Ura, na Raja weiknye birye, Esra anti, nyapkine. Allah arye kel bikna deiyok ning weik arye areamkuka ati, akel bikna deice arye, ance ninye deiyok nang kipnamlyame. Ara, yupu lipsisikuka bokolina deiyok nang wipdeipminyeba, yuk nang arye, malye kanye bobuka nyace talak ara, sikce kekebikirye, yupu bokeipnamake. Ara, yata nang do nirya, anggun ni koproba Allah arye, ‘Wininamlulume,’ nyapdeiamuk yupu kel bikamik nang, Efrat mek lilun arye, otam keting wekelban tam noutamak unyak nang nirya talibikirye, yupu lipsisikuka bokolina deiyok nang unamake. Winibikirye, ‘Aning telebe, aning malye. Tonda diksukum una ara anye,’ nyabuka peterenamake. Tonda, yata nang do nirya, anggun ni koproba Allah arye, nyapdeiamuk yupu min kum kel bikamik nang ara, an Esra birye peterenamlyame.
Matius 23:2 - Eipomek2 Minop talak Allah arye Musa ati, “Na yupu petereplyame,” nyabuka peterena deiyok aribukba, Musa arye peterelamuk. Minop talak ara, Musa arye peterelamuk touk, wini talak ara, sik Farisi nang ap, Musa sekamuk yupu peterena deiyok nang ap, Allah yupu peterena deiyok nang unyake. Musa arye pil dolamuk touk, wini talak sik anang arye donyake. အခန်းကိုကြည့်ပါ။ |
Matius 23:2
8 ပူးပေါင်းရင်းမြစ်များ
Ura, Allah el si Yahweh arye Israel ninye ati bico tenelamukce, melilamuk. Minop talak ara, Allah arye Musa biti, ‘Wininamlulume, aning ara ton kum wininamlume,’ nyapdeiamukba, Musa birye sekeiamuk. Musa birye sekeiamuk yupu nirya ara, Esra weik kel bikamuk anya arye, Allah yupu peterena deiyoknye ulamuk. Elda Persia mutuku bukni, provinsi Babel mutuku ulamuka ani, Yerusalem mutuku tuba tamubuka yayuk. Allah el si Yahweh arye, el mikip weik Esra biti arebukce weik arye meliamukba, pia telebnye ulamuka anya arye, Persia ninye deiyoknye Raja Artahsasta birye, Esra morolamuk ning nirya urtalya arelamuk.
Na tenelamse ning ara, ani. Sik imam-imam nang ara, dipkoprob sik pil dona diksukum ninguk talibuka unyakce, kel weik bikna ning nirya ara, anang aniryuk yuk ninye ati, teleb kibuka peterenamake. Yata ninye do nirya, ‘Se, yata wiripnamap do?’ tenen, kanye wangapne talak ara, sik Lewi yala deiyok nang dam binuka asipdecopura, ‘Sik imam-imam nang arye, teleb yupu uk lak lenamaka,’ tenelamse. Ara, talye ati kum nyapsine. Nara, Allah Yahweh aning-aning nirya talibuka deice tam erebuka unirye, im deice yin talin malaikat nirya, sik weik deiyoknye ununa anya arye, na nyanye yupu laka nyapniba, sik imam nang kekebikirye, yuk talye daunyak kili sal nirya ati, ‘Allah tenelye ning ara, ani, ani,’ nyabuka, ‘Laka nyabuka peterenamake’ tenen, anang wipdeiamsise. ‘Wininamak’ tenen, anang wipdeiamsise bukni, aning ara, kum winilulume.
Apil talibuka unyaka ati, Allah yupu deice peteresinyak yupu ara, moubuka kekepmunce, aning talibuka unamlulume. Bukni, sik Farisi nang ap, Musa sekamuk yupu peteren nang ap arye, Allah yupu peterelamak touk, sik babye moubuka talibikirye dipkoprop kum unyake. Ati, na mapu anggunda, anang sik wininyak ning eipmunce, sik malye wininyak atonun kum wininamlulume.
Yesus ayupu peterenmok talak ara, ayupu tonap, nyabuk. Allah arye, ‘Aning wininamlulume, aning ara, kum wininamlulume,’ nyapdeibukura, Musa arye sekamuk yupu peterena deiyok nang, sik wininyak ning ati, moubuka unamlulume. Sik malye wininyak touk, ‘Nun babye, malye winibibyak’ tenen, kanye moubuka unamlulume. Sik malye wininyak ning nyapnusine. Sikda, ‘Yuk ninye arye, nunti sisinanye tenepnamsiak’ tenen, deice tam ongoce ongon cang weik baju, juba ara, cang weik ning ongobikirye, banyake talak ara, langtupnin banyake. Tonda, ninye bona ning dekna ati, yupa weik arye bulubuka weklamak noutamak arye, ‘Ninye weik dinyak ak banmabibuk, kipdopsikirye, “Telebe,” nyapsiceopura, yuk nang nirya eibuka kekebikirye, “Se, anang ara, weik mambul nang,” nyanamsiak’ tenen, pia patalule.
Allah arye, ‘Aning ara, wininamlulume. Aning ara, pia kum wininamlulume,’ nyapdeibukura, Musa arye sekamuk yupu, mem yupu peterena deiyok nang, sik wininyak ning ati, ‘Sik malye wininyak ning arye, nun malye updeipsilyak’ tenen, moubuka unamlume. Sik malye wininyak ning nyapnusine. Sikda, ‘Sisinanye tenepnamsiyak’ tenen, deice tam ongoce ongon baju ara, cang weik ning ongobikirye, bakce talak ara, luluklamle. Sik awininyaka deiyok ara, ‘Yuk nang eipsikirye, sikda weik nang adano, tenepnamsiak’ tenen, wininyake. Tonda, ninye bona dekna ati, yupa weika arye bulubuka wekelamak noutamak arye, ‘Babyebuk, kipsikirye, teleb nyapsicopura, yuk nang arye, anang ara weik nang yanmasiake’ tenen, kil-kil kanye bobuka tenenyake. Tonda, Allah yupu peterena aik pum, ninye sik urasin nirya din tamuk bukibyeba eipdisikirye, ‘Anang ara, weik nang tenepnamsiak’ tenen, weik nang bulamicak uk, bulbanyake. Tonda, weik yuna talak nirya ara, weik nang bulamicak uk, ‘Weik nang tenepnamsiyak’ tenen, pia patapliba bulbanyake.
Dipkoprop, Allah elda, ninye tukwak ninye ati, bico tenelule. Allah arye, pia diksukum ninye nirya ara, el mapu kibice nang ara, elce talibuka melilule. Sik nirya ara, Allah el yan dam gutam tuku dipdongobuka, el si erenyake. Tonda Allah arye, ‘Wininamlulume,’ nyapdeiamuk yupu ati, dib tenebuka talibikirye, dobolbanyake.