Matius 14:33 - Eipomek

³³ Tunimabukopura, Yesus el mapu 12 nang arye, ‘Se’ tenen, mambul kanye bobikce, el si erena ati, ayupu nyabik. “Anda, dipkoprop Allah el Mi Koprop ulyame,” nyabik.

Matius 14:33 ပူးပေါင်းရင်းမြစ်များ

Mazmur 2:7

Aninye deiyoknye birye nyapnamle. Allah Yahweh arye, nati nyapnuk yupu ara, nyapnune. Allah Yahweh arye nyapne. “Anda na mi koproba ulyame. Na Allah ara, an ni koproba na unune,” nyabuka, wibuka deipnuke.

Daniel 3:25

Nyabikba, ninye deiyoknye birye, “Winilye nanguk dongopmabe,” nyapmalum bukni, “Weik uku buk dinmala noutamak ara, dinmanabuk, ninye dumbarye banmakak eipmane. Adumbarye nang nirya ara, sik tapu koubuka dongopmapu ning ara, kum danmale. Tonda, sik nong bol deice ara, uku dila babye, ton pia kum upmale. Dumbarye ning ara, minop kwemdina ning atonun bukni, el urasin ara, malaikat atonun unmalak eipmane,” nyabuk.

Matius 14:32

Nyabukopura, Yesus ap, Peterus ap, mek lia yo welebuka bulbirik. Mek liya yo welebuka, sik anang ap bulbirikopura, weik mok piripna donmoka ara tunim abuk.

Matius 15:25

Nyabukura, akil arye Yesus el dam yayukce, ‘Si erepnun’ tenen, gutam tuku dipdongobuka morobuk. “Naie, anda Daud yala nang arye deipkiknye, ance bico tenebuka melipnilyame,” nyabuka, weik arye morobuk.

Matius 16:16

Asipdeyukba, Simon Peterus arye tamubuka nyabuk. “Nai Yesuso, ‘Ninye mutuku-mutuku nirya noutamak, ninye weik lyeplirye, sik kanye talima talinamle’ tenen, Allah arye wipdeiamkuknye, anda Kristus ulyame. Anda, Allah el Mi Koprop ulyame,” nyabuk.

Matius 17:5

Peterus arye ayupu tuba nyanmok talak ara, sik amutuku dup unmek bukni, dua arye siktikmek mutuku nirya palibuka lelipdongobukura, adua kan-kan arye, Allah arye ayupu nyabuk. “Aunmalanye bira, na Mi Koprop ulula ati, elti, na kanye pia delinune. Anggun nirya ara el yupu pia moubuka kekenamlulume,” Allah arye nyabuk.

Matius 2:11

Weik arye kanye deibikce, anyaik wekuka Maria ap, el mi Yesus ap eibikce, ami el kina ati, sik nirya arye, gutam tuku diprongobukabikce, tonda, Yesus el si erenmek. Erenmekce, sik mambul ning, lin ning pum torokukabikce, dekna weik ning Yesus ati arebik. Sikce Yesus arebik ning ara, ani. Yo pia akunum mikamuk ning, el si kemenyan uku dongobikba, ‘Teleb nintong nyapnamle’ tenen, arebik. Aning el si ara, kemenyan. Tonda, dekna weik ning emas arebik. Ton ning ara, dekna weik yo pia teleb nintong nyalamuk ning, el si ara, mur arebik.

Matius 26:63

Asipdeyuk bukni, Yesus ara yupu tonap tamubuka kum nyabukce, tunim abuk. Winibukopura, ila tonap Allah arena ati, aweik deiyoknye, Kayapas birye, Yesus ati asipdeyuk. “Allah arye dinmasilak unmalama ati, talya yupu nyana kum, dipkoprop ninguk nyapnusilame. ‘Ninye weik lyeplirye, sik kanye talima talinamle’ tenen, Allah arye wipdeiyamuknye, Mesias bira, an aulyam do? Tonda, Pia Teleb Etekdopnye Allah ara, anuk el Mi Koprop ulyam do?” nyabuka asipdeyuk.

Matius 27:43

Anye bira, ‘Nara, Allah el Mi Koprop unune,’ nyalamuka ati, ‘Allah elcuk melinulul’ tenen, ululnye anya arye, Allah arye anye pataptopura, atalak aryuk Allah arye lyepmimitue,” nyabuka nalinmek.

Matius 27:54

Yesus weik arye ngalukukce, el dipmok talak ining mek lokuk ning ap, ton asum winibuk ning yuk ning nirya winibukba, yuk nang ton eibik. Tonda, tonoknye, yin talin nang yupa weik, 100 nang talyamuknye, Yesus wanwanun yo deipmeka deice tam tikuka dinmoka anya arye, el ap neika unmek ninye ap, sik nirya eibikce, ilil weik ubuk ati, ayupu nyabik. “Se, anye bira, dipkoprop Allah el Mi Koprop ulamuke,” nyabik.

Matius 28:17

Amutuku tamubuka biyikce, daunmek talak ara, Yesus yayukba eibikce, ton nang ara diba tenebikce, el si erebik bukni, ton nang ara, ‘Dip do, telela do?’ tenen, teniltonauk unmek.

Matius 28:9

Bisik noutamak bik-bik abuka banmarik talak ara, Yesus talye karin yayukce epdayik. Epdayikce, Yesus arye akilapu bitinye ati, “Telebe,” nyabukba, el dam yarikce, si erebuka, ‘El si kipnunam,’ teneprikce, el yan dam yanuka taliprik.

Matius 4:3

Din pia patabukopura, Isa Mutuku Dongonye arye, ‘Yesus piripdenun’ tenen, Yesus dam nyalyayuk. “Anda dipkoprop Allah, el Mi Koprop ulaminyopura, aubuk keil dopropmince, ‘Kwaning kiplyame,’ nyapminba, kwaning daliba, aning dobuka diptume,” nyabuk.

Markus 1:1

Allah el Mi Koprop, Yesus Kristus ap, ninye lyena ati el laka teleb yupu deiyok kouna ara, ani.

Markus 14:61

Asipdeyuk bukni, Yesus ara, yupu tonap, tamubuka kum nyabukce, tunimanauk ubuk. Winibukba, ila tonap, Allah arena ati, aweik deiyoknye birye, Yesus ati asipdeyuk. “Ninye weik lyeplirye, sik talima talinamle deiyoknye, Mesias nyanyapnye bira, an aulyam do?” Tonda, “Si erekinyapnye malye winin ning pia kum winilulnye, Pia Etekdopnye Allah ara, anuk el Mi Koprop ulyam do?” nyabuka asipdeyuk.

Markus 15:39

Yin nang yupa weik, 100 nang talyamuknye, Yesus wanwanun yo deipmekak deice tam tikmoka anya arye, Yesus weik arye ngalukukce, el dipmok talak winibuk ning nirya eibukce, ayupu nyabuk. “Se, anye bira, dipkoprop Allah el Mi Koprop ulamuke,” nyabuk.

Lukas 24:52

Akunum im deice biyukopura, anang nirye arye Yesus ati, kibuka, el si erenmek. Erenmekce, kanye pia deibikura, Yerusalem mutuku tamubuka biyik.

Lukas 4:41

Tonda, uk adilamuk ninye kan-kan ara, aninye sik nong talyamuk isa nirya kutukuka biyik. Kutukuka biyikopura, aisa mer arye ayupu nyanmek. “Anda Allah el Mi Koprop ulyame,” nyanmek ati, Yesus arye ayupu sekdongobuk. Ara, Yesus arye, aisa nirya, ‘Elda Ninye Lyenanye, Mesias ulule,’ akunum tenepmaniaka ati, ‘Ayupu kum laka nyapnamniyak’ tenen, sik nyanmek yupu sekdobuk. Aisa nirya ara, el Yesus akunum kel bikamik ati, ‘Na laka nyapnicak’ tenen, “Anggun yupu tunimaplulume,” nyabukura, aisa nirya arye yupu kum dayikce pia yupu nyapmanto kum ubuk.

Lukas 8:28

Amutuku ulamik ninye arye, ‘Isa uryamuknye nun yana opsilyak’ tenen, kawat rantai tapu arye, el taruk ap, yan ap, tapu koubuka deililamikura, aisa uryamuka mikip deice arye, el nong mikip kibuka, mikip weik ulamukce, atapu buluklobuka balamuk. Buluplonak arye, bik-bik abuka ninye pia kumak balamuk.

Yohanes 1:49

Nyabukura, Nataniel birye mambul kanye bobuka nyabuk. “Se, anda Peterena Deiyoknye, Rabinye dipkoprop ulyame. Na kele, anda Allah el Mi Koprop ulyame. Anda Israel yala ninye nun weik ninye deiyoknye, Sisinanye Raja unamsilame,” nyabuk.

Yohanes 11:27

Nyabukura, Marta arye tamubuka nyabuk. “Naio, narye dib tenepkine. Tonda, anda Ninye Lyena Deiyoknye, Allah arye wipdeipsuknye Kristus ulyame. Sik minop talak arye, “Allah el Mi Koprop ara, aminyan talak tukwak mutuku yanamle,” nyabuka, nabi nang arye nyalilamsiknye bira, anda akunuma. Narye dib tenekunune,” nyabuk.

Yohanes 17:1

Yesus arye ayupu nirya akunum nyabukopura, el urasin erebuka im deice tam dipdeyukce, Allah morobuk deice arye ayupu nyabuk. Naio, winira, na tenyamnulum talak akunum upmale. Ance an Mi Koprop nati, ‘Ninye nirya arye, na si erepnamak’ tenen, mambul pil dopnamnilyame. Winipniminyopura, ninye arye na si erenamniyake. Winipniminyopura, ‘Ninye tukwak nang nirya arye, an pia teleb winiminya kel bikikirye, anti kibuka si erebikirye, an si pia erenamkiyake’ tenen, narye mambul pil donamne. Na mambul pil dopnaman deice arye, an si erepdeipniba, yuk nang eibikirye, sikce an si erenamake. Ati ance nati teleb kipdeipnamnilame. Winipniminyopura, an Mi Koprop na pil dopnaman deice arye, ‘Ninye nirya an si weik arye erepdeipkikirye, si erenamak’ tenen, moropkine.

Yohanes 19:7

Nyabuk bukni, sik Yahudi yala deiyok nang, weik arye nyanmek. “Kume, nun apu Musa birye sekeiyamsuk yupu, amem yupu noutamak nyasilye yupu ara, anye birye yanipsuka ati, adiparyuk opdeipsilyame. Elce, ‘Nara, Allah el Mi Koprop unune,’ nyabuka deice arye, nun mem yupu yanipsuka ati, opdeipsilyame,” nyabik.

Yohanes 6:69

Nun kel bikuburye, anti akunum dib tenekinyabe. Allah arye dopdeipsukba, Diksukum una deiyoknye bira, an tonoka. Yuknye kume,” nyabuk.

Rasul 8:36

Apia peterepnin banmoka ani, bisik noutam mekwen deiyamukak birikopura, anye birye nyabuk. “Mekwen mening dam deibuka ati, adiparyuk mek dongopnutum do? Na talye ning ton aupmanil do? Kum do?” nyabuk.

Roma 1:4

Yesus Kristus ara akunum dipmok bukni, Allah arye Yesus ati tamubuka kam bukeibuka deice arye laka kipdeipsuke. Ara Allah El Dib Kanye mikip deice arye nyapsuke. “Yesus ara Allah el Mi Kopropa ulule. Allah el malye winina kumce, pia telebuk ulul touk, el mi kopropa Yesus babye, malye un ning tonok babye kum winilirye, pia diksukumuk ulule. Elda pia mikip weik unamle,” nyabuka, laka kibuka ayupu laka nyapsuke. Lakak kibuka deipsuknye bira, yuknye kume. Elda, nun Deiyoknye Yesus Kristus el tonok ulule.