Mazmur 115:18 - Eipomek

¹⁸ Wininyak bukni, nun tuba kam unmap ninye tonok ara, kam unmap talak aryuk, Allah ati, telebe nyabuka, kibuka erebibirye, el siuk erenamabe. Wini talak arye dipdongobuka, yuk talak nirya ara, pia ati, el siuk erenamabe. Allah Yahweh ati, telebe nyapne.

Mazmur 115:18 ပူးပေါင်းရင်းမြစ်များ

Mazmur 113:2

‘Ninye mutuku sirya, im sirya nirya arye, nun ni koproba Yahweh ati, “Anda pia telebuk ulyama ati, an si ara, pia teleb siuk ulule,” nyabuka, ‘El si erenamak’ tenen, patasulule, ‘Winibuka nyanamak’ tenen, moronyabe. Ara, “Atalak babye, aminyan talak babye, tonda doupnamle talak babye, ‘Ninye yala-yala nirya arye, Allah ati, ‘Anda pia telebuk ulyame!’ nyabuka, ‘El si erenamake’ tenen, patasulule,” nyabuka, moronyabe.

Mazmur 145:2

Asum-asum nirya, narye Allah antibuk, “Anda pia telebuk ulyame,” nyanamkine. Winipnirye pia ati, “Anda pia mambulnye ulyame,” nyabuka, ‘An tibuk kipkinirye, si erenamkine,’ tenenune.

Mazmur 145:21

Ati, nara asum-asum nirya Allah Yahweh, antibuk si erenamkine. Aning atonun, Allah ance kwepdeiyalumba, kam unyak ning ayala-yala nirya arye, Allah Yahweh an si atibuk, asum-asum nirya, an siuk pia erenamkiyake. An si erepnamak ning ara, pia kum bataknamake. Sisinanye Raja Daud, el mot sena deice arye nyalamuk.

Daniel 2:20

Daniel birye Allah ati, si erebukce, ayupu nyabuk. “Allah anda pia unamlamnye, telebe nyabuka, si erepkine. Anda weik kel kina ning nong noutam ning, kel kina ap, mikip weik ap ara, anuk ulyame.

Wahyu 5:13

Amot kekepse talak ara, adiparyuk tonok mot ton nyanmekba, kekepse. Ara, kam ulul ning ayala-yala nirya, im deice ulul ning ap, tukwak mutuku ulul ning ap, laut mekwen deice ulul ning ap, laut mekwen pum tam ulul ning ap, tukwak mutuku amu tam ulul ning ap, tonok babye batakna kum, sik nirya arye amot senmekba, kekepse. Amot senmek yupu ara, ani. “Weik ninye deiyoknye bun ning deice bululnye Allah ap, Domba Mi Atonye ap ati, nun kam unyap ning nirya arye, sik bitinye ati, ‘Sikda pia telebe,’ nyabuka, kibuka sik si pia erenamabe. Si eren ning nirya ap, mikip weik ulul ning nirya ap ara, sik deiceuk pia unamle. Aning-aning nirya ara, wini talak arye dipdongobuka, doryanamle talak noutamak nirya ara, sik deiceuk apia unamle,” nyabuka mot senmekba kekepse.