Tonda, Allah elce kwepdeiamukba, tukwak mutuku noutamak kam ulul ning ayala-yala nirya arye, Allah Yahweh el tibuk kanye deibuka, kibuka erebikirye, el siuk erenamake. Nun ni koprop Allah, el si Yahweh ati, “Anda pia teleb ulyame,” nyabuka, el siuk erenamabe. Akunuma. ‘Tukwak mutuku noutamak kam ulul ning nirya arye, Allah ati, “Telebe,” nyapnamak’ tenen, Haleluya nyapne. Na Sisinanye Raja Daud arye, akunuma nyapne.
Mazmur 117:1 - Eipomek1 Anggun tukwak mutuku ululum ninye, mutuku sirya, im sirya nirya arye, nun ni Allah si Yahweh ati, “Se, nun Allah, anda pia telebuk ulyame,” nyabuka, el si ati erenamlulume. Yata yala ninye do nirya, nun ni Allah ati, “Nun ni Allah, anda aning-aning deice tam ulyamce, pia telebuk ulyame,” nyabuka, elti, si erenamlulume. အခန်းကိုကြည့်ပါ။ |
Mazmur 117:1
12 ပူးပေါင်းရင်းမြစ်များ
Diba, sirya talak ara, tukwak mutuku unyak nang, mutuku sirya, im sirya nirya ara, anti, ilil weik upliba, an dam ara, kutam tuku deice dipdongobikirye, sik kisok kanulongonamake. Winibikirye, ‘Se, diba Allah ara, pia mikip weik ululnye,’ nyabuka, an si erebikirye, an si erena ati, mot nyanamake. Diba, mot nyana ati, lelim nyalamle ning bobikirye, “Se, Allah ap, el si ap ara, pia telebuk ululnye,” nyabuka, an si erebikirye, mot nyanamake.
Na ni Allah ance, “Aning wininamlulume. Aning ara, kum wininamlulume,” nyabuka, nyapdeiamsulum yupu ap, ance mambul pil dolulum ning nirya ap, ‘Mutuku-mutuku nirya, daunyak ninye kel biknamake’ tenen, moronyabe. Tonda, an mikip arye, damutuku-damutuku, im sirya, mutuku sirya nirya unyak ninye ati, tuba lyesilyame. ‘Winibuka uminyeba, ninye nirya arye, eibuka kel bikikirye, an si pia erenamkiyake’ tenen, moronyabe.
Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.
Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
ကြော်ငြာတွေ