Matius 20:2 - Eipomek

² “Asum tonok na wa winmanunye bukni, iniplyopura, dekna teleb keil uang tonok el si ara derakma arepnamasine,” nyabukura, sik anang arye, “Telebe,” nyabuka el wa pil wilbiyik.

Matius 20:2 ပူးပေါင်းရင်းမြစ်များ

1 Raja-Raja 18:12

Nyabukce ayupu ton dukdongobuka nyabuk. “Naie, winipmanto ‘Ninye deiyoknye dam nyapnun’ tenen, bisik tuba banmanye talak arye, Allah el si Yahweh, el Dib Kanye arye bobuka yuk mutuku delilbikiliba, ‘Tuba atikmala’ tenen, ninye deiyoknye Ahab dam binuka nyapniba, yalirye, yanuka dipdelamkiliba, kum eipkilyopura, ‘Ahab birye, ‘Tilila nyapmanilama,’ nyabuka na opnilyak’ tenen, nyapkine. Bukni na nio, na mitik talak arye Allah el si Yahweh ati, el siuk erepnin yangalamse, ani wini talak babye tuba si erenune. Ati biknilyame na nio. Nara an amu tam atonunye unye bukni, anyapmanilam ning ara, na ilile.

2 Tawarikh 34:3

Yosia el wel winiryuk nepmok talak aryuk, ninye deiyoknye Raja tikamukce, el umur keting tamun delapan (8) tahun kibuk talak ara, el apu koproba Raja Daud si erelamuk Allah ati, el babye atonun, ‘Allah arye yata nyapnunil do?’ tenen, Allah ati si erena deiyok koubukce, moubuka kekelamuk. Winibuka ulamuka ani, keting tamun dumbarye ton mabukopura, sik Israel nang arye, minop talak isa si erena ati, kintinibuka delilamik ning nirya ara, ‘Amalye ning kum kipdeipnamne,’ tenebukce, deiyok koubuk. Ara, isa si erena ati, mutuku kon deice kintinibuka dolamikak ap, isa Asyera nyabuka, el si erena ati, cang yo iklamik ning ap, yuk-yuk talye ning ati, si erelamik ning, ninye urasin atonun ubuka memebuka, deiamik ning nirya ara, ulubuka dakukce, kum kipdeibuk.

Penghotbah 12:1

Ura, an kam unalam talak, ikin ning an dam kum upmakilye, keting tamun aniryuk, an kwepdeipkuknye Allah atibuk tenenamlyame. Ara, an akunum wisi daminye talak ara, ‘Kam una na like,’ tenepmince nyanamlama ati, nyapkine. Ati Allah atibuk pia tenenamlyame.

Matius 18:28

Yo bok weik dopropmoknye biyuk bukni, el ap neika pil dolamdiknye, anye el yo bok pia mitika aryuk tia dopromuka ati, el ngang talipnurubuka long-long abukopura, yu asa arye, ayupu nyabuk. “Ance tia dopromlum yo bok ara, adiparyuk arepnilyame,” nyabuk.

Matius 20:1

Yesus arye el mapu 12 nang ati nyabuk. Allah arye ninye mutuku-mutuku nirya noutamak arye, ninye weik lyeplirye, anggun talima talisilya atonun ning ati, winipmanto yupu nyapnusine. Tonok wa deiyoknye birye, ‘Na anggur tapu duk wa pil donamak’ tenen, beren tam talak ninye dolbiyukce, ayupu nyabuk.

Matius 20:13

Nyabikopura, adeiyoknye birye tamubuka nyabuk. “Anango na malye kum winipmasine. Arup beren tam talak arye, ‘Tonok sum pil dobibyopura, tonok weik yo bok dona telebe,’ nyapmanulum do, kum do?

Matius 20:3

Anang arye pil donmek bukni, keting jam 9 pagi kibuk. Awa deiyoknye birye, din ning deibuka deklamikak, pasar deklamikak biyuk talak ara, talye urdem balamik nang eipdayikce, ayupu nyabuk.

Matius 20:9

Yukubukba, el wa winmek nang yayikopura, inilongon talak jam 4 sore deiyok koupmek nang ati, keil uang el si derakma tonok aribukba doprobik.

Matius 22:19

Anggun pajak ati pemerintah arelulum keil uang ara, dobuka na arepdenumunyeura, na dipdenune,” nyabuk. Nyabukura, apajak ati arilamik keil uang, sikce dobuka Yesus ati arepdeyikopura, Yesus arye asipdeyuk.

Matius 9:37

Winibukce, el yupu kekebuka, el melibuka dobolbalamik nang ati, adomon yupu nyabuk. “Weik wa wiyamiceba, pia weike paplirye, kwaning nong ara weike akunum wisiamlye, bukni, yongopra lilbinmanto nang ara, mitik nun unyake.

Markus 12:15

Anang arye, ‘Yesus malye nyaptue’ tenen, nyabuka tenepce arye asipdeyikopura, Yesus arye anang sik talima ak duknublobuka nyapmek ning bikukce, ayupu nyabuk. “Anggunda, ‘El yupu nyaptua deice arye malye uptue’ tenen, tenebuka asipdenmanulum ning ara, yata ati do? Anggun keil uang dobuka bebdenumunba, dipdenune,” nyabuk.

Lukas 1:15

Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle.

Lukas 10:35

Mapmarika berekukopura, aSamaria mutukunye birye, weik keil uang peraknye bitinye dobuka, aninye asik nang malamik aik talibuka ulamuknye biti aribuk. Aribukce ayupu nyabuk. “Ance anye biti melibuka kwetenmaminya ani, aminyan na tamubuka yanyopura, el kwetena ap, el manak ap ati, an yo bok weik tonap areaminyopura, narye yo bok tonap punupnamkine.” Yesus arye winipmanto yupu deice arye nyabuk.

Lukas 20:24

“Anggun keil uang el si denarius dobuka arepnumunyeura, dipdenune,” nyabuk. Nyabukura, sikce akeil uang dobuka arebikopura, Yesus arye asipdeyuk. “Anggun dipdelulume. Akeil uang deice el ninye urasin atonun ning ap, el yupu ap puturubuka deibik ning ara, yatanye urasin ap, sekna ap upmal do? Tonda, ninye si sekuka deibik ning ara, yatanye si do?” nyabuka Yesus arye asipdeyuk.

2 Timotius 3:15

Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.

Wahyu 6:6

Atalak ara, sik dumbarye kam unyak ning noutamak arye, ninye yupu nyalamak atonun yupu deice arye nyanmekba, ayupu kekepse. “Wini talak ara, tonok sum nirya arye, ikin pil donmaca ani, dekne ning arenamak deice arye, din ning mitik anunuk dekenamake. Ara tonok sum nirya ikin pil dobikirye, dopropnamak dekna ning deice arye, roti dana deiyok ning, atu ato ning, el si ara terigu, tonok literuk deknamake. Akumopura, mitik teleb ning yakong atonun ning ara, 3 literuk deknamake. Bukni, Ara yo duk teikikibuk, basam kop atonun mek kwelamak ning ap, anggur mek dilamak ning ap ara, dauplye. Ance aning bitinya ati malye ulina kume, Ara yo kan-kan ap, anggur tapu wa ap ara telebuk unamle,” nyabukba, kekepse.

1 Samuel 2:18

Ura, Eli el mapu bitinye arye, malye weik winilamdik bukni, atalak babye, Samuel el nong nena kum bukni, Allah el aik pum tam, pil melinanye ulamuk. Atalak ara, Allah el aik pil don nang, ongolamak baju, pia teleb kurun baju ongobuka, apil dolamuk.

1 Samuel 2:26

Bukni, awinilamrik talak ara, Samuel bira akunum nemukce, kanye akunum wisamuk. Tonda, Israel ninye ap, Yahweh ap arye, el Samuel biti, ‘E, elda telebnye,’ tenelamikce, kanye el deice delilamik.

1 Samuel 3:1

Samuel bira kamnye ulamuk talak arye, Allah el si Yahweh biti, el pil moubuka dolamuk. Atalak ara, Yahweh arye, el aik pil dona deiyoknye, Eli ulamuka anya arye, Samuel bira, Eli el amu tam ubuka pil dolamuk. Atalak noutam ara, Allah Yahweh arye, ninye ati, el yupu weika arye, kum nyalamukba, el yupu laka nyan nang arye, mitikto aryuk kekelamik. Aning atonun, Allah arepliba, lengdar mabica deice arye, elilamak ning ton, mitik anun aryuk arelamuba, mitik aryuk elilamik.

1 Samuel 3:21

Atalak noutamak ara, Allah Yahweh ara, el si eren aik, Silo mutuku damak arye yanuka, deiyok kouna talak ara, el nyalamuk yupu deice arye, Samuel dam laka kipdeibukura, adeice Samuel birye, Allah el si Yahweh ati, moubuka tenelamukce, weika arye kel biklamuk.