Matius 7:13 - Eipomek

¹³ Yesus arye ayupu nyabukopura, ayupu ton dukdongobuka nyabuk. “Anggun akekenmanulum nang ara, mitik bisik buplan noutamak wekenamlume. Allah arye malye unyak ninye wenebuka donoknamlak mutuku bisik ap, buplan ap ara, weik bisik weike ubuka anya arye, abisik deice ara, ninye weike wekuka banyake.

Matius 7:13 ပူးပေါင်းရင်းမြစ်များ

Kejadian 6:12

Tukwak mutuku ninye nirya arye, diksukum kum ulamikce, malye bisikuk kirikuka akunum balamik.

Kejadian 6:5

Ninye tukwak mutuku-mutuku nirya arye, sik kanye talima pum tam tenelamik ning nirya, pia malyeuk winilamik. Atalak-atalak nirya, teleb ning tenena kum diparyuk, pia malye ninguk tenebuka patalamukba, malye-malye pia weik winipnin balamik. Malyeuk winilamik ning ara, Allah el si Yahweh arye dipdeyukce, bikamuk.

Amsal 16:25

Ara, ninye nirya arye, sik tenebice bisikuk bakirye, ‘Kume, nun banmap bisik ara, teleb bisik anya arye, abisikuk banamabe. Nunda diksukumuk unyabe,’ tenebuka banyake. Bukni, abisik urasin teleb bisik upmatu babye, sikda moubuka kum tenipdekirye, malye bisikuk balamicopura, dipkoprob dipna damuk banyake. Dipkoprop teleb bisikuk wibuka kum banamake. Aminyan talak, sik banamak bisik nirya ara, uku din mutuku uk banamake. Ati, ‘Awininamap ning ara, teleb ning do, malye ning do?’ tenen, pia moubuka tenipdemunce, banamlulume. Talye lukparabuka bana meme.

Amsal 7:27

Akil el aik ban bisik ara, ninye dilban bisikuk ulule. Akil el aik dam banyanyak nang nirya ara, aminyan dibikirye, diplamak ninye unyak sukumuk binuka unamake. Ati, akilapu unyakak nirya ara, leipdopmunce, pia yuk pera sukumuk, binuka unamlulume. Raja Salomo birye, el mapu ati nyabuk.

Amsal 9:6

Ayupu ton nyalule. Na dam yamunce, pia weik kel bikna deiyok ning, akunum dopropmunyopura, aninguk moubuka talibuka upmunce, anggun walwal arye winilamlum ning nirya ara, adiparyuk bataknamlulume. Winibuka aning nirya batakmunyopura, pia weik kel bikna deiyok ninguk, talibuka umunce, teleb ubuka un ning nirya ara, kel kipra banamlulume. Aninguk talibuka umunce, pia teleb ubuka pia kam uk unamlume. Tonda pia diksukum un ninguk, kel bikmunyopura, abisikuk melibuka dobolbanamlume.

Yesaya 1:9

Allah el si Yahweh arye im deice yin talin nang, malaikat nirya talibuka ululnye birye kum melipmasutopura, sik yu weik nang arye, nun yala ninye nirya akunum obuka sirya dakmasitinge. Ninye mitik tonun babye ton kum bataksutue. Nun yala nang nirya, obuka sirya dakmasitingba, nunda Sodom mutuku ap, Gomora mutuku ap nirya, obuka sirya dakamuk touk, winipmasitinge. Bukni, nun ni koproba Allah Yahweh arye, ninye mitik anun ton lyepsukba, tuba unyabe.

Yesaya 35:8

Asukum ara, weik bisik aunamle. Abisik el si ati Pia Diksukum una ati Banamak Bisik nyanamake. Malye ning wininyak ninye ara abisik ara, pia kum binamake. Tonda aning-aning nirya ati walwal upliba, moubuka bita kel kum bikinyak ninye babye, abisik bakirye, abisik ara kum walwalapdanamake. Allah arye abisik yapdeipnamsile, ‘Na ti dib teneninyak ninye uk, abisik banamake’ tenen, yapdeipnamsile.

Yesaya 55:7

Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.

Matius 23:13

Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.

Matius 25:41

Nyapnyopura, na kwanim taruk tam deipnamne ninye ati nyapnamne. “Allah arye, ‘Aninye na like,’ tenebuka akunum bataksuk ninye ara, na dam arye yukak bilulume. Allah arye Isa Mutuku Dongonye ap, el pil donyak nang, sik malye malaikat atonun isa ap, nati bataknikce, malye ning talibuka, sik malye wininyak kili sal niryada, ‘Pia uku dipnamle’ tenen, uku din mutuku kintinibuka deibukak ara, anggun wekelbululume.

Matius 25:46

Nyapnyopura, adiparyuk, sik malye unyak ninye ara, dopdeipniba, Allah arye wenebuka pia opnamle bukni, sik diksukum unyak ninye ara, telebukirye kam pia unamake. Yesus arye el mapu ati ayupu nirya nyabuk.

Matius 3:2

Yohanes peterelamuk ning ara, ani. “Anggun nirya, anggun kanye talima malye tenelulum ning ap, anggun malye winimunye ning ap batakuka, kanye dangupmunyeura, Allah arye amalye ning nirya kum daneiplirye, namin kipnamsile. Winipnamlum ning, ara Allah arye ninye weike lyeplirye, sik kanye talima talinamle talak, akunum dam upmala ati, anggun malye winimunye ning nirya bataknululume,” nyabuk.

Matius 3:8

“Anggunda, ‘Nunce nun malye wininyap ning akunum batakape,’ nyabuka, talya yupu deice arye nyapnutum bukni, yo duk mouamlya ani, eklamle touk, dipkoprop bataktumce, diksukumuk uptumba eipsitinyopura, diba tenepsitinye. Ati, anggun malye winimunye ning, adiparyuk batakmunce, telebuk unululume.

Matius 7:14

Bukni, Allah arye kanye talima teleb unyak ninye taliliba, pia kam unamakak ara, el wekelban bisik ap, buplan ap ara, pia mitik dukun bisik anya arye, ninye weike, ‘Se, abuplan wektibye’ tenen, enyak bukni, ninye pia mitik anunuk eibuka wekenamake,” Yesus arye nyabuk.

Lukas 14:33

Adomon yupu nyapmasin nang wininyak touk dipkoprop deiyok ara ani. ‘Ara aminyan yata wiripnamsil do?’ tenen, pia moubuka tenenamlulume. Aning ati ara, yata nang do nirya, sik talyamice ning kum batakikcopura, na kum dobolyanganamake. Ara Na mapu kum uptinge.

Lukas 9:33

Sik nabi Elia ap, Musa ap, Yesus ap, ayupu talipmekce, abitinye yanmarik nang binurik talakuk, Peterus arye Yesus ati nyabuk. “Naio, nun aunmaba ara, pia teleb ati, nun winilye nang arye buru aik ton doptibye. Ton aik ara anti, ton aik ara Musa ati, ton aik ara Elia ati doptibirye, anyakuk ulamtibye,” Peterus arye nyabuk. (Peterus arye ayupu nyabuk ning ara, Yesus el urasin yuk ubuk ning ap, Musa ap, nabi Elia ap yanmarik ning ap, yupu nyaprik ning ap, nirya eibikce, ‘Se’ tenen, ngalukikura, Peterus arye bita bikna kumce, talye yupu nyabuk.)

Yohanes 10:9

Tonda, nara domba poka buplan bisik atonun unune. Yata ninye do nirya, na deice aryuk, na bisikuk wekelbice ninye nirya ara, Allah arye lyepnamle. Lyeplirye, aninye ati kalekuka meliplyopura, telebuk unamake. Domba basam bai tam bakirye, dina teleb ak eibuka dibikirye, tuba tamubuka tonap poka pum bisik yangalamak touk, na mapu koprop ara, dabanmakirye telebuk unamake.

Yohanes 14:6

Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake.

Rasul 3:19

Aning ati ara, anggun malye ulamlum ning ap, anggun kanye talima malye tenelulum ning ap, batakmunye akarye, Allah el tam kipropmunyeura, elce anggun malye winilamlum ning nirya kum daneipnamsile.

Roma 9:22

Ura, Allah arye tenelamuk touk, ‘Ninye nirya, na yu unilye ning ap, na mikip weik unilye ning ap, na wininye ning nirya ap kel kipnamniyak’ tenen, malye winin ning ap, malye winin ninye ap ati, malye kanye bomturye, el weik mikip deice arye, adiparyuk oltakalamtue. Akunum oplomtu bukni, Allah arye, ‘Minopce wenebuka kum oplopnun’ tenen, namin asa arye namin kibuka dinauk ulamuk. Winibuka ulamuka ati ara, tukwak ninye kan-kan arye, yatanye birye Allah ati weneptu do?

2 Korintus 4:4

Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.

2 Korintus 6:17

Allah arye nyabuk. “Aning ati ara, talye ninye, dib kum tenenyak ninye kan-kan una batakuka, yukak kilonamlulume. Amalye wininyak nang ap, anggun ap neika ansinibuka una pia malye weik ati, anggun yuk-yuk unamlume. Na Allah arye nyapsine. Narye anggunti, ‘Aning ara, malye ning anya arye, talina meme,’ nyapdeiamsise ning, tonok ning babye kum talibuka winimunyopura, nara anggun dam yanuka dopdopsinirye neika unamabe. (Yesaya 52:11; Yehezkiel 20:34, 41)

Galatia 5:24

Yesus Kristus ati diba tenebibirye, el ap talima dukdongobuka ubibyeura, elce nun talima talisulul ninye ara, wininyabe. Talye tukwak ninye ubirye, nun kanye talima noutam malye ning ulye akarye, talima lilosululba, malye ning patasilye ning ara, aupmal bukni, amalye winin ning kum wininyabe. Deiyok ara, Yesus Kristus wanwanun yo deice dibuk talak ara, nun ap dukdongopsuk anya arye, el dibuka deice arye, nun ton dibupu. Ara, nun ap, Yesus ap talima dukdongopsuk deice arye, nun malye ning patasilye ara obuka, yaniltana atonun unyabe.

Pilipi 3:19

Aninye aning ara, sirya talak ara, Allah arye, weik wenebuka pia onamle. Oplirye, bataknamle. Anang ara, sikce, ‘Aning weik mambule,’ tenenyak ning ara, sik talye nong deice patalamle ning ap, sik babye, kanye deililana ning ap, anyuka. Sikce malye-malye winipmace ning deice arye, malye kanye bobuka, alye ulamtu bukni, amalye wininyak ning ati ara, maknya kintibuka kwalina ap, kimkimilana ap, unyake. Sik kanye talima nirya ara, talye tukwak deice ninguk delinyaka ati nyapsine. Tukwak ning deiceuk delinyaka ati, nyapsine.

1 Yohanes 5:19

Ara, ‘Allah el mapu unyabe’ tenen, akunum kel kibupu bukni, talye tukwak ning nirya ap, Allah diba kum tenenyake ninye nirya ap, Malye Deiyoknye, Isa Mutuku Dongonye, elce moubuka talilya deice arye, anang nirya el yupu uk kekebuka unyake.

Wahyu 12:9

Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.

Wahyu 13:8

Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.

Wahyu 20:15

Yata nang do nirya, Allah el buku si, Kam Pia Unamak Ninye Si Sekna Buku noutamak, si kum uamuk nang nirya ara, adiparyuk doprobikce, uku deibukba, uku pia dilul mekwen noutamak dopkwetebikba, na Yohanes arye eipse.

Wahyu 20:3

Tapu koupdongobukce, tuku pum karu weik uamuk noutamak dopkwetebukce, atuku pum tam buplan tirikukce, kunci dakdongobuk. Winibuka deiyok ara, ‘Keting tamun seribu tahun min kum uplye talak noutamak nirya ara, Isa Mutuku Dongonye arye, tukwak mutuku ninye ayala-ayala nirya ati, tilila yupu tonap pia kum nyanamle. Tilila yupu kum nyaptua ati ara, atalak noutamak ara tukwak kili sal mutuku-mutuku nirya, elce nyalul tilila yupu ton diba kum tenenamake’ tenen, buplan tirikdongobuk. Keting tamun 1.000 tahun akunum uplyopura, like tonok mitik anun tonap lopdongopnamle bukni, atalak ara tuku pum tam dopkwetebukba, eipse. Na Yohanes arye nyapne.