Winipnamne bukni, Daud bira na amu tam ulamukce, na nyapdeiamse yupu kekelamuka ati, Yerusalem mutuku noutam ara, ‘Daud birye deiplyopura, dadeipdanin binamak ninye nirya kum kipdeipnyak’ tenen, tonok yala nang ton Salomo biti arepnamne. Winipniba narye, ‘Amutuku noutam na si deipniba, pia si erenamake,’ nyalamsirye, ‘Wipdeiamse mutuku Yerusalem upnamak’ tenen, winipnamne.
Mazmur 132:17 - Eipomek17 Sion mutuku noutam ara, na mikip arepnirye, lo arepnyeba, Daud birye deiplyeba, dadeipdanin banamak nanguk, wipdeipnyeba, Israel nang talepnamlanye ton, sik deiyoknye ton unamle! Na Allah arye, Israel nang talibuka, ninye deiyoknye ulul raja Daud biti, ‘Anye bira, dipkoprob, Israel nang sik ninye deiyoknye unamle’ tenen, akunum wipdeipsa ati, amutuku nirya ara, dipkoprob talinamle! အခန်းကိုကြည့်ပါ။ |
Mazmur 132:17
11 ပူးပေါင်းရင်းမြစ်များ
Abiam bira, malye winilamuk bukni, Abiam el apu koproba, Raja Daud birye, Allah Yahweh el si erelamukce, telebuk winilamuk ning ati, Allah arye, ‘Amalye wininyak deiyok nang ara, wenebuka opnirye, kum kipdeipnamne do? Yata winipnamne do?’ tenen, tenipdeyukce, ‘Kume, Daud birye deibukba, dadeipdanin banamak nang ara, Israel ninye ap, sikce unamak mutuku nirya ara, tuba talipnamake,’ tenebuk. Ati, Rehabeam birye deiamuk mi, Abiam birye, el li punubuka, Yerusalem mutuku asik nirya, talipnamle. El diplyopura, elce deipnamle mi arye, amutuku talipnamlarya,’ tenebukce, anye wipdeibuk. Tonda, ‘Abiam el mi ton deipnamleʼ tenen, melibukba, Abiam birye, mi ton deibuk.
Bukni, Allah Yahweh arye, ‘Yehuda tam unyak ninye nirya ara, wenepnirye nirya kum opniba, kum kum danaknamyake,’ tenebuk. Adeiyok ara, minop talak, Allah arye, el kanye delilamukce, el pil donanye Raja Daud biti, nyapdeibuk. “Ance deipminye mapu ap, sikce dibikiba, dadeipdanin, bakirye, unamak nang noutam arye, ninye ton wipdeipniba, Israel tam talinamake. Ara, Israel tam noutam unyak ninye talipnamaka ati, an mapu silip arye, ninye deiyok nang Raja kibikirye, ninye talebuka pia unamake,” nyalin yupu deice arye nyapdeiamuk. Tonda, Allah arye, “Sik Daud yala ninye bukni, anoutam arye tikinamak Raja-Raja nang ara, weik weisa dirina weik ulamle touk, pia ati unamake,” nyabuk.
Yehoram bira, malye winin ning weik winilamuk bukni, Allah Yahweh ara, Raja Daud elce deibukba, dadeipdanin yangalamik nang nirya ati, obuka sirya kum dakuk. Aning kum obuka deiyok ara, ani. Ara, Allah Yahweh arye, Daud el yala nang ati, nyalin yupu deice arye, “Daud birye deiplyeba, dadeipdanin banamak nang arye delinamak nang, sikcuk ninye deiyok kibuka, amutuku talibuka, Raja nang pia kipnin banamake,” min talak nyalin yupu deice arye akunum nyabuka ati, ‘Aning ara, akunum nyapdeipsa ati, sik Daud yala nang aryuk, amutuku talibikirye, Raja nang unamake,’ tenelamuk. “Pia aninguk wininamake,” nyalin yupu deice arye, Yahweh akunum nyapdeiamuka ati, aninye deiyok nang ara, obuka sirya kum dakuk. Ara, Allah arye, “Daud el yala nang aryuk, amutuku nirya talibikirye, ninye deiyok kibuka, Raja nanguk unamake,” nyalin yupu deice arye, min talak akunum nyapdeiamuka ati, ‘Daud el yala nang nirya ara, kum obuka sirya daknamne,’ tenelamuk.
Allah elcuk im sirya, mutuku sirya unyak ninye ati, tenelule. Tonda, elce awamuk ninye, sik Israel yala ninye ati, mikip deiyok ning arelamukba, sikda mikip weik ninye ulamik. Ara, Allah arye, “Aning ara telebe, aning ara malye,” nyabuka laka lelamuk touk, ayupu moubuka talinyakce, diksukum unyak ninye ati, kanye delilirye, aninye dobuka, ‘Sikda ‘Naʼ tenen, ninye’ tenelirye, el damuk delilule. Ati, aning-aning nirya arye, Allah el siuk erenamake. Nun nirya arye, Allah Yahweh el siuk erenamabe. Sisinanye Raja Daud arye, mutuku deice arye nyabuk.
Ninye nirya moubuka biklulume! Allah Yahweh ati, ‘Elda nun like,’ tenenyak nang nirya ara, aminyan talak dipnamake! Diba nun ni Yahweh, anti yanikikirye, ‘Nun like,’ tenekinyak nang nirya ara, aminyan talak ance sikti, wenebuka opminyeura, sik nirya kum danamake! Mandipna kanye bobikirye, malye-malye ninguk wininyak nang nirya ara, aminyan talak, ance sikti, yakuka dopkwepminyeura, sik kanye teniltonauk kibikirye, bai tam bikbik abuka bikirye, mutuku yuk-yuk, dana-dana tam mutuku binamake.
Aning nirya akunum winipnamne talak ara, atalak dam uplyopura, na pil dopnamna deice arye, Israel nang nirya ara, mikip kipdeipnamne. Winipmanto ara, sapi basam kisok deice taice ning belelamlarye, cang belepnin balamle touk, Israel nang ati, mikip kipdeipnamne. Tonda narye melipkiniba, Yeheskiel anda, Israel nang dam, yupu talye mangkau nyaminyeba, sikce an yupu kekenamkiyake. Aning nirya winipnye deice arye, sik anang nirya arye, ‘Se, dipkoprob, aning-aning nirya talibuka, deice tam erebuka ulirye, pia mikip weik ululnye bira, ara Allah Yahweh el uka,’ tenepnikirye, nati moubuka biknamniake.
Allah arye nun apu kopropa Abraham ati, “Winipnamne,” nyapra deiamukura, el yupu nyabuka laka nyalamik nang, nabi nang arye, sekeiyamsik touk, Allah el pil dolamuknye Daud arye deibuka, dadeipdanin, yangalamica ani, deipnamlanye bira, nun lyena ati, Lyena Deiyoknye weik mikipnye akunum erepdeipmasile.
Allah Yahweh ati, ‘Nun like. El yupu kum kekenamabe,’ tenebikirye, el yupu yaninyak ninye nirya ara, elce obuka, atu atonun kinamle. Aninye sik ilil una ati, im deice arye, weik liman nyaplirye, lelim pia weik tonun nyalamle touk, el yupu nyanamle. Allah Yahweh elcuk, mutuku-mutuku unyak ninye nirya ati, aning ara, “Teleb ning ara ani, malye ning ara ani,” nyabuka, lipsisiklirye, bokdeiplirye, wenepnamlarya. Winiplyopura, Allah Yahweh elce, ninye deiyoknye Raja una ati, wipdeibuknye biti, mikip weik arepnamle. Tonda, awipdeiplye ninye deiyok Raja ati, weik tonun mikip kipliba, mikip weik ton ap tabakuka upnin banamle. Hana elce ayupu nyabukce, akunum nyabukopura, yupu ton nyana kumce bukuk.
ကြော်ငြာတွေ