Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.
Lukas 4:18 - Eipomek18 Allah arye na laka teleb yupu dobuka, ‘Talya kankan ninye peterelbinamle’ tenen, akunum wipdeipnuka anya arye, Allah El Dib Kanye arye el mikip weik arepnukura, unune. ‘Tapu koubuka deiamik ninye lolongona yupu peterelbinamle’ tenen, dopkwetepnuke. Tonda, asing guna ninye asing lalina ap, yaniplobikirye ikin ning sik nong deice delilamak ninye, ‘Melibuka erelina ap, wininamle’ tenen, dopkwetepnuke. အခန်းကိုကြည့်ပါ။ |
Lukas 4:18
56 ပူးပေါင်းရင်းမြစ်များ
Anda, ayupu kekepmalamce, ‘Se, Allah arye nun mutuku ap, nun malye ulamupu ning ap ati, yu ubuka anya arye, weik arye wenepnamsile. Ati, yata malye ning nirya mangkau arye malye weik ulamupu do?’ tenepmalamce, an talima amu tam kipmalamce, ‘Malye ning nirya bataknirye, Allah dam tamubuka yanirye, diksukumuk unamne,’ tenepmalame. ‘Allah arye nun Yerusalem mutuku nang ati, obuka wenepnamsile,’ tenepmalamce, aning ara akunum biklumce, talima lamabuka, an ongolyam baju kwilikuka bataklumce, na Allah dam engeplume. Awiniplum ning ara, narye akunum kekepkisirye, eipkise.
Allah el si Yahweh arye nyapnamle. “Sion mutuku pia telebak, pia telebnye ulul mutuku noutamak ara, narye wipdeiamsinye amutuku deipne. Ara, ‘Amutuku noutamak ara, na si pia erenamniyak’ tenen, Yerusalem mutuku noutamak deipne. ‘Anye bira, tukwak im sirya, mutuku sirya nirya unyak ninye, sik ninye deiyoknye, Raja unamle’ tenen, wipdeipse.” Allah arye nyabuk.
Malye ning nirya batakuka, diksukumuk winikirye, Allah el amu tam unyak ninye ara, sikce, “Se, nun ni Allah Yahweh, melipsilyame,” nyabuka morobikce talak nirya ara, Allah kekeplirye, sik morobikce ning atonunuk, kibuka melilule. Sik ikin ning weik ulamlya noutamak, elce lyebuka doproplirye, sik ikin ulamlye ning nirya, kum kipdeipliba, teleb kanye bobuka unyake.
Se an ni Allah, an weik tonun, aning-aning nirya talibuka, nun ninye deiyoknye ulyam ning ara, pia aunalame. Aning ara, pia kum, kum datue. Ance ninye deiyoknye kina ati, emas kama dopmince, nun ninye tukwak nang ati, yupu lipsisikuka bokeipsimince, ‘Wininamlume,’ nyabuka, yupu nyasilyam ning ara, pia telebuk ulule. Ninye yupu lipsisikuka bokolina ati, ance, ‘Na kwit’ tenen, tenebuka arye, kum nyasilyame. Pia dipkoprob yupu uk nyapsimince, yupu lipsisikuka bokolisilyame.
Aning nirya winplyopura, asing auamlye ninye ara, aning nirya teleb arye elinamake. Asing kum kupnamle. Aning atonun, amul auamlye ninye ara, moubuka kekebikirye teleb arye kekenamake. Amul kum kunuknamle. Ara, na Allah arye nyanamne yupu ap, mambul pil donamne ning ap ara, moubuka kel biknamaka ati nyapne.
Ance na mambul pil dopra balaminya ani, sik asing kun ninye ara, asing lalinamlyame. Tonda, sik wenena aik dongolamikba, ulamak ninye ara, bublan pakuka lopdongopnamlyame. Tonda, pia kunukak ulamak ninye ara, ance aninye dobuka teleb dirina ak deipnamlyame. Ara, ikin kanye bobuka unyak ninye nirya, ance pil donamlama deice arye, na Allah arye aninye lyepnamna ati nyapkine.
“Na Allah arye Babel mutuku ninye deiyoknye, el si Kores biti, ‘Teleb uk unamle’ tenen, wipdeipse. Ati, ‘Kanam aryuk binamle’ tenen, el banamle bisik ara, narye pung uk kilinamne. Narye melipniba el unamle ning nirya ara, telebuk unamle. Na wiamse mutuku, Yerusalem mutuku uluplobicopura, na mikip Kores arepneba, elce tuba tonap punubuka Yerusalem dopnamle. Tonda minop talak Babel mutuku nang arye, Israel ninye obisibikce, anang nirya Babel mutuku bobinamik nang arye deiamik mapu ara, dobuka Yerusalem mutuku boyanamle. Ara, narye melipniba, dekna ton arena kumce, na mapu lyepnamle. Na Allah Yahweh arye aning nirya ara, na tenepse touk dipkoprob wininamle nyapne. Na Yahweh ara, aning-aning nirya deice tam talibuka, im deice yin talin malaikat nirya, sik weik deiyoknye ununa ati nyapne.”
Ninye wenebuka dongolamak aik bunyak nang ara, lopdeipnirye, ‘Bai tam bilulume,’ nyapniba binamake. Tonda kunuknak unyak ninye ara, dirin dam dobuka deipnamne. Winipnirye sik aninye ara, dobuka yo pata mutuku aning-aning nirya teleb kibuka pana kum mutuku deipniba, unamak bukni, sik unamakak nirya ara, din ton pia kum patapnamle. Auna uk upnamle. Sik weinyak ning babye, bisik lilunak palamle maning ap, mutuku kon palamle maning ap, talye lukparabuka dinamake.
Allah wiamuknye birye nyabuk. “Allah Yahweh, elce ‘Winipnamne,’ tenelye touk winilule. Elda Weik Erena Deiyoknye birye weik kel kina deiyok ning arelamnuka deice arye, peterena deiyoknye unune. El mikip arepnuka deice arye el yupu peterenune. Ati, na yupu nyapnya deice arye, ‘Ninye mikip kum ulul ning ara, mikip unamak’ tenen, nyapnuke. Beren tam mapmanye talak nirya ara, Allah arye na bukeipnirye, el yupu nyana ati, ‘Na unamne ning ani. Ance peterepnamlam ning ani,’ nyabuka laka nyapnilirye, na patan ning teleb kanye bopnirye peterelbanune. Winibuka bulinilya deiyok ara, ‘Peterepnye ning kekepnamle’ tenen, el siuk erenamne. Adeice na nyanamne yupu ara elce tuba petereniliba, kekenune.
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Ura, Allah arye ayupu nyabuk. Narye na mapu koprop, anggun deice ara, ‘Narye winipnamsine. Winipsinyopura, anggunce ton wininamlume,’ nyabuka, nyalin yupu deice arye nyapsine. Na mikip weik ulye, Allah el Pia Teleb, Lek Dip Kanye ara, na mapu koproba, anggun Israel nang deice deipnamsine. Tonda, narye na nyasinye yupu dobuka peterepsinirye, anggun si pum bisik dongopnamsine. Ayupu peterepsiniba, anggunce, ‘Aninguk aupsiliba, pia ati talibuka unamabe, tenepmunyopura, ayupu ara, tuba nyapnamlume. Pia ati kum bataknamlume. Tonda, anggunce deipmunba, dadeipdanin banamak mapu babye, na nyasinye yupu dobuka, sik deice peterenamake. Anang arye deilinamak mapu ati, peterebikiba, anang babye ayupu kekebikiba kel bikikirye, talinamake. Ara, na Allah Yahweh arye, ayupu nyapsina anya arye, dipkoprob nong upnamlarya! Ara, atalak arye dipdongobuka, doyanamle talak nirya ara, peterepdanin bana uk unamlume,” nyapsine. Allah arye, sik Israel nang ati nyapdeibuk.
Nabi Yesaya birye nyabuk. Allah aning-aning deice tam talibuka Weik Mikip Deiyok ululnye, Allah Yahweh arye, ‘Wininamne,’ tenelye touk winilule. El Sambala mikip weik ning na deice deipnuke. Allah Yahweh winipnukce, nati ‘Elce laka teleb yupu nyalbanamle’ tenen, wipdeipnuke. Ara, bona utotoa kum talinyak ninye ap, imun kanye bobuka, unyak ninye ap ati, nyanamlyame. Kanye talima uk dipliba ikin kanye bobuka unyak ninye ati, ‘Allah arye anggun kwa dibuka melinamsile,’ nyabuka laka nyanamlyame. Tonda malye kum winilamik buk, wenen aik noutam bunyak nang ati, ‘Allah arye lolinamsile,’ nyabuka laka nyanamlume. Tonda sik asing kubukba kwelakirye, kunukna noutamak unyak ninye ati, “Allah arye anggun asing laipnamsile,” nyabuka laka nyanamlyame. Anggun nirya ati, “Allah arye lyepnamsile,” nyabuka, ‘Nyalbanamle’ tenen, Allah Yahweh arye na wipdeipnuke. Nabi Yesaya birye nyabuk.
Na Allah Yahweh arye nyapsine. “Tukwak mutuku noutam ulul ning nirya ap, im noutam ulul ning nirya ap ara, na taruk koproba arye, kwepdeipsiba ulule. Kanye talima erena kum, ‘Se nun malye unyabe’ tenen, ilil upliba, nimalyap asa unyak ninye ati, na kanye delinune. Tonda, sik malye unyak ning batakikirye, narye, ‘Aning ara wininamlulume, aning ara, kum wininamlulume,’ nyalisinye yupu nirya ara, moubuka kekebikirye, talibuka unyak ninye ati, na kanye delinune.” Allah arye, Israel ninye ati nyabuk.
“Anda, Yerusalem mutuku weik asik noutam dana-dana tam nirya ak, binulyame. Biminyopura, anyasik noutam unyak nang nirya dipdemince, yata nang do nirya, Israel yala nang pia malye-malye weik wininyak ning ap, na Allah arye, ‘Aning ara, pia na like,’ tenenun ning bukni, amutuku nang arye, pia mem ning wininyakba, eibikirye, sik kanye talima noutam arye, ‘Se, aning ara, kum winiptinge, aning ara pia malye wininyakeʼ tenen, talima uk diliba, engenyak nang nirya ara, sik dam binulyame. Biminyopura, anang sik urasin tam bukni, sik asok deice tam ara, lak bikna ati, tanda sekdeipnamlyame.” Allah arye, kain lenan ongopmoknye, seken ning lipmoknye biti, nyabuk.
Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.
Teleb winin ninguk wininamluma deiyok ara, ani. Ara, narye alek mutuku obinuka unamak nang ara, na Allah arye, sikda tonok kanye kipdeipnyeba, talima lamapdongobuka, amutuku noutamuk binuka, telebuk unamake. Amutuku noutam binuka unamak talak ara, sik aninye nirya arye, ‘Se, nun ni Allah Yahweh, elce, melibuka lyepnamsilarya. El si deiceuk, teleb unamabe,’ tenenamniake. Sik atouk nang ara, omutuku binuka unamake.
Akama bulaklopseba, asum deice, akama bulakmase ning, nyalin yupu nyapdeipse ning ara, akunum kum kipdeipse. Winipseba, sik domba basam dekna deiyok nang arye, nati kalikuka dilamnika ati, moubuka bikike. Ara, ‘Se, nabi Zakaria birye nyapmasil yupu ap, elce winimok ning ap ara, dipkoprob ninge ara, Allah Yahweh, elcuk aning nyapsutua babye, atonun ulule. Ati nabi arye nyapmasil ning ara, Allah Yahweh el yupu uk nyasulule,’ tenelamik.
Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.
Ara, nyapnululume. ‘Asing kuamlye ninye perekeipliba, elinyake. Aik bukamikce nang kwetelilulba, banyake. Barye suse atonun suse dilamlye nang kwetelilulba korokolsakalule. Amol kunukamlye nang kukeipliba kekenyake. Akunum dipmakce nang kam bulilule. Tonda ninye lyena ati, Allah el lak teleb yupu talya kankan ninye kekena ati peterepliba, kekenyake,’
Allah arye ‘Ninye weike lyepnamle’ tenen, dopkwetebuknye Yesus ati, Yesaya arye ayupu nyabuka sekuk. Yesaya arye sekamuk yupu ara ani. ‘Anye bira, na amu tam ulirye, na piluk donamnil’ tenen, wibuka deipse. Narye elti, kanye deipsirye, kanye talima arepnuke. Na Kanye ap, na mikip ap, weik arye elti, arepnyopura, elce, ‘Diksukum una ara, wininamlulume,’ nyabuka laka nyalbinamle. Na Allah arye tenepse ning nirya ara, elce ninye mutuku-mutuku nirya ati, laka nyalbinamle.
Ninye arye kwalin pina malye ati, bataklamak touk, tonda, ninye arye upna ubikiba, ililim abuka tangalamle touk, anye birye mikip kum ninye ati kum bataknamle. Tonda, ‘Yata wiripnun do?’ tenen, kanye walwal upliba, teneipdebuka, mitang asa unyak ninye ara, elce kum bataknamle. Sik kanye talima melinauk unamle. Aning wininamla ara, pil dopra balamlya ani, ninye mutuku-mutuku nirya arye Allah nyasilye yupu ap, ‘Wininamake,’ tenesilya ning ap, akunum winibiceopura, el pil sirya daknamle.
Anggun kanye talima kunuknak atonun ulamak bukni, wini talak ara, weik dirina atonun ning akunum eipmake. Sik aunyak nang, talima kanye dipna atonun unyamukba, kunuknak atonun ulamak bukni, wini talak ara, weik dirina atonun ning eipmaka ati, bereklirye, keting deililamle touk unamake,’ Yesaya arye, domon yupu nyabuk. (Yesaya 9:1-2)
Sik kanye deibuka, telebuk un nang ara, ani. Ara, sik kanye talima erena kum aryuk, Allah arye, “Etekdopuk unamlulume,” nyasilya ara, ‘Nunda talima malye ninguk winiyaba, ati, nun bidamnye aryuk kum winiptibye. Allah el melisilya deice aryuk teleb unamabe,’ tenebikce ninye ara, Allah lyeplirye, sik kanye talima talibuka, el mapu kipliba, el ap neika unamake. Allah arye sik kanye talima taliliba, el tam nang unyaka ati, sik kanye deibuka telebuk unyaka atonun, apia unamake.
Atalak arye winilamuk ati, Yesus arye asilyanmarik nang ati, tamubuka nyabuk. “Anggun amul arye kekelulum ning ap, asing arye elilulum ning ap, Yohanes dam lake nyalbirurume. Ara, asing kuamlye ninye lalilyeura, elinyake; aik bulamice ninye kweteiplyeura, banyake; barye suse atonun suse dilamlye ninye kweteiplyeura, mikilule; amul kunukamlye ninye pakeiplyeura, kekenyake; akunum dipmace ninye kam bulilule; tonda ninye lyena ati, Allah el lak teleb yupu talye bona utotoa talina kumnye kekena ati peterelyeura, kekenyake.
Yesus ap, abitinye nang ap, neika unmekba, keting jam 4 ubukba, Anderias min winibuk ning ara, el du kopropa Simon biti enmoka ani, eibukce, Simon biti nyabuk. “Na duo, Ninye Lyena Deiyoknye, Mesias nyalamaknye bira, nun akunum eipdanmaname,” nyabuk. (Anderias birye ayupu nyabuk ning ara, Allah arye, ‘Ninye weik lyepnamle’ tenen, wipdeiamuknye, Kristus ati nyabuk.)
Allah arye Yesus Nasaret mutukunye, akunum wipdeibuka ati, ‘Na piluk donamle’ tenen, el mikip ap, Allah El Dib Kanye ap, Yesus nong deice deibukura, Yesus arye pia teleb piluk dopra balamuk. Dopra balamuk akarye, Isa Mutuku Dongonye kouke pum tam weklamukak ulamik ninye weik kwetelilamuk. Aninye weik kwetelilamuk deiyok ara, Allah ap, Yesus ap, sik neiktoto ulamrik arye, Allah el mikip el nong deice deiamuk arye aninye kwetelamuk.
Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.
Mutuku-mutuku nirya weik ninye deiyok nang, Raja nang ap, ninye talinyak deiyok nang ap arye, mikip kibuka erebuka tikmakce, ‘Nun ni Allah ap, elce ninye mutuku-mutuku nirya lyeplirye, talinamle’ tenen, wibuka deiamuknye, ara, Mesias ap ati, ‘Opbisipnamap’ tenen, bulubuka wekmake.” (Mazmur 2:1-2) Nyabuka moronmek. Daud arye sekamuk yupu dobuka Allah moronmek nang nyabik deice arye ayupu ton moronmek.
“Ara, Daud arye nyapdeiamsuk touk, dipkoprop Herodes ap, Pontius Pilatus ap, Yahudi yala kum ninye babye, Yahudi yala ninye ababye, anang ap, Yerusalem mutuku bulubuka wekik akarye, ‘Obisipnamap’ tenen, an yupu uk kekebuka, an piluk melibuka mambul pil dolulnye Yesus ati, yupu sisikinmek. Anye Yesus ara, ance wipdeiamlum akarye, ‘Ninye lyepnamle’ tenen, erepdeiamlumnye biti, yupu sisikinmek.
“Im deice weik dirina noutamak umunce, mininga dekna weik ning dolonamlume,” nyapmanama ara, urtalya ati kum nyapname. Isa Mutuku Dongonye arye, nun kanye talyamsukba, pia kunuknak atonun ulamubu noutamak arye, Allah arye akunum lobuka lyepsuke. Lyepsukce, el kanye deiamuknye, el Mi Koprop Yesus arye, aning-aning nirya talibuka, weik deiyoknye kibuka ulya noutamak, akunum dobuka deipsukura, aunyabe. Winira, el Yesus elcuk talisulule.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
ကြော်ငြာတွေ