Mazmur 140:3 - Eipomek

³ Ayu nang arye yuk nang ati, ‘Amutuku nang ton olbinamabe,’ nyabuka, sik kweit cayapu ap, yupu talinyake. Kanye pum noutam arye, aninguk pia teninyake. Sik ayu nang arye, asum-asum nirya arye, ‘E, amutuku-amutuku nirya, dana-dana tam nirya unyak nang ati, yu kilam yupu nyabibiba, kekepsikcopura, ninye olbanauk pia unamake,’ tenebikirye, malye wininyake.

Mazmur 140:3 ပူးပေါင်းရင်းမြစ်များ

Kejadian 3:13

Nyabukopura, Allah el si Yahweh arye, Hawa ati nyabuk. “Anda yata deiyok ati malye winipmalam do?” nyabuka wenebukba, akil arye, “Kume, kwatima arye, yupu tenepce arye, nyapmanilamba, mangkau arye, diba tenepmanurye, ayo duk dakuka dipmanue,” nyabuk.

Mazmur 57:4

Ati ara, Allah anda, im deice ulyamak arye, na melin ning dopkwetepnamnilame. Tonda, ance na melibuka lyepdopnamnilame. Yu nang arye, nati, ‘Anye opnuyap’ tenen, warikininyak nang nirya ara, an Allah arye, anang nirya wenepmince, obuka sirya daknalyame. Winipminyopura, sik nirya alye dakdanamake. Allah arye, ‘Winipnamne,’ tenesilirye, nyasilye touk, batakna kumce, aninguk dipkoprob winilule. Ati, na ni Allah arye, ‘Winibuka pia bico tenekununa ati, pia teleb kipdeipnamkine,’ nyalin yupu deice arye, nyapdeipnuk ning nirya ara, pia nati, dipkoprob melinamnile.

Mazmur 58:4

Anggun weik deiyok nang arye, malye-malye kibuka umunce, Allah arye nyasulul yupu yaninauk ululume. Ara, anggun nin yapu arye, deiamsik talak arye dipdongobuka, anggun kam ulamlum talak noutam nirya babye, malye winin ninguk winilamlume. Diba, anggun nin yapu arye, winiryuk deiamsik talak arye, tuba-tuba malye winin ninguk winilamlumce, tilila yupu nyalulume.

Mazmur 59:7

Na mutuku noutam ara, akunum ipnamalye talak ara, sik amalye unyak nang arye, tamubuka yanganyake. Yakcopura, bai tam yu kam arye, ‘Yata ning obuka dipnun’ tenen, weik yupu arye, yu nyalamle touk, amalye winin nang babye, Yerusalem mutuku dana-dana tam nirya ara, cang keil arye deibuka domik poka, deice tam yanibuka banmakirye, ‘Amutuku nang ara, yata wiribuka optibye do?’ tenenyake.

Amsal 12:18

Ninye ton sik yupu nyapnuce talak ara, moubuka tenena kumce, talye-talye yupu uk, nyalamak ninye ara, sik yupu nyanyaka deice arye, ninye talimak parang ya tace arye, talimak lukliba, uk dilamle touk wininyake. Bukni, weik kel bikin nang arye nyanyak yupu ara, teleb yupu uk nyanyaka ati, sik yupu nyanyaka deice arye, ninye nirya ati, teleb ulinyake. Winipmanto ara, ninye kwetena deiyok nang arye, uk dilamle ninye kwetelamak touk, weik kel bikin nang arye nyanyak yupu deice arye, yuk ninye kekebicopura, sik kanye talima melilanyakba, teleb kilinyake.

Amsal 23:32

Anggunce kanye wangalamak yu mek dimunye talak ara, ‘Kume amek ara, to weik nun kanye deibabe,’ tenemunce, ‘E, ayu kum dipnamap ning ara, telebuk,’ tenenamle bukni, aning weik arye dimunyopura, dipkoprob aminyan talak ikin weik unamlume. Winipmanto ara, ninye on kwatima arye si topsiliba, aminyan talak kanye imun ning ulamsil touk, kanye wangalamak mek weik arye dimunyopura, aminyan talak ikin ning weik anggun damak yanganamlarya.

Amsal 6:14

El kanye pum tam ara, yu kanye bona ninguk ulula ati ara, el talima pum tam lyuna uk ululba, tilila ninguk panalule. El tenelye ning nirya ara, malye un ninguk tenelula anya arye, el balamle mutuku nirya ara, el malye ulye deice arye, yuk ninye nirya babye, kanye wilibuka bokolanyake.

Yesaya 59:13

Nun dam, akunum malye ulilamnyap bukni, ance, ‘Winipnamlume,’ nyapdeipsulum ning ara, batakaltakanauk unyabe. Tonda, yuk nang dam ara, nunce, ‘Kume, Allah Yahweh ara, nun walwale, el bisik kum dobolbanyabe,’ nyabuka batakanyabe. Nun ni Allah, an siuk erelamupu bukni, wini talak ara, an dam mal pipkuburye, nunda mandipna dobuka unyapce, pia yuk kwalin bisikuk akunum banyabe. Malyeuk winibibirye, yupu lipsisikuka bokolina deiyok nang dam bibirye, yuk nang ati, malye kum winipmakibuk, ‘Kume, sikda malye winipmake,’ nyabibirye, ‘Deiyok nang arye, anang wenepnamakʼ tenen, minin yupu arye nyanyabe. Allah anti, kum melibuka dobolyangakinyabe. Nunce yuk nang ati, nun kanye pum tam tenebibirye, ‘Ikin ning, sik deice akunum deilinamabeʼ tenen, yupu bokolina deiyok nang dam binuka, tenepce arye, talye tilila yupu uk nyabibiba, anang deice wenepnarye ikin ning delinyake. Adeice arye, an yupu yaninyabe.

Yeremia 9:3

Sik abulubuka unyak nang arye, talye tilila yupu nyana ap, talye-talye kanye bobuka, malye weik winina ap, aninguk talibuka wininyakce, dipkoprob ning ton, pia kum wininyake. Sikce aning wininyaka deice arye, winipmanto ara, ninye arye, ‘Yuk nang opnuyap’ tenen, yin talibuka, mal olalal balamaka atonun wininyake. Amutuku nang nirya ara, teleb kibuka un ning deice arye, talibuka kum wininyake. Sik tilila yupu nyanyaka deice arye, amutuku noutam mikip weik nang akunum unyake. Sikce, diksukum winin ning ap, dipkoprob yupu nyana ap ara, pia min talibuka kum unyak bukni, malye winin ninguk talibuka, malyeuk pia winipnin banyake. Dipkoprob ning ara, sik amutuku nang ara, na Allah Yahweh ap, narye wininun ning ap ati, moubuka kum bikininyake.

Yeremia 9:5

Sik anang ara, tilila yupu boyanuka, sik mining dam unyak nang kekenak bakirye nyanyake. Anang nirya ara, tilila yupu uk nyanyake. Sik kan-kan noutam ara, tonoknye babye, dip yupu pia kum nyalule. Sikda, talye-talye yupu nyapnin banyaka ati, sik si bambol deice arye, nyanyak yupu ara, pia ati, talye tilila yupu uk nyanyaka ati, sik malye unyak ning ara, pia wininyaka ati, namin asa ubikirye, malye winin ning min kum batakmanto unyake.

Ratapan 3:62

Na olyanganikce nang arye na ona ati, asum akunum nirya ara, “Anye bira, nun lik ati, winipnuyabe, winipnuyabe,” nyabuka, malye yupu talininyake. Ara, sikce na ona ati, “Winibibirye opnamabe,” nyabuka, yupu talininyake.

Matius 12:34

Anggunda, kwatima duknupmalya ani, ninye olamle touk winilulum nang. Anggunda kanye talima pia malye winilulum nang anya arye, yata ubuka teleb yupu nyaptum do? Yata nang do nirya, sik talimak wamlye ning deice, si bam bol arye yupu nyanyake.

2 Korintus 11:3

Utenyamsise bukni, winira na ilil upnile. Ara, Isa Mutuku Dongonye arye, tenepce arye yupu teleb-teleb kibuka nyabukba, Hawa arye, tilila yupu dib tenebuk touk, ‘Anggun Korintus ninye babye atonun winipnamlum’ tenen, nyapsine. Ara, deiyok kouna talak ara, anggunce yuk yupu tabakuka dib tenena kum arye, dipkoprop Kristus el tonok dib tenyamlum bukni, yuk nang arye, yuk yupu peterepsikca deice arye, ‘Anggun kanye tenen ning deice arye, yuk malye bisik kirikuka bimunyak’ tenen, ilil upnile.