Aminyan ara, Salem mutuku taleamuk ninye deiyoknye, el si ara Melkisedek birye, din ning el si ara roti ap, anggur mek ninye kanye wangalamak mek ap dobuka ‘Abram arepnun’ tenen, boyayuk. Melkisedek bira, Allah dana tam, ninye dana tam noutamak ansinilina deiyoknye ulamuk. Aning-aning deice tam ulamukce, malye winilamik ning, nun ni Allah ati pil dolamuk.
Lukas 24:44 - Eipomek44 Yesus amekin bal dibukopura, ayupu nyabuk. “Na ap, anggun neika ulamuburye, nyalamsise yupu ara, tonap nyapnusine. Yata yupu do nirya, Musa sekamuk yupu ap, Allah yupu laka nyalamik nang, nabi-nabi sekamik yupu ap, Mazmur noutamak sekamik yupu ara, nati sekeiyamnik touk dipkoprop upnamle,” nyabuk. အခန်းကိုကြည့်ပါ။ |
Lukas 24:44
88 ပူးပေါင်းရင်းမြစ်များ
Tonda, ance deiplum mi arye deipliba, dadeipdanin balamica ani, pia dodeipdanin binamak nang ati, narye teleb kipdeipnamne. Teleb kipdeipnyopura, anang arye dodeipdanin balamica ani, aminyan deipnamak nang deice arye, mutuku sirya, im sirya nirya, unamak ninye ati, teleb kipdeipnamne. Deiyok ara, narye nyapmakunuba ance, na yupu kekemomce, aninguk winipmalam ati, ayupu nyapkine,” Allah arye, Abraham biti nyabuk.
Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.
Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.
Tonda, sik asik teleb ubuka dolamik nang arye, ‘Akeil urasin malye keil’ tenen, dobuka, bai tam donokik. Akeil ara, bataklamik bukni, akeil dobuka, bai tam donokik keiluk, weik mambul keil akunum upmale. Winipmanto ara, keil aik donyak nang arye, ‘Akeil aik abilinga nirya, pia teleb diksukumuk upnamle’ tenen, minopce delilamak keil atonun, sik bai tam donokik keil ara, weik mambul keil akunum ulule. Winipmanto ara, yuk keil nirya ara, mitik mambul bukni, akeil tonok ara, weik mambul aik dona deiyok keil, akunum ulule.
Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.
Allah Yahweh arye, nyapsine. Dipkoprop, na pil donamlanye birye, pia weik kel bikna deice arye, mambul pil dopliba, nong upnamle. Nong uplyopura, ninye weik tonun eibikirye, elti, si erelinamake. Narye, ‘Elda, aning-aning nirya deice tam ulirye, ninye deiyoknye pia unamle’ tenen, elti, si erepdeipniba weiknye kipdeipnamne.
Aning nirya ara, talye ati kum nyanyabe. Aminyan talak, pia telebuk wininamsil ning deiyok ara ani. Ara, Allah arye tenelamsuk touk, wini talak ara, nun lyena ati, sal mi tonok akunum deipmasirake. Allah arye weik mambul mi akunum kintinibuka arepmasile. Nun lyena ati, ami akunum arepmasil mi elda, aminyan talak aning-aning nirya talibuka, nun ninye deiyoknye unamsile. Winibuka daulamepya ani, ninye nirya arye, el si erebikirye, el si ati nyanamak ning ara, ani. Pia Mambulnye ulule. Ninye melina ati, Kanye Talima Kwadina Deiyoknye ulule. Pia Mikip Weiknye Allah ulule. Nun Ni Allah, Pia Kam Unamlanye ulule. Allah ap ninye ap, neika teleb una ati, Ansinilina Deiyoknye ulule. Aning-aning nirya, ninye arye el si tenibuka nyana ati, ayupu nyanamake.
Na Allah Yahweh arye nyapne. “Doryanamle talak noutamak ara, Daud birye deibukba dadeipdanin, banyak nang noutamak, ton pia diksukumuk telebuk winilulnye wibuka deipniba, Israel ninye, sik ninye deiyoknye Raja ulirye, Israel ninye pia talinamle. Winiplirye, pia moubuka teleb diksukum winin ninguk teneplirye, weik kel kina arye, aninye talinamle. Elce pia teleb ubuka, aninye talilirye, diksukumuk winibuka, yupu bokeipnamle. Winipnamle deice arye, amutuku noutamak nirya, dipkoprob diksukum winina ap, malye winina kum aniryuk, pia teleb winina ap, pia awininamake.
Nara Allah Yahweh, aning-aning nirya talibuka, deice tam erebuka, pia mikip weik deiyoknye ununa ati, narye nyapdeipnusin domon yupu ara, atia. Ara ani. ‘Naryuk, keipyal yo koubikba, weik tonun pabuka, cang weik arye eitam welebuk keipyal yo dam yanuka, winiryuk teleb yo dup ning ara, narye daknamne. Akunum pia winiryuk yo taruk, dup teleb ning dakuka, aning ara, pia teleb winiryuk taruk ning, naryuk winibuka daklopnamne ning ara, bobinirye, tuba tamubuka koupnamne. Ara, ayo taruk dobuka, tonok weik tonun welyamuk mutuku kon deice, tuba tonap akunum koupneba, nepnin balamya ani, cang pia weik welepnamle.
Aning nirya winipnamne talak ara, narye ninye deiyoknye Raja tonokuk, ‘Sik aninye nirya taliplirye, yupu nyanamleʼ tenen, na amu tam pil teleb kibuka dolulnye, el si Daud, domba deiyoknye atouk kipnirye, elti wibuka, sik dam deipnyopura, elcuk, ‘Naʼ tenen, nang, Israel yala nang talibuka, Raja kiplirye, yupu nyapnamle. Domba basam weina deiyoknye telebuk ulamle touk, Daud babye, ‘Naʼ tenen, nang, Israel yala nang nirya taliplirye, sik din ning teleb ninguk arepnamle. Areplirye, ‘Adomba telebuk unamakʼ tenen, anang ati, teleb kibuka kalikinamlule. Elti wipdeipyeba, Raja Daud, elcuk, na domba basam atonun nang nirya ara, ninye deiyok kiplirye, teleb kibuka weinamle.
Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”
“Alukunyan noutamak babye, na lengdar mapmasirye, lengdar deice dinmase. Wininmase talak ara, Ninye Mi Atonunye, ninye urasin atonun upmok ning welebukba, aning ton eipse. Tonda, el anye yangayuk talak ara, dua bum arye, deibuka antanapmok deice yangayukak eipse. Ninye Mi Atonunye yanganmoknye ara, el minop talak arye, kam ulamuka ani, Pia Tuba Kam Unamle Deiyoknye, el dam bana ati, sik im deice unyak ninye arye, menekuka banmekak, Ninye Mi Atonunye, sik aminyan tam banmok.
Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Ura, Daud birye deibukba, deipdanin yanganyak nang nirya ap, Yerusalem mutuku weik asik noutam unyak nang nirya ap ara, narye sikti, kanye talima namin una deiyok ning arepnamne. Ara, aning arepnyeura, sikce, ‘Seʼ tenen, bico tenebuka, talima lamapdongobuka unamake. Tonda, sikda talima erelana kum aryuk, nemalyap aryuk, na Allah ati, moronuk unamake. Winipnamsina deiyok ara ani. Ara, aminyan talak ara, sik tam nang arye, nati lukuka opnamniake. Aminyan talak ara, sikce lukuka opnikirye, anang nirya arye eipnamniake. Tonda, eipnikirye, ‘Se, bicoeʼ tenen, engepnamake. Nati, engenamniaka ara, sik mi tonok deiamikcak, ami diplyeba, ami ati weik arye engelamak touk, unamake. Tonda, sik anang nirya arye, engenamniaka ara, sik min yuma deiamikce mi tonok, diplyopura, atonok mi ati, engelamak touk, na eipnikirye, atonun weik arye engenamake.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Atalak ara, Allah Yahweh Zaitun mutuku kon deice yanuka tiknamle. Zaitun mutuku kon ara, Yerusalem weik asik dam bukni, otam keting panalyangan tam ulule. Asukum ara, Allah yalirye, Zaitun mutuku kon deice yanuka tiknamle. Winiplyeura, Zaitun mutuku kon arye sakukaplirye, pala weik tam ara, keting panalyangan tam arye, deiyok koubuka binamlya ani, keting kumulban tam binamle. ‘'Amutuku toplirye, ton tam ara, outam dabu tam kisikuka binamle. Ton tam toplirye, iknapye tam ton kisikuka binamle. Ara, Zaitun mutuku kon nirya ara, dana-dana tam kipdoplyeba, danoutam ara, weik lu upnamle.
Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Akunum morobukopura, Allah el si Yahweh arye, Musa biti nyabuk. “Kat ning deice arye, ninye on kwatima urasin atonun memepmince, kintinipnulyame. Akunum winipminyopura, cang yo deice ikuka deipminba, akwatima akunum si topliba, uk dilul ninye ara, acang yo deice deipminye kwatima eibikirye, adiparyuk narye kweteipnyopopura, kum dipnamak bukni, adiparyuk kam buknamake.” Allah arye nyabuk.
Anggun nirya bulubuka yanuka wekmunce, yupu talibuka, mangkau arye ninye oplyeura dipmalya ati, dipmalinye tam nang arye, ikin ning el deice kum deilinamake nyabuka lyebikirye, anye telebak uk delinamake. Ara ninye kum opmantoak, teleb asik wibuka deipnalum noutam arye, anye dobuka deipmunyeba, asukumuk unamlule. Anye amutuku bilyeura, amutuku binuka ulamlyebuk, atalak imam weik deiyok kiyamlinye, akunum diplyeura, anye tamubuka el mutuku uk yanuka unamlule.
Yesus arye anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu 12 nang ati, deiyok koubuka peterenmokce nyabuk. “Nara, Ninye Mi Koprop Atonunye unune. Narye Yerusalem mutuku binyopura, sik Yahudi yala nang sik deiyok nang ap, Allah arena ati deiyok nang ap, Allah arye, ‘Winamlulume, aning kum wininamlulume,’ nyapdeibukba, Musa arye sekeiyamsuk yupu, mem yupu peterena deiyok nang ap, anang nirya arye nati, ‘Nun like’ tenen, bataknikirye, ikin ning weik na nong deice deipnikirye opnamniyake. Opnikcopura, dipmanyani, weipnikcopura, like winilye sum arye, ila tamubuka Allah arye kam bukeinamnile,” nyabuk.
Nyabukce, ayupu ton nyabuk. “Na dipkoprop nyapsine. Allah yupu laka nyalamik nang, nabi nang arye, nyalilamnik touk, ‘Anye bira, pia malye unanye,’ tenebikirye, dipkoprop malye un nang ap, neika dobuka opnamake. Aning nyapmasin tok, Allah yupu laka nyalamik nang, nabi nang arye, ‘Winipnamle,’ nyabuka sekeiyamnik tok, dipkoprop upnamnile. Aning nirya sirya dakna talak akunum dam uple,” Yesus arye nyabuk.
Yesus arye, anyapmok yupu moupdeibukce, el nong deice ikin ning deipnamik ning ap, kanye imun ning upnamuk ning ap, el mapu obarye 12 nang ati, deiyok koubuka lak nyabuka peterenmok. “Nara, Ninye Mi Koprop Atonunye unune. Sik Yahudi yala nang sik deiyok nang ap, Allah arena ati deiyok nang ap, Allah arye, ‘Winipnamlulume, aning kum winipnamlulume,’ nyapdeibukura, Musa arye sekamuk yupu peterena deiyok nang ap, anang nirya arye nati bataknikirye, opnamniyake. Opnikcopura, dipmanya ani, lik winilye mapmanya ani, Allah arye tamubuka kam bukeipnamnile,” nyabuk.
Minop talak mok ap, ninye ap, pia kum uamuk mutuku noutamak ara, ninye on kwatima arye ninye weik olamukba, Musa arye kat ning dobuka, kwatima urasin atonun puturubukce, cang yo deice kwatipdongobukce, ikuka erepdeibuk touk, nati ton atonun wininamake. Ara, Ninye Mi Koprop Atonunye dobuka, yo deice deibikirye, ikuka tikeipnamniake.
Allah arye nyapdeiamukba, seklamik yupu buku nirya ara, anggunce, ‘Kume, ayupu kel bikibirye, moubuka talibibya deice arye, pia kam una deiyok ning dopropnamabe’ tenen, ayupu nirya weik arye, moubuka kel kilulume. Bukni, ayupu seklamik nirya ara, dipkoprop nati lak nyanulul ning ara, moubuka dib kum tenelulume.
Ura, yuk yupu ton nyapnusine. Allah arye nyapdeibukba, Musa arye sekamuk yupu, mem yupu ara, winipmanto ninguk, keting kukia atonun ulamuk. Aminyan talak nong dipkoprop yanamle ning, el urasin yuk ulule. Minop talak mem yupu ara, mitik anun keting kukia atonun ulamuk bukni, aminyan talak nong dipkoprop yanamle ning ara, minop talak uamuk yupu atonun kume. Aminop yupu ara, keting kukia atonun ulamuka ati ara, sik Allah ati, arilamik deiyok nang arye aketing tamun, aketing tamun nirya, weik deice arye, sik arilamik ning uk, tuba-tuba arilyangalamik. Winilamika deice arye, ‘Allah el si erepnuyap’ tenen, el si erena aik dam weklamik ninye ati, sik malye winin ning nirya kum kipdeipnarye, diksukumuk kum daneipmanto winilamik.
Wini talak Melkisedek ati, ayupu nyapnusinye bira, Salem mutuku talyamukce weik ninye deiyoknye, Raja ulamuk. Tonda, aning-aning deice tam ulirye, Weik Mambulnye Allah, el pil dona ati, Melkisedek bira ninye ap, Allah ap, dana-dana ansinilina deiyoknye ulamuk. Ulamuka ani, Abraham bira yuk mutuku ninye deiyok nang obuka malye kibukabukce, tamubuka yayuk talak ara, eiprarikce, Melkisedek arye Abraham biti, “Allah arye teleb ulinamkile,” nyabuka, teleb yupu nyapdeibuka deice arye, Abraham ati teleb kipdeibuk.
Ura, sik winilamik ning deice ara, Allah El Dib Kanye arye, winipmanto ning ati, peterelamsuke. Peterelamsuk ning deiyok ara ani. Ara, minyuma aik, cang kambing bol arye wibuka, tia talak ati, dopra balamik tenda aik uamuk talak nirya ara, anyaik noutamak, Pia Teleb Lek Aik wekmanto bisik, laka kum nyalamsuke. Ara, domona atonun anya arye, Allah el ulya ati, wekmanto bisik min kum laka nyalamsuka ati nyapsine.
Ara, Kristus El Dib Kanye arye, nabi nang sik talima noutamak yupu laka nyalamuk. Laka nyalamuk yupu ara, Kristus ikin upnamuk ning ap, ikin ubukura, aminyan sirya talak, weik mambul ning, pia teleb ubuka dirina weik ning upnamuk ning ap ati, yupu laka nyalamuk. Ayupu laka nyalamukbuk, sik nabi-nabi nang arye, ‘Se ayanamle ning yanamle talak ara ani, ayanamle talak noutamak winipnamle ning ara, anye moubuka kel kiptibye,’ tenelamikce, pia piriltaklamik. Piriltaklamik bukni, aning deiyok ara, moubuka kel kum bikmanto ulamik.
Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.
ကြော်ငြာတွေ