Matius 7:16 - Eipomek

¹⁶ Winibuka wininyak bukni, sik wininyak ning moubuka eililum deice arye, ‘Aning ara, tilila nang unyake’ tenen, kel bikinamlulume. Anggun kel bikna ati, winipmanto ning nyapnusine. Ura, ninye arye, ‘Sumik duk daknuyabe,’ tenebikirye, cunang tapu deice mouamlyak ton dakanyak do? ‘Kisang dakuka dipnuyap’ tenen, kwalip naca tapu deice arye dakanyak do? Kume.

Matius 7:16 ပူးပေါင်းရင်းမြစ်များ

Amsal 20:11

Tonda, nunce yata mapu do nirya, sik unamak ning ati, ‘Yata wiribuka unamak do?’ tenen, moubuka dinamabe. Winibuka dinauk ulamibiba, sikce teleb unyak ning ara, lakak uk ulule. Aning atonun, sikce malyeuk unyak ning babye, lakak uk ululba eibuka kel kinyabe. Aning ara kum duknuptinge. Aning atonun, nunce wisi nang sik winilamice ning eibibirye, ‘Sik wininyak ning ara, pia teleb kibuka unyake,’ teneptibye. Teneptibirye, ‘Aning ara, pia teleb unyake, anang ara, tuba-tuba malyeuk winipre banyake’ tenen, kel kinyabe.

Matius 12:33

Yesus arye nyabuk. Duk moulamle yo nirya ara, ‘Yatato yo duk moubuk do?’ tenen, duk mouamlya eibibyeopura, urasin biknarye, adiparyuk, ‘Ayo el yala anye, ayo ara, el yala anye,’ tenen, kel kinyabe. Yo duk mouamlya deice arye, kel kinyaba anya arye, yo duk teleb ning mouplyopura, ‘Ayo ara teleb yo,’ tenenyabe. Duk malye ning mouplyopura, ‘Ayo ara malye yo uka,’ tenenyabe. Aning ati ara, na wininye ning teneipdenululume.

Matius 7:20

Anyapmasin touk, yo yala nirya yo duk moupliba eipmunce, ‘Ayo yala ara anye,’ tenelamluma atonun, atilila yupu peterenamak nang arye, sik wininamak ning deice arye, eibuka kel bikinamlulume.

Galatia 5:22

Ura, amalye-malye winina kum bukni, teleb yo arye, teleb yo duk moulamle touk, Allah El Dib Kanye, el mikip arye melisilyeba, wininamap ning ara nyapnusine. Ateleb winin ning ara, ani. Ara yuk nang ati bico tenebuka melilana ap, kanye deibuka pin-pin asa una ap, kanye teniltona kumce, kanye deibuka una ap, yuk nang arye nunti malye updeipsica babye, talima namin asa arye una ap, yuk nang pataplye ning ati melina ap, diksukum una ap, ikin upsilya babye pil batakna kumce, pi dobuka pia pil dona ap,

Yakobus 2:18

Bukni, tonoknye birye, nati nyapnutue. “Kume, tonye bira, diba tenen ninguk upmale. Yuknye bira, diksukum winin ninguk upmale,” nyapnutue. Bukni, narye tamubuka nyapsine. Anggunce, anggun winin ning laka nyana kum arye, “Na diba tenepse ning ara, ani,” nyabuka, talye yupu deice arye, laka peterepnutum bukni, lakak nong kum kel kipsitinye. Nara anggunti, na diksukum wininun ning, laka nyapsitinyopura, na winin ning deice arye, diba tenepse ning ara, nong lakak uplibuk, aning deice arye, kel kipnamlume.

Yakobus 3:12

Aning atonun na weit yapu tenipdelulume. Tonok yala yo duk moulamle yo arye, yuk yala yo duk mouptu do? Tonda tonok duk moulamle tapu arye, yuk yala tapu duk mouptu do? Kume, kwarang yo arye, kabalye yo duk kum mouptue. Aning kum winipmanto. Aning atonun, teleb ulamle mek ap, sisilya mek ap, tonok mek pu donarye kum yatue. Aning atonun, nun si bam bol tonok aniryuk, Allah si eren yupu ap, yuk ninye ati malye len yupu ap, talye tabakuka kum nyanamabe. Aning ara, pia malye.

1 Samuel 24:13

An kele, nun apu yapu arye minop talak nyalamik touk, nun yala nang tuba nyanyake. “Kanye talima malye nang arye malye winin ninguk wininyake,” nyanyake. Bukni, na bidamnye taruk aryuk anti malye kum updeipmakine. An nong deice ikin ning kum deipnamkine.