Yata ninye do nirya, sikce anti, teleb yupu nyabuka, teleb kipdeibkicopura, narye anang ati, tamubuka teleb kipdeipnamne. Aning atonun, yata nang do, sikce anti, malye yupu nyabuka, an nong deice ikin ning deipkicopura, narye anang ton tamubuka, sik nong deice ikin ning delinamne. Aninye sik wenemna ati supnamne. Narye melipkineba, an deice arye, yuk ninye tukwak nang im sirya, mutuku sirya nirya ati, teleb kipdeipnamne.” Allah arye Abram biti, nyalin yupu nyapdeibuk.
Lukas 24:47 - Eipomek47 Kam buklyopura, el si deice arye ayupu bitinye laka nyabuka peterepra banamake. Ara, ninye nirya sik malye tenenyak ning ap, malye wininyak ning ap batakuka, kanye danguna ap, tonda, Allah arye ninye, sik malye un ning namin kiplirye, kum danipnamle ning ap ara, ayupu bobuka ninye mutuku-mutuku nirya ati peterepra banamake. Ara, Yerusalem mutuku arye deiyok koubuka dana-dana mutuku nirya peterepra banamake. Ayupu nirya ara, na si Yesus deice arye peterelbinamake.” အခန်းကိုကြည့်ပါ။ |
Lukas 24:47
52 ပူးပေါင်းရင်းမြစ်များ
Diba, mutuku im sirya, mutuku sirya nirya, unyak ninye nirya arye, antibuk, “Telebe,” nyabuka, an si erenyakce, kanye deibuka, mot nyanyakce, si erenamkiyake. Winibuka ubicopura, nun ni koproba Allah arye, kanye delisilirye, tuba melisilyeba, ninye koulamak ning ayala-ayala nirya, pia teleb kibuka panamle. Ninye arye, wa wibuka koulamikce ning nirya, teleb kibuka panamla ara, urdem ati kume. Deiyok ara, nun ni koproba Allah arye, nunti, bico tenesimince, aning-aning nirya tabakuka arisilyamba, aning nirya, weika arye linyabe.
Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.
Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.
Na Allah Yahweh arye nyapsine. Nara aning-aning talibuka deice tam unirye, Weik Erena Deiyoknye unune. Narye, ‘Winipnamne,’ tenenye touk wininune. Na mapu Israel yala ninye ati nyapsine. Narye ninye yuk mutuku ninye, Israel yala kum ninye ara, sik unyakak laka kipniba, sik Israel mapu ara, yuk nang arye dobuka bobinamikbuk, sik noutamak dabinuka unyak mapu nirya ara, tamubuka amutuku uk iribuka boyanganamake. Tonda sik kilmapu ara, amakuka boyanganamake.
Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.
Allah Yahweh arye ninye mutuku-mutuku nirya anggun dinak, el mikip laka kibuka kiklipdebuka, mikip weik pil dopliba eibikirye, kel biknamake. Pia malye ton winina kumnye birye, mikip weik donamle pil ara kum duknupnamle, laka kibuka pil dopliba elinamake. Ati, mutuku sirya im sirya, mutuku-mutuku nirya unyak ninye, nun ni Allah arye ninye lyen ning arepsiliba eibikirye, kel biknamake.
Minop talak ara, yu weik nang arye elti, wenebuka olamikba, urasin yuk ubukba, ninye elilamikce, ‘Se,’ tenen, lukdanuka kisok kwisi meka bongolamuk. Bukni, aminyan talak ara, ninye mutuku-mutuku nirya arye, el wininamle ning mambul pil doplyopura, ninye weik tonun, ‘Se, elda weik mambule, pia telebnye ulule’ tenen, kel biknamake. Tonda, yata mutuku do nirya, ninye deiyok nang, Raja nang weik tonun, elti, eibikirye, sik yupu nyana kumce na nie tenen, elti, dinamake. Winibuka eibikirye, pia lukuldana uk unamake. Ara, urdem ati kume. Deiyok ara, minop talak arye kum winilamuk ani, sik Raja nang bita kel kum biklamik ning ap, tonda yuk ninye arye sikti, kum laka nyalamikba, moubuka bita kel kum biklamik ning ap, talak arye aning winipliba eibikirye, moubuka kel kipnamaka ati nyapsine. Allah Yahweh arye nyabuk.
Atalak arye dipdongobuka doyanamle talak ara, tonoknye birye, el kwit yuknye biti, ‘Anda Allah si kel biknalame,’ nyabuka, peterelamik atonun, tuba kum wininamake. Ara, weik nang babye, mitik nang babye, na siuk akunum kel bikikirye, ‘Nun ni koproba,’ nyabuka, na damuk unamake. Ara, urdem ati kum bukni, deiyok ara, sik malye winilamice ning babye, narye pia kum kipdeipnamne. Aning nirya ara, kilipnirye, kum kipdeipnyopura, tuba tamubuka tonap, sik malye winin ning nirya kum tenepnamne. Ayupu ara, na Allah Yahweh arye, akunum nyapsine ati, dipkoprob nong upnamle,” Allah arye nyabuk.
Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.
Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.
Winipmanto ara, ninye arye yala teleb ning, tuku telebak dokikiba, teleb ubuka palamle touk, na Allah arye, Israel ninye bobuka, teleb mutuku noutam deipnirye, pia teleb ubuka kalikuka melinamne deice arye, pia telebuk unamake. Minop talak ara, Israel ninye ati, bico tenena kumce bataklamsirye, kum melilamsa ati, ninye yuk nang nirya arye, Israel ninye ati, “Se, Allah arye aninye bico kum tenelula anya arye, sikti, ‘Lo-Ruhama,’ nyanamabe,” nyalamik. Bukni, narye Israel ninye, tonap tuba dobuka, teleb kipdeipnirye, anggunti bico tenenamsine. Aning atonun, minop talak Israel ninye bataklamsiba, yuk ninye nirya arye, sikti, “Se, aninye ara, Allah el mapu dipkoprob kum unyaka anya arye, ‘Lo-Ami,’ ” nyalamik. Minop talak nyalamik bukni, aminyan talak ara, na Allah arye Israel ninye ati, “Dipkoprop wini talak ara, anggunda na mapu koprop ululume,” nyanamsine. Nyapsiniba, anggun Israel ninye arye, nati tamubuka, “Dipkoprop, Allah, anda nun ni Allah ulyame. An tonok usilyama ati, an si uk pia erenamabe,” nyanamake. Allah arye nyabuk.
Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Ati ara, ninye mutuku-mutuku nirya, na yupu moubuka kekebikirye, ‘Na wininye ning atonun wininamak’ tenen, anggunda na mapu arye, ‘Ninye mutuku-mutuku im sirya, mutuku sirya nirya kekenamak’ tenena ati, peterelbanamlume. Peterepra balamunyebuk, ninye dib tenebikceopura, Allah el si deice ap, el Mi Koprop, Yesus na si deice ap, Allah El Dib Kanye si deice ap, sik diba tenepnamak ninye mek dongopdeipnin banamlume.
Yohanes peterelamuk ning ara, ani. “Anggun nirya, anggun kanye talima malye tenelulum ning ap, anggun malye winimunye ning ap batakuka, kanye dangupmunyeura, Allah arye amalye ning nirya kum daneiplirye, namin kipnamsile. Winipnamlum ning, ara Allah arye ninye weike lyeplirye, sik kanye talima talinamle talak, akunum dam upmala ati, anggun malye winimunye ning nirya bataknululume,” nyabuk.
Aning ati ara, na nyapnusin yupu ara ‘Deiyok ani’ tenen, anggun aik tamubuka bimunce, pia tenepmunce, kel bikinamlulume. Ara, Allah yupu nyalamuknye, nabi Hosea arye sekamuk yupu nyasilye touk, ‘Allah el kanye ara, Allah arena ati, kam ning obuka arilamak ning ara, na patana kume. Weik mambul ning ara, yuk ninye nirya ati bico tenebuka melilana ara, aninguk ara, weik telebe tenenune.’ (Hosea 6:6) Allah arye nyapdeibukba, Hosea sekamuk yupu ati nyapsine. Aning atonun, mitik pung uk ulamice bukni, sik talimak malye ning tuba aupmalibuk, aning tenena kumce, ‘Kume, nunda teleb nanguk unyabe,’ tenelanyak ninye ati, ‘Aninye ara dobuka lyepnamne’ tenen, kum yase. Sik malye winilamikce bukni, talima noutamak ara, ‘Se, nunda malye nanguk unyabe,’ tenenyakce, malye kanye bobuka unyak ninye ara, ‘Sik malye winilamikce ning batakikcopura, atouk ninye dobuka, lyepnamne’ tenen, yase. Yesus arye sik Farisi nang ati nyabuk.
Nyabukopura, ayupu tonap, dukdongobuka nyabuk. Ara, anggun Yerusalem mutuku ululum ninye ara, Allah yupu laka nyabuka peteren nang Allah arye nabi-nabi nang weik, anggun dam dolkwetelul bukni, anggunce anabi sik nong deice keil dobuka ona ap, tonda, talye oltakana ap winilulume. Narye anggun Yerusalem mutuku ululum nang ati, ‘Ayam amaka el mapu irilamle touk, na wiamse kili sal, kalikuka melipnamsin’ tenen, patasiliba anggunti tuba tenesinye bukni, anggun Yerusalem deiyok nang arye, ‘Anye Yesus bira nun lik’ tenen, batakanululume.
Minop talak Allah arye nyalilamukura, sik seklamikce ayupu lak nyalamik nang nabi ulamik. Nabi-nabi nang nirya arye, sik seklamik yupu ara, tuba nyalisulule. Ara, yata-yata nang do nirya, elti, diba tenebiceura, el si deice aryuk sik malye wininyak ning ap, kanye talima malye tenenyak ning ap, nirya kum kipdeipsilirye, namin kisulule. Elcuk lyesulule. Peterus arye ayupu nirya nyabuk.
Nyabukura, sik anang kekebikce, yupu tonap kum nyabikce, Allah siuk erebik. Erebikce nyabik. “Winira akunuma. Sik yuk-yuk talye mutuku ninye, Yahudi yala kum ninye babye, sik malye unyak ning batakuka, ‘Pia kam unamap’ tenen, Yesus ati dib tenebiceura, Allah arye anang ati, bola koplobuka kam pia una deiyok ning akunum arepmale,” nyabik.
Yupu sekikura, Paulus ap, Barnabas ap, ilil kum asa mikip arye, tamubuka anyanmek nang ati nyaprik. “Pia teleb ning ara, nunce Allah yupu minopce anggun nyapsitinimibuk, kekeptum bukni, anggun ayupu batakmalumce, kum kekepmalume. Aning ati ara, Allah arye kam pia una arisulul ning, ‘Kum dopdopnamabe’ tenen, anggun kanye pum tam aryuk tenepdanmalumce, ayupu batakmalum ati ara, winira nunda Yahudi yala kum ninye ati, sik un dam peterelbinaname.
Nyabikura, Peterus arye tamubuka nyabuk. “Anggun nirya ara, anggun malye winilulum ning ap, kanye malye tenelulum ning ap, ‘Allah arye namin kipsilirye, kum daneipnamsil’ tenen, anggun malye ning nirya batakmunyak arye, donga tamubuka, Allah el tam kipropmunyeura, nunda Yesus el si deice aryuk mek dongopnamsiape. Winibibyeura, Allah arye nun bico ati, talye arisulul Dib Kanye ara, arepsilyeura, dopropnalume.
Yahudi yala nang ap, Yunani yala nang ap ati, ‘Moubuka tenepnamak’ tenen, nyalamse. ‘Anggun malye ulalum ning ap, anggun talima noutamak malye tenelulum ning ap, batakmunce donga tamubuka, Allah tam kipmunyeura, nun deiyoknye Yesus ati, dib teneplulume,’ nyabuka laka nyalamsise.” Paulus arye nyabuk.
Narye aning ati dopkwetepnamkin deiyok ara, ‘Sik asing laipnalama’ tenen, dopdeipnamkine. Tonda, ‘Sik kanye talima yuk punubiceura, sik kanye talima kuna atonun unyaka ati, dirinak tamubuka dobuka, delilyanganalam’ tenen, dopkwetepnamkine. Tonda, Isa Mutuku Dongonye, el mikip arye talibukak arye tamubuka, ‘Allah el mikip arye talipnamle ati dobuka, delilyanganalama’ tenen, dopkwetepnamkine. Ara, yata deiyok ati kume. Ance anang ati aning nirya akunum winipminyeura, nati diba tenebikca deice arye, sik talima ak malye tenenyak ning ap, sik malye unyak ning ap, Allah arye meliplirye, aning kum kipdeipnamle. Tonda, na Yesus ati diba tenepnika deice arye, Allah arye akunum wipdeiamuk ninye ap, ansinibuka unamake. Allah arye aning ati winipnamle. Yesus arye na Paulus ati nyapnuke, Paulus arye nyabuk.
Ara, minopce Damsyik mutuku ulamik ninye ap, anyapce Yerusalem mutuku ulamik ninye ap, Yudea tam nang ap, tonda Yahudi Yala kum ninye ap ati, ayupu peterelamse. “Anggun nirya anggun malye ululum ning batakuka, anggun kanye yuk punupmunce, balye tamubuka, Allah el tamuk kipdopnamlulume. Anggun kanye tenena winiryuk ning punupmaluma atonun, yuk talak babye, anggun winin ning nirya pia funguk unamlume. Ara, yata nang do, nirya eipsikirye, ‘Sik malye ulamik ning nirya akunum batakika ati, wini talak nirya ara, diksukumuk unmak ani,’ tenepsikirye, kel kipnamsinyak ati, ayupu nyapne.” Ayupu nyapsirye peterelamse.
Ura, Nyapsuka ati, wini talak ara, ‘Anggun dipkoprop kel kiplulum’ tenen, ayupu nyapsine. Ara, ‘Allah arye ninye lyepnamle’ tenen, laka dopkwetepsuk yupu, Yahudi yala kum ninye ati, akunum dopkwetepmale. Anang ara, dipkoprop kekepnamake Allah arye anang lyepnamlarya.” Paulus arye awekmek nang ati ayupu nirya nyabuk.
Yesus ara, Weik Ninye Deiyoknye una ap, ninye mutuku-mutuku nirya, Lyena Deiyoknye una ap, ‘Unamle’ tenen, Allah arye Yesus dobuka, el sirik taruk tam erebuka deibuk. Ara Allah arye, Yesus pil dobuk deice arye, Israel ninye lyeplirye, sik malye wininyak ning batakikirye, balye tamubikcopura, ‘Na Allah arye, sik malye wininyak ning nirya kum kipdeipnamne’ tenen, Allah arye el sirik taruk tam Yesus erepdeibuk.
Allah arye, ‘Aning wininamlulume, aning ara kum wininamlulume,’ nyapdeibukba, Musa birye sekamuk mem yupu arepsuka deiyok ara ani. Ara, ‘Amem yupu kekebuka kel kibikirye, se nunda dipkoprop pia malye nanguk unyabe,’ tenebikirye, ‘Moubuka kel kipnamak’ tenen, arepsuke. Amem yupu aribukba, ninye nirya kel kiyamik bukni, malye ning weika arye tonap tapakrap tuba winipribalamik. Tuba tabakuka malye winipribalamik bukni, Allah weika arye tonap bico tenelamsukce, el kanye aryuk, ‘Dipkoprop ninye lyena ning talye arepnamsine,’ tenyamsuke. Malye winin ning ara, mitik weik upra balamuk bukni, Allah arye bico tenesilirye, lyesulul ning ara, pia weik upra balirye, malye una deiyok ning nirya ara, malye kibuka bisilule.
Aning nirya akunum winipsuka ati ara, ninye nirya kel kibicopura, “Se, Allah bico tenepsilirye, el kanye aniryuk melibuka arisilye ning ara, weik mambule. Allah ara, pia teleb ulule,” nyabuka, el si weik arye, erenamake. Allah bico tenepsukce, talyeuk arisilye ning nirya ara, el mi koprop deice arye, arepsuke. Allah arye, el Mi Koprop Yesus ati ara, kanye talima aribuka pia kanye delilule.
Na kanye ara, Allah el mapu nirya ara, ilil weik asa unyak bukni, na Paulus ara, ilil pia kumnye unune. Nara, ilil pia kumnye ununa babye, Allah el kanye deipnukce, ‘Paulus ara, Ninye Lyena Yupu, Kristus el pia teleb yupu bobuka, Yahudi yala kum ninye peterelbinamle,’ tenepnukce, wipdeipnuke. Allah arye, Kristus deice kintinipdeipsukce, el ap kanye dukdongobuka upyopura, arenamsil ning nirya ara, nukmanto kum ati, nunce kum biktibye.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Sik kamto nang ara, narye bico tenesununa ati, na mapu atonun ululume. Anggun malye tenelulum ning ap, malye winilamlum ning ap, Yesus Kristus el si deice, Allah arye, ‘Sik malye winilamik bukni, aning tonok minopce kum opnune’ tenen, batakdongobukce, talye kanye bobuke. Winibukce, anggun malye winilamlum ning nirya ara, akunum namin kipsukce, anggun malye ning ara, kum ubuka deibuke. Ati ara, ayupu seksene.
ကြော်ငြာတွေ