikip ap, sik taruk ap arye, amutuku nirya ulamik nang ara, min obuka, sirya daklamikce, amutuku nirya kum alubuka dopropmik. Aning dem kum bukni, Allah an koproba taruk mikip deice arye, nun apu yapu meliamlum mutuku nirya, alubuka dolamik. Tonda, an babye, nun apu yapu dam ulamlumce, sikti, kanye delilaluluma deice arye, Israel nang meliamlum mutuku nirya dopromik. Winipmanto ara, an dirina weik, sik deice deiamlumce, sikti, pia teleb kililamlume. Ara talye ati kume. An Allah arye, nun apu yapu ati, kanye delilyama deice arye, sik meliamlumba, amutuku dopromik.

Mazmur 45:1

Mot nyana deiyoknye arepnamuka ati, sekuk. “Amot ara, yuk mot ton, el si Bunga Bakung mot lelim nyalamle touk nyanamlume,” nyabuka sekuk. Amot ara, sik Korah yala nang arye, deibiknye birye sekuk. Ara peterena ap, bico tenelana ap ati, sekuk.

Mazmur 45:6

Na ni Rajao, ance dopnalam mal ara, pia yu ulula ati, nun mal olan nang ati, sik talima pum tam oplyopura, adiparyuk dipnamake. Ance, yuk mutuku nang yala nirya, sik dam binuka opminyopura, sikda adiparyuk, tuku deice sakuka, an yan dam dipnamake.

Mazmur 5:2

Na ni Allah Yahweh, narye anti moropnukin yupu ara, moubuka kekepnamnilame. Na kanye talima daksaknil ati, narye, ‘Se, yata winiptinye do?’ tenen, ikin kanye bonuna ara, ance moubuka tenepnamnilame.

Mazmur 5:3

Na ni Allah, narye engebuka moronun yupu ara, ‘Moubuka kekepnamnilam’ tenen, moropkine. Anda, na deiyoknye Raja unilyame. Tonda, anda na si erenun Allah ulyame. Ati ara, narye, ‘Melipnilyame,’ nyabuka, morokununye bira, an uka.

Mazmur 52:9

Ara, anggun nirya arye, anye dilulume! Elce tenelule, ‘Kume, ‘Yatanye birye, melibuka lyepnamnil’ tenen, nara Allah dam binuka, kum unamne. “Allah daupmalye,” nyalamuk. Bukni, anye birye, ‘Kume, nara akunum pia bona talinanye ununa ati, aning-aning nirya, weik tonun talinun bona arye, melibuka lyepropnamnile,’ tenelamukce, nyalamuk.

Mazmur 68:4

Bukni, Allah arye, “Aning wininamalume. Aning ara, pia kum wininamlume,” nyapdeiamsuk yupu, moubuka talibikirye, ‘Diksukumuk wininyak nang ara, kanye deipnamak’ tenen, moropkiyabe na nio. Tonda, sik telebuk wininyak nang kanye deibikirye, Allah el dam ara, kanye deibuka pin-pin asa unamak’ tenen, moropkiyabe na nio! Diba, ‘Sik anang ara, kanye deibikirye, telebuk unamak’ tenen, moropkiyabe.

Mazmur 75:9

Winipmanto ara, ninye arye weik kwalya kwalibikirye, ‘Din ning lukuka, ninye nirya ati, bokuka arelbinuyap’ tenen, weik pala ning waskom deice, din aning-aning nirya deibikirye, bokuka arelamak atonun, Allah el babye atonun akunum kintinipmale. Deiyok ara, nun ni Allah Yahweh, elcuk nun tukwak nang nirya arye, winilamupu atonun ati, yupu bokeipsilirye, dekna ning ap, wenen ning ap arenamsile. Winipmanto ara, ninye arye kanye wangalamak mek arebikceba, aning dinyak nang, ikin uk dilamle touk, Allah arye ninye tukwak nang, malye wininyak ning ati, yupu bokeipnamsil talak ara, ikin weik wenen ning bokuka arenamsile. Tonda winipmanto, ninye ara, mek makau arye mek kwebikirye, adiparyuk amek dikiltaklamak touk, Allah arye ninye tukwak nang nirya ati, yupu nyapdeipnamle. Tonok ning babye, kum bataknamle. Ati ara, sik malye winin ninguk talibuka wininyak nang nirya ati, sik wenena ati, Allah arye kanye imun weik ning areplyopura, sik nirya arye, aning dopropnamake. Diba, ninye arye tonok mek makau, el si cangkir dobuka, amek dibikirye, sirya dakalalamak touk, Allah arye, sik malye wininyak nang ati, weik wenen ning areplyopura, anang arye, aning nirya doprobikirye, weik ikin kanye bobuka unamake. Tonok ning babye, kum bataktinge.

Mazmur 95:3

Allah Yahweh el si erenamapa ara, talye ati kume. Deiyok ara, nun ni koprop Allah, el si Yahweh, elda aning-aning nirya deice tam erebuka, talibuka Mikip Weik Deiyoknye ulula anya arye, talye ning bukni, ninye arye, ‘Nun ni,’ nyabuka, si erenyak Isa Mutuku Dongonye ap, isa mer nirya ap, yuk mikip ulul ning, aning-aning nirya ap, el amu tamuk unyake. Allah elda, mikip weik ubuka, aning nirya Deice Tam Erenanye ulule.

Mazmur 96:2

Tonda, tuba-tuba el siuk ereipmunce, “Anda pia telebe,” nyabuka, kanye lon mot yupu nyanamlume. Allah el si Yahweh ulina atibuk unamlume. Ara, elce nun malye ulamupu ning ap, malye wininyap ning nirya ap ati, lyelosulule ati, el si erebuka teleb kilinamabe.

Yesaya 33:22

Anyapman yupu ara, talye ati kum nyapne. Deiyok ara, nun ni Allah Yahweh, elda nun ninye deiyoknye unamsile. Allah el mikip weik deice arye melibuka kalikinamsile. Allah Yahweh elda, nun weik deiyoknye unamsila ati ara, el dem arye lyebuka teleb ulinamsile.

Yesaya 38:20

Ati ara, na kanye ara, ‘Na ni Allah Yahweh arye, dipkoprob lyepnilirye, kanye tamubuka teleb kipdeipnamnile,’ tenenune. Akunum teleb kipdeipnilyopura, anggun ap, na ap, nun nirya kam tuba unamap talak nirya ara, neika mot nyanamabe. Ara, mot lelim nyana deiyok ning nirya, bung-bung nyana, el si kecapi ap, gitar ap arye, nun kam unamap talak noutam nirya ara, mot nyanamabe. Ara, Allah Yahweh, el si eren aik dam bipyopura, elti, ‘Telebe,’ nyabuka, neika mot nyabibirye, el siuk erenamabe. Raja Hizkia birye, ayupu nirya nyabuk.

Daniel 4:37

“Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.

Maleaki 1:14

Ati ara, anggunce na si eren ati kam ning ara, bol malye bomlye ning obuka boyakirye, ‘Nunda Allah Yahweh el si erena ati, yim domba pia teleb ning arebape,’ nyabuka tilila yupu nyanyak nang ara, Allah Yahweh arye sik anang ati, ‘Malye unyake’ tenen, supliba, ikin weik ning sik dam yalyopura, malyeuk wininamake. Ara, urdem ati kume. Na Allah Yahweh, talinye kum unune. Nara, aning-aning nirya ap, tukwak ninye mutuku-mutuku nirya ap talibuka, sik weik deiyoknye ununa ati ara, nara dipkoprob pia weik mambulnye, Raja unune. Na Allah Yahweh, aning-aning nirya talibuka, im deice yin talin malaikat nirya, sik weik deiyoknye unune. Na Allah ninye deiyok nang nirya deice tam, eitam ununa ati ara, winipniba yuk yala ninye im sirya, mutuku sirya nirya arye, nati kibuka, si ereninyake. Allah arye nyabuk.

Matius 25:34

Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.

Wahyu 19:16

Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.