Aning ati ara, sik anang ap, sikce deibikura, dadeipdanin yangalamik nang nirya ap ara, Allah Yahweh ap, ninye ap elana ati ara, el si eren ati doltakna tenda aik kintinip deiamik ning ara, aik wekelban bisik bublan dam kalikna piluk, pia talibuka dolamik. (Atalak ara, Allah el si eren aik ara, keil arye dolamik ning ara, min kum domik talak ara, tenda arye dolamik ati nyapne).
Mazmur 134:1 - Eipomek1 Nun ni Allah, el si Yahweh, el amu tam umunce, el si eren aik pum tam, pil dolulum nang nirya ara, Allah Yahweh ati, “Nun ni, anda pia telebuk ulyame,” nyabuka, el siuk pia erenamlulume. Ara, lukunyan noutamak bukni, Allah si eren aik pum, Allah ati, teleb ning arebuka, elti, kibuka, si eremunya deiyok nang nirya arye, Allah Yahweh ati, “Nun ni, anda pia telebuk ulyame,” nyabuka, el si pia erenamlulume. အခန်းကိုကြည့်ပါ။ |
Mazmur 134:1
32 ပူးပေါင်းရင်းမြစ်များ
Tonda, Lewi yala nanguk wilipdopnarye, ton tam nang ara, Allah el si eren aik noutam arye, mitik-mitik aik wilibuka domik ning ara, anang arye aik malamik. Deiyok ara ani. Ara, anang ara, Allah si eren ati, Allah yupu mot nyana deiyok nang wipdeiamikba, ayala nang arye mot nyalamik. Ara keting noutam ap, lukunyan ap, atalak-atalak nirya ara, sik anang adiparyuk bulubuka, mot nyalamik. Sik anang nirya ara, Allah el si eren aik noutam, weik cang aik domika pum tamuk ulamik. Anang ati ara, yuk pil ton kum areamik. Sik nirya ara, anyasik koproba noutamuk ulamikce, mot nyalamik.
Ati na kayapu, wini talak ara, anggun imam-imam nang ap, anggun Lewi yala nang ap ara, ‘Yo, dotalak-dorace, aning ara winipnamap ca,’ nyabuka, talye nyaltakna kume. Dipkoprop Allah arye areamsuk piluk moubuka donamlume. Allah arye anggun dem wipdeipsiliba, el yupu kekena ap, el si eren aik pum tam pil dona ap, Allah moron talak siltong teleb nyan ning uku dongona ap, tonda anggunce Allah el si erena ati pil don ning nirya ara, amutuku unyak nang ati, ‘Allah el yupu kekepnuyap,’ nyamunyeba, kekenamaluma ati nyapsine,” Raja Hizkia birye, nyapdeibuk.
Anggun kong yuk-yuk kibuka deiplum ning ara, Allah el si eren aik dam binuka kintinipmumnyeba, sikce talye Israel nang nirya ara, sik yala-yala aulamikce touk, kong yuk-yuk kibuka yakirye, ‘Allah ati, teleb aren ning arepnuyapʼ tenen, yanganamak talak ara, anggun Lewi yala deiyok nang bokdokmunce, Israel nang kong yuk-yuk ati melinamlume.
Nun nirya arye Allah ati, “Haleluya,” nyabuka, el si erenamabe. Nun nirya arye, nun ni koproba Yahweh ati, “Anda pia telebuk ulyame!” nyabuka, elti, si erenamabe. Tonda, nun ni koproba Allah, el amu tam umunce, el piluk melibuka dolulum nang babye, Yahweh ati, “Anda pia telebuk ulyame,” nyabuka, el si erenamlume. Diba, nun nirya arye, nun ni koproba Yahweh ati, “Anda pia telebuk ulume!” nyabuka, el si erenamabe.
Israel yala nang arye, weik kwalya kwalin sum akunum uplyeura, ‘Allah ati, el si erelbinamap’ tenen, Yerusalem mutuku wekelbalamik talak, Mazmur yupu mot nyanamika ati, sekuk yupu. Se nun ni Allah, anti, na urasin erepnirye, an winilyamak ap, an ap ati dinamkine. Bukni, anda, mikip weiknye, im deice noutamuk umince, aning-aning nirya talebuka, weik deiyoknye ulyama ati, ‘Na ni koproba Allah eipnamne’ tenen, na urasin erepnirye, an tam dinamane.
Weik asik Yerusalem mutuku noutam welebuka bibirye, ‘Mambul weik sum ati, kwalya kwalibuka wininamap’ tenen, kanye lon mot nyanyabe. Allah Yahweh ati, ‘Dip tenebuka,’ anggun kanye talima nirya, el deice delinyak nang nirya ara, anggunda, weik tonun bukuk mutuku, el si ara, Sion mutuku, pia kum lulukulula nyalula atonun ubuka, sik babye, kanye imun weik ning yatua babye, imun kanye bobuka, kum unamake. Aning kum bukni, sikda pia, kanye deibuka, telebuk unamake.
Kanye delina deice arye, amot nyabik. Minop talak Babel mutuku nang arye, Israel ninye weik arye, tomobuka bobinamik bukni, Allah Yahweh arye tamubuka, Sion mutuku yanuka deipsuke talak ara, ninye arye, lengdar deice eipmace ning ati, kanye lopliba, sik ninye kanye delilamak touk, ubuka kanye lopsuke.
Sisinanye Raja Salomo birye, kanye deibuka mot sena deice arye nyabuk. Allah Yahweh aryuk, tonok aik kum dobika ara, anyaik dopnamak nang ara, urdem atibuk, talye aik donamake. Aning atonun, Allah Yahweh arye, tonok weik ninye asik ara, kum kaliklyopura, sik weik asik kalikinamak nang babye, talye atibuk kalikinamake.
Yata nang do nirya, Allah arye, “Aning ara, wininamlume. Aning ara, pia kum wininamlume. Teleb winin ning ara, ani. Ati, anggunda winibuka-winibuka wininamlame,” nyapdeiamsuk yupu, moubuka kekebikirye, aninguk talibuka, wininyak nang ara, Allah arye teleb kideiplyeba, sikda kanye deibuka, pia telebuk unamake.
Israel yala nang nirya ara, weik sum akunum upne talak ara, Yerusalem mutuku bana ati, amutuku welepnarye, amot nyalamike. Se, nun ni Allah, nun mal olan nang arye, min talak babye, wini talak babye, weik tonun tuba olyangasinyake. Ara, na mitikop ulamse talak arye dipdongobuka, na weik nebuka unye talak nirya ara, tuba pia wininyake. Diba, nun Israel yala nang nirya arye, neika ayupu ton nyanamabe.
Na talima noutamak arye, Allah Yahweh ati, pia tuba tenena arye, kanye delinune. El tibuk pia patanulule. ‘Na ni Allah, dan talak yanuka lyepropnamnil do?’ tenen, na kanye talima noutamak ara, anti kintinibuka dinauk unamne. Ninye aik kalikina deiyok nang arye, lukunyan noutam, ‘Yu nang arye yanuka, opsikirye, nun talenyap ning, dalubuka dopropsicak’ tenen, pia dinauk ulamake. Aning atonun, narye, ‘Allah dan talak arye, yanuka lyepropnamnil do?’ tenen, anti, pia kintinibuka dinauk unune. Lukunyan kalikina deiyok nang arye, ‘Se, minopce berektue,’ tenelamak touk, sikda mitik anun aryuk tenenyak bukni, Allah ati tenikunun ning ara, pia weik arye pataniliba, tuba tenenune. Narye anti, pia moubuka dinauk ukunune. Inipmalye babye, berekmalya babye nirya, anti, an siuk erepkinirye, pia kintinibuka dinauk ukunune.
Israel nang ara, weik sum akunum uplye talak ara, Yerusalem mutuku welebanamak talak ara, amutuku nyanamake. Anyanamak mutuku ara, Mazmur mot nyanamak ati, Daud birye sekuk. Na ni Allah, na kanye talima nirya ara, maknya kintinibukapnirye, kum erelanirye, pia kum wininune. Tonda, na urasin erepnirye, ‘Nara telebnye,’ tenelana kumce, kum kwalinune. Tonda, mambul weik pil ap, pia mikip weik ning ap ati, ‘Naryuk aning nirya ara, winiptinye’ tenen, kum pirinune. Aning ara, narye pia kum winipmanto ning ati, batakanune.
Israel nang arye, weik sum upneba, ‘Allah si erenamab’ tenen, Yerusalem mutuku noutam wekelbalamik talak nirya ara, Mazmur yupu mot nyalamik. Sikce nyalamik yupu ara, ani. Nun ni Allah Yahweh, nun ninye deiyoknye Daud biti, ‘Bico tenepmince, teleb kipdeipnalam’ tenen, moropkiabe. Daud el deice ara, weik ikin ning, pia weik arye bulubuka, imun kanye bomuk ning ara, ance tamubuka, tonap teneipdenulyame, nun ni Allah.
Raja Daud birye, Mazmur yupu deice, mot sekuk. Israel yala nang ara, ‘Allah el si erenamap’ tenen, Yerusalem weik asik domik mutuku welebalamik talak ara, Mazmur yupu mot deice arye nyalamik. Daud birye sekeibuk yupu ara, ani. Yata nang do nirya, olana ap, walana ap kumce, neika unyak talak nirya ara, kanye deibuka, telebuk winilamting toura, pia telebe.
Bukni, anyapmasin touk, tekbarye sum nirya ara, keting noutam talak ap, lukunyan talak ap, asum-asum nirya ara, Allah Yahweh el sapi bol arye doltakna domik tenda aik bublan damuk binuka kintinipmunce, Allah arye, “Wininamlume,” nyapdeiamsuk touk, apiluk donamlulume. Tonda, atonun kibuka, pil donamlulume. Ara, Allah Yahweh arye, “Aning winipnululume,” nyapdeipsuk touk winibuka, pil donamlulume. Aning kum pil dopmumnyopura, anggunda adiparyuk dipnamlume. Ati, aning nirya ara, Allah Yahweh arye, na Musa dam nyapdeipnuk touk, wininamlume. Musa birye Harun ap, elce deiamuk nang ap ati, laka nyabuk.
Amutuku noutamak biyik talak ara, Allah el si Yahweh arye, Lewi yala nang ati wipdeibuk. Ara, Allah nyalin yupu yo lakase marikna, el si Peti Perjanjian pum tam deiamuk ning ara, anang arye bobuka banamika ati, anang wipdeibuk. Tonda, Lewi yala nang arye, Allah el si eren aik binuka wekikirye, el pil dopnamik ning ap, tonda, ‘Allah arye Israel ninye ati, teleb kipdeipnamsile,’ nyanamik ning ap, tonda, Allah el si erepnamik ning ap ati, Allah arye Lewi yala nang wipdeibukba, wini talak tuba sikce deibikba, dadeipdanin yangalamik Lewi yala nang ara, tuba apil dobuka unyake.
Ayupu nyabikba, Kekepsopura, adiparyuk tonoknye Allah el weik ninye deiyoknye bun ning dam arye ayupu tonap nyabukba, kekepse. “Allah el amu tam bukuka, el piluk dolulum ninye nirya arye, nun Ni Kopropa Allah ati, el siuk erepnululume. Allah ati, ‘Se, elda mambul pia weike’ tenen, elti, si erelulum ninye nirya, mambul nang babye, mambul kum nang babye, anggun nirya ansinibuka el siuk erenamlulume,” nyabuk.
ကြော်ငြာတွေ