Matius 13:35 - Eipomek

³⁵ Domon yupu deice aryuk peterenmok ning ara, Allah yupu laka nyananye, nabinye nyalamuk touk upnamuka ati, peterelamuk. Nabi Asap arye nyalamuk yupu ara, ani. ‘Allah arye, “Na peterenamne talak ara, domon yupu ap, winipmanto yupu ap adeice aryuk peterenamne. Allah arye aning-aning nirya kintinipdeibuk talak, aniryuk dipdongobuka anoutam talak nirya, Allah arye duknyamuk ning nirya ara, wini talak ara, laka kibuka nyanamne,” nyabuk.’ (Mazmur 78:2) Ayupu ara, Mazmur yupu noutamak, nabi Asap arye, nyalamuk.

Matius 13:35 ပူးပေါင်းရင်းမြစ်များ

Mazmur 49:4

Narye nyapnusin yupu ara, kel weik bikina deice arye nyapnusine. Ara, na kanye pum noutam arye, moubuka tenipse ning ara, nyapsiniba, kekepmunyopura, anggun babye, kel weik nang unamlume.

Mazmur 78:2

Narye, winipmanto yupu atonun bukni, el si ara amsal deice, ayupu nyapnusine. Narye nyapnusin yupu ara, minop talak arye nyalamnikba, kekelamsa ati, minop kanam asa aryuk, kum kekeplume. Moubuka kekepmunyopura, ‘E, deiyok ara ani,’ tenen, biknamlume.

Yesaya 42:9

Minop talak narye nyapsise. ‘Aminyan doryanamle talak ara, dipkoprob winibuka-winibuka winipnamle,’ nyabuka nyalilamse ning ara, wini talak aning nirya nong akunum aulule. Aning nirya min kum uamuk talak ara, akunum nyalilamsise. Wini talak arye dipdongobuka, doryanamle talak winipnamle ning ara, ‘Winipnamlarya,’ nyabuka nyalisunune. Aminyan talak winipnamle ning nirya, akunum kel bikmana ati nyapne. Awinipnamle ning nirya ati, min kum winipmalye talak arye, ayupu ara anggunti nyasunune.

Amos 3:7

Dipkoprop Allah Yahweh elda, Weik Erena Deiyoknye, aning-aning nirya talibuka, deice tam ulule. Winilula anya arye, Allah elce, ‘Aning nirya ara, winipnamne,’ nyabuka, el yupu lak nyan nang, ‘Nabi-nabi arye kekepnamak’ tenen, lak nyaliba kekenyake. Sikda, el amu tam pil don nang unyake. Allah arye, sik dam lak kum nyapdeiamturye, el pil dolye ning nirya, talye mangkau kibuka kum pil dolule. ‘Winipnamna arye,’ nyabuka, laka nyaliba, nabi nang akunum kekebiceura, Allah arye apil dolule.

Matius 13:14

Sik wininyaka ara, Allah yupu laka nyalamuknye, nabi Yesaya arye, ‘Wininamak’ tenen, nyalamuk touk wininyake. Yesaya nyalamuk yupu ara ani. ‘Amol arye talya kekeltakanamlum bukni, nong noutamak deiyok ning ara, pia kekebuka kum bikinamlume. Asing arye bola deiceuk elinamlum bukni, ‘Deiyok anye,’ tenebuka, pia kum bikinamlume.

Matius 13:3

Peterenmok talak ara, domon yupu ton weik arye peterenmok. Apeterenmok domon yupu noutamak arye, ayupu ton nyabuk.

Matius 25:34

Deipnyopura, na Raja unamna ati, na sirik taruk tam deipnamne ninye ati ayupu nyapnamne. Sikda na ni Allah arye talima aribukba, bico tenebuka kanye deilisilye ninye ara, na dam wekelyalulume. Allah arye aning-aning nirya min kum kwepdeiyamuk talak arye, ‘Anang aryuk talinamak’ tenen, akunum kintinibuka deiamsuk ning ara dolyalulume.

Matius 5:2

Aninye ap, el yupu kekebuka dobolbalamik nang, yuk nang ap, sik nirya bukikura, elce ayupu deiyok koubuka peterenmok.

Lukas 10:14

Bukni, na dipkoprop nyapsine. Anggunda aning-aning nirya elilulum nang anya arye, Allah arye ninye nirya ati, bokuka deiplirye, wenepnamle talak ara, sirya talak ara, Tirus mutuku nang ap, Sidon mutuku nang ap, mitik kanam arye wenepnamle. Anggunce nati, ‘Anye bira nun like’ tenen, batakanululum nang ara, pia ikin weik arye wenepnamsile. Anggunda, pia ikin arye wenepnamsile.

Yohanes 17:24

Winibuka morobukopura, ayupu ton nyabuka morobuk. “Naio, ance aning-aning nirya ap, tukwak mutuku nirya ap, min kum kwepdeiplum talak ara, ance nati weik arye kanye talima areamnulume. Winibuka talima areamnuluma ati, weik mambulnye kipdeipnulumce erepdeipnulumba, na si weik arye kibuka si erenamake. ‘Aning nirya pia teleb kipdeipnulumnye bira, na mapu arye eipkitingce kel bikiting’ tenen, moropkine, naio. Ara, ‘Aning nirya eipnamak’ tenen, ance areamnulum ninye, ‘Na mapu nirya ap, na ap, na unamne mutuku neika unamap’ tenen, moropkine, naio.

Rasul 15:18

Allah elcuk aning nirya pil dolule. Min arye aning lakak nyabukura, ninye kel kinyaka deiyoknye bira Allah el uka. Elce ayupu nyapdeiyamuk.’ (Amos 9:11-12)

1 Korintus 2:7

Kume, nunce weik kel bikne yupu nyanyaba ara, Allah minop talak arye duknyamuk ning ati nyapsine. Allah arye aning-aning nirya min kum kwepdeiamuk talak arye, nunti utenyamsuk. ‘Aweik kel bikne ning deice arye, na ap, na mapu ap, talima dukdongobuka ulamibya ani, na pia teleb unye touk, sik babye, atonun teleb kipdeipnirye, na ap neika unamake. Winipnyopura, aninye ereipnamne,’ Allah arye, aning tenelamsuke.

Efesus 3:5

Allah arye, Kristus arepsukopura, elce pil dopsuka deice arye kintinipsuk ning ara, minop talak ulamik ninye nirya ati, lak akarye, kum nyalamuk arye, kum biklamik. Bukni wini talak ara, Allah el yupu dobuka peterelbana ati, deiyok kouna, deiyok Rasul nang ap, el yupu laka nyabuka peterena ati nabi-nabi nang ap ati, Allah El Dib Kanye arye, ayupu nirya lak akarye, nyaliba, anang nirya moubuka kel bikinyake. Adeiyok nang nirya ara, Allah arye, wipdeiyamuka anya arye, sikda malye winina kumce, pia pung diksukum nang unyake.

Efesus 3:9

Tonda, Allah arye, tenepnuke. ‘Paulus bira, na yupu laka nyabuka peterenamle,’ tenepnuke. Aning ara, ani. ‘Ninye nirya moubuka kekenamak’ tenen, Allah arye, ninye lyena ati, bico tenepsilirye, el kanye aryuk pil donamsil ning ara, ‘Paulus bira, “Allah arye, winibuka, winibuka wininamsile,” nyabuka, peterenamle’ tenen, wipdeipnuke. Allah arye, aning-aning nirya kwepdeiyamuk deiyoknye birye, ninye lyena ati tenyamsuk ning ara, dungnyamukce el demuk kel bikamuk. Aning nirya duknyamuk bukni, Allah arye nati, ‘Aning laka nyapnyopura, Paulus kekeplirye, aninye nirya ati laka nyabuka peterelbinamle’ tenen, wipdeipnuke. Na Paulus arye, nyapsine.

Ibrani 1:1

Minop talak ara, Allah arye nun apu yapu nang ati, yupu nyalamuk ning ara, elce nyalamukba, el yupu laka nyalamik nang, sik nabi-nabi nang kekelamikce, nun apu yapu nang ati, laka nyalamik. Allah arye, el yupu laka nyalamik nang deice laka nyabuka nyalamsuk ning ara, like yupa weik ap, pil yala yupa weik ap dolamuka deice arye, laka nyalamsuke.

Wahyu 13:8

Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.

Wahyu 17:8

“Yohanes ance eipmom ning pia Malye Kam Ulul Ning ara, min arye tukwak mutuku noutam balamuk. Wini talak tunimapliba, ninye kum elinyak bukni, aminyan talak ara, tukwak mutuku noutam tuku pum bisik bakamlyak douapce, kutukuka tiknamle. Aminyan tuku pum bisik arye weleplyopura, Kristus arye anye biti wenebuka oplopnamle. Allah arye aning-aning nirya kwepdeiyamuk talak arye, ‘Aninye lyepnamne’ tenen, Kam Pia Unamak Ninye Si Sekna Buku, sik si kum sekiamuk ninye ara, aminyan talak aMalye Kam Ulul Ning tuba tonap eipnamake. Minop arye tukwak mutuku balamuk bukni, wini talak kum elinyakbuk, aminyan talak tonap laka yalyeura, eipnamaka ati nyapkine. Malye Kam Ulul Ning ara, elinamak ninye ara, Allah arye ‘Sik kam pia unamak’ tenen, sik si kum sekiamuk ninye ara eibikirye, lukdanamake.”