Matius 20:21 - Eipomek

²¹ Morobukba, Yesus arye nyabuk. “Yata ning patapmakilba morolyanmanilam do?” nyabuk. Nyabukura, akil arye nyabuk. “Naio, na patanmanilba, moropnukin ning ara, ance arepnamsilame,” nyabuka morobuk. Tonda, nyabuk, “Aning-aning nirya talibuka umince, weik ninye deiyoknye unalamak ara, na mapu bitinye bobuka, tonye bira an kwanim taruk tam, tonye bira an sirik taruk tam deipmince, ninye deiyok nang kipdeipminyeba, weik nang keptiring do?” nyabuka morobuk.

Matius 20:21 ပူးပေါင်းရင်းမြစ်များ

1 Raja-Raja 2:19

Nyabukopura, Batsyeba aning kekebukce, Adonia nyapmok ning ati, Raja dam biyuk. Biyukopura, Raja Salomo minop tikukabukce, kutam tuku dipdongobuka, el lin yanganmok ati, si erebuka kibuk. Kibukopura, Salomo adiparyuk, el buknamok ning, el si takta deice bulbiyuk. Winibukopura, Salomo birye nyabukba, el pil melin nang arye, el lin buknamok ning ati, el si takta dobuka, el sirik tam delilyayik ura, asukum bukuk.

1 Raja-Raja 3:5

Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

Ester 5:3

Ninye deiyoknye Raja Ahasyweros birye, Ratu Ester biti asipdeyuk. “Anda yata ning patanmakilba, na dam morolyanmanilam do? Yata tenepmalamak arye do? Se, Ratu Ester, yata ning do nirya, an moropnunilam ning ara, kum bataknukine. Dipkoprop arepnamkine. Moropniminyopura, na taleamse mutuku, ‘Noutam karin arye bokuka amutuku nirya arepnilyame,’ nyabuka moropniminya babye, na talenun mutuku noutamak arye boknirye, amutuku noutamak dobuka, dipkoprob anti arepnamakine,” Raja Ahasyweros birye Ester biti nyabuk.

Mazmur 110:1

Allah Yahweh arye, na ninye deiyoknye ati nyabuk. “Anda na sirik tam yanuka bukminba, narye an oldan ninye nirya obuka bisipnirye, aninye nirya dobuka, an yan amu tamuk deipnamkine. An oldan ninye nirya dobuka, an yan amu tam deipkiniba, aninye sik nong deice yanipdongopnalame.” Allah arye nyapdeibuk.

Mazmur 45:9

Tonda, ‘Anye bira, ninye deiyoknye Raja ulule,’ tenen, bikilina ati, cang baju, el si juba, arepkik ning ara, el si juba deice, ‘Nintong teleb nyanamle’ tenen, nintong teleb minyak ap, minyak gaharu ap, nintong nyana teleb yo, el si kayu manis yo ap dobuka, ninye deiyok nang ongon baju, el si ara juba, an ongolamlum ning deice likdeipkike. Ninye deiyoknye un aik ara, dengna weik ning, el si gading arye, domik aik pum tam, teleb sukum ara, kitar deice arye, mot ton nyakiba, ance kanye delilyame.

Yeremia 45:5

Ati ara, anda Baruk birye, ‘Na ti, Allah arye na dam ara, teleb ninguk upnutueʼ. Tonda, yuk nang nirya arye, nati, ‘Elda telebnye,’ tenepnikirye, ‘Telebuk kinamniake,’ tenenmalama ara, yata ati do? Ato ning tenepmalama ara, bataknulyame! Baruko, ance aning tenimalama ara, adiparyuk bataknulyame. Na Allah Yahweh arye, tukwak nang, mutuku sirya, im sirya nirya unyak nang nirya ara, sik deice ikin weik ning deibuka wenenamne. Winipnyopura, an babye ikin asa unamlam bukni, winipmaminya babye, anda damutuku binmaminya babye, kum dipnamlame. Ara, na Allah arye anti, lyepropnamkine. Anda kamuk unalame. Winipmanto ara, yin talin nang arye, ninye olanak arye tamubuka yakirye, ‘E, nun mal olan nang opmapu sukum arye, ateleb ning ton dopromse ning ara, ani,’ nyalamak touk, ance an tuba kam unalam ning ati, ayupu atonun nyapnamlyame. Ayupu ara, na Allah Yahweh arye, an Baruk biti nyapdeipkine.” Allah arye nyabuk.

Matius 18:1

Kapernaum mutuku anyuk tuba unmek talak ara, Yesus el mapu arye Yesus ati asipdeyik. “Allah arye ninye weik lyeplirye, sik talima talinamle talak ara, nun kan-kan arye, yatanye tiklirye, minopce nun weik deiyoknye uplirye, melinamsil do?” nyabuka asipdeyik.

Matius 19:28

Asipdeyukba, Yesus arye el mapu ati nyabuk. Na dipkoprop nyapsine. Nara, Ninye Mi Koprop Atonunye birye, aning-aning nirya winiryuk ning kwepdeipnamne talak ara, aning nirya ara, na talipnirye, ninye deiyoknye ubuka, Raja unamne. Weik deiyoknye upnyopura, na pia teleb buna ning, weik dirina uplye nang deice arye buknirye, aning-aning nirya talibuka, deice tam unamne. Atalak ara, narye wibuka deipsise nang, na yupu kekebuka, pia dobolyanganamnulum ati, anggun ap aning-aning weik arepsiniba, anggun babye aning talibuka, deiyok nang kibuka unamlume. Winipmunye talak ara, anggun babye, teleb bunak 12 deice bukmunce, Israel ninye yala 12 unyak ninye nirya ara, anggun deiyok nang kibuka umunce, Israel yala ninye kan-kan arye, ‘Teleb unyak nang ara, ani. Malye wininyak nang ara anye,’ nyabuka, sik yupu lipsisikuka bokolina deiyok nang unamlulume.

Matius 20:22

Morobukba, Yesus arye akil, el mapu bitinye, Yohanes ap, Yakobus ap ati, tamubuka nyabuk. “Anggun asipdenmanurum ning ara, deiyok moubuka kum tenepmarume. Na nong deice ikin ning weik deipnikiba, na donamne touk, anggun babye atonun akanye imun ning dopturum do? Tonda, na nong opnikceba dipnamne touk, anggun babye atonun dipturum do?” nyabuk. Yesus arye nyabukba, sik bitinye nang arye tamubuka nyaprik. “An donmaminya dipnalam touk, nun babye atonun winiptinimnye,” nyaprik.

Matius 20:32

Moronmarikba, Yesus banmoka ani, kekebukopura, anang bitinye dam binuka tikukce, asing kuamuk nang abukmarik ati, ayupu nyabuk. “Anggunda, ‘Yata wiripsutu’ tenen, patapmasilba, moronmanurum do?” nyabuk. Nyabukura, asing kuamuk nang sik bitinye arye tamubuka nyaprik.

Markus 10:51

Yayukura, Yesus arye anye biti nyabuk. “Anda, ‘Yata wiripdeipnutu’ tenen, patapkilba, moropmanilam do?” nyabuk. Nyabukura, asing kuamuknye Bartimeus arye tamubuka nyabuk. “Naio, na asing arye aning-aning elina ati patanulule,” nyabuk.

Markus 16:19

Nun ni Yesus arye ayupu nyabukopura, el mapu adinmek bukni, Allah arye Yesus el nong dobuka bobiyukura, im deice welebuk. Yesus welebukopura, ‘Allah ap, aning-aning nirya pia talinamnam’ tenen, Allah el taruk sirik tam bukukce im deice tuba ei ulule.

Markus 6:22

Sik akwalipmok ning dinmek talak ara, Herodias el kilmu mot yanuka senmokba, sik anang nirya arye kanye deipmekce dinmek. Herodes el kanye deipmoka ati, akilmu ati nyabuk. “Yata ning do an patapkilye ning nirya ara, nati moropniminyopura, dipkoprop arepnamkine,” nyabuk.

Lukas 18:41

“Anda, ‘Yata wiripdeipnutu’ tenen, patapmakil ati, moronmanilam do?” nyabuk. Nyabukura, asing kuamuknye birye tamubuka nyabuk. “Naio, na asing arye aning-aning elina ati, ‘Kwetepnutum’ tenen, patanmanil ati moronmakine,” nyabuk.

Lukas 19:11

Yesus aunmok talakuk, Yerusalem mutuku dam binmoka anya arye, el yupu kekenmek nang nirya arye, Allah aning-aning nirya malye kibuka taliplirye, ‘Israel ninye nun weik ninye deiyoknye upnamsil’ tenen, ‘Talinamle talak adiparyuk upnusile, akunum dam uple,’ tenenmek. Utenenmeka ak bikuk ati, Yesus arye winipmanto yupu ton dukdongobuka nyabuk.

Lukas 22:24

Tonda, sik nyabuk yupu nyanmek talak ara, ‘Nun awekmap nang kankan noutamak arye, yatanye erebuka, nun deiyoknye akunum unamsil do?’ tenenmekce, yupu nyaldanmek.

Yohanes 15:7

Bukni, anggunce na batakana kumce, na ap talima dukdongobuka, nauk diba tenebuka, na yupu kekemunce, ayupu anggun kanye talima noutamak tuba uplyopura, yata ning do nirya, anggun patapsilye touk moropnumunyopura, kekepsinirye aninguk arenamsine.

Rasul 1:6

Yesus ap, elce wibuka deiamuk nang, tonok sum neika unmek akarye, anang arye Yesus ati asipdeyik. “Naio, atalak aryuk nun Israel ninye arye mutuku-mutuku nirya ninye talipnamapa deiyok nang adiparyuk tonap tamubuka arepsiminye akarye nun kan-kan arye tonoknye, ‘Weik ninye deiyoknye unamsil’ tenen, erepdeipnamsilam do, kum do?” nyabuka asipdeyik.

Roma 12:10

Anggunce, yuk ninye nirya ati, ‘Na weit yapu atonun unyake’ tenen, kanye talima deipdamunce, unamlulume. Pia kum batakalanamlulume. Yuk nang ati, ‘E, sikda mambul weik bukni, nara mitik mambulnye unune,’ tenemunce, yuk ninye sik amu tam umunce, aninye ati erepdeipmunce, si erenamlulume. Anggun nirya arye, anggun kayapu nirya ati, kanye deibuka si erelanamlulume.

Roma 8:34

Aning atonun, yatanye birye, nunti wenebuka oplopnamsil do? Kume. Yesus Kristus arye nun lyena ati dibuk. Yesus dipsuka ara aupmal bukni, weik mambul ning ara, Yesus dibukba, Allah arye tamubuka kam bukeibukba, Yesus ara Allah el sirik taruk tam bulbiyuk. Allah el dam bul biyukce, Yesus nun melina ati, melibuka Allah ati morosulule. Aning ati ara, yatato nang arye, nunti, “Anggun malye winimunye ning ati, Allah weik arye wenepnamsila ati, el ap neika pia kum unamlume,” nyabuka wenepsitingce, yupu lepsisikuka bokeipsiting do? Kume, aning ara kum nyapsiting.

Kolose 3:1

Ara, Allah arye Kristus kam bukeibuk talak ara, anggun ap, neika kam bukeipsuke. Ara, diba teneplum ati, Allah arye bol kobuka pia kam una deiyok ning akunum areamsuk ning ati nyapsine. Anggun ap, Kristus ap, akunum arepsuka anya arye, im deice ulul ninguk tenebuka, aning deiceuk anggun kanye talima delinamlulume. Im deice ara, Kristus arye Allah el sirik taruk tam bukukce, aning-aning nirya talibuka, im deice tam Deiyoknye ulule.