Tunim abikura, Elia biryuk tonap tamubuka nyabuk. “Allah yupu nyapdeipliba lak nyan nang ton weik aulamik bukni, wini talak ara, el yupu lak nyananye nabi ara, na tonok unune. Bukni, Bahal el yupu kekebuka lak nyana deiyok nang, isa si eren nabi-nabi anggun yupa ara, empat ratus lima puluh nang aululume,” Elia birye nyabuk.
Lukas 10:2 - Eipomek2 Anang dopdeibuk talak ara, anang ati adomon yupu nyabuk. “Kwaning nong ara, pia weik akunum wisibuk bukni, kwaning lin nang ara, pia mitik anya arye, awa deiyoknye ‘Allah arye el wa win dam lin nang ton wibuka dopkwetepnamle’ tenen, moronamlume.” Yesus arye, ayupu nyabukopura, ayupu ton nyabuk. အခန်းကိုကြည့်ပါ။ |
Lukas 10:2
48 ပူးပေါင်းရင်းမြစ်များ
Tonda, winipmanto ara, ance weilyam domba basam ara, nun Israel yala nang, teleb kipdeipsiminyeba, amutuku noutam ara, ‘Nun pia unamap mutuku ara, anyeʼ tenen, akunum ebuka talebupu. Aninguk kum bukni, tonda, Allah ance aning-aning yala-yala nirya, talilyama noutam arye, nun bona talena kum ati, talye kankan nang ulamupu buk, aning nirya patanauk ulamsuk bukni, aning nirya weik areamsulume.
Se, narye wipdeipse domba weina deiyoknye bira, elda pia telebnye kum ulule. Anye bira, pil teleb kibuka dopmantonye kum ulule! Na domba basam nirya, teleb kibuka kum weilirye, adomba basam nirya batakalule! Winilula ati na Allah Yahweh arye elda domba basam moubuka weina kumnye biti supnamne! winipniba, elce adomba basam weina ati ara bataknamle. Winipliba, lo arepniba yu yin talen nang arye, ninye ona ati parang ya arye, el taruk sirik tam opliba weik suse upnamle. Winiplirye, el asing sirik tam babye asing luklopnamle! Winiplyopura, adomba weina malye ululnye bira, el taruk mikip ara, pia kum upnamle. El sirik tam asing ara, kuna daknamle!” Allah arye ayupu nyabukba, na nabi Zakaria birye kekepse.
Tonda nyabuk. Aning deiyok ara ani. Sik adomba basam nirya akunum dekikirye, dopropnamaka ning ara, adomba basam nirya opnamak bukni, sik anang arye, ‘Se, adomba basam opnamaba ara, bicoe,’ pia kum tenenyake. Sik adomba basam el kalipdeibuka dekenyak nang arye nyanyake, “Se, Allah Yahweh anda pia telebe. Adomba basam dekmapya deice arye, nunda, pia weik tonun tabakuka bona weik talin nang unamabe,” nyanyake. Tonda, adomba basam dekenyak nang ap, sik domba weina ati deiyok nang ap, sik nirya arye sik weinyak domba basam ati, ‘Se nun domba basam obikirye, dipnamak,’ tenen, pia bico kum tenenyake.
Nyabukce, ayupu ton nyabuk. “Na si eren aik dam yanuka tikmunyopura, asukum anyuk yanirye, yupu nyapnamakine. Na Dib Kanye ap, mikip ap, akunum arepkise ning ara, bokukapnirye, adeiyok nang babye ton, sik deice ton deipnamne. Winipniba, anyuk na mapu Israel ninye noutamak pil dopminyeba, kanye imun ukilya ati, sik awisi nang ap, neika sik Israel ninye ati, pil donamlyame. Ara, an ikin ukilye ning ara, sik adeiyok nang arye, kwa dibuka melipnamkiyake. Winibikikca deice arye, mitik kanam asa ton upnamkile. Aminyan talak ara, an dem aryuk, Israel ninye kum bobinamlyame.” Allah arye, Musa biti nyabuk.
Yosua birye, nyabuk yupu ati ara, Musa birye Yosua biti, tamubuka nyabuk. “Yata deiyok ati, ance anang ati, yu upkilaba, talima pum tam tulum upkil do? ‘Sik bitinye arye, mambul yupu nyaprikiba, Musa el kanye malye uplyak’ tenena ati, nyapmanilam do? Kume, na kanye ara, yata ninye do, Allah Yahweh arye, el mikip ap, el Dib Kanye ap, sik deice deiptuba, sik Israel ninye ati, el nyalul yupu laka nyaptingopura, teleb uka. Ara, abitinye nang babye, yuk nang babye, Allah Yahweh, el yupu lakak nyaptingopura, na kanye ara teleb uka,” Musa birye nyabuk.
Atalak ara, Yesus elce wipdeiamuk nang, awekmek nang, sik 11 tuba unmek nang ati ayupu nyabuk. Anggunda mutuku sirya im sirya nirya ap, mutuku-mutuku nirya ap, na laka teleb yupu, ninye lyena yupu dobuka peterepra balamunyebuk, ‘Mutuku sirya im sirya unyak ninye nirya ayupu kekenamak’ tenen, peterelbilulume.
Yesus im deice akunum welebukopura, el yupu kekebuka dobolbalamik nang arye, amutuku-amutuku nirya el laka teleb yupu dobuka peterepda balamik. Yuk nang arye, ‘Ara, Allah yupu dipkoprop tenepnamak’ tenen, sik peterepda balamik talak nirya ara, Allah el mikip weik areamukbuk, ninye kum winipmanto ning, weik mambul pil dolamikura, elilamik nang arye, ‘Sik nyasikce yupu ara, dipkoprop Allah yupu nyasinyake,’ tenelamik. Telebe, na Markus arye asukumuk deipsine.
Ara, Yesus elce wibuka deiamuk nang, obarye 12 nang, el yupu peterelbana ati Rasul nang, el dam yangana ati, yukubukce, ‘Na pil dopnin banamak’ tenen, yuk-yuk dopdeibuk. Anang dopdeibuk ning ara, ‘Isa nirya bisibuka yakanamak’ tenen, tonda, ‘Uk yala-yala nirya kwetepnamak’ tenen, winin ning deiyok bitinye aribukce, el mikip sik nong deice deibuk.
Ura, atalak ara, Stefanus obik talak arye, yu nang arye, Yesus ati dib tenenang ati, sik nong deice ikin ning weik delilamik deice arye, yuk-yuk pera mutuku bik-bik abuka biyik. Sik biyik nang arye, weik pera mutuku ton biyik. Fenisia tam ap, Siprus mutuku ap, tonda, Antiokia mutuku ap, biyikopura, anang arye Yahudi yala nang ati, “Yesus arye lyesulule,” nyabuka, Yesus ati teleb yupu peterepra balamik.
Sik anang ara, ‘Allah si erepnamabe’ tenen, din dina kum arye, din si tebuka Allah siuk erelamikura, Allah El Dib Kanye arye nyabuk. “Anggunce Barnabas ap, Saulus ap, wibuka deipnululume. Na tenepse pil ‘Sik anang arye dopnamdak’ tenen, wiamsa ati, winira anggunce abitinye nang wibuka deipnululume,” nyabuk.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Allah ati dib tenebuburye, el mapu unyaba noutamak ara, Allah arye, nun nirya ati, ‘Pil yuk-yuk donamak’ tenen, kwepdeipsukce, pil dona deiyok ning yuk-yuk bokuka aresulule. Ara, minopce weik mambul ning ara, ‘Na yupu dobuka peterelbana ati deiya kouna deiyok nang, Rasul nang unamak’ tenen, nun Rasul nang wipdeiamsuke. Bitinye ning ara, el nyalye yupu laka peterena ap, aminyan unamle ning min kum upmalye talak, laka nyana ap, ati, ‘Nabi nang donyak pil dobuka unamake’ tenen, yuk nang wipdeiyamuk. Winilye ning ara, el yupu nirya peterena ati deiyok nang wipdeiamsuke. Yuk nang ati ara, ninye kum winipmanto ning, winipman kum pil donyak ninye ap, wipdeiyamuk. Tonda, Allah El Dib Kanye arye, mikip ariliba, ninye kwetena ninye ton wipdeiyamuk. Ton ning ara, ‘Yuk nang ati bico tenebikirye, sik patan ning ati melinang unamake’ tenen, wipdeiyamuk. Tonda, ‘Pil nirya teleb ubuka donamak’ tenen, “Wininamabe, wininamabe,” nyabuka, pil dona deiyok ning moubuka tenebikirye, pil laka nyan nang, administrasi nyalamak ap, wipdeiyamuk. Tonda, sik min kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, aninye areplibuk, ayupu dobuka, nyanyak nang ton wipdeiyamuk.
Malye ulamse ati ara, ayupu kum nyapnitinge bukni, Allah arye nati, bico tenepnukce, el kanye aniryuk melibuka lyepnuka deice arye, el yupu peterelbana ati deiyok kouna deiyoknye una ati, wipdeipnuke. Bico tenepnukce, el kanye aniryuk melibuka lyepnuka nong ara, kum kum dayuk. Talya kum winilamse. Aning ara pia kume. Allah el yupu peterena deiyok nang nirya ara, pil mitik mikip arye, el Pil dolamik bukni, nara mikip arye, Allah el Pil dolamse. Pile weik dolamse nyapmasin bukni, dipkoprop ara, na mikip deice aryuk pil kum dolamse. Kume. Allah bico tenepnukce, el kanye aryuk melilamnukce, el mikip areamnuka deice aryuk, el Pil dolamse.
Nunda, Allah el pil nika melibuka donyap nang arye, anggun Korintus mutuku ninye ati mikip arye nyapsiyabe. “Allah el kanye aniryuk bico tenepsilirye, melibuka lyesulul ning ara, dib tenepmunce dopropmunyopura, talye-talye winina ap, talye tenena ap, malye winin ap kum wininamlulume. Allah arye tenyamsuk touk diksukumuk wininamlume,” nyapsiyabe.
‘Yanamne,’ tenenun bukni, tonda, na kwit Epafroditus ara, anggun dam tamubuka dopdeipnamsine. Anggunce, ‘Epafroditus bira, Paulus el patana ning ati melibuka winipnamle’ tenen, minopce na dam dopdeiamnulume. Epafroditus ara, na weit atonun ulirye, Yesus el laka teleb yupu, ninye lyen yupu ati, melibuka neika pil dolamnumu. Tonda, yin talin nang arye, ‘Aning opnuyabe,’ tenebice nang ati, pia darabuka olbisilalamak atonun, Epafroditus ap, na ap, nun neika, pia pi deibuka, mikip arye, Allah yupu peterebuka balamnumu. Ara, Yesus el yupu ati, “Deiyok ani,” nyabuka, pia moubuka lakak peterelamnumu.
Anggunce nati kum melipmanto ulamnuluma anya arye, el dopdeipnumunba, ‘Kristus el piluk dopnun’ tenen, Epafroditus arye na melyamnuka deice arye, dipmanto ubuk. Kristus el pil dona ati, dipmanto ubuka anya arye, wini talak ara, elda anggun dam yalyopura, elti, weik kanye deibuka, kinamlulume. Na Paulus arye, nyapsine.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Nun kayapu, anggun dipkoprop tuba tenelulume. Anggun ap neika ulamubu talak noutamak ara, nunce weik pil dolamubu ning ap, ikin ulamsuk ning ap ara, kum lupakeipsulume. Winilamupa deiyok ara, nunce, Tesalonika mutuku ninye ati, Allah el laka teleb yupu, ninye lyena yupu peterenamap talak nirya ara, ‘Nun patan ning ati, arepsikibuk, sik ikin upnul’ tenen, keting noutam ap, lukunyan ap, pia pil dolamubu.
Telebe nun kayapu, anggunce nunti, Allah moronamsululume. Ara, nunce Yesus el laka teleb yupu, ninye lyena yupu dobuka, anggun dam peterelamsupubuk, dib tenebuka teleb ululuma atonun, ‘Yuk mutuku ninye babye atonun unamak’ tenen, Allah moronamsululume. Ara yuk ninye weik tonap kekebikirye, dib tenebuka, ‘Ayupu ara, weik mambul’ tenen, ‘Allah yupu ati, kanye deibikirye, dib tenen ninye pola-pola weik upnin banamak’ tenen, Allah moronamsululume.
Allah ara, pia Kam Una Deiyoknye ulirye, ‘Ninye mutuku-mutuku nirya lyeptinye’ tenen, patalula ati ara, ninye arye dib tenebiceura, dipkoprop lyesulule. Ninye Lyena Deiyoknye ulula ati ara, el deiceuk nun kanye delinyabe. ‘Eluk melinamsil’ tenen, dinauk unyabe. Winilye ara, pia dib tenenyap ati ara, pia pi dobuka, mikip arye el piluk donyabe.
Sikda wininamak bukni, Timotius anuk ara, kanye teniltona ap, kanye walwal una ap, kum unamlyame. Sirya talak nirya ara, kanye moupmince, moubuka tenenamlyame. Ikin ning weik aupkilya babye, batakna kum arye, pia pi dobuka pil donamlyame. Allah yupu min kum kekelamik ninye ara, ‘Sik ton kekeptinge’ tenen, Allah el ninye lyen yupu laka peterelbanauk unamlyame. Allah arye areamkuk pil nirya ara, tonok ning babye, batakna kum arye, sirya dakanamlyame.
Telebe, na ka, Pilemon, na Paulus arye asurat sekuka dopkwetepkine. Narye, Yesus Kristus, el teleb yupu peterelamsa ati, tapu koubuka, wenena aik dongopnikba, aunune. Na ap, nun weit atonunye Timotius ap arye, asurat sekeipkiname. Anda, nun ka kopropa ati, nun pil neika pil donyapnye uluma ati, kanye deibuka kanye deipkunume.
Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.
Ninye Mi Koprop Atonunye birye nyapnuk. “Yohanes, ance Efesus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” Ayupu nyapmakilinye bira, talinye kume. Na sirik taruk arye kurya tekbarye talinune. Tonda, narye atekbarye weisa dirina ning eipmase ning noutamak banune. Narye ayupu nyapkine.
ကြော်ငြာတွေ