Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.
Kolose 4:3 - Eipomek3 Aning atouk, anggunce nati, pia Allah moronamnululume. Ara, ‘Allah min arye duknupdeiamuk bukni, wini talak lakak nyasilye yupu, Allah arye lo areplibuk, Paulus arye Kristus el ninye lyena yupu, mambul yupu peterenamle’ tenen, ‘Allah moronamnulume’ tenen, nyapsine. Kristus el yupu peterelamsa ati, tapu koubuka wenena aik dongopnikba, aunune. အခန်းကိုကြည့်ပါ။ |
Kolose 4:3
27 ပူးပေါင်းရင်းမြစ်များ
Birikce, sik nyaprikura, amutuku diba tenebik nang bulubuka wekikura, sik Allah arye meilyamukbuk sik dolamrik pil nirya ara, laka nyaprik. Tonda, “Allah arye talye Yahudi yala kum ninye ati, ‘Diba tenepnamake,’ tenebuk talakuk, akunum upmale. Ati, Allah melipmalbuk akunum diba tenenmake,” nyabuka, ayupu ton laka nyaprik.
Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.
Ara, na nyanye yupu ap, na wininun ning ap ati, ‘Aning ara, nun like’ tenen, yanipnikirye malye kibuka bisininyak ninye weik amutuku unyak bukni, Allah yupu peterena ati, pil dona talak lo weik teleb ning, amutuku tuba upmanile anya arye, asukumuk tonap weik tonun mapnamne. Ara, ‘Peterepnibuk, ninye weik arye, dib tenepnamak do?’ tenen, unamna ati nyapsine.
Ara, yuk yupu ton nyapnusine. ‘Kristus el pil dona ati, ninye lyena yupu, laka teleb yupu peterenamne’ tenen, Teroas mutuku binamse talak ara, Allah arye el yupu peterena ati, lo teleb ning akunum kintinibdeipnuk ning ara, eibuka kel kipse. Ara, ninye wekna ati, buplan weik arye kukulilamak atonunuk, pia teleb lo arepnukura, ‘Amutuku ninye petereptinye’ tenen, akunum kel kipse.
Na kayapu, arup nyapmasin touk, Allah arye, nun nirya ati, Kristus pil dopsuk deice arye, nong tonok atonun kibuka, kanye talima dukdongopsuka ati ara, narye anggun Yahudi yala kum ninye ati, Allah morosunune. Wini talak ara, narye anggunti, Yesus Kristus el yupu peterelamsise ati, yu nang arye, na tomobuka tapu koubuka wenena aik dongopnikba, unune.
Ati, na akunum sekmasin yupu dobuka yinipnamlum deice arye, moubuka kekepmunce, kel biknamlulume. Ara, Allah arye, ‘Wininamsine,’ tenyamsukce, Kristus pil dopsuka deice arye, akunum kintinipsuk bukni, dungnyamsuk ning, ‘Deiyok ani’ tenen, moubuka kel bikamse touk, asekmasin yupu yinipmunce, ‘Anggun babye, kel biknamlume’ tenen, nyapsine.
Tonda, Allah arye, tenepnuke. ‘Paulus bira, na yupu laka nyabuka peterenamle,’ tenepnuke. Aning ara, ani. ‘Ninye nirya moubuka kekenamak’ tenen, Allah arye, ninye lyena ati, bico tenepsilirye, el kanye aryuk pil donamsil ning ara, ‘Paulus bira, “Allah arye, winibuka, winibuka wininamsile,” nyabuka, peterenamle’ tenen, wipdeipnuke. Allah arye, aning-aning nirya kwepdeiyamuk deiyoknye birye, ninye lyena ati tenyamsuk ning ara, dungnyamukce el demuk kel bikamuk. Aning nirya duknyamuk bukni, Allah arye nati, ‘Aning laka nyapnyopura, Paulus kekeplirye, aninye nirya ati laka nyabuka peterelbinamle’ tenen, wipdeipnuke. Na Paulus arye, nyapsine.
Ara, na kayapu. Nun Deiyoknye Yesus ati pil dolamsiba, yu nang arye, tomopnikce, tapu koubuka wenena aik dongopnikba, asukumuk unune. Narye anggunti nyapsine. Allah ati dib teneplum arye, akunum lyepsuka ati ara, Allah arye anggunti, ‘Na mapu unamaka ati, winibuka, winibuka diksukumuk wininamake,’ tenyamsuk atonun, adiparyuk aninguk tenebuka unamlulume, nyapsine.
Narye anggunti bico tenesununa ati, arup asurat deice nyapmasin yupu ara, telebe uka. Ara, na kele, tapu koubuka wenena aik dongopnikbuk, aunye talak, Allah el laka teleb yupu, ninye lyen yupu ati peterenye talak babye, Allah arye melinulule. Atouk, malye nang lik tenebuka, Allah yupu ati, “Ayupu ara, talye yupu uka,” nyaninyak bukni, narye, “Kume, deiyok ara ani,” nyabuka, lipsisikuka peterenun talak babye, Allah pia bico tenenululce melinulule. Allah arye, nati wininulul touk, anggun babye atouk, anggun ati pia bico tenebuka, melisulula anya arye, na weik arye kanye delisunune. Allah arye, anggunti melisulule, akunum kel kiyamsise. Ati, ‘Allah arye, anggun talima ak pil dosilye ning ara, teleb ubuka sirya daknamsile,’ tenesunun ara, telebe uka.
Allah arye nati, “Na yupu petereplyame,” nyapdeipnuk yupu ara, pia mambul yupu bukni, duknuna atonun yupu ara, ‘Deiyok anye’ tenen, kel kum kipmanto yupu nyapdeipnuke. Ara, Allah arye minop talak ulamik ninye nirya ati, ‘Moubuka kel kum kipnamak’ tenen, ayupu nong noutam ning duknupdeiamukba, ‘Deiyok anye,’ kum tenelamik. Bukni wini talak ara, Allah arye, ‘Aninye ara, na tenen ninye unamak’ tenen, wibuka deiyamsukba, elti, dib tenenyap ninye, el mapu ati, ayupu nong noutamak ara, akunum lakak nyalyopura, ‘Deiyok anye’ tenen, moubuka kekenyabe.
Ara, telebe, Na Paulus arye, anggun nirya ati, “Telebe,” nyapsine. Anggun nirya arye, ‘Dipkoprop Paulus el taruk arye, asurat sekuka dopdeipsuke, tenepnamlum’ tenen, na taruk aryuk asurat sekeipsene. Tapu koubuka wenena aik dongopnikba, tuba aununa ati, anggunda luba kina kumce, Allah pia moronamnululume. ‘Nun Deiyoknye Yesus Kristus arye anggun nirya ati, el kanye aryuk bico tenepsilirye, pia melinamsil’ tenen, narye anggun Kolose mutuku ninye nirya ati Allah morosunune. Telebe, na Paulus arye akunum nyapsine. Asukum anyuk deipne.
Bukni, Onesiporus ap, el aik unyak ninye ap, nirya ati ara, ‘Allah arye aninye nirya ati, wenena kumce, sik patana atonun, mitang arye melibuka arenamle’ tenen, moronune. Deiyok ara, tonok talakuk kum bukni, Onesiporus ara, anirya talak nirya weik arye, na kanye kwa melilamnuke. Tonda elce nati, ‘Se, Paulus ara, tapu koubuka wenena aik dongobik ati, na alye upnilyak’ tenen, ‘El dam kum binune,’ pia kum tenelamnuk.
Yesus Kristus arye ninye lyena ati, el laka teleb yupu peterenibuk, yuk nang arye, ‘Nun lik’ tenen, ikin ning weik na nong deice deilinikibuk, kanye imun kanye bobuka unune. Tonda, sik pia malye unyak ninye tomobikirye, tapu koubuka wenena aik dongolamak touk, ayupu peterepnin balamsibuk, tapu koubuka wenena aik dongopnike. Bukni, Allah el yupu ara, ninye arye tapu kum kouptinge. El yupu peterenyakbuk, ninye kekebikirye, diba tenebuka weik arye biknin banamake.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
ကြော်ငြာတွေ