Matius 7:7 - Eipomek

⁷ Yesus arye ayupu nyabuk. Anggun patasilye ning moropmunyopura, Allah kekepsilirye, aninguk arenamsile. Anggun patasilye ning, ‘Danak eipnuyap do?’ tenen, epkirikmunyopura, eipnamlume. ‘Anyasik abuka wektinye’ tenen, bisik lorum-lorum abuka, pitin-pitin upmunyopura, Allah arye buplan kukeipnamsile.

Matius 7:7 ပူးပေါင်းရင်းမြစ်များ

Kejadian 26:32

Sik kwalipmik sum anyuk, Isak domba wein nang arye, el dam yanuka nyabik. “Naie, nun mek dina ati, winiryuk mekwen ton palipmap, mek mekwen deipmasile,” nyabuka laka nyabikba,

1 Raja-Raja 3:5

Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

Mazmur 10:17

Nun ni Allah Yahweh, nun kanye namin asa unyap nang arye, nun patapsiliba, anti morokinyap ning nirya ara, adiparyuk kekepsilyame. Tonda, nun kanye imun usulul ning nirya ati, melipsimince, nun talima kwa dinamsilame!

Mazmur 10:4

Tonda, sik urasin eibibirye, bikinyabe. Sik talima noutam ara, pia maknya kintinin nanguk unyaka ati, sikce utenenyake. Sikce, ‘Kume, nun malye wininyap ning ap, teninyap ning ara, Allah arye eibuka kum bikisulule,’ tenenyake. Sikce teninyak ning ara, ‘Kume, dipkoprob Allah ara, kum ulule. Allah ati nyace yupu nirya ara, talye yupu uka,’ tenenyake.

Mazmur 119:12

Diba, na ni Allah Yahweh, anda pia telebuk ulyama anya arye, nara an siuk erenamkine. Winikiniba ance nunti, “Teleb winina ara ani,” nyabuka, nyalisiminye yupu nirya ara, nati melibuka peterenamnilame.

Mazmur 27:8

Na ni Allah, na talima pum tam arye, ‘Allah el si erepnune,’ tenepe talak nirya ara, na adiparyuk tenebuka, an siuk erenamkine.

Mazmur 34:4

Ati ara, anggun nirya, na dam yanganamlume. Yamunba nun nirya arye, “Allah el mikip weik arye winilul ning nirya ara, pia telebuk winilule,” nyabuka, Allah el siuk erenamabe. Aubirye, Allah el si erebibirye, neika si erenamabe. Winibuka ulamepya ani, ninye weika arye, tonap tabakuka kekebikirye, ‘E, diba Allah elda pia mambulnye ulule,’ tenebuka unamake.

Mazmur 37:4

Anggunce, ‘Nun ni koproba Allah Yahweh, elda pia mambulnye ulula ati, el tibuk pia kanye deibuka unamabe,’ tenepmunce, Allah arye, ‘Aning telebe,’ tenelye ninguk, talibuka unamlulume. Winibuka winimunyopura, anggun talima pum tam arye, pia ‘Se,’ tenepmunba, teninmamunye touk, Allah arye arenamsile.

Mazmur 50:15

Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

Mazmur 69:32

Aning winibuka winikinyopura, Allah ance, ‘Aning ara, pia dipkoprop, teleb ning arepmanile,’ tenenamnilame. Bukni, weik yim sapi basam obikirye, an arena ati, boyatinya babye, ‘Aning ara, mitik teleb uka,’ tenepnutume. Tonda, weik yim sapi, el yan kala sirya ning ap, el kisok deice yang belelamle ning ap, akepman yanuka arepkitinya babye, ‘Aning ara, mitik mambul uka,’ tenepnutume. Bukni, na kanye talima nirya arye, antibuk moubuka kenekinirye, mot nyana deice, an si erekinyopura, ‘Ara, pia telebe unmale,’ tenepnutume.

Mazmur 70:4

Tonda, anang arye nati, ‘Moubuka ikin upmale,’ nyabuka, nalininyak nang ara, ‘Anye opnuyabe’ tenen, warikininyak bukni, ance sik tenenyak ning dobukapmince, tamubuka sik deice deipmin buk, alye weik dakalanamak’ tenen, moropkine na nio.

Mazmur 86:5

Narye an Allah Yahweh ati, ‘Melibuka lyepdopnilyame!’ nyabuka, morokununa deiyok ara, ani. Ara, anda aning-aning nirya talimince, deice tam erebuka, mikip weik deiyoknye ulyam bukni, ance kanye deipsimince, nun malye wininyap ning ati, namin kipsimince, kum danalilyame. Anda pia telebnye ulyama atia. Tonda, yata ninye do nirya, sikce antibuk, ‘Naio, ancuk melibuka lyepsilyame!’ nyabuka, morokinyak nang ati, lyepmince, pia teleb kililyame. Tonda, anda, ‘Weik tonun bico tenesimince, pia telebuk kilinamsine,’ nyapdeiamsulum yupu ara, weik tonun nyasilyama ati nyapkine.

Amsal 8:17

Sikce nati patapliba, ‘Se, pia weik kel bikna deiyok ning ton doproptibye’ tenen, tuba teneninyak ninye ara, narye sikti, bico tenenirye, melinune. Tonda, yata mutuku ninye do nirya, sikce, ‘Se pia weik kel bikna deiyok ning doproptibye’ tenen, nati patapliba, pia pi dobuka, eninyak ninye ara, dipkoprob sikce pia weik kel bikna deiyok ning, akunum talibuka unamake.

Kidung Agung 3:2

Ati ara, wini talak ara, na buknirye, weik asik unyap noutam ara, na talima noutam arye, pia kanye delinunye biti, ‘Dan sukum unmal do?’ tenen, pia elbinamne. Ara, nun mutuku nang nirya banyap bisik nirya ara, ‘Yupu talipnuyapʼ tenen, bulumak sukum nirya ap amutuku noutam bukni, dana-dana tam nirya ap, ‘Dan sukum unmal do?’ tenen, pia epra binamne. Dipkoprob ning ara, narye na weik tonun bico tenenunye biti, akunum ouku weik tonun dipra balamse bukni, elti, pia kum eipse.

Yesaya 30:19

Anggun Yerusalem mutuku weik asik noutam ululum ninyeo, anggunda tuba-tuba kum engenamlume. Anggunce Allah ati, “Se na nie, anda melipsilyame,” nyabuka moropmunyopura, elce anggun moropmamunye ning ara, kekepsilirye, amoropmamunye touk ubuka, melipnamsile. Deiyok ara, Allah arye anggun malye winilamlum ning ati, talye kanye bobuka oplopsutu bukni, anggunti weik tonun bicoe, tenesulula anya arye, talima namin aryuk, kekepsilirye, lyepnamsile.

Yeremia 33:3

Anggunce amutuku ulamlum ninye arye, nati, ‘Nun ni Allah, aminyan talak upnamle ning ara, lak nyapsilyame,’ nyabuka, moropnimunyopura, narye anggun moropnimunye ning kekebuka, laka nyanamsine. Ara, narye anggun bikina kum yupu, pia mambul weik ning, minop talak min kum laka nyapdeipsise ning, lak arye laka nyapdeipsiniba, kekepmunce, biknululume.

Amos 5:4

Na Allah Yahweh arye nyapsine. Se na mapu, Israel yala nang, anggunda, ‘Naʼ tenen, ninye ululuma anya arye, anggun malye ululum ning batakmunce, anggun tamubuka, na damak yamunyeura, anggunda pia kam unamlume.

Matius 18:19

Dan mutuku do nirya, nati dib teneplumce, na si deice arye bulupmunyopura, na babye anggun unmamunyakuk, neika unamabe. Na ap neika unamabe. Tonda neika unamaba ati, anggun Allah moronamlum talak ara, ninye bitinye nang kanye tonok tenebuka, moropmunyopura, na ni Allah im deice ululnye kekepsilirye, anggun moropmamunye touk melinamsile,” Yesus arye el mapu 12 nang ati nyabuk.

Matius 21:22

Aning ati ara, na nyapsine. Allah moropmamunye talak ara, aning-aning moropmamunye ning nirya ara, ‘Allah arye dipkoprop arepnamsile’ tenen, kanye bokoltona kum diparyuk, diba tenebuka moropmunyopura, Allah arye dipkoprop arenamsile,” Yesus arye nyabuk.

Matius 6:33

Aninguk tenebuka, kum unamlum bukni, weik mambul ning ara, Allah arye, ‘Wininamake,’ tenen, nyasilye touk, diksukum winina ap lyepsilirye, nun kanye talima talibuka unamsil ning ap, im deice welepnamlum ning ap, aninguk minopce tenepmunce, pia moubuka talipmunyopura, yuk yala ning nirya babye, elce dipkoprob arenamsile.

Matius 7:11

Anggunda, talimak malye winilulum nang bukni, anggun mapu ati, teleb ning arena ara, akunum kel biklume. Winimunye ning ara, mitik teleb ubuka, mitik anun arye arelulum bukni, anggun ni Allah im deice ululnye birye, el kanye talima pia telebnye binya arye, elti, moronyak ninye arenamsil ning ara, weik telebe uka.

Matius 7:8

Aning ati ara, na dipkoprop nyapsine. Yata nang do nirya, Allah ati morolamak nang ara, Allah kekeplirye, arepliba dolonamake. Elkirikilulnye bira, Allah arye melipliba eipnamle. ‘Anyaik wekuka bitinye’ tenen, bisik lourum-lourum abuka, pitin-pitin ululnye bira, Allah arye abuplan kukeipliba weknamle.

Markus 11:24

Aning ati ara, na nyapsine. Allah morolulum talak arye, aning-aning morolulum ning nirya ara, ‘Aning dipkoprop akunum arepmanile’ tenen, diba tenepmunyopura, Allah arye dipkoprop arenamsile.

Lukas 13:25

Anyaik deiyoknye birye buplan akunum dekdongoplyopura, anggunda, buru tam buplan dam tikilbimunce, ‘Naio nun ton wektibye’ tenen, patapsila anya arye, “Nunti buplan kukdeipsilyame,” nyabuka, lorum-lorum abuka weik arye moropnamlum bukni, anyaik deiyoknye birye tamubuka, “Anggun dan mutuku arye yanmalum nang do? Na ap neika kum ulamubu ati, anggunda na pia walwale. Na tam nang kum ululume,” nyapsilirye, bataknamsile.

Lukas 18:1

Yesus arye, ‘Na mapu ara, batakna kum arye Allah moronauk unamak,’ tenebukce, ‘Winipmanto yupu nyapnyeura, kel biknamak,’ tenebuk ati, ayupu nyabuk.

Yohanes 15:16

Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile.

Yohanes 15:7

Bukni, anggunce na batakana kumce, na ap talima dukdongobuka, nauk diba tenebuka, na yupu kekemunce, ayupu anggun kanye talima noutamak tuba uplyopura, yata ning do nirya, anggun patapsilye touk moropnumunyopura, kekepsinirye aninguk arenamsine.

Yohanes 4:10

Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.

Roma 2:7

Aning tonap laka nyapnusine. Yata ninye do nirya sikce, ‘Kume, Allah arye nunti, pia teleb una deiyok ning ap, kam pia una deiyok ning ap arepsutuba, elti, pia si erenamep’ tenen, patalyeba batakna kumce, pia pi dobuka, teleb winin ninguk talibuka wininyak ninye ati ara, Allah arye bol koplobuka, pia kam una deiyok ning arepnamle. Anyaripnamle ninye ara kam pia unamake.

Roma 3:11

Sik nirya Allah el ulul ning ati, pia moubuka kum kel kinyakce, walwaluk unyake. Tonoknye babye, ‘Se, na ap, Allah ap neika utinimnye’ tenen, patalyeba kum kel bikinyake.

Ibrani 11:6

Yata ninye do nirya, ‘Allah el si erebuka, el mapu unamap’ tenen, patalul ninye nirya ara, adiparyuk, ‘Allah dipkoprop ulule’ tenen, minyuma diba tenepnamake. Diba tenebikirye, ‘Allah el si erena ati, pia pi dobuka winilamiceba, ‘Allah arye menenga ning arenamle’ tenen, kanye bokoltona kum diparyuk, diba tenenamake. Aning ati ara, yata ninye do nirya, Allah ati dipkoprop diba kum tenebikcopura, Allah arye sikti, kanye kum delinamle.

Yakobus 5:15

Kanye bokoltona kum arye, Allah pia diba tenebikca deice arye morobikcopura, Allah arye, uk dilamlinye kweteipnamle. Kweteiplirye, kam bulinamle. Auk dilinye bira, minop arye malye ulamtuopura, Allah arye anye bira el malye winina ati, namin kiplirye, kum daneipnamle.

1 Yohanes 3:22

Tonda, Allah arye, “Wininamlulume,” nyasilye yupu nirya moubuka kekebuka dobolbabirye, el kanye deililul piluk donyabe. Winibibyeopura, yata ning do nirya, nun patapsil ning, ‘Elce melipnusil’ tenen, Allah ati morobibyopura, kekepsilirye, aning nirya arisilibuk, dolonamabe.