Markus 4:3 - Eipomek

³ Yesus arye awekmek nang ati nyabuk. Anggun kekeplulume, tonok sum tonoknye birye wa wibuka, yala ning doknin banmok.

Markus 4:3 ပူးပေါင်းရင်းမြစ်များ

Mazmur 34:11

Aning atonun, bai tam ulamle weik kuse atonun ning, weik yu ning, el si ara, singa kuse, el din ning ton kum uplirye, din kum diplyopura, mikip kum ulule. Bukni, nun ni koproba Allah Yahweh ati, si erebuka ukirye, ‘El dem aniryuk lyenamsil’ tenen, el amu tamuk unyak ninye nirya ara, teleb ning ati, kum patalule. Sik kam una ati, teleb ning nirya arepliba, kanye imun ton kum ulule. Aning nirya ara, sik dam pia aunamle.

Mazmur 45:10

Tonda, anda mambul weiknye ulyama ati, yuk-yuk mutuku ninye deiyok nang arye, ‘Israel ninye unyak mutuku talilul ninye deiyoknye biti, nun kilmapu dobuka arebipyeba, el patalul ning ati melinamak’ tenen, sikce, anti areamkikba, kilapu ara, an dam weik unyake. Diba, ance domlum kil ara, an taruk sirik tam tikilule. El baju deice ara, pia dengna weik ning, el si emas, pia teleb ning, Ofir mutuku arye dobuka boyanamik emas ara, taplak deiamikba, ongolule.

Amsal 7:24

Ati ara, na mapu nirya ati, narye, “Winibuka upnamlume,” nyabuka nyasinye yupu moubuka kekepmunce, kel biknamlulume.

Amsal 8:32

Ati ara, anggun na mapu nirya ap, anggun kam nang nirya ap ara, na nyasinye yupu moubuka kekenamnululume. Yata ninye do nirya, narye, “Wininamlulume, aning ara kum wininamlulume. Teleb kibuka un ning ara ani,” nyalisinye yupu moubuka kekebikirye, talibuka dobolbana uk, unamak nang nirya ara, Allah arye melipliba, pia telebuk unamake. Allah arye aninye nirya ati, kanye deiplirye, teleb ulinamle.

Penghotbah 11:6

Tonda beren tam talak arye, anggun yala ning dokonmamunya ani, sintam kiplya babye, batakna kumce, dukdongobuka dokonamlulume. Adokmamunye ning ara, yatato ning teleb ubuka paptuba, kel biktibye do? Tonda, beren tam dokmapye ning babye, sintam dokmapye ning babye nirya, telebuk ubuka paptu do? Aning ara, nun walwal anya arye, kel kum biktibya ati, pia pi dobuka pil dona uk unamlulume.

Yesaya 46:12

Allah arye nyabuk. “Anggun talima erepmunce, ilil kanye pia bolulum nang nirya ara, anyapne yupu moubuka kekeplulume. Anggunda diksukum pia kum ululumce, malyeuk ululum ninye ara, kekeplulume. ‘Aning ara, min kum winipnamle,’ tenena meme.

Yesaya 46:3

Ati, Yakub birye deibukba, dadeidanen balulum ninye, Israel ninye ara, anggun tuba kam aunmalum ninye ara, “Na yupu uk moubuka kekepnululume. Anggunda na mapu koprop ati nyapsine. Ara, anggun apu yapu arye anggun min kum deiamsik talak arye, narye meliamsa ati nyapsine. Anggun deipsik talak arye dipdongobuka, wini talak nirya ara, narye tuba kalikuka melisinirye, talisunune.

Matius 13:24

Ayupu nyabukopura, domon yupu tonok ton nyabuk. Allah arye ninye mutuku-mutuku noutamak nirya, ninye weik lyeplirye, sik talima talilya ara, anyapnusin ning atonun ulule. Wa wina deiyoknye birye, wa wibuka teleb yala ning dokuk.

Matius 13:26

Sik daulamik bukni, el dokuk ning pabukce, welelamuka ani, duk moubuka muruk kibuk. Muruk kibukopura, talye nang arye turukuka dokamik ning babye welelamuka ani, duk moubuka muruk kibukopura laka ubuk.

Matius 13:3

Peterenmok talak ara, domon yupu ton weik arye peterenmok. Apeterenmok domon yupu noutamak arye, ayupu ton nyabuk.

Markus 4:14

Yesus arye nyabuk, “Ura, yala ning dokda banmoka ani, nyanmanu ara, Allah yupu peterelamak ning ati, nyapmanue.

Markus 4:2

Ayupu-ayupu nirya weik arye peterenmok. Apeterenmok yupu noutam arye, ‘Mambul ning kel kipnamak’ tenen, winipmanto yupu deice arye nyabuk.

Markus 4:23

Aning ati ara, na peterepsinye yupu ara, talye amul deiceuk kum kekeltakanamlulume. Yata nang do nirya, na nyasinye yupu ‘Moubuka kel kiptinye’ tenen, pataplinye bira, pia na nyapmasin yupu, moubuka kekenululume.

Markus 4:4

El yala ning dobuka doknin banmokak, ton yala ning ara, el doknin banmok bisik yok sakmok. Yok sakmokbuk, talye maka yayikce bulubuka dodibik.

Markus 4:9

Yesus arye winipmanto yupu nyabukopura, ayupu ton dukdongobuka nyabuk. “Amul aupmasilyeura, ayupu nong noutamak ning kekepmanto nang ara, kekenululume,” nyabuk.

Rasul 2:14

Nyabikopura, Peterus ap, Yesus arye wipdeiamuk nang, 11 nang ap tikikura, Peterus arye awekmek nang ati, weik yupu arye nyabuk. Na kayapuo, moubuka kekepnalume. Nun Yahudi yala nang ap, anggun Yerusalem mutuku wekmalum nang nirya ap, awekmabe. Na laka nyapnusin yupu ara, moubuka kekepnuse!

Ulangan 4:1

Atalak ara, Musa birye, Israel ninye ati nyabuk. Anggun nirya moubuka kekeplulume. Allah arye, ‘Aning ara, wininamlulume. Tonda, aning ara kum wininamlulume,’ nyapdeipsuk yupu, narye anggunti laka nyapnusine. Ayupu moubuka kekepmunce, nimalya ap asa arye, Allah el amu tam umunyopura, kam pia unamlume. Winibuka umunyopura, Allah arye winiryuk ning arepnamsil, pia teleb weik mutuku binuka wekmunce, amutuku talibuka unamlume. Ara, anggun ni koproba, el si Yahweh, anggun apu yapu ati, kalikuka meliamukba, sikce el si erelamik Allah, elcuk nyapsuk yupu ati nyapsine.

Yakobus 2:5

Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?

Wahyu 2:11

Aning ati ara, anggun amul aupsililiba, ayupu kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, malye kibuka kinyak ninye nirya ara, ninye dipna like bitinye talak dipnamak ning ara, sik kum dipnamake. Malye winin ninye ila tuba tonap like bitinye dipnamak bukni, malye ning ati, ‘Nun like’ tenebuka, malye kilamice ninye ara kume. Kamuk unamake. Ayupu nirya ara, Semirna mutuku diba tenebuka unyak ninye ati nyapnamlyame. Ayupu nirya nyapnuke.

Wahyu 2:29

Ati, anggun amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye ati nyasilye yupu ara, moubuka kekenamlulume. “Ayupu nirya ara, Tiatira mutuku unyakce, diba tenena ninye ati nyapnamlyame,” nyapnuke. Allah arye, na Yohanes ati nyapnuke.

Wahyu 2:7

Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.