Mazmur 119:119 - Eipomek

¹¹⁹ Sik malye winin ninguk, talibuka wininyak ninye ap, anang arye malye wininyak ning nirya ap ati ara, Allah ance, ‘Aning nirya ara, na like. Ati, anang ap, sikce wininyak ning ap, nirya ara, ninye arye malye din bama dobuka, bura donoklamak ning atonun ulule,’ tenelyame. Aning ati ara, ance, “Aning ara, wininamlume. Aning ara, kum wininamlume,” nyapsulum yupu nirya ara, na pia teleb kanye delinune.

Mazmur 119:119 ပူးပေါင်းရင်းမြစ်များ

Mazmur 119:111

Allah ance, “Aning ara, wininalulume. Aning ara, pia kum wininamlulume,” nyapdeiamsulum yupu ara, pia moubuka talinamne. Ara, minop talak arye, an yupu arepnulumba, aninguk talibuka wininirye, ayupu ara, pia ati aupnamle. Tonda ance nyasilyam yupu ara, weik mambul yupu ulula anya arye, adeice nara, pia kanye tenepnirye, pin-pina asa uniliba, telebuk unamne.

Mazmur 119:47

Ance, “Aning ara, wininalulume. Aning ara, pia kum wininamlulume,” nyapdeiamsulum yupu, kekebuka winina ati, na kanye delinamne. Aning ati ara, an yupu bobuka, yuk ninye dam laka nyalbinamne talak ara, alye kum dakanamne.

Yesaya 1:25

Na yupu yanibuka malye winimunye ning ati, ikin ning anggun deice deipnamsine. Tonda kat ning el si perak urasin pia teleb uamlya ani, butbuta palilamle ning, uku dongobikiba, malye ning kum dalirye, teleb ulamle touk, narye, anggun malye winin ning kum daneipnamsine. Anggun malye winilulum ning nirya ara, kilibuka bataknamsine. Winipsinyopura, anggun nirya telebuk unamlume.

Yeremia 6:30

Ati ara, ninye arye malye perak bataklamaka touk, na Allah arye aninye sik si ara, ‘Malye Perak,’ nyanamne. Deiyok ara, narye sik malye wininyak ninye ati, akunum lik weik upnila ati, sik batakse nyapne. Perak ara, pia teleb ning bukni, talye donoklamak ning atonun wininyaka ati nyapne. Na Allah Yahweh arye sikti, akunum batakse.” Allah arye Yeremia biti, nyapdeibukba, Yeremia birye, ayupu sekuk.

Matius 3:12

Batce dipnulinye bira, batce bama labuka, uku dongoplirye, batce nonguk dilamle touk, Yesus arye ninye nirya bokuka, teleb ning doproplirye, malye ning bataknamle. Ninye arye din ning teleb ning yo lalina deice delilamak touk, Allah arye elti, diba tenebikirye, diksukumuk wininyak nang ara, aninye dobuka im deice deipliba, el ap neika pia unamake. Tonda, ninye arye, din ning bama labuka, uku dongolamak touk, Yesus arye malye winin ninye nirya dobuka, uku pia dilulak dongopnamle. Auku ara pia kum tangaptue, pia dinamle.” Yohanes arye awekmek nang nirya ati, adomon yupu nyabuk.

Matius 7:23

Bukni, narye aninye ati, adiparyuk laka kibuka nyapnamne. ‘Anggunda kanye talima pia malye ululum nang anya arye, na dam arye bindoplulume. Anggun winilamluma ara, na kum kel bikamsise. Anggunda na mapu koprop kume. Anggunda na walwale,’ nyapnamne,” Yesus arye nyabuk.

1 Samuel 15:23

Ara, urdem ati kume. Allah el kanye ara, malye winin ning aupmalebuk, Allah ati batakna ara, malye weik un ninge. Deiyok ara, Allah yupu batakna ara, ninye kirdona atonun winin ning atie. Aning atonun, kanye talima pum tam erepdace nang ara, sik wininyak ning ara, Isa Mutuku Dongonye si eren nang, winilamaka atonun unyake. Ati ara, anda Allah arye, ‘Wininamlyame,’ nyapdeiamkuk ning, yanipmoma ati ara, Allah arye anti, ‘Ninye deiyoknye unamle’ tenen, erebuka tikeipkuk ning ara, akunum batakile,” Samuel birye, Saul biti nyabuk.