Matius 21:31 - Eipomek

³¹ Ayupu akunum nyabukopura, aYahudi yala deiyok nang ati, asipdeyuk. “Amapu bitinye nang ara, sik ni patapmokba, morobuk ning ara, danye birye dipkoprop kekebuka wininmok do?” nyabuka Yesus arye asipdeyuk. Asipdeyukba, sikce, “Minyumanye bira kekebuka el li pil ati melipmoke,” nyabik. Nyabikopura, Yesus arye anang ati tamubuka nyabuk. Na dipkoprop nyapsine. Sik ninye deiyok nang arena ati, pajak yo bok ubula dolonyak nang, pia malye unyak nang ap, talye-talye yoldalamak kilapu ap, aninye nirya, sik malye ning batakuka, akunum dib tenepnikirye, Allah arye ninye mutuku-mutuku nirya noutamak, ninye weik lyebuka sik talima talisilirye, akunum menekuka wekenyake. Bukni, anggun wini talak ululum nang ara dib tenena kum ati, anggun wini talak babye min kum wekelulume.

Matius 21:31 ပူးပေါင်းရင်းမြစ်များ

Ayub 15:6

Bukni, ancuk si bam bol deice arye, talye yupu nyalyama ati, ancuk, anti malye kililalyame. Ayub anda, ance winiminye ning ara, narye, “Anda winibuka malye winilyame,” nyabuka, talye yupu deice arye kum lulupkitinye. Aning kum bukni, ancuk nyamince tamupdeipminye yupu deice arye, “Malye wininune,” nyabuka, yupu bokolilamlyame. Ancuk nyaminye yupu arye, malye winiminye ning ara, akunum lak kipkile.

Yehezkiel 33:11

Nyapminyopura, an Yeheskiel birye, sikti, ayupu ton tabakuka nyapnalame. “Na Allah ara, dipkoprob pia kam unune. Aning ara, dip ulamle touk, adeice arye, adipkoprop yupu ton nyapsine. Na Allah Yahweh, aning-aning nirya talibuka, deice tam erebuka, mikip weik ununye birye nyapsine. Sik malye wininyak nang ara, sik tuba malyeuk unyak talak aryuk, dekenyak nang ara, na kanye kum delinune. Kanye teleb unulul ning ara, ‘Sik malye unyak nang arye, sik malye winin ning ara, bataktingirye, tamubuka na dam yakirye, teleb aryuk ubikirye, kam unamakʼ tenen, kanye deibuka teninune. Ati ara, “Se, anggun Israel yala nango, anggun tuba malye winilulum ning ara, adiparyuk batakmunce, tamubuka na damuk yalulume! Yata ning deiyok ati, malye winipmunye deice aryuk, anggunda dipnamlum do?” nyabuka laka nyapnalame.

Matius 12:50

Yata ninye do nirya, Allah arye ‘Wininamake,’ tenelul touk pil dolamikce ninye ara, sikda, na weit yapu ap, na weit kilapu ap, na nin yapu ap, atonun unyake,” Yesus arye nyabuk.

Matius 18:3

Na pia dipkoprop nyapsine. ‘Nun weik nang upnamap’ tenen, kanye talima erelamunya ara, bataklulume. Mitik mapu ara, sik kanye talima nimalya arye unyakce, du nang yupu kekebuka ulamak touk, sik bidamnye kanye tamubuka kum umunyopura, Allah arye anggunti lyepsilirye, kum talinamsile. Lyepsilirye, im deice babye kum weknamlume.

Matius 20:16

Nyabukopura, ayupu nong tonap laka nyabuk. “Arup winipmanto yupu nyapmasin touk, sirya talak ara, wini talak anggun tukwak ninye arye, ‘Se anang ara weik mambule,’ tenelulum ninye ara, amutamuk deipnamne. Aning atonun, anggunce, ‘Se aninye ara, mambul pia kum ninye unyake,’ tenen, luba kilulum ninye ara, Allah arye erepdeiplirye, weik nang kipdeipnamlarya. Allah arye anang dobuka amutamto kipdeipnamle. Wini talak, yuk nang arye, ‘Sikda mambul kum ninye unyake,’ tenenyak ninye ara, Allah arye erepdeipliba, mambul weik ninye unamake.” Yesus arye nyabuk.

Matius 21:30

Wa wilbiyukopura, aminyan talak ara amapu sik ni el mi tonye biti, arup nyapmok touk, bitinye mi ati nyabuk, “Na mio, na wa wilbinilyame,” nyabuk. Nyabukura, ami bitinanye birye, “Naie, telebe an wa wilbinukine,” nyaplobuk bukni, wa kum wilbiyuk. Yesus arye winipmanto yupu nyabuk.

Matius 5:18

Na dipkoprop nyapsine. Wini talak arye dipdongobuka, im ap, tuku ap, kum danamle talak noutamak nirya ara, Allah arye, ‘Aning wininamlulume, aning ara pia kum wininamlulume,’ nyapdeibukba, Musa arye sekeiyamsuk yupu, mem yupu noutamak ara, tonok huruf babye, pia mitik sekna ning babye, min kum, kum danamle. Ayupu nirya, sik lyalamik touk, dipkoprop nong upnamle.

Matius 5:46

Yuk nang arye anggunti, bico tenebuka kanye talima melisinyak nanguk, bico tenepmunyopura, adeice arye Allah elce anggun teleb una ati, ‘Talya arepnamne,’ tenepsuk ning arepnamsil do? Kume. Sik pia malye nang, ‘Ninye deiyok nang dopropnamak’ tenen, pajak yo bok bulubuka delilamak nang, anggun malye nang ababye, sik babye, atonun nang ati, bico tenebuka melildanyake. Aning ara, ninye nirya, sik babye, atonun nang ati, melildanyake.

Matius 6:5

Yesus arye ayupu nyabukopura, ayupu ton nyabuk. Anggun talimak malye ning tuba aupsukbuk, ‘Ninye eipsikirye, teleb nang tenepnamsiyak’ tenen, nong bola deiceuk teleb unyak nang wininyak touk, anggunda na mapu arye, aning kum wininamlulume. Amalye unyak nang ara, ‘Yuk nang arye eipsiting’ tenen, ninye bulubuka balamak bisik ap, Allah yupu peterena aik kopropa ap, ninye dinak tikikirye, Allah moronyake. Awininyak ning nirya ara, ‘Teleb nang tenepnamsiyak’ tenen, unyaka anya arye, na dipkoprop nyapsine. Sik dekna atonun ning ara, adeice arye akunum dolonyake. Aminyan talak, Allah arye anang ati, yuk ning ton tabakuka kum arenamle. Bukni, na mapu, anggunce Allah moronamlum talak nirya ara, sik anang wininyak touk kum wininamlulume.

Matius 7:21

Ninye aryuk nati, ‘Na ni, Na ni,’ nyabuka, talya nyaltakaninyak nang nirya ara, narye talipniba, neika kum unamabe. Nati, ‘Na nie,’ nyabuka, talya nyaltakaninyak nang nirya kum bukni, Na ni Allah, im deice ululnye birye, ‘Ninye nirya wininamak’ tenen, nyasilye touk kekebikirye, aninguk talibuka unyak nanguk, narye talipnirye, na ap neika unamabe,” Yesus arye nyabuk.

Matius 9:9

Yesus amutuku batakukce, yukak banmok. Banmoka ani, tonoknye, el si ara Matius ulamuk. Roma mutuku nang arye amutuku nirya talilamika ati, amutuku ulamik nang arye sik pajak yo bok Roma mutuku weik ninye deiyok nang ati arilamik. Matius ara, Roma mutuku nang arena ati, ‘Apajak yo bok bulubuka, Roma mutuku nang arepnamne’ tenen, ayo bok deiyamuk aik pum bukmokak, Yesus yayukce eibuk. Eibukce, Matius ati, “Anda na melibuka dobolyanilyame,” nyabukba, Matius arye adiparyuk tukuka, el bukmok aik batakuka Yesus melibuka dobolbiyuk.

Lukas 15:10

Aning nyaptu touk, na dipkoprop nyapsine. Malye ulamice nang noutam arye, tonoknye babye, ton, el malye ulul ning bataklyopura, Allah arye nyalin yupu laka nyana ap, pil donanye ap unyak nang malaikat nirya arye, kanye deilinyake.” Yesus arye nyabuk.

Lukas 19:22

Apil donanye birye nyabukura, aweik deiyoknye birye anyanmuknye biti, tamubuka nyabuk. “Anyapmanilama ati, an nyapmanilam yupu deice arye yupu bokeipnukine. Ance nati, ‘Elda yunye ulirye, moubuka minop deibuk ning ara, talye lukdanuka dololule. Tonda el minop koubuk ning ara, talye lukdanuka libuka dilule,’ nyanmanilame.

Lukas 7:29

Yesus arye ayupu nirya akunum nyabukopura, el yupu kekenmek nang nirya babye, talye nang babye, amutuku talyamik nang ati, yo bok dololamik nang ara, malye nang ulamik bukni, sik babye, “Yesus nyanmasil yupu ara, pia telebe. Allah el bisik ara, diksukum bisikuka,” tenebuka nyanmek. Ayupu nyanmek nang ara, sik malye winin ning batakamikce, Yohanes arye, mek akunum dongolamuk. Anang arye, ayupu nyanmek. “Yesus nyanmasil yupu ara, pia telebe,” nyanmek.

Yohanes 3:3

Nyabukura, Yesus arye domon yupu atonun yupu deice arye tamubuka nyabuk. “Na dipkoprop nyapkine. Yata nang do nirya, nun ni yapu arye winiryuk deipsikikba, winiryuk mapu ulamap touk, nun kanye talima noutamak ara, Allah arye ila tamubuka tonap winiryuk ninye atonun deipnamsile. Kanye talima winiryuk ninye atonun kum deipsilyopura, Allah lyepsilirye, nun kanye talima talinamsil ning nirya ara, aninye kum eibikirye kum dopropnamake,” nyabuk.

Yohanes 3:5

Nyabukura, Yesus arye tamubuka nyabuk. Dipkoprop nyapkine, yatanye do nirya, mek ap, Allah El Dib Kanye mikip ap, abitinye deice arye kum deipsilyopura, Allah lyepsilirye, nun kanye talima talinamsil ning nirya ara, anye birye kum wektue. Tonda, kam pia kum uptinge.

Rasul 17:30

Minop arye Allah dilamuk bukni, walwalto nun winilamubu ning ara, Allah arye, ‘Minpola kum wenepnune’ tenen, namin kilongolamuk. Bukni, wini talak ara, Allah arye ninye mutuku-mutuku nirya ati, nyasulule. “Anggun malye winiluluma ara, batakmunce na tam kipropnamlume,” nyasulule.

Roma 3:19

Ura, nun nirya akunum kel kiyamupe. Allah arye el mem yupu nyabuka areamukba, Yahudi yala ninye doprobikce, ayupu uk talibuka, ayupu amu tam unyake. Ayupu noutamak nyasilye ning nirya ara, anggunti nyasulula anya arye, anggun kan-kan noutamak arye, tonoknye babye, “Nara, malye kum unune,” kum nyaptue. Yahudi yala ninyeuk kum bukni, ninye mutuku-mutuku nirya atonun, malye nanguk unyaba anya arye, Allah arye yupu lepsisikuka bokeipsilirye, wenepnamsila ati, nunce elti, yupu ton tamubuka kum nyaptibye. Allah ati tamubuka yupu nyana kumce unamabe.

Roma 5:20

Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekamuk mem yupu arepsuka deiyok ara ani. Ara, ‘Amem yupu kekebuka kel kibikirye, se nunda dipkoprop pia malye nanguk unyabe,’ tenebikirye, ‘Moubuka kel kipnamak’ tenen, arepsuke. Amem yupu aribukba, ninye nirya kel kiyamik bukni, malye ning weika arye tonap tapakrap tuba winipribalamik. Tuba tabakuka malye winipribalamik bukni, Allah weika arye tonap bico tenelamsukce, el kanye aryuk, ‘Dipkoprop ninye lyena ning talye arepnamsine,’ tenyamsuke. Malye winin ning ara, mitik weik upra balamuk bukni, Allah arye bico tenesilirye, lyesulul ning ara, pia weik upra balirye, malye una deiyok ning nirya ara, malye kibuka bisilule.

2 Peterus 3:9

Aning ati ara, ‘Yesus tukwak mutuku tamubuka yanamle,’ nyalilamuk yupu ara, yuk nang arye, ‘Kume, Allah arye nimalya ap asa aryuk, pil donamsile,’ tenenyak atonun, anggunce aning kum tenenamlulume. Yuk nang ara, ‘Allah arye nimalyap asa pil dolule,’ tenenyak touk, pia kum tenenamlume. Aning kum bukni, Allah arye, sik nirya ati, ‘Se, aninye mutuku sirya, im sirya nirya, sik malye wininyak ning nirya, bataktingce, tamubuka diksukum bisikuk, binuka utingura, tonoknye babye, sik malye winina deice arye, nirya dibuka, kum danana kume,’ tenesulule. Utenesulula ati, tenepce adiparyuk, wenena kumce, aning-aning nirya kum kum danipmasile. Ati, elce nunti eibuka, ‘Yata wiripnamak do?’ tenen, nimalyap arye, dinauk usulule.