Matius 26:31 - Eipomek

³¹ Zaitun mutuku deice unmek talak ara, Yesus arye el mapu 12 nang ati nyabuk. Anggunce nati dib tenepmanulum bukni, ‘Malye nang arye opnamap’ tenen, tapu koubuka bobinikcopura, anggun nirya arye, ‘Se ninye nirya lyebuka talinamlanye, Mesias bira, Yesus dipkoprop ulul do, kum do?’ tenen, kanye boktopsilirye, na batakuka bindopnamnulume. Allah yupu laka nyalamuknye, nabi Zakaria arye, ‘Winipnamake’ nyabuka sekamuk touk winipnamnuluma ati, elce sekamuk yupu nyapnusine. Zakaria arye nyalamuk domon yupu ara, ani. ‘Na Allah arye domba weina deiyoknye opnamne. Opnyopura, el domba nirya buru sakuka bindopnamake.’ (Zakaria 13:7)

Matius 26:31 ပူးပေါင်းရင်းမြစ်များ

Mazmur 38:11

Tonda, na talima noutam ara, weik tonun nyalanauk unulule. Wininirye, isin welepnilirye, na nong mikip ara, akunum kum danmanile. Tonda, na asing babye, akunum kupnamnila ati, eipmanto kum unamne.

Mazmur 69:20

Allah ance nati, kel kinilyame. Ara, na mal olan nang nirya arye nati, ‘Anye obuka, kum kipdeipnamabe,’ tenenikirye, nati yep-yep abuka, talak doninyak ninye nirya ara, ance akunum kel kilyame.

Mazmur 88:18

Ara, asum-asum nirya noutam ara, na wenena ati arenilyam ikin ning ara, na dana-dana tam nirya, antanap dongobuka yanganulule. Winipmanto ara, weik mek opnin banmalirye, dana-dana tam ulul ning nirya dilamle touk unulule. Ara, tonok tam arye kum yanganulule. Aning kum bukni, na dana-dana tam nirya arye, aikin ning na dam yanganilirye, dinikilongonulule.

Yesaya 53:10

Malye nang arye obik bukni, Allah el si Yahweh arye, minop talak danirye, ‘Anye bira imun kanye bobuka dadipnamle,’ tenelamuk touk, nun pununa ati dipsuke. Tonda Allah Yahweh arye tenelamuk touk, el nong uk dibuka deice arye ninye malye wininyak ning nirya kum kipdeibukce, tukwak ninye sik malye winina ati dibuke. Akunum dibuk bukni, kam buklirye, el unamle talak babye weik malamlirye, elce deipliba dadeipdanin banamak ninye eipnamle. Anye deice arye, Allah Yahweh arye, ‘Wininamne,’ tenelamuk ning nirya, anye pil dopliba, dipkoprob nong upnamle.

Ratapan 1:19

Narye na kayapu koproba, nun neika unyap ninye ati, yukupniba, yanamak bukni, sikce na ati, ‘Nun like,’ nyabuka bataknamniake. Tonda, Allah el aik pil talibuka donyak nang, imam-imam nang ap, amutuku noutamak ninye deiyok kibuka, talibikce unyak nang nirya ap ara, amutuku bisik noutamakuk dipnamake. Winibikirye, tamubuka sik kam tuba unyak ati, din dina kumce, si tebuka, nati pia enamake.

Zakaria 13:7

Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.

Matius 11:6

Yatanye do nirya, na wininye ning eiplirye, tonda kekeplye deice arye, kanye kum boktoplirye, teniltona kum diparyuk batakna kum upnilyopura, telebuk unamle. Ati na nyapmasin yupu bobuka, Yohanes dam nyalbilyame,” Yesus arye, Yohanes el melin nang ati nyabuk.

Matius 26:24

Allah yupu laka nyalamik nang, sik nabi-nabi nang arye, nati sekamnik touk, nara Ninye Mi Koprop Atonunye bira, malye nang arye opnikceba dipnamne. Sik Allah yupu laka nyalamik nang, nabi nang arye laka lyalamik touk, amutuku nang arye winipnamniyak bukni, nara Ninye Mi Koprop Atonunye yupu delilbinamnilanye bira, elin, el li birye kum deiamtiringtoura, telebe. Bukni, el lin, el li birye anye deiamrika ati ara, yupu deiyaliba opnikcopura, Allah arye delilbinamnilanye biti weik arye wenebuka opnamle. Ati anye bira pia bicoe,” Yesus arye nyabuk.

Matius 26:56

Bukni, Allah arye nyalilamukba, Allah yupu sekamik nang, nabi nang arye sekeiyamnik touk winipnula ati, anggun tenepmalum touk winipnululume.” Yesus arye el tongolyanmek nang ati nyabuk. Nyabukopura, Yesus el mapu nirya ara, ilil weik ubukba, sikce Yesus asukumuk batakuka, bai bukuka biyik.

Yohanes 16:32

Bukni, aminyan yanamle talak noutamak ara, malye nang arye anggun nong deice ikin ning deipsicopura, anggun nirya na batakuka, yuk-yuk bindopnamnulume. Nati, bataknumunce, anggun aik ap, anggun mutuku koprop ap, batakuka yuk-yuk benamlume. Ilil ati, anggun nirya arye na batakuka, yukak bindopmunyopura, na yuk unamne. Na ni Allah ap, na ap neika tuba unyama anya arye, dipkoprop na yuk kum unune.