Mazmur 144:12 - Eipomek

¹² Na ni Allah, anti moropkine. Ara, ‘Nun Israel nang arye deibibiba, dadeipdanin banamak nang nirya ara, minop nepnin bakirye, pia mikip weik nang upnin banamak’ tenen, moropkiabe. Tonda, ‘Nun Israel yala nang arye deinamap kilmapu nirya ara, urasin pia teleb upnin banamak’ tenen, moropkiabe. Winipmanto ara, sik ninye deiyok nang arye, sik pia teleb unyak aik, el si ara istana aik dam, ikilamak cang yo, urasin pia teleb ulamle touk, ‘Nun kilmapu nirya babye, urasin pia teleb upnin banamak’ tenen, moropkiabe na nio!

Mazmur 144:12 ပူးပေါင်းရင်းမြစ်များ

Ayub 42:15

Amutuku nirya ara, urasin teleb kam kilapu ton, daulamik bukni, Ayub el kilmapu ara, urasin pia teleb kilmapu ulamik. El kilmapu urasin teleb wel kilmapu atonun, yuk kilmapu ton, atalak kum ulamik. Ayub el kilmapu winilye tonok ara, urasin pia teleb wel kilmapu ulamik. Sik ni taleamuk ning yuk-yuk bokuka arebukce, akilmapu arye, aning nirya taleamik. Tonda, sik makal nang babye, atonun arelamukba, taleamikce, sik nirya neiktoto ulamik.

Mazmur 128:3

Tonda winipmanto ara, anggur tapu duk, weik arye papnin balamya ani, duk pia weik moulamle atonun, anggun dopnamlum kilapu nirya ara, mapu weik delinamake. Tonda, anggun mapu weik unamak ati, winipmanto ara, zaitun yo duk moulamle yating deice arye butuklirye, mitik yo ton weika arye teleb kibuka palamle atonun, unamake. Ara, sik kilapu nirya ara, mapu weika arye delilamikceba, amapu teleb kibuka nelamikirye, anggun aik pum tam neika bukuka, din dinamlume. Anang ara, akunum winibikcopura, kanye deibuka unamlume.

Ratapan 4:2

Min talak ara, Sion mutuku ulamik wel nang ara, pia teleb, mambul nang ulamik ati, sik kamo ara, dekna weik ning, el si emas, teleb ulamle atonun ulamik. Bukni, wini talak ara, sik kamo ara, aning kel nang arye, kat tuku dobuka, talye yun mek makau deiamica ani, yun talak kiplyeura, ‘Dauplye,’ tenelamak atonun, nun wini talak, Sion mutuku unyap wel nang ati ara, ninye nirya arye, nunti, ‘Sikda, dauplye, sikda pia teleb mambul nang kume. Kum ubikceba babye, dauplye. Nun like,’ tenenyake.

Zakaria 9:17

Doyanamle talak ara, Allah arye anang ati, arepnamle mutuku noutam ara, ninye arye, wa wibuka koulamak ning, el si gandum, nong weik upliba libuka, dilamica deice arye, sik awel nang ap, wel kilapu ap, sik nong teleb kibuka nenamake. Aning atonun, anggur mek winiryuk purubikiba, pia telebuk uplye ning, sikce kwebuka dinamaka deice arye, telebuk unamake. Winibicopura, akilisal sik nong urasin nirya, pia teleb asa arye unamake. Aninye nirya ara, Allah arye, pia moubuka talipliba, unamake.

Ulangan 7:13

“Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”