Lukas 6:21 - Eipomek

²¹ Anggun aning-aning nirya pataplibuk ulalum ninye ara, aminyan ara Allah arye arepsilyeura, boupnamsil ati, anggun kanye deibuka unamlume. Anggun wini talak kanye imun usiliba engelulum ninye ara, aminyan talak kanye deibuka agu tunamlum ati, kanye deibuka unamlume. Allah arye lyesilibuk teleb unamlum ati, kanye deibuka unamlume.

Lukas 6:21 ပူးပေါင်းရင်းမြစ်များ

Kejadian 17:17

Allah arye Abraham biti nyabukba, Abraham birye, ‘Na ni koproba ati si ereipnun’ tenen, amnyok kanupdongobukce, utenebuk. ‘Kume, nara keting tamun yupa weik, 100 tahun nukuka wisi akunum dase ati, yata wiribuka arye, mi deiptinye do? Aning ara, kum winiptinye,’ tenebukce, dib kum tenebuk deice arye, el kanye pum tam arye akutubuk. Tonda, utenebuk. ‘Kume, na dopse kil Sarah ara, keting tamun yupa weik, 90 tahun wisi akunum dayuk anya arye, yata wiribuka akil arye mi deiptu do? Mi kum deiptue’ tenen, dib kum tenebuk.

Kejadian 21:6

Sarah arye nyabuk. “Allah melipnuka deice arye, na kanye teleb deipnile. Aning atonun, yata ninye do nirya, na sal mi deipman ara, yuk nang arye laka nyabikiba, kekebicopura, sik babye, teleb kanye delinamake,” nyabuk.

Mazmur 107:9

Ara, urdem ati kume. Deiyok ara, mek patanmalye ninye ap, dina patanmalye ninye ap, elce yamubuka areliba, dibiceura, boulule. Ati ara, Allah el tibuk, “Telebe, anda weik telebnye winilyame,” nyabuka, el si erebuka kinamake.

Mazmur 119:136

Allah ance, “Aninguk wininamlulume. Aning ara, kum wininamlulume,” nyapdeiamsulum yupu nirya ara, yuk ninye batakikirye, yanibicopura, na eipnirye weik arye, engenmanye talak ara, na asing maka ara, mek pu dobuka balamle tonun unulule. Yuk ninye arye, an yupu yaninyaka anya arye, engena weik arye engenune. Ara, ‘Se, yata deiyok ati, Allah el nyalye yupu yaniltanyak do?’ tenen, engenune.

Mazmur 143:6

Na ni Allah, ‘Ancuk melinamnilam’ tenen, na taruk erepnirye, anti morokunune. Tonda, na kanye talima nirya ara, antibuk pia patanulule. Winipmanto ara, mok ap, mek ap, pia kum ulul mutuku noutam unyak nang, mek weik tonun patalamliba, ikin weik ulamak touk, narye anti, weik tonun patanulule.

Mazmur 17:15

Bukni, na ati ara, malye winin ning talibuka kum wininuna ati, pia diksukumuk wininmanya ani, akunum winipnyopura, aminyan talak Allah, an urasin ton eipnamne. Tonda, aminyan akunum dipnyopura, daunmanya ani, tonap kam buknyak arye, an urasin ap, nong ap, eipnyopura, pia kanye deibuka unamne.

Mazmur 28:7

Nun ni Allah Yahweh ara, elce nati, tuba-tuba mikip kilinulule. Winipmanto ara, yin talin nang arye, yuk nang ati, ‘Sikce mal bobikirye opsicak’ tenen, sik nong lelilongona ati, kat ning, el si ara perisai, talibuka balamak touk, Allah arye nati, kalikinulule. Allah ati ara, ‘Dip,’ tenepnirye, na kanye talima nirya, el deiceuk delinune. Allah ati, mikip arye diba tenenuna ati, melinilya deice arye, na kanye talima noutam ara, pia kanye deibuka, mot nyana deice, kil-kil asa arye unune. Narye na ni Allah ati, “Naio, anda pia teleb ulyame,” nyanune.

Mazmur 65:4

Nun malye ulamupu ning nirya ara, pia weik ulamsuk buk, nun imun kanye bobuka ulamuburye, ‘Se, yata wiriptibye do? Yatanye birye, melibuka lyepsutu do?’ tenelamupu bukni, Allah ance nun malye winilamupu ning nirya, namin kibuka lyesilyame.

Yesaya 25:6

Asukumuk, Sion mutuku deice, Allah arye, weik kalina kwalibuka kintinip deipnamsile. Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Elda, mikip weiknye birye, mutuku sirya, im sirya nirya unyak nang, sik din ati, weik kalina kwalibuka kintinip deipnamsile. Elce pia teleb-teleb din ning, ap, tup kalimna ap, meta ap, yok noutam wamlye ning ap, tonda anggur duk yu mek, pia to ning ap, wibuka teleb ninguk kintinip deiplirye, kwalibuka arepnamsile.

Yesaya 30:19

Anggun Yerusalem mutuku weik asik noutam ululum ninyeo, anggunda tuba-tuba kum engenamlume. Anggunce Allah ati, “Se na nie, anda melipsilyame,” nyabuka moropmunyopura, elce anggun moropmamunye ning ara, kekepsilirye, amoropmamunye touk ubuka, melipnamsile. Deiyok ara, Allah arye anggun malye winilamlum ning ati, talye kanye bobuka oplopsutu bukni, anggunti weik tonun bicoe, tenesulula anya arye, talima namin aryuk, kekepsilirye, lyepnamsile.

Yesaya 66:10

Ati ara, yata nang do nirya, anggunce Yerusalem mutuku weik asik unyak nang ati, tenepmunce, kanye pia delilulum nang ara, kanye weik deibuka, pin-pin asa arye unamlulume. Tonda, minop talak yu nang arye yanuka, Yerusalem mutuku weik asik ulubuka sung-sunga buklobikba, kanye imun ubukba, anggunce, ‘Seʼ tenen, malye kanye bobuka engelamlum nang nirya ara, atalak aryuk, anggun Yerusalem mutuku unyak nang ap, tonok kanye bobuka, neikauk kanye weik deibuka, pin-pin asa arye unamlulume.

Yeremia 13:17

Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.

Yeremia 31:25

Sik aninye noutamak, yata ninye do nirya, sikce, ‘Se, nun kum winiptibye,’ tenen, mikip kum mitang uple ninye nirya ara, narye mikip kilinamne. Tonda din patapliba, kisok biribiri alamle ninye ara, din ning arepneba, tuba tonap mikip unamake.” Allah arye nyapdeibukba, Yeremia kekebuk.

Yeremia 31:9

Sik bisik yanganamak talak ara, pia teleb ubuka melipniba, kanye deibuka engepnin yanamake. Pin-pin kanye bobuka, engepnin yanamak talak ara, narye sikti, melipnirye, lyu teleb bisikuk bobuka yanamne. Winipniba, sik yan dum keil kum duknamle bisikuk yanganamake. Tonda, pia teleb mek weik ubukakuk boyanamne. Winipniba, Israel ninye ara, teleb kibuka yanganamake. Ara, urdem ati kume. Nara, sik ni koprop Allah ununa anya arye, Israel yala ninye ati ara, ‘Na mapu koprop,’ tenenune. Tonda, Efraim yala ninye ati ara, narye, ‘Sikda, na minop talak deipse mi atonun, weik mambul mi ululume,’ tenesunune. Ati, na mapu du nang atonun unamake. Allah arye nyabuk. Nyabukba, Yeremia birye nyabuk.

Yeremia 9:1

Na patapnil ning ara, ani. ‘Na kisok noutam ara, mek weik deibuka langdiptua deice arye, na asing maka mek durupna deibikiba, balamle touk kipnutueʼ tenen, patapnile. Aning atonun, ‘Na asing maka, mek pu dobuka balamle atonun kipnutuba, pia engeptinyeba, na asing maka pia saktueʼ tenen, patapnile. Winiptopura, lukunyan talak babye, keting noutam talak babye nirya, malye kanye bobuka, engena dem uptinye. Ara talye ati kum engenune. Bukni, nun olana nang ara, yuk mutuku yu nang arye, na mutuku nang yupa weik akunum obuka, sirya dakaca ati engenune.

Yehezkiel 7:16

Anyasik noutamaik ara, weik uk ap, din patana ap, ninye bai tam arye daunyak nang arye, olanamaka deice arye, ninye weik tam ara, dibinamake. Bukni, mitikto tam nang arye, bai sakuka, mutuku-mutuku kon bukuk noutam, bikbik abuka bindopnamake. Abinuka unamakak ara, sum maka ara, weik mutuku amu tam, lu ubukak bukuka engelamaka atonun, binuka engenamake. Winipnamaka deiyok ara, sik anang nirya ara, ‘Se, nun bidamnye malye ulamupa deice arye, wenepsukba, dibinauk unyabe,’ tenebikirye, malye yupu nyabuka, malye kanye bonamake.

Yehezkiel 9:4

“Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk.

Matius 5:4

Sik kanye deibuka telebuk winin nang ara, ani. Ara, sik babye malye winin ning ap, yuk nang malye winin ning ap ati, ‘Se,’ tenebikirye, mambul kanye bobuka engenamak nang ara, Allah arye, sik talima kwa dibuka melinamle. Aning ati ara, sik kanye deibuka telebuk unyaka atonun, pia unamake.

Matius 5:6

Sik kanye deibuka, telebuk winin nang ara, ani. Ara, Allah arye, “Diksukumuk wininamlulume,” nyasilye yupu ati, ‘Aninguk winiptibye’ tenen, pia patalul nang ara, sik kanye talima noutamak diksukum winin ning, pataplye ning nirya, Allah arye tuba melibuka arenamle. Ati ara, sik kanye deibuka, telebuk unyaka atonun, aminyan talak babye, apia unamake.

Lukas 1:53

Tonda, sik aning-aning nirya patalamuk ninye ara, Allah arye sik patapne ning weika arye aribnabuk dololamikura, boulamuk. Winilamukura, sik bona weik talin nang ara, arena kumce talye nonguk dolkwetelamuk.

Lukas 6:20

Yesus arye, el yupu kekebuka dobolbalamik nang ati dipdeyukce, ayupu nyabuk. Wini talak teninamsil ning, talye bona utotoa talina kumnye ara, Allah ninye nirya lyeplirye, kanye talima talinamsil ning dopropmunce, el ap neika unamlume. Allah arye teleb ulinamsil ati, anggun kanye deibuka unamlume.

Lukas 6:22

Nara, Ninye Mi Koprop Atonunye diba tenepnuluma deice arye, yuk nang arye anggunti, ‘Anang ara, pia malye nang. Nun like,’ tenebuka, malye yupu nyapsikirye, kanye talima wilipsikirye, pia bataksikceura, kanye deibuka unamlume. Ara, Allah melipsilirye, teleb ulinamsile ati, kanye delinamlulume.

Lukas 6:25

Anggun wini talak aning-aning nirya dimunyeura, bousulul ninye ara, kwaning patapsilyebuk, unamluma ati, se tenebuka kanye imun unamlume. Tonda, anggun wini talak arye, ‘Mambul ning anye’ tenena kum aryuk, talye kanye bobuka, teleb arye kanye deibuka pin-pin asa ulamlum ninye ara, aminyan ara imun kanye bobuka engenauk unamluma ati, se tenebuka kanye imun asa unamlume.

Yohanes 11:35

Nyabikba, Yesus arye engenmok.

Yohanes 4:10

Akil arye nyabukba, Yesus arye tamubuka nyabuk. “Kume, akilo, Allah arye teleb ning talye arisilye ning ap, mek dena ati, moropmakinanye si ap, moubuka kel bikmanutumtoura, ance nati moropmanutumba, narye kam una deiyok mek arepkitinye,” nyabuk.

Yohanes 6:35

Nyabikba, Yesus arye tamubuka adomon yupu nyabuk. Roti kwaning kam una deiyok ning ara, na uka. Yuknye ton kume. Yata ninye do nirya, nati moropnikirye, na dam yanamniyak ninye ara, wini talak arye dipdongobuka, doyanamle talak nirya ara, din pia kum patapnamle. Tonda, nati diba tenepnice ninye nirya ara, doyanamle talak nirya ara, mek pia kum patapnamle.

1 Korintus 4:11

Nun Allah yupu peterena deiyok nang ara, minop talak dorapce, dukdongobuka, wini talak babye nirya ara, din ning ap, mek ap patanauk unmasilibuk, talyauk lamapdongobuka unyabe. Tonda nun ongoldon baju ara, kwilikiltakne baju uk ongolyabe. Yuk ninye arye, nunti yu upliba, ikin ning nun nong deice delisinyake. Nunda, nun aik kopropa ton, kum upsuka anya arye, ninye asik nang atonun unyabe. Wininyaba anya arye, tia talakuk anyasik-anyasik amapna omapna kinyabe.

2 Korintus 11:27

Pia pi dobuka pirilamsirye, ikin pil weik dolamse. Asum-asum nirya, mana kum pil donauk winilamse. Winilamse noutamak ara, like yupa weik ning ara, mek ap, dina ap kum uamuka ati, talye patanuk ulamnuk. Tonda, baju kum wamnuk talak ara, nong bananguk ulamsirye, aruklamnuke.

2 Korintus 12:10

Aning ati ara, Kristus eluk talibuka, el pil donamne talak noutamak arye, mikip mitang unilye talak ap, yuk nang arye nati malye yupu nyabuka deilininyak talak ap, kanye imun kanye bonun talak ap, na dib tenepsa ati yu nang arye, ‘Nun lik’ tenen, na nong deice ikin ning deilininyak talak ap, anirya aupmanilya babye, ‘Aning telebuka’ tenen, kanye delilnamne. Ara, na mikip ara mitang upniliba, ikin unilye talak ara, dipkoprop Kristus mikip deice aryuk mikip unamna ati nyapne.

2 Korintus 6:10

Tonda, nunce, ‘Se’ tenen, kanye imun kanye bobuka engenyap bukni, aning awabsilya babye, atalak nirya nun talima ak kanye deibuka unyabe. Nunda, aning-aning kum upmasilibuk, talye bona utotowa talina kum ninye unyap bukni, nun mambul pil donyapa deice arye, yuk ninye arye weik mambul ning doprobikirye, bona weik talinanye atonun unyake. Ara, nunda tukwak mutuku noutamak talye auplye ning ati, bona aning-aning nirya talibuka kum unyap bukni, dipkoprop ara nun akunum dopropbupe ning ara, weik mambul ning anya arye, nun kanye ara, bona weik talin nang atonun unyabe.

Yakobus 1:12

Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.

Wahyu 21:3

Eipsiba, Allah el weik bun ning dam, tonoknye birye ayupu nyabuk. “Wini talak ara, Allah el pia unamlak ara, el ap, ninye ap neika pia unamake. Kam tuba unyak ninye nirya ara, Allah el mapu kopropa unamake. Allah arye aninye nirya ati talipliba, sikce, ‘Nun Ni’ tenen, Allah el siuk pia erenamake. Allah elda, sik ap neika unamake.

Wahyu 7:16

Allah arye aninye ati, pia melilamlya ani, atalak arye dipdongobuka aminyan doryanamle talak nirya ara, din ap, mek ap, pia kum patanamle. Keting bupu din ning, sik nong deice pia kum teng-teng anamle. Aning atonun, yuk weik tin ning nirya arye, sikti, tin upliba, uk kum dinamle.