Matius 4:11 - Eipomek

¹¹ Nyabukopura, Isa Mutuku Dongonye biyukba, Allah el im deice pil don nang, malaikat-malaikat, Yesus dam yayikce, el patalamuk ning, aning nirya ara melilamik.

Matius 4:11 ပူးပေါင်းရင်းမြစ်များ

1 Raja-Raja 19:6

Kekebukce, adiparyuk Elia lukdanuka bukukce dileyukce, el kisok deipmokak ara, roti bol uku arye dapmekba akunum opmok ning telebroba ap, mek kwepmok makau ap, ayanuka deipmokak eibuk. Eibukopura, adiparyuk dobuka dibukce, tuba tamubuka mabuk.

Matius 26:53

Winina bataklyame. Anda bita kum bikmalam do? Na ni ati moroptinyopura, adiparyuk el im deice pil don nang, malaikat yupa pia weike 12 pasukan dopdeipnutuba, lyepnitinge.

Matius 4:6

Deibukce, ayupu nyabuk. “Allah yupu buku noutamak ara, ayupu nyabuka sekik. ‘An opkilyak ati, Allah el im deice pil don nang, malaikat nyapdeipliba, tukwak pia moubuka kalikmaka arye, tomobuka erelinamkiyake. Ara, ‘An yan kisok babye, keil yan dum dukuka opkilyak’ tenen, kalikuka melinamkiyake. Tomobuka erelinamkiyaka anya arye, ‘Mitik tonun arye ton oplyak’ tenen, anti kalikinamkiyake.’ (Mazmur 91:11-12) Isa Mutuku Dongonye arye, ayupu nyabukba, ayupu ton nyabuk. “Ura, Mazmur yupu akunum nyapkina ara, ayupu ara, Allah yupu buku noutamak aupmala ati, anda Allah el Mi Koprop ulaminyopura, anyaik aruma deice arye, tukwak sakminyebuk, kum opkutue,” Isa Mutuku Dongonye arye, Yesus ati nyabuk.

Markus 1:13

Bobiyukura, like yupa weik 40 sum deice arye, Isa Mutuku Dongonye arye, ‘Yesus malye winiptu’ tenen, pia asilelamnuke. Amutuku ulamuk talak ara, amutuku noutamak ara, ninye yuk nang ton, kum ulamik bukni, talye buru tam kam ulamle ning ton ubukba, Yesus el ton aulamuk. Atalak ara, Yesus din patalamuk bukni, kum dilamuka anya arye, el mikip mitang ubukba, Allah el im deice pil don nang, malaikat-malaikat arye, Yesus dam yanuka kalikuka melilamik.

Lukas 22:43

Allah morobuk talak noutam ara, ‘Opnikceura, dipnaman ning ara, Allah arye lyepnutuura, kum diptinye’ tenen, pia ikin kanye bobuka, Allah moronmok. Wininmok akarye, Allah moronmok talak ara, malaikat im deice talye karin arye tikilyayukce, Yesus el kanye talima melibuk.

Lukas 22:53

Asum-asum nirya, Allah ati arilulum aik dam peterelamsi bukni, kum tomamnulume. Ara, Allah arye tenyamnuk touk, winipnula ati, isa el mikip deice pil donmasil talak aryuk winipnamanulume.” Yesus arye el tomolyanmek nang ati nyabuk.

Lukas 4:13

Isa Mutuku Dongonye arye, ‘Yesus malye winiptue’ tenen, winilden ning nirya akunum piripdeyukopura, ‘Yata talak arye yuk lo uplye talak tonap, Yesus piripdenamane,’ tenebukce biyuk.

Yohanes 14:30

Tukwak mutuku talibuk, Isa deiyoknye yanamala ati, atalak ara yupu weik tonun ton, kum nyapnusine. Ayanamal malye deiyoknye bira, nati kum malye kibuka bisipnuturye, nati kum talipnutue.

1 Timotius 3:16

Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.

Ibrani 1:14

Anggun ton teneipdelulume. Allah el im deice pil don nang malaikat nirya ara, im deice ning, dib kanye atonun nang unyakba, Allah arye sik malaikat ati, ‘Kume, ninye tukwak ninye lyepneba, ninye lyen ning nirya dolonamak ninye ati, sik melipnamlyame. Tukwak ninye, lyepnamne ninye ara, sik melina ati, ‘Pil melibuka donamlum’ tenen, anggun malaikat dolkwetesunune.’ Allah arye untenyamukce, sik malaikat ati nyabuk. Malaikat ara, Allah arye lyelul ninye sik melina ati, dolkwetelula anya arye, sik malaikat ara, mitik mambul unyak bukni, Allah el Mi Kopropa ara, eluk weik mambul ulule, nyapsine.

Ibrani 1:6

Arup nyapmasin touk, Allah arye, el minyuma deibuk Mi Kopropa ati, tukwak mutuku dopkwetepsuk talak ara, ami ati ayupu nyabuk. Ayupu ara ani. ‘Na im deice pil donyak nang, sik malaikat nirya ara, na Mi Kopropa ati, el siuk kibuka si erenamake,’ Allah arye nyabuk. (Ulangan 32:43)