Mazmur 107:32 - Eipomek

³² Tonda, sik aninye arye, Allah Yahweh ninye kum winipmanto ning, mambul pil dolamuk ning nirya ara, yupu bobuka, yuk ninye ati, laka nyalbinamake. Tonda, Allah el yupu talibuka, pil donyak nang, sik wisi-wisi nang ara, ninye yupu bokolina ati, bulunyakak laka nyalbinamake.

Mazmur 107:32 ပူးပေါင်းရင်းမြစ်များ

Mazmur 111:1

Nun nirya ara, nun ni koproba Yahweh ati, “Anda pia telebuk ulyame!” nyabuka, elti, si erenamabe. Tonda, na kanye talima noutam nirya arye, Yahweh ati, “Anda pia telebuk ulyame!” nyabuka, el siuk erenamne! Tonda, Allah arye, ‘Aning wininamlume. Aning ara, pia kum wininamlume,’ nyapdeiamsuk yupu, moubuka talikirye, diksukumuk wininyak nang bulunyakak binuka, Allah ati, ‘Telebe,’ nyanamne. Aning atonun, sik Israel yala ninye nirya arye, ‘Allah el dam binuka unamabe’ tenen, bulunyakak ara, narye, Allah ati, “Anda pia telebuk ulyame,” nyabuka, el si erena ati nyanamne.

Mazmur 119:46

Tonda ance, “Aning ara, wininalulume. Aning ara, pia kum wininamlulume. Teleb winina ara ani,” nyapdeiamsulum yupu dobuka, narye ninye deiyok talibuka wininyak nang, kekena ak nirya laka nyalbinamne. Ayupu bobuka, ninye deiyok nang, sisin nang kekena ati, laka nyalbinamne talak ara, alye ton pia kum dakanamne.

Mazmur 18:46

Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.

Mazmur 22:22

Na ni Allah, ance lyepniminyopura, na tam nang yanuka bulubuka, an si erena ati, yanuka wekice talak aryuk, narye Allah, an si pia erenamkine. An si erena ati, ninye nirya bulubice talak ara, ance lyepnamnilam ning nirya ara, sik kekena ati, laka nyanamne. Winipyopura, an siuk erenamkiyabe.

Mazmur 22:25

Allah ance na talima pum tam arye, nyapdeiamnulum ning nirya ara, an mapu bulubuka wekmace sukum arye, laka nyanamne. Ara narye, “Na ni koproba Allah ati, el si erepnamne,” nyabuka, nyalin yupu deice arye, nukamkise ning ara, sik dam laka nyanamne.

Mazmur 26:12

Na telebuk wininuna ati, ikin ning na dam ton pia kum yanamnile. Ati, ance wipdeiamsulum nang arye, an si erena ati, tonokak bulubiceura, an si erebuka, anti, ‘Pia telebe,’ nyanamak talak ara, na babye atonun, Allah Yahweh, anuk neika si erenamkine.

Mazmur 35:18

Na ni Allah, ance nati, akunum lyepropniminyopura, nun Israel yala nang nirya, ‘Allah el siuk erenamabe’ tenen, bulubibirye, an si eren aik dam, neika binamap talak ara, narye anti, “Naio pia telebe nyapkine,” nyabuka, an siuk erenamkine. Diba, nun Israel nang nirya, ninye nukman kumto ubuka bulubibirye, an si erena ati, neika unamap talak ara, narye, “Allah anda, pia telebuk ulyame!” nyabuka, an si erenamkine.

Mazmur 46:10

Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.

Mazmur 66:16

Yata mutuku nang do nirya, Allah ati ilil tenelulumce, ulamlum nang nirya ara, anggun babye, na amot nyanmanye dam yamunce, kekenamlume. “Allah arye, na melina ati, mambul pil melibuka dolamnuk ning ara, ani,” nyabuka nuknirye, laka nyanamne. Ati, anggun nirya ara, na dam yamunce, kekepnululume!

Mazmur 99:5

Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.

Mazmur 99:9

Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.

Keluaran 15:2

Allah el si Yahweh, elda mikip weiknye anya arye, na kanye talima el deice uk delinune. Elce Mesir mutuku noutamak arye nun dobuka lyepmasil ati, narye Allah el si erebuka kisal donune. Nun ni Allah ulula ati, kanye deibuka mot nyabuka si erenamne. Elda nun ni Allah el uka ulula ati, el si erenyabe. Elda nun apu yapu ati kalikuka pia meliamuka anya arye, elti, kisal dobuka el si erenyabe.

Yesaya 12:4

Atalak akunum kiplyopura, anggunce nyapnamlulume. “Nun nirya arye, Allah el tibuk, telebe,” nyabuka, el siuk erepnuyabe! Tonda, ‘Elcuk melibuka lyedopnamsilʼ tenen, el tibuk morobibyakarye, el siuk erenamabe. Tonda, Allah el mikip weik arye, mambul pil dolul ning nirya ara, ‘Yuk mutuku nang nirya kekepnamakʼ tenen, aning laka nyalbinamlulume. Tonda, “Nun ni koproba Allah, mambul weiknye ulula ati, el pia teleb siuk, pia telebe,” nyabuka, erenamabe. Ati ayupu nyabuka, laka nyalbinamlume.

Yesaya 25:1

Se, na ni koproba Allah Yahweh, narye antibuk, an si erepkinirye, anti si erekunune. Tonda, antibuk, ‘Telebe,’ nyabuka, an siuk erekunune. Deiyok ara, Allah ance min talak arye, ‘Apil dopnamle,’ tenyamlum touk, aninguk ninye winipman kum pil, ance akunum dolyame. Allah ance, ‘Aning ara, winipnamne. Aning ton winipnamne,’ tenyamlum touk, dipkoprob winilyame. Ance pil dolyam ning ara, pia ilil weik ning pil dolyama anya arye, aning nirya ara, pia ati unamle. Tonok babye, min kum kum datue. Aning ebuka kel bikisirye, pia weik tonun si erenamkine.