Mazmur 122:1 - Eipomek

¹ Daud kanye deibukce mot nyabuk Yuk nang arye nyapnik. “An ap nun nirya, Allah Yahweh el si eren aik neika binuyab,” nyapnikba, weik kanye deipse.

Mazmur 122:1 ပူးပေါင်းရင်းမြစ်များ

Mazmur 119:111

Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu ara, pia moubuka talinamne. Ara, minop talak arye, an yupu arepnulumba, aninguk talibuka wininirye, ayupu ara, pia ati aupnamle. Tonda ance nyasilyam yupu ara, weik mambul yupu ulula anya arye, adeice nara, pia kanye tenepnirye, pin-pina asa uniliba, telebuk unamne.

Mazmur 120:1

Nara, imun kanye bobuka, unye talak nirya arye, ‘Na ni Allah Yahweh arye, na damak yanuka melibuka lyepnamnil’ tenen, “Na ni koprop, ance yanuka, melibuka lyepropnilyame,” nyabuka moronune. Narye Allah ati, moronye talak nirya ara, kekeplirye, melininulule.

Mazmur 121:1

‘Allah el si erenamap’ tenen, Yerusalem mutuku welebuka balamik talak, nyalamik mot ara ani. Narye mutuku-mutuku nirya dinmanirye, ‘Se, na melipnamnilnye bira, dan mutuku arye yalirye, melipnamnil do?’ tenen, dinune.

Mazmur 123:1

Israel yala nang arye, weik kwalya kwalin sum akunum uplyeura, ‘Allah ati, el si erelbinamap’ tenen, Yerusalem mutuku wekelbalamik talak, Mazmur yupu mot nyanamika ati, sekuk yupu. Se nun ni Allah, anti, na urasin erepnirye, an winilyamak ap, an ap ati dinamkine. Bukni, anda, mikip weiknye, im deice noutamuk umince, aning-aning nirya talebuka, weik deiyoknye ulyama ati, ‘Na ni koproba Allah eipnamne’ tenen, na urasin erepnirye, an tam dinamane.

Mazmur 124:1

Daud kanye deibuka, mot sena deice arye nyabuk. Na kayapu, Allah Yahweh arye, nun Israel ninye ati, ‘Melinamsine,’ nyabuka, kum nyasulula anya arye, nun dam ara, yata ikin ning yasutu do?

Mazmur 125:1

Weik asik Yerusalem mutuku noutam welebuka bibirye, ‘Mambul weik sum ati, kwalya kwalibuka wininamap’ tenen, kanye lon mot nyanyabe. Allah Yahweh ati, ‘Dip tenebuka,’ anggun kanye talima nirya, el deice delinyak nang nirya ara, anggunda, weik tonun bukuk mutuku, el si ara, Sion mutuku, pia kum lulukulula nyalula atonun ubuka, sik babye, kanye imun weik ning yatua babye, imun kanye bobuka, kum unamake. Aning kum bukni, sikda pia, kanye deibuka, telebuk unamake.

Mazmur 126:1

Kanye delina deice arye, amot nyabik. Minop talak Babel mutuku nang arye, Israel ninye weik arye, tomobuka bobinamik bukni, Allah Yahweh arye tamubuka, Sion mutuku yanuka deipsuke talak ara, ninye arye, lengdar deice eipmace ning ati, kanye lopliba, sik ninye kanye delilamak touk, ubuka kanye lopsuke.

Mazmur 127:1

Sisinanye Raja Salomo birye, kanye deibuka mot sena deice arye nyabuk. Allah Yahweh aryuk, tonok aik kum dobika ara, anyaik dopnamak nang ara, urdem atibuk, talye aik donamake. Aning atonun, Allah Yahweh arye, tonok weik ninye asik ara, kum kaliklyopura, sik weik asik kalikinamak nang babye, talye atibuk kalikinamake.

Mazmur 128:1

Yata nang do nirya, Allah arye, “Aning ara, wininamlume. Aning ara, pia kum wininamlume. Teleb winin ning ara, ani. Ati, anggunda winibuka-winibuka wininamlame,” nyapdeiamsuk yupu, moubuka kekebikirye, aninguk talibuka, wininyak nang ara, Allah arye teleb kideiplyeba, sikda kanye deibuka, pia telebuk unamake.

Mazmur 129:1

Israel yala nang nirya ara, weik sum akunum upne talak ara, Yerusalem mutuku bana ati, amutuku welepnarye, amot nyalamike. Se, nun ni Allah, nun mal olan nang arye, min talak babye, wini talak babye, weik tonun tuba olyangasinyake. Ara, na mitikop ulamse talak arye dipdongobuka, na weik nebuka unye talak nirya ara, tuba pia wininyake. Diba, nun Israel yala nang nirya arye, neika ayupu ton nyanamabe.

Mazmur 130:1

Se, na ni Allah Yahweh, weik ikin ning, na dam yanmanilba, imun kanye bobuka unmane. Ati, ‘Na ni Allah arye, yanuka melipnilyame,’ nyabuka, weik yupu deice arye ngalukunmance, na ni Allah Yahweh, anti moropkine.

Mazmur 131:1

Israel nang ara, weik sum akunum uplye talak ara, Yerusalem mutuku welebanamak talak ara, amutuku nyanamake. Anyanamak mutuku ara, Mazmur mot nyanamak ati, Daud birye sekuk. Na ni Allah, na kanye talima nirya ara, maknya kintinibukapnirye, kum erelanirye, pia kum wininune. Tonda, na urasin erepnirye, ‘Nara telebnye,’ tenelana kumce, kum kwalinune. Tonda, mambul weik pil ap, pia mikip weik ning ap ati, ‘Naryuk aning nirya ara, winiptinye’ tenen, kum pirinune. Aning ara, narye pia kum winipmanto ning ati, batakanune.

Mazmur 132:1

Israel nang arye, weik sum upneba, ‘Allah si erenamab’ tenen, Yerusalem mutuku noutam wekelbalamik talak nirya ara, Mazmur yupu mot nyalamik. Sikce nyalamik yupu ara, ani. Nun ni Allah Yahweh, nun ninye deiyoknye Daud biti, ‘Bico tenepmince, teleb kipdeipnalam’ tenen, moropkiabe. Daud el deice ara, weik ikin ning, pia weik arye bulubuka, imun kanye bomuk ning ara, ance tamubuka, tonap teneipdenulyame, nun ni Allah.

Mazmur 133:1

Raja Daud birye, Mazmur yupu deice, mot sekuk. Israel yala nang ara, ‘Allah el si erenamap’ tenen, Yerusalem weik asik domik mutuku welebalamik talak ara, Mazmur yupu mot deice arye nyalamik. Daud birye sekeibuk yupu ara, ani. Yata nang do nirya, olana ap, walana ap kumce, neika unyak talak nirya ara, kanye deibuka, telebuk winilamting toura, pia telebe.

Mazmur 134:1

Nun ni Allah, el si Yahweh, el amu tam umunce, el si eren aik pum tam, pil dolulum nang nirya ara, Allah Yahweh ati, “Nun ni, anda pia telebuk ulyame,” nyabuka, el siuk pia erenamlulume. Ara, lukunyan noutamak bukni, Allah si eren aik pum, Allah ati, teleb ning arebuka, elti, kibuka, si eremunya deiyok nang nirya arye, Allah Yahweh ati, “Nun ni, anda pia telebuk ulyame,” nyabuka, el si pia erenamlulume.

Mazmur 26:8

Na ni Allah, an si eren aik dam ara, an ulyamak, na kanye pia delikunune. Ara, an ulyamak ara, pia telebuk ulula ati, na kanye delinune.

Mazmur 42:4

Tonda, na ikin unilye talak ara, ninye yuk dib tenena kum nang arye nyaninyake. An ni koproba Allah ara, dan ukulul do?’ nyabuka asipnikiba, keting noutam ap, lukunyan ap nirya, ‘Se’ tenen, mambul kirikna deiceuk unune.

Mazmur 55:14

Bukni, wini talak ara, anda na tamnye, na kwit koproba ulyamnye birye, ikin ning delinilyame. Tonda, an ap, na ap, keting tamun weik arye akunum kanye deipdanuka, teleb kibuka neika ulamupu.

Mazmur 84:10

Tonda, nun ni Allah, ance nun deiyoknye Raja melibuka talipminyeura, elda pia diksukumuk wininamle. Tonda, ‘Ance akunum wibuka deiplumnye bira, talipminyeura, elda an amu tam ulirye, pia telebuk wininamle’ tenen, moropkine.

Yesaya 2:3

Sik mutuku dana-dana unyak ninye ayala-ayala nang nirya arye, nyanamake. “Kume, amutuku ara, Allah el si Yahweh arye, wipdeiamuk mutuku anya arye, amutuku dilbinuyabe,” nyanamake. Tonda, “Se, Israel ninye, sik apu koproba Yakub biti, kalikuka melilamuk Allah ara, el aik amutuku deice domik ning ara, bulubuka dilbinamabe,” nyanamake. Tonda, “Nun nirya arye, Allah el aik domik mutuku deice welebipye talak ara, Allah arye, ‘Winina telebe, winina ara meme,’ tenelye ning peterenamsile. Ayupu kekebipyopura, elce nyasilye touk, talibuka diksukumuk unamabe. Elce melipsilyeba, el bisikuk dobolbanamabe,” nyanamake. Ati Allah arye, ‘Wininamlulume, aning ara, kum wininamlulume,’ nyabuka peteresilye yupu ara, Sion mutuku arye deiyok koubikirye, mutuku-mutuku nirya peterepra banamake. Allah arye nyasilye yupu ara, Yerusalem mutuku arye nyapsikiba, kekenamlulume.

Yeremia 31:6

“Aning nirya wininamlume,” nyapmasina ara, urdem ati kum nyapsine. Deiyok ara, dipkoprob na tenepse talak akunum uplyopura, amutuku kalikina ninye noutamak, tonoknye birye, Efraim mutuku noutamak yukupnamle. Ara, nyapnamle. “Anggun nirya yangalulume. Nun nirya tuba tamubuka, Sion mutuku binamabe. Ara, nun ni koproba Allah, el si Yahweh, el si eren aik dam bibirye, el si erenamabe,” nyabuka yukupnamle.

Yehezkiel 46:10

Sik ninye deiyok nang Raja, Allah Yahweh el aik wekelbinukce talak ara, sik talye Israel nang babye, amutuku noutam unyak nang ap, Raja ap, neika wekenamnyake. Winipmaca ani, tamubuka binukce talak nirya babye, neikto touk tamubuka binamnyake.

Mika 4:2

Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.