Lukas 7:47 - Eipomek

⁴⁷ Aning ati ara, na nyapnukine. Akil arye nati weika arye bico tenebuka, kanye talima arepmanila anya arye, el malye winin ning pia weika arye winilul bukni, narye akil malye winilul ning nirya ara, narye akunum namin kibuka, lyepnarye kum daneipne. Bukni, malye winin ning mitik winilamice nang ara, sik malye winin ning namin kibuka kum kipdeipnyopura, bico tenebuka kanye delina ara mitik tonunuk kanye delinyake.” Yesus arye Simon ati nyabuk.

Lukas 7:47 ပူးပေါင်းရင်းမြစ်များ

Yesaya 1:18

Na Allah Yahweh arye nyapsine. Anggun ap, na ap yupu talipnuyabe. Ara, ‘Anggun moubuka teneipnamlum’ tenen, nyapsine. Winipmanto ara, anggun malye ning ara, kapye yo kita moulamle talak, ining bi ulamle touk usulule. Bukni, anggun malye winin ning batakmunba, narye amalye ning kilipsinyopura, kurun teleb ning atonun unalume. Aning atonun, anggun malye winimunye ning ara, cunang tapu kita moulamle talak, ining bi ulamle touk ulul bukni, anggun malye ning batakmunba, narye amalye ning kilipsinyopura, ngarye maka potong lelamle touk, telebuk unamlume.

Yesaya 55:7

Anggun malye winin ninguk tenebuka ululum nang ara, ‘Nun malye unyabe,’ tenepmunce bataknamlulume. Aning atonun anggun diksukum un ning bataklum nang ara, anggun malye tenelulum ning nirya batakuka teleb ninguk tenenamlume. Winipmunyopura, anggun ni Allah, el si Yahweh dam tamubuka yanamlulume. Ara, ‘Nun malye wininyap ning ati, talye opsutu bukni, el kanye aryuk bico tenesilirye lyepnamsil’ tenen, unamlume. Anggun ni koproba Allah el dam tamubuka yamunyeba, weik tonun bico tenepsilirye, anggun malye ning weik aupmalya babye, namin kipnamsile. Anggun talima mitang usilirye, anggun malye winilulum ning batakmunba, kum kipdeipsilirye namin kipnamsile. Ati, anggun malye winimunye nang ara, tamubuka Allah el dam yanganamlulume.

Yehezkiel 16:63

Ati, narye anggun malye weik winilamlum ning ara, narye, ‘Teleb dauplye. Namin kibuka kilipnamsine,’ nyabuka, anggun malye winin ning kum kipdeipsinyopura, anggunce tuba tonap, ‘Se, nunda pia malye weik winilamupu,’ tenepmunce, alye weik dakdanalume. Anggun malye winilamlum ning ara, pia kum luba kipnamlum ati, anggunda pia ilil upsilyeba, alye dakdanamluma ati, aminyan doyanamle talak ara, yatato yupu do nirya, anggunce yupu ton, pia kum nyapnamlume. Aning nirya, na Allah Yahweh, aning-aning nirya talibuka, deice tam erebuka, Pia Mikip Weik Deiyoknye unune. Ati ara, narye ayupu nirya nyapmasina ati, aning nirya ara, dipkoprob nong upnamle! Allah arye, sik Israel nang ati, nyabuk.

Mika 7:19

Anda weik arye nunti, tuba-tuba bico tenesilyamnye uminya ati, ance nun Israel ninye nirya ati, bico tenesimince, nun malye wininyap ning nirya lyesimince, namin kinamsilyame. Winipsimince, nun malye wininyap ning nirya ara, dobukapmince, weik laut mekwen deibuka, kum-kuma noutam donoknamlyame.

Matius 10:37

Nyabukopura, ayupu ton nyabuk. “Ura nada, ‘Mika arye nyalilamuk atonun unamle’ tenen, yasa ati, yata nang do nirya, anggun ni yapu ap, anggun nin yapu ap ati, weik arye kanye delilulum bukni, na ati ara, kanye mitik anun aryuk kanye delilulum nang ara, na mapu kum uptinge. Atonun ton, anggun mapu ap, anggun kil mapu ap ati, weik arye kanye talima dukuldongolulum bukni, na ati ara, kanye talima mitik anun aryuk dukuldongolulum nang ara, na mapu kum uptinge.

Lukas 7:39

Dikeibukopura, aFarisinye Simon arye, Yesus yukupmoknye eibukce, el talima noutamakuk tenebuk. ‘Anye bira Allah yupu lak nyananye, nabi ulamtuopura, el yan talipmal kil, ara pia malye kil teneptue,’ tenebuk.

Lukas 7:46

Tonda, na kina ati, nintong teleb minyak, na gisok deice kum dikmanumubuk, akil aryuk na yan deice nintong teleb mek dekna weik ning, weika arye dikdeipmanile.

Lukas 7:48

Nyabukopura, Yesus arye akil ati nyabuk. “An pia malye winilaminye ning nirya ara, akunum namin kipdeipkinarye kum daneipkine” nyabuk.

Rasul 5:31

Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.

Roma 5:20

Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekamuk mem yupu arepsuka deiyok ara ani. Ara, ‘Amem yupu kekebuka kel kibikirye, se nunda dipkoprop pia malye nanguk unyabe,’ tenebikirye, ‘Moubuka kel kipnamak’ tenen, arepsuke. Amem yupu aribukba, ninye nirya kel kiyamik bukni, malye ning weika arye tonap tapakrap tuba winipribalamik. Tuba tabakuka malye winipribalamik bukni, Allah weika arye tonap bico tenelamsukce, el kanye aryuk, ‘Dipkoprop ninye lyena ning talye arepnamsine,’ tenyamsuke. Malye winin ning ara, mitik weik upra balamuk bukni, Allah arye bico tenesilirye, lyesulul ning ara, pia weik upra balirye, malye una deiyok ning nirya ara, malye kibuka bisilule.

2 Korintus 5:14

Aning-aning winibya nirya ara, deiyok tonokuk ulule. Ara, Kristus elce nun nirya ati, bico tenepsilirye, melisilya deice arye, el mikip arisilibuk adeice arye el pil donyabe. Aning babye, talye ati kume. Kanye teniltona kum usilyeba, pia dipkoprop tenenyabe. Nun kele. Yesus arye, ‘Ninye mutuku-mutuku nirya dipnamak’ tenen, tukwak mutuku ninye nirya sik lyena ati, elda tonoknye birye, nun malye ning nirya pununa ati dipsuke. Aning ati, nun kele. Kristus dipsuka deice arye, nun malye ning nirya punupsuka ati, Kristus dipsuka deice arye, nun nirya akunum dibupe.

Galatia 5:6

Yesus Kristus ap talima dukdongobuka neika unyaba noutam ara, Allah eipsilirye, el kanye ara, ‘Den bola mouse ning sekna babye, sekna kum babye, mambule pia kume. Aning babye, aning babye nong kum danamle ning atia,’ tenelule. Allah eipsilirye, kanye delinamsil ning ara, tonok ninguk ulule. Ara ani. Yesus ati diba tenenyaba deice arye, yuk ninye ati, ‘Bico’ tenen, melinauk winibibibuk, Allah eipsilirye, a deiceuk kanye delisulule. Mambul ning ara, anyuka. Yuk ning ton kume.

Efesus 6:24

Tonda, yata mutuku ninye do nirya, nun Deiyoknye Yesus Kristus ati, sik kanye el deiceuk deibuka, eluk talibuka unyakce, pia kum batakanyak ninye ati ara, Allah moronun ning nyapnusine. Ara, ‘Allah bico tenesilirye, el kanye aniryuk talye arisilye ning ara, weik arye, arepsilirye, teleb kipdeipnamsil’ tenen, Allah morosunune. Telebe akunum nyapsine. Na Paulus birye, asukumuk deipsine.

Pilipi 1:9

Utenebuka, Allah morosunun ning ara, nyapnusine. Ara, ‘Anggun weik kel kina deice, nong bol deice ninguk kum bukni, anggun talima noutamak ulul ning nirya, pia moubuka tenelamunce, anggun bico tenebuka melilanamlum ning ara, weik upnin banamle’ tenen, Allah morosunune.

1 Timotius 1:14

Nun Deiyoknye Yesus arye, el kanye aryuk nati, bico tenyamnukce, pia weik arye melilamnuke. Mitikanun arye kume, elti, dib tenena deiyok ning ap, yuk ninye ati, bico tenena deiyok ning ap, abitinye weik arye areamnuke. Yesus Kristus ap, kanye dukdongobuka ulamap talak noutamak arye, abitinye ning arisulule.

1 Yohanes 1:7

Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.

1 Yohanes 3:18

Na mapu, nun nirya arye yuk nang ati, “Nun bico tenebuka melinamsiabe,” nyabuka, talye yupu deice aryuk kum nyaltanamnyabe. Aning ara kume. Allah yupu deice nyasilye touk, dipkopropuk yuk nang ati, bico tenebuka melinamabe.

1 Yohanes 4:19

Allah arye nunti, minpola bico tenebukce melipsuke ati, nun babye aminyan uk, Allah el deice kanye deibibirye, yuk nang ati, bico tenebuka melilanyabe.

1 Yohanes 5:3

Dipkoprop Allah ati kanye delinyaba ara ani. Ara elce, “Wininamlulume,” nyasilye yupu nirya ara, ‘Diba’ tenen, kekebuka dobolbanyabe atia. Yuk ning ton kume. El yupu kekebuka dobolbalamtibya deice aryuk, “Allah ati kanye delinyabe,” nyaptibye.