Nyabukopura, Betel mutuku ulamuk nabi, wisinye birye tamubuka, Yehuda mutuku ulamuk nabi ati, tilila yupu nyabuka ara, “Na babye nabi unune. An uminye touk, na babye unune. Allah el im deice pil donanye, Malaikat arye, na dam yanuka, nyapdeipmanilce, ‘Anye bira bobinuka, an aik boyanulyame,’ nyapmanile. Ati ara, anda na aik din neika dipnuname,” nyabuka, tenepce, tilila yupu deice nyabuk.
Matius 7:15 - Eipomek15 Yesus arye ayupu tonap nyabuk. “Kekenululume. ‘Tilila yupu peteren nang arye yanuka peterepsikcak’ tenen, kanye moubuka unamlulume. Ara, anang arye, ‘Allah el yupu peterenyabe,’ nyabuka talya nyaplopsikiba, tilila yupu peteren nang yanuka peterepsicopura, mangkau kanye bobuka, sik nyanyak yupu diba teneluluma ati, anggun moubuka tenepmunce unamlulume. Anang sik winina ara, kanye talima mitang arye teleb winin nang atonun wininyak bukni, sik talima ak ara, yua basam atonun unyake. Ara, yu una ap, wirik-wirik ana ap, unyaka ati nyapsine. အခန်းကိုကြည့်ပါ။ |
Matius 7:15
54 ပူးပေါင်းရင်းမြစ်များ
Na Allah Yahweh arye, im deice unyak yin talin malaikat nirya sik deiyoknye unirye, anggunti, ayupu nyapnusine. Tonda, na Allah ununa ati, anggun Israel yala nang nirya ara, na siuk erenululume. Narye, ninye si Kolaya, elce deiamuknye, Ahab ap, tonda, Mahasea elce deiamuknye Zedekia ap, sikce tilila yupu nyasinyake. Abitinye nang arye, “Kume, nun ni Allah si deice arye nyapsiyabe. Allah arye, doupnamle talak yanamle ning ara, ani-ani,” nyapdikirye, tilila yupu uk nyasinyake. Sik bitinye ara, pia malye ururaka ati, narye sik anang bobinuka, Babel mutuku talibuknye, Raja Nebukadnesar, el taruk deice deipyopura, anggun amutuku nirya dinmamunye buk, sik abitinye nang opliba, eipnamlume.
Ati ara, na Allah arye, Nehelam mutukunye Semaya biti, dipkoprob wenepnamane. Ara, Semaya ap, elce deiamukba, dadeipdanin yangalamik nang, el mapu koproba nirya babye, wenepnamne. Winipnyopura, na Allah arye, na mapu koproba, anggun Israel nang ululum ati, aminyan talak tonap, teleb kipdeipnamsin ning ara, Semanya ap, el mapu silip nirya ara, sikce ton kum eipnamake. Sik ap, el mapu silip nirya ap ara, dipnamaka atia. Ati ara, na Allah arye na mapu koproba, anggun Israel yala nang ati, tonap, teleb kipdeipnamsin ning nirya ara, sikce kum eipnamake. Deiyok ara, ani. Ara narye kum nyapsise yupu bukni, tilila yupu ap, minin yupu ap, Semanya birye nyalamuka deice arye, anggun kekelamlumce, anggun babye, na yupu yanipmanto kiplume. Ati, Semanya birye, na yupu yanipnukce, anggunda, malye bisik dobolbana ati, bobinmanto upsuka ati, el dengna ati, el ap, el mapu silip nirya ap, dipnamake, nyapne. Na Allah Yahweh arye, ayupu nyapmasin ning ara, dipkoprob nong kunupnamle! Allah arye nyabuk.
Ara, yuk nang ati kume. Ara, anggun talye-talye yupu nyalulum nabi-nabi nang atia. Anggun kanye aryuk tenibuka nyalulum ning ara, ‘Kume, Yerusalem mutuku ap, nun nirya ara, teleb unyabe. Aminyan talak ara, ikin nun dam pia kum yanamle. ‘Mal olana kumce, talye kanye bobuka, teleb neika unamabe,’ nyabuka, tilila yupu, pia nyalulume. Bukni, aning nirya ara, talye nyaltakna yupu nyalulume. Ayupu nirya ara, na Allah Yahweh, pia deice tam erebuka, aning-aning nirya talibuka, Pia Mikip Weik Deiyoknye birye, akunum nyapsine.
Sik pia teleb diksukumuk unyak nang ati, yuk-yuk ning, sik dam ton kum winipse bukni, anggun mem pil dolamlum kilapu arye, minin yupu nyalamlum yupu arye, sik talima noutam ara, mitik tonun arye, kanye tenilamikce, imun kanye bobuka ulamikce, ‘Se’ tenen, talima dakalsaknauk ulamuk. Bukni, sik malye ning talibuka, malye weik wininyak nang ati, sikce, “Kume, anggun malye weik winilulum ning ara, batakna kume. Talya lubakibuka wininamlume. ‘Allah arye wenebuka opsilyak’ tenena ara, pia meme,” nyabuka, nyalamluma ati, anang ara, malye winin ninguk, tuba unyake.
Sik mutuku noutam, deiyok kibuka talinyak nang arye, malye un nang ara, ani. Sik kanye aryuk, ‘Aning ara, winiptinye,’ tenenyak ninguk, sik Israel yala nang noutam ara, aninguk talye lubparabuka wininyake. Sik adeiyok nang ara, winipmanto, weik yu singa kus arye, el dina obuka, si tobuka boplirye, weik yupu nyalamle atonun unyake. Deiyok ara, sik Israel yala ninye deiyok nang arye, sik tam nang ton onyake. Oplobikirye, sik obikce nang arye talilamikce bona nirya ara, ubula alubuka dolonyake. Winibice deice arye sik obice nang domikce kilapu ara, youwakuk unyake.
Aninguk kum bukni, sik Israel nang unyak mutuku noutam, ninye deiyok kibuka, taleamikce ulamik touk, tuba unyak deiyok nang babye, pia malye weik wininyake. Winipmanto, bai tam ulamle yu kam arye, ulamle ning obuka, si tobuka dilamle touk, unyake. Ara, sikce ‘Se, nunda yo bok pia weik ton doproptibnye’ tenen, malye winina ap, tilila yupu nyana ap, ninye ona ap, ikin ning dobuka, yuk nang nong deice delina ap, wininyaka deice arye, ubula dolokirye, bona talin nang unyake.
Sik malye un ning talibuka unyak nang arye, kel weik nang, Allah ati diba tuba tenenyak nang ati, yanuka opnamak talak ara, yuk nang ton, Allah el mapu koproba ati, mitik tonun ton, yanuka melinamake. Bukni, amelipnamak nang kan-kan, ninye weik tam ara, anang sik kanye diksukum kum unamake. Tenebuka, Allah el tam nang neika unamak bukni, dipkoprob ning ara, sik malye-malyeuk unyak nang, sik tam nanguk unamake.
Tonda, Yerusalem mutuku noutam unyak ninye nirya ati, yupu lipsisikuka bokolina talak ara, diksukumuk ubuka, yupu kum bokolilulume. Anggun ninye deiyok kibuka, amutuku talilulum deiyok nang nirya arye, sik malye winipmace ninye ati, wenelamtum bukni, aninye arye, “Nun winipmap ning ara, namin kipsilyame,” nyanyake. Ara, yupu sekelana ati, yo bok arebikiba, tilila yupu deice aryuk nyalulume. Aning atonun, Allah el si eren aik noutam talibuka, pil donyak nang, anggun imam-imam nang arye, “Nunda yo bok weik arepsikiba doprobibyopura, amutuku noutam unyak ninye nirya ati peterenamabe,” nyalulume. Tonda, Allah el yupu nyapdeipliba, sik Allah yupu laka len ap, aminyan winipnamle ning ati lak lena ap, ati unyak nang nabi-nabi babye, “Yo bok arepsumunba, dopropmapya deice arye, Allah Yahweh elce nyapmasil ning ara, lak lepnamsiyabe,” nyanyake. Wininyak diparyuk sikce tenenyaka ara, ‘Kume, Allah Yahweh, nun dam ausulula ati, ikin ning nun dam kum yanganamsile. Telebuk unamabe,’ tenekirye nyanyake. Utenenyak deice, Allah arye kanye imun ning dobuka, sik nong deice delinamle.
Winipnamaka ati, atalak ara, tilila yupu nyanyak nabi-nabi nang, ilil weik upnamle. Ilil uplyeba, nabi nang arye, “Nunda lengdar mapmaba deice arye, mambul ning elinyabe. Ati, aning deice ara, Allah arye nyasulul yupu laka nyanamabe,” nyanyak ning ara, tuba kum nyanamake. Ara, alye dakdakirye, ayupu tuba kum nyanamake. Aning atonun, tonda, ilil uplyeba, atalak ara, sikda, ‘Yuk nang eipsikirye, ‘E, ara dipkoprob nabi unamale,’ tenepnamakʼ tenen ati, dipkoprob nabi nang ongolamice baju, kambing potong arye memenyak baju, tuba kum ongonamake.
Aning ati ara, ninye arye aning-aning winipnamak ning ara, moubuka dimunce, moubuka tenenamlulume. Anggunda, ‘Yupu talina deiyok nang arye wenebuka opnamak’ tenen, tapu koubuka arilbanamsiyake. Tonda, Allah yupu peterena aik noutamak bobisikceopura, kama weik arye kulabuka onamsiyake. Aning ati ara, ‘Winipsicak’ tenen, kanye moubuka unamlulume.
Asipdeyukopura, ayupu ton nyabuk. “Na winipse ning nirya akunum eipluma ati, yata deiyok ati, walwal arye nyanmalum do? Anggunce, ‘E, roti kum dinmaba anya arye, Farisi nang sik roti nen ning ati, malye upsilyak’ tenen, moubuka kalikildanamlulume, nyapmasile, tenepmaluma ara, yata ati do? Talya din ning roti nena deiyok ning ati kum nyapsine. Aning ara kume. Sik Farisi nang ap, Saduki nang ap arye, sik malye wininyak ning ara, roti nena deiyok ning nelamle touk un ning ati ayupu nyapsine,” Yesus arye el mapu ati nyabuk.
Mek liya yo deice bukuka banmek talak ara, Yesus arye el mapu 12 nang ati nyabuk. “Farisi nang ap, sik Saduki nang ap, sik malye wininyak ning ara, mitik anunuk nyabikiba, yuk nang kekebikce deice arye, malye winin ning weik wininyaka anya arye, roti nena deiyok ning ara, roti bun mitik anunuk dongonyak bukni, weik arye balamle touk ulule. Ulula ati, sik Farisi nang ap, Saduki nang ap, sik roti nena atonun ara, ‘Aning arye malye winisulule’ tenen, pia kalikuka dinamlulume,” nyabuk.
Nyabukopura, awekuka kekenmek nang nirya ati ayupu nyabuk. “Anggun nirya, anggunce anggunti, ilil una ap, anun una ap, upsilya ati, kanye talima kalekuka dildanamlulume. Ninye kam una ap, ninye teleb una ati, mambul ning ap ara, aning-aning bona talinanye kina deice arye teleb kum updeipsute.” Yesus arye nyabuk.
Wini talak unyak ninye arye anggunti, “Anang ara, pia teleb nang,” nyapsiceopura, se tenebuka kanye imun kanye bobuka unamake. Ara, anggun yok pununa nang arye, tilila yupu uk laka nyalamik nang ati, “Ara teleb nang,” nyalamik touk, sik mapu babye, atonun tenebuka nyanyake. Dipkoprop Allah yupu peteren nang ati ara, “Anang ara teleb nang,” kum tenenamake. Sik kanye delice nang ara, tilila yupu nyanyak nang ati kanye delinyake. Yesus arye nyabuk.
Domba weina ati, ‘Pil dopnamak’ tenen, yo bok arepmakibuk, talye pil melinang ara, domba weina deiyoknye ulye atonun kum unyake. Sik talye pil melinang arye, domba dipkoprop kum weinyaka anya arye, yu kam arye, ‘Domba obuka dipnun’ tenen, yangalye talak ara, atalye melinang eibikirye, domba nirya batakuka, bik-bik abuka banyake. Bik-bik abuka bindobikcopura, yu kam arye adomba basam bulubuka wekmakcak olyangaliba, domba nirya arye ilil ati, yuk-yuk bai tam sakuka bik-bik abuka banyake.
Salamis mutuku akunum petereprikopura, anirye Siprus mutuku noutamak nirya balamrika ani, Papos mutuku birik. Papos mutuku birikce, Yahudinye tonok, ninye ker dolamuknye ulamukbuk eiprik. Anye bira, ninye ker dolamuknye ati ara, el si ara, Baryesus nyalamik. Baryesus arye, talye yupu deice arye, “Nara, Allah yupu laka nyananye unune,” nyaltaklamuk bukni, elda telila yupu nyalamuk.
Ura, aning ara, Allah el mapu laka una ati, den bola mouse seklamak yupu laka kipsuka ara, deiyok nyapnusine. Deiyok ara, yuk nang, sik dipkoprop Yesus ati diba tenena kum nang arye, nun Yesus Kristus ati diba tenenyap nang ati, winibuka tenyamsik. ‘E, sik Yesus ati diba tenenyak nang ara, Musa sekamuk yupu, mem yupu ap, mem pil ap talibuka kum wininyaka ara, yata ati do? Aning ara, yata wiribuka unyak do?’ tenen, nun kan-kan duknubuka dilyasik. Nun Kristus ati diba tenebupa deice arye, akunum lyepsukce, teleb kipdeipsuka anya arye, ‘Mem pil dona ap, mem yupu ap kekebuka dobolbanyaba deice arye, Allah arye lyepnamsil’ tenen, diba kum tenenyabe. Ati sik duknubuka dilyasik nang arye, ‘Kume mem pil ap, mem yupu ap, sik nong deice deibibyopura, anang ati tapu kouna atonun kiptibyeba, nun tam kipropsitinge,’ tenepsik.
Pia moubuka telebuk kipdeipsilye talak ara, mitik mapu arye, ‘Aning dib do, tilila do?’ tenen, teniltonauk ulamak touk, tuba kum unamabe. Aning atonun, mek linglinga mekwen deice bolkekenmalye talak ara, itam-utam kilanmalya ani, bobalamle tonun kum unamabe. Aning atonun, tonda yo bok tuku deice sakmalibuk, kumanya doplye talak ara, kumanya mikip arye, otam binaplya, atam yanaplya kinmalya ani, erelolamle atonun, kum unamabe. Sik yuk nang arye, talye peterenyak yupu, yala yuk-yuk peterepsikca babye, ayupu kekena kum, yupu tunim abuka unamabe. Sikda, ‘Anang ara, nun tamuk kipdopsiting’ tenen, tenepce talye tilila yupu peterepsikca babye, kanye boktopsilirye, nun kanye orbina ayana kum kinamsile.
Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.
Sik Yahudi yala ninye, malye unyakce, ‘Allah arye kanye deipnamsil’ tenen, “Sal den bam bol mouse ning sekenamlulume,” nyabuka peterenyak nang ara, yu ulamlye kam arye pia yu uplibuk, ubula dona ap, walana ap, malye winilamak atonun, anang babye, malye wininyake. Ara, nun yupu yanipsikirye, ‘Sik yupu kekenyak ninye ara, nun yupu uk kekebuka nun tam kepropsitinge’ tenen, malye yupu nyasinyake. Aninye ara, wininyaka anya arye, ‘Anang nun malye updeipsicak’ tenen, memelonamlulume. Anang ara, winibuka tenenyake. Ara, yuk nang, ‘Aninye ara, malye winin ning batakuka, Allah el na tenen nang unyake, tenepnamsiak’ tenen, bikilin ning ati, sal den bam bol mouse ning sekenyake.
Yuk malye nang arye, ‘Sik talima lipdobibyeura, nun tam kipropnamsiyak’ tenen, tilila yupu peterepsica deice arye, mankau kanye arye diba tenebuka, yuk bisik bimunyak ati, anggun kanye pia moubuka unamlulume. ‘Anang arye, nong kum yupu talye peterepsicak’ tenen, anggun kanye moupnamlulume nyapsine. Atilila nang arye nyanyak yupu ara, Kristus el ulul ning deice arye kum nyanyake. ‘Sik talye tukwak ninye, sik kanye deice aryuk,’ tenenyak ning peterenyake. Tonda, ayupu deiyok ara, talye nang bol deice atonun ning, talye tukwak ninye arye, “Aning nun deipkirikdop nang dorapce winilamik touk, aninguk talibuka unamabe,” nyanyak yupu ati nyapne. Tonda sikce, ‘Aning ara, weik mambul mem ning,’ tenebuka, talye yupu aryuk nyaltakanyak yupu uk ulule. Tonda, ayupu ara, Kristus yanina atonun yupu ulule. Anirya ati ara, atilila yupu ara, talye yupu uk ulula anya arye, aning kum kekenamlulume, nyapsine.
Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.
“Wininalyame,” nyapmakina ara, talye ati kum nyapkine. Deiyok ara, aminyan talak ara, ninye nirya arye, ‘Allah yupu nyasilye touk nun lik’ tenen, diksukum peteren yupu kum kekepnamake. Peteren yupu dipkoprop kum bukni, ‘Nun kanye delinyap ning ap, nun patapsilye ning ap, aninguk peterepnamsiak’ tenen, “Buluplulume,” nyabikibuk, peteren nang talye-talye nanguk bulupnamake. Bulubikibuk, aninye arye, sik talye yupu peteren nang ati, “Nunce nyabipye ning uk, peterepsululume,” nyabuka moronyak yupu uk, sik talye peteren nang arye aninguk peterepnamake. Dipkoprop Allah yupu nyalye touk kum peterenamake.
Aning ati ara, na kayapu, siktilila yupu peterena ninye arye wininyak ning ara, anggun akunum kel kipmaluma anya arye, ‘Aning nyanyak yupu pia kum kekenamabe’ tenen, kanye moupropmunce, kalikildanamlulume. Allah yaniplobice ninye malye wininyakce, tilila yupu peteresicebuk, mankau arye luba kibuka diba tenepmunyak, ‘Yuk bisik bobisinyak’ tenen ati, anggun kanye mouplulume, nyapsine. Sik malye winin ninye arye, wininyak ning ap, nyanyak yupu ap deice arye, tilila ning mankau arye ubuka, diba tenepmunyebuk, yuk bisik bobisikceura, ‘Wini talak akunum diba teneplumce, tunim abuka winilulum ning batakmunyak’ tenena ati nyapsine. Ati, kanye mouprumunce kalikildanamlulume.
Na kayapu, Allah el dipkoprop yupu kum bukni, yuk tilila yupu dobuka peterelbanyak nang weik unyake. Atilila yupu peterena nang arye, mutuku-mutuku nirya akunum yangasinyake. Aning ati ara, na kayapu, anang arye, “Allah el Kanye arye nyapnuk yupu nyasinyabe,” nyabuka talye nyaltakanyak yupu ara, ayupu kekebuka, diba kum tenenamlulume. Talya luba kibuka diba tenena kume. ‘Allah El Dib Kanye arye nyapdeibukura, peterenyak do, kum do?’ tenen, ninye arye nyanyak yupu nirya ara, winipnamlulume.
Anyapmasin ning ara, talye ati kume. Deiyok nyapnusine ara, tilila yupu nyabuka pia malye winin nang duknubuka, anggun kan-kan yanuka unyakce, pia malye winilisinyake. Allah yupu laka nyalamik nang, nabi nang arye, amalye winilamice nang atonun nang ara, “Allah arye wenebuka opnamle,” nyabuka nyalilamik. Atilila yupu peteren nang arye tenenyaka ara, ‘Allah elda talinye. Elda mambul kume,’ tenenyake. Winibuka tenebikirye, Allah yaniplobikirye, pia malye wininyake. Sikce peterenyak ning ara ani. Ara, ‘Nun malye ulamibye bukni, Allah talye urdem aryuk namin kipsilirye, lyesululnye anya arye, nun talye tenepce pia malye wininamabe. Ara, telebuka. Allah arye kum wenepnamsile,’ tenenyake. Tonda, nun du Yesus Kristus elcuk talisilirye, nun Weik Deiyoknye usulul bukni, siktilila nang wininyak ning ap, nyanyak yupu ap, deice arye, “Yesus elda talinye,” nyanyake.
Aning eipsopura, isa winilinye birye, yakai urasin atonun ubukce, yanganmekba, eipse. Tonok ning ara, Mem Kwatima Urasin Atonye tikukba, el si bam bol pum tam arye ayakai kutukuka yayuk. Bitinye ning ara, Pia Malye Ning Kam Ulul ning, laut mekwen noutamak arye kutukuka tikilyayuknye, el si bam bol pum bisik arye yakai kutukuka yayuk. Aning atonun, winilinye ning ara, Tilila Yupu Nyana Deiyoknye, el si bam bol pum bisik arye yakai kutukuka yayuk. Aisa yakai urasin atonun danmekce yanganmekak eipse.
Akil dipdesirye, kel bikse. Akil ara, diba tenen nang pia weik olamukba sik ining balamuka kwebuka dilamukba adeice arye, kanye deibukce, el kanye wangamuk. Ara, ninye arye kanye wangan mek weika arye dinyakba, sik kanye wangabikirye, teleb kanye bona kumce, malye winin ning talye luparabuka winilamak touk, akil ton winipmokba, eipse. Akil arye ninye olamuka ara, talye nang kum bukni, akil arye nyamukba, yu nang arye, Allah wiamukba, elti, diba tenelamikce, Yesus el yupu dobuka peterelamik ninye ati olamik. Yesus el yupu kekelamik ninye pia weik olamika ati, akil ara kanye deibuka ulamuka deice arye, el kanye wangamuk. Winibukba, epsirye, na kanye pia lukdase.
‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.
Uku arye dibukba, amalye winin kili sal ati, tilila yupu nyalamuknye Isa Mutuku Dongonye, sik malaikat arye tuba tonap tongobikce, weik uku din mutuku noutamak dopkwetebik. Ara uku buk dilamukce, tin ap, kumasan bol keil el si ara belerang, kel lyin ap, ara uku tin weika arye dipliba, keil but-buta tong bukni, sikin tong atonun tong weik lelamle ning tong ap nyalamukce, deiyamuk mekwen noutamak dopkwetebuk. Ara, pia Malye Kam Ululnye ap, Tilila Yupu Nyalamuknye ap minyuma talak dopkwetebuk akuk, Isa Mutuku Dongonye babye, auku din mutuku noutamak dopkwetebuk. Keting noutam babye, lukunyan babye, atalak nirya, batakna pia kum aryuk, auku arye sik nong deice, uk weik dilamlya ati, pia donmaca ani, engenauk unamake.
ကြော်ငြာတွေ