Ayub birye Allah ati, nyabuka morobuk yupu ara, ani. Nun nin yapu arye, deipsice talak arye diprongobuka dotalak babye, mikip kum usulule. Tonda, ouku mitik tonun dem unamap talak ara, kanye ikin weik ning unmasilye diparyuk, minopce dibinyabe. Keting tamun pia weik arye kum unyabe. Tonda, kam unyap talak noutamak nirya ara, ikin ninguk yangasulule.
Lukas 12:19 - Eipomek19 Winipnyopura, na aik na yuk ati tenenamne. Ara, akunuma, aminyan upnamle talak nirya ara, aning-aning nirya pia weik akunum deipsa ati, din telebuk dipnirye, mek dibuka pia kanye deibuka, talye kanye bobuka unamne,’ tenebuk. အခန်းကိုကြည့်ပါ။ |
Lukas 12:19
39 ပူးပေါင်းရင်းမြစ်များ
Deiyok ara ani. Sik bona weik bonyak nang babye, akunum dibikcopura, sik talilamikce bona ap, yo bok ap ara, kum dobuka bobinamake. Kume, sik akunum dipnamak talak ara, tuku dongobikiba, dabinuka unamakak ara, sikce talilamikce, dengna weik ning yuk-yuk ning nirya ara, dobuka kum bobinamake. Aning nirya ara, kum danamle!
Mikip kum nang nirya ara, tonok isin atonun unyaka ati, sikce pia kum lyepsitinge. Atonun, sik pia mambul weik nang babye, sikce kum lyepsitinga ati, sik bidamang lengdar deice arye, elilamak ning atonun unyake. Talye bona utotoa talina kum nang babye, weik nang babye, sik nirya ara, mambul nang kume. Winipmanto ara, bona dobuka, ‘El ikin ara yata barye kilo do?’ tenen, timbangan deice deibikcopura, sik ikin ara, pia mitik diamuk ulule. Sik tukwak nang ara, weik mambul nang kume. Diba, talye bona utotoa kum nang babye, weik bona talin nang babye, sik nirya ara, mambul kum ati, winipmanto ara, ‘Ikin ulul do?’ tenen, timbangan deice deiptibya babye, sik ikin ara, pia kume. Sik nirya ara, tonok isin atonun unyaka ati, sikce kum melibuka lyepsitinge.
‘Bon-bona weik ning talibuka ubirye, kanye deibuka unamabe,’ tenekirye, tilila yupu ap, tenepce arye nyana ap, ubula dona ap deice arye, dekna weik ning dolonamlum ning nirya ara, nong ton pia kum upnamsile. Malye uk upnin banamsile. Bukni, malye un ning nirya ati, ‘Na like,’ tenebuka batakikirye, diksukum un ninguk, talibuka unyak ninye ara, sik nong dibica babye, kam pia unamake.
Weik kel bikamik nang sikce weik kel bikna deice arye, pil teleb ubuka dopra balamica ani, aminyan dolonamak ning ara pia weik unamle ati, yuk nang nirya arye sikti, kanye delilanamake. Bukni, walwal arye malyeuk unyak nang ara, ‘Se, pia piribuka teleb utibya deice arye, nun bona ning weik upsutu,’ tenenyak bukni, dipkoprob nong kum unamle. Walwal kanye bobuka unyaka anya arye, talyeuk unamake. Ati ara, ninye nirya arye, awal-wal unyak ninye unamak ning ati, moubuka kel bikamikca arye, ‘Nun babye atonun upsilyak’ tenen, leilonamake.
Allah ati dib tenebuka unyak ninye arye, winibuka unamak bukni, bona weik talin nang, sikce tenenyaka ara yuke. Sikce utenenyake. ‘Kume, nun dekna weik bona ning, ayala-yala nirya bulubuka deiamupa anya arye, aupsuka deice arye pia telebuk unamabe. Ikin ning nun damak kum yanganamle,’ tenenyake. ‘Abona ning weik arye talibuka ubya deice arye, melipnin basiliba unamabe. Ikin ning nun damak kum yanganamle,’ tenenyake. Tonda, sikce, ‘Ninye arye weik kota mutuku ukirye, mikip cang keil poka antanabuka dolamikiba, telebuk ulamak touk, nunda weik bona weik talin nang unyaba anya arye, nun dam ara, kanye imun ning ton pia kum unamsile,’ tenenyake. Winibuka tenenyak bukni, walwal uk unyake.
Yo bok ap, bona ning ap nirya ara, asing elimunce umunye ning nirya ara, tuba elinmamunye talak noutamak aryuk, kum upnamlarya. Winipmanto ara, bip maka eipmunba, adiparyuk minopce im noutamak lakuka balamle atonun, bona weik talin ning babye, minopce kum danin banamle. Winipmanto ara, bip maka pol laklirye, talye karin arye lakuka balule. Winilamle atonun aning nirya ara, pia kum upnamlarya.
Nara, ‘Ambusum arye or yanamal talak ara, aning nirya ati dipkoprob winipnamane,’ nyabuka, kanye deipmunce, maknya kintinildan yupu kum nyanamlulume. Ara, ‘Orsum ara, aning winipnamale’ tenen, moubuka kum kel kipmanto atia. ‘Aning winipnamale’ tenen, kum kel kipmamincuk, ‘Orsum ara, aning winipnamale,’ nyana kume nyapkine.
Ati ara, anggun wel nanguk tuba ululum nang ara, anggun tuba weluk unamlum talak ara, kanye deibuka umunce, pin-pin kanye bobuka unamlume. Anggun talima noutam arye, ‘E, aning ara wininamne, aning ara, ton piripnamaneʼ tenen, teninamlum ning nirya ara, dobolbanamlume. Tonda, anggun asing arye eipmunce, ‘Se, aning ton taliptibye,’ tenelulum ning nirya babye, ‘Talipnunʼ tenen, dobolbanamlume. Wininamlum bukni, kanye moubukapmunce, teninamlume. Anggun wel tuba unamlum talak wininamlum ning nirya ara, Allah arye, anggun malye wininamlum ning nirya ati, dipdelirye, yupu bokeipsilyopura, wenepnamsile. ‘Dauplyeʼ tenen, talye luba kina kum unamle. Ati, pia moubuka teninamlume.
Aning nirya ara, narye tenepne. ‘Ninye arye atenebuka donyap pil nirya ara, pia teleb ning ton kum unyabe. Ati nun winipnamtibye ning, pia teleb ning ara, ani. Ara, mek dina ap, din dina ap, tonda nun pil dopmatibye touk, apil donyaba deice aryuk, kanye deibuka unamtibye. Aning dotalak ara, nong teleb upnamnil do? Yata tonye birye aning nirya dopropnamle do?’ tenen ning ara, kume. Aning ara, teleb uka ati, narye tenepse ara ani. ‘Ara mitik babye, nun dam aupsilye ning ara, nun ni Allah, elcuk aning nirya ara, el taruk aryuk aresululeʼ tenen, unamabe.’ Utenebibye ning ara, aninguk talibuka moubibyak arye, tunim abuka una ara, teleb uka tenepse.
Nyapdeipsuk bukni, anggun Yerusalem mutuku ululum nang ara, teleb kanye bobuka pin-pin upsukba kanye deipmunce, weik kwalya kwalilulume. Anggunce sapi basam ap, domba basam ap, weik tonun opmunce, tup dobuka diplume. Tonda anggur mek dobuka diplumce, ayupu nyaplume. Anggunce, “Kume, anggun nirya yalulume! Nun nirya ara, anggur mek ap, teleb tup ning ap dibibirye, talye kanye bobuka unmanbe. Winibuka dibibirye, mapmapya bereklye sum ara, nun nirya dipnamabe. Ati ikin kanye bona kume,” nyabuka kanye deibuka winipmalume.
Anggunda bicoe, weik arye wenebuka opnamsina atia! Ara, anggun Israel yala nang kan-kan arye, ton nang ara, beren tam koproba arye, bukikirye, ‘E, adiparyuk kanye wangalamak mek dilbinuyabe,’ tenebikirye, unyake. Ton nang ara, beren tam arye dipdongobuka, anoutam talak ap, lukunyan talak ap ara, sikce yu mekuk pia dinyaka deice arye, amek el yu arye, sik kanye pia wanganyake.
Anggun malye ululum nang ara, Allah arye wenepnamsila ati, anggunda bico. Ara, anggunce, anggun aik akunum doplum bukni, yuk talye kankan nang arye domik ning ara, anggunce dekna ap, alubuka dolona ap arye, doproplumce, anggun ninguk weika arye, tabakuka delilulume. Atonun, anggun wa tuku akunum aubuk bukni, yuk nang arye wilamak wa tuku ton, alubuka doproplum nang ara, malye winilulume. Angguncuk, sik yuk nang talilamik ning ap, ulamik mutuku ap nirya ara, akunum doproplumba, anang yukak bendobikura, angguncuk amutuku talibuka, anggun yuk aunmamlume. Winilulum ning ara, malye weik winiplume. Allah arye nyabuk.
Tonda, sikce nyanyake. “Anggun ton yalulume! Nun ap, kanye wangalamak yu mek doprobipyeura, amek weik anun neika dinamabe! Anggun ton yalulume! Nun ap, anggun ap arye, yu weik anggur mek dobuka, dinamabe. ‘Dilamepya ani, akunum boupsilyopura, teleb kanye bobuka unamabe,’ tenena kume. Tonda, mapmapya bereklyopura, ambusum abapye, awininmap touk winipnamabe. Arup ara, mitik teleb upmasil bukni, ambusum ara, pia teleb weik sum yanamala ati, ambusum ara, kanye weik deibuka, telebuk unamabe!” nyabuka nyalanyake. Allah arye, sik Israel yala deiyok nang ati nyabuk.
Allah Yahweh arye, sik Yakub yala nang ati, nyabuk. “Sik Kanaan mutuku nang arye, talye dungnubuka, bona diripnarye, ubula dololamik touk, anggun babye winilulume. Ara, ‘Abona ara, yata barye kilo ulul do?’ tenen, anggun ikin kiklilen ning, el si timbangan talibuka dipdemunce, tilila yupu uk nyalulume. Ara, ninye arye, ‘Nun bona deknamapʼ tenen, anggun dam yakcopura, anggunce sik bona deiamikirye, yanuka dekelulnye birye, talye yupu deice arye, ‘El ikin ara, ani. Ati, yo bok ara, winibuka arepnamnulume,’ nyabuka, tilila yupu uk nyaplobuka, dipkoprob yupu, el dam kum nyalulume. Winimunya deice arye, yuk nang ati, ikin ning sik nong deice delilulume.
Se, anggun Israel yala ninye ara, deiyok ton kum upmalibuk, teleb kanye bobuka umunce, kanye teleb mot selulume. Tonda, anggunce, “Kume nun mikip aniryuk, mambul mutuku ap, mikip ninye ap, obuka sirya dakupurye, dalubuka doprobupu,” nyabuka, talima erebuka kwalilulume. Aning nirya nyalulum bukni, talye yupu uk nyalulume. Allah arye nyapdeibukba, Amos birye kekebuka sekuk.
Sik laut mekwen pum tam ulul ning, ikan olamak nang ara, Allah ati pia kum tenenyaka anya arye, el mekwen pum ikan tomon ning, el si jala ati, ‘E aning ara, weik mambule’ tenen, aning ati, si erenyake. Aning atouk, sik mekwen pum ikan on ning si ara, ‘Se, aning ara, mambul ning anya arye, nun dina ati, mekwen pum ikan weik talepmalebuk, dobuka weik dinyabe. Kum dinyap ning ara, weik tuba aulula anya arye, aning dekibirye, yo bok weik dolonyabe. Wininyaba deice arye, aning-aning weik aupmasile. Tonda, ayo bok deice arye, yuk yala din ning nirya, pia teleb ning dekuka dinyabe. Ati, nunda kil-kil kanye bobuka, pia telebuk unyabe,’ tenenyake. An Allah ati, pia kum tenikinyake.” Habakuk birye, Allah ati nyabuk.
Aning ati ara, anggun kanye moubuka unamlulume. Malye-malye winina ap, talye kanye bobuka urdemuk una ap, kanye wangan mek talye dina apura, ‘Nun aik, nun ongon butum, nun dina ap, yata wiripnuyap do?’ tenen, teniltona ap deice arye, anggun kanye talima tenena ning ara, ikin weik upsilirye, mitang yuksilyeura, na pil dopmanto kum ululum ati, kanye pia moubuka unamlulume. Winipmanto ara, kabang bisik balamlya ak wena wemikceura, kabang talye mangkau arye balyeura, youlamla atouk, na yanamne sum mangkau kanye bopmamunye talak winipsilyak ati, kanye pia moubuka unamlulume.
Na kayapo, Efesus mutuku noutamak unye talak ara, Allah yupu peterenibuk, pia yu weik nang arye, opmanto uninyak bukni, apil donuna ara, na talye kanye aryuk tenebuka, talye ulamtinyetoura, aminyan ara, yata teleb ning winipnamle do? Kume, Allah el mapu akunum diamik ninye, kum kam bukeipnamsutopura, ‘Apil ara, talye urdemuk donune,’ teneptinye. Apil ara, nong kum upnamtutopura, dipkoprop kum uptopura, ‘Dauplye,’ teneptibye. Ara, minop talak Yahudi yala ninye ulamikce nyalamik touk winiptibye. Sikce nyalamikbuk, Yesaya arye, sekamuk yupu ara, ani. ‘Sikce nyalamik, “Nun kam unamap talak ara, mitik anunuk kam unmabya ani, minopce talye dibinyaba anya arye, talye kanye deibuka dina ap, kanye wangalamak mek ap, talye kanye bobuka dinamabe,” nyalamik.’ (Yesaya 22:13)
Aninye aning ara, sirya talak ara, Allah arye, weik wenebuka pia onamle. Oplirye, bataknamle. Anang ara, sikce, ‘Aning weik mambule,’ tenenyak ning ara, sik talye nong deice patalamle ning ap, sik babye, kanye deililana ning ap, anyuka. Sikce malye-malye winipmace ning deice arye, malye kanye bobuka, alye ulamtu bukni, amalye wininyak ning ati ara, maknya kintibuka kwalina ap, kimkimilana ap, unyake. Sik kanye talima nirya ara, talye tukwak deice ninguk delinyaka ati nyapsine. Tukwak ning deiceuk delinyaka ati, nyapsine.
Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.
Anang arye yuk nang ati, tenepce arye teleb yupu yukuna ati, talye nyanamak bukni, aminyan ara, anang deice ikin ning delinamake. Tonda, sik winipnamak ning ati, ‘Winipnyopura, aminyan talak yata winipnamnil do?’ tenena kum aniryuk, ‘Talya parapkabuka winipnune,’ tenebuka malyeuk wininamake. Sirya talak unamak ninye arye, sik bidamnye ati, ‘Nunda pia teleb nang, nunuk ara, pia mambul’ tenen, sik kanye erelilanamake. Anang arye, Allah el winilul ning ap, Allah el ap, ati, kanye kum deipnamak bukni, sik patan ning atibuk, ‘Kanye deibuka talye-talyeuk unamap’ tenebuka malye wininamake.
Anggun tukwak mutuku umunye talak nirya ara, ninye kanye delina pia teleb ning nirya talibuka, mutan nang ululume. Winipmanto ning ara ani. Anggunda, ‘Sapi basam owala obuka dipnamape’ tenen, el dina weik arye arilamice bukni, weik neplirye, bol teleb uplyopura, asapi basam arye, ‘Na opnamniak,’ kum tenyamlye bukni, obuka dilamak atonun ululume. Sapi basam arye, ‘Na opnamniak,’ kum tenyamlye atonun, anggun babye, ‘Nun malye winin ning weik upsilyeura, aminyan talak ara, Allah arye wenebuka opnamsile’ tenena kumce, malye kanye kum boluluma ati, nyapsine.
“Anggun babye, wininamlulume,” nyapmasina ara, talya urdem ati kum nyapne. Anggun kele, sik diba kum tenenyak ninye arye, malye-malye wininyak ning ara, minop talak weika arye akunum ulalum bukni, wini talak ara, aning nirya ara, akunum batakmalume. Aning ati ara, amalye un ning tonap, pia kum wininamlulume. Sik diba tenena kum ninye arye, malye-malye wininyak ning ara ani. Sikda, kil talye yona ap, ubula dona ap, malye un ning patana ap, kanye wangalamak mek weik arye dina ap, weik kwalina kwalibikirye malye-malye ubuka kouldana ap unyake. Tonda, sik puturubuka memenyak ning do, isa mer do, talye ning si erenyak ara, Allah arye, ‘Aning na like,’ tenelule.
“Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.
Nyabukura, Daud ap, el mapsilip ap arye, ‘Telebe, amorop malam touk, winipnamkiyabe,’ nyabik. Nyabikopura, anye birye, sik nirya dobukabukce, sik Amalek yala nang, talye bukuka ulamikak bobiyuk. Ayu nang ara, tonokak kum ulamik. Talye mangkau kanye dobuka unmekce, amutuku dana-dana nirya, eldem bukuka, din ap, kanye wangalamak mek ap, dinmikce, talye kanye bobuka, malye-malye unmek. Deiyok ara, sik Amalek ninye arye, Pilistin tam noutamak bukni, Ziklak mutuku ulamik nang ap, Yehuda yala nang ulamik mutuku noutamak ap, aninye nirya obuka, malye kipmekce, ubula dobuka yanamik bon-bona pia weik anya arye, talye mangkau kanye bobuka, pin-pin asa arye, wininmikce din ap, kanye wangalamak mek ap, weika arye dinmek.
ကြော်ငြာတွေ