Lukas 3:1 - Eipomek

¹ Roma mutuku nirya weik ninye deiyoknye Kaisar Tiberius talyamuk talak, anirye dipdongobuka, keting tamun koklom dekin 15 akunum ubuka talak ara, Pontius Pilatus dobuka, ‘Yudea tam talipnamle’ tenen, Gubernur kipdeibuk. Atalakuk Galilea tam talyamuknye, Herodes pemerintah nang deiyoknye kipdeibuk. El weit kopropa Pilipus arye Iturea tam ap, Trakonitis tam ap, talyamuk. Atalakuk Abilene tam talyamuknye bira, Lisanias ulamuk.

Lukas 3:1 ပူးပေါင်းရင်းမြစ်များ

Kejadian 49:10

Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.

Matius 14:1

Yesus el mapu arye peterepra balamika ati, ninye weik arye, Yesus el si kekelamik. Ninye weik kekelamika ati, sikce laka nyalamikba, amutuku talyamuk deiyoknye birye, Raja Herodes babye kekebuk.

Matius 14:3

Raja Herodes arye Yohanes Pembaptis obuka deiyok ara ani. Raja Herodes elcuk yupu nyapdeibukba, el yin talin nang arye Yohanes Pembaptis tapu koubuka deibikce, wenen aik dongobik. Herodes arye Yohanes dobuka wenen aik deibuka deiyok ara, ani. Herodes el weit Pilipus arye domuk kil Herodias ara, Raja Herodes arye dopromuk.

Matius 14:6

Batakuk bukni, Raja Herodes el deiamik sum akunum ubukura, weik kwalina kwalibuka deibukba, el kayapu nang weik dilyayik. Sik akwalipmok ning dinmek talak ara, Herodes el kil Herodias, el kilmu mot yanuka senmokba, sik anang nirya arye, kanye deibuka dinmek.

Matius 22:17

Aning ati ara, asipdenukiyabe. Nun mutuku talisilirye, Roma mutuku weik ninye deiyoknye Kaisar arye, ‘Pemerintah ati, pajak yo bok arenamlume,’ nyasilya ara, arena teleb do, kum do? Apajak yo bok ara pemerintah nang ati arenamap do, bataknamap do?” nyabuka tenebuka arye asipdeyik. (Ara, ‘Yesus el yupu nyaptua deice arye malye uptue’ tenen, talye tenepce asipdeyik.)

Matius 27:2

Akunum tenebikopura, sikce nyapdeibikba, sik yin talin nang arye Yesus tapu koubuka, Yudea tam talyamuknye, ‘Gubernur Pilatus arye yupu lipsisikuka bokeipnul’ tenen, bobinuka arebik.

Markus 6:17

Ara, Herodes elce nyapdeiamukba, el yin talin nang arye Yohanes Pembaptis tapu koubuka boyayikce wenen aik dongamik. Herodes arye winibuk ning ara, Herodes el weit Pilipus kam tuba ulamukbuk el kil Herodias ara, Raja Herodes birye ubula dopromuk.

Markus 6:21

Sik nirya winilamika ani, Herodias arye, ‘Yohanes optibye,’ tenelamuk touk, Yohanes opmanto talak ubuk. Ara Raja Herodes el deiyamik sum akunum ubukura, el amu tam meliba pil dolamik nang ara, weik nang ap, el yin talin nang nirya ap, ura Galilea tam ulamik deiyok nang ap, anang nirya ati, weik kwalina kwalibuka deipmokba dilyanmek.

Lukas 13:31

Yesus arye ayupu nyabuk talak ara, sik Farisi nang Yesus dam yayikce, ayupu nyabik. “Amutuku weik deiyoknye Herodes arye, ‘Anye bira, optine,’ tenekulule anya arye, amutuku batakuka yukak binamlyame,” nyabik.

Lukas 2:1

Atalak ara, Roma mutuku noutamai ulamik ninye nirya talyamuka weik deiyoknye, Roma mutukunye Kaisar Agustus arye, “Nun Roma mutuku nang arye talinyap ninye, ‘Yatato ubuka unyak do?’ tenen, si seknamabe,” nyapdeibuk.

Lukas 23:24

Pilatus el kanye ara, ‘Awekmek nang nirye arye, pia pi deibuka nyanmaniaka ati, Yesus dobuka anang arepnyopura opnuyake,’ tenebuk.

Lukas 3:19

Ara, aninye kekelamik bukni, amutuku pemerintah weik ninye deiyoknye Herodes, el malye winibuk ning ati, Yohanes arye wenebukba, Herodes arye nyapdeibukura, Yohanes tapu koubukabikce, wenena aik dongobik. Yohanes arye Herodes wenebuk ning ara deiyok ara ani. Ara Herodes el weit koprop kil Herodias, ubula dalubuka doprobukce, doprobuk ning ap, ton malye ning pia weik ulamuk ning ap ati, Yohanes arye Herodes ati wenebuk.

Lukas 9:7

Yesus el mapu arye peterepra balamika ati, ninye weika arye, Yesus el winilamuk ning ap, el si ap, kekelamik. Tonda, amutuku nirya talyamuknye, weik ninye deiyoknye Raja Herodes ababye, kekebuk. Ton ninye ara, Yesus arye ninye winipman kum pil dolamukak, eibika ati, sikce nyabik. “Kume, Yohanes Pembaptis akunum diamuk bukni, ila tamubuka kam bukuk akarye, ninye winipman kum pil dolule,” nyalamik.

Rasul 23:26

Nara, Kelaudius Lisias arye, nun pia teleb weik ninye deiyoknye, Gubernur Feliks ati, “Telebe,” nyapkine.

Rasul 24:27

Apia ulamdika ani, keting tamun bitinye akunum kibukopura, Feliks el pununa ati, yuknye el si ara, Perkius Festus, wipdeibik. Winibikura, Feliks arye, Yahudi yala nang yukuna ati, tonda sikce, ‘El telebnye, tenepnamniak,’ tenebukce, Feliks arye Paulus wenena aik adeiamuk touk batakukura, pia anyaikuk ulamuk.

Rasul 26:30

Paulus nyabukura, Raja Ageripa tikukba, anyapce, Gubernur Festus tikuk. Akaren uk, Bernike ap, sik neika bukmek nang, sisinanye ap nirya tikik.

Rasul 4:27

“Ara, Daud arye nyapdeiamsuk touk, dipkoprop Herodes ap, Pontius Pilatus ap, Yahudi yala kum ninye babye, Yahudi yala ninye ababye, anang ap, Yerusalem mutuku bulubuka wekik akarye, ‘Obisipnamap’ tenen, an yupu uk kekebuka, an piluk melibuka mambul pil dolulnye Yesus ati, yupu sisikinmek. Anye Yesus ara, ance wipdeiamlum akarye, ‘Ninye lyepnamle’ tenen, erepdeiamlumnye biti, yupu sisikinmek.