“Allah el si erenamlume,” nyapmasina ara, urtalya ati kum nyapsine. Deiyok ara, ani. Nun ni Allah arye, tukwak mutuku, im sirya, mutuku sirya, unyap kili sal ati, pia weik arye, bico teneslirye, weik arye melisulule. Tonda, Allah arye ‘Wininamsinirye, melinamsine,’ nyabuka, nyalin yupu arye nyasilye ning nirya ara, tonok ning babye, kum batakalule. Nun ni Allah, el si Yahweh arye nyasilye yupu nirya ara, dipkoprob winisulule. Elce nyasilye touk, winisulule. Wini talak arye dipdongobuka, doryanamle talak nirya babye, Allah arye nyasilye touk, dipkoprob wininamsile. Ati ara, el si pia weik arye kibuka, si erenamlulume. Nun ni Allah, el si Yahweh ati, “Haleluya nyanamlulume. Ayupu deiyok ara, ani. “Se, nun ni Yahweh, anda pia telebuk ulyame,” nyabuka, el si ati, pia weik arye erenamlulume.
Kolose 3:11 - Eipomek11 Winibuka akunum teleb kipdeipsuk ak, ululuma ati, ‘Weik mambule,’ tenebuka wininamlum ning ara, Yesus Kristus el uka. ‘Anggun bidamnye ati’ tenena, do yuk ninye ati tenena do, ‘Se aning ara, mambule’ tenen, kum asilanamlum ning ara, nyapnusine. Ara, “E aninye ara, Yahudi yala ninye do, kum do? Sikda den bam bola mouse ning akunum sekik nang unyak do, kum do? Anye bira nun mutukunye do, yuk pera mutukunye do? Anang ara, kel nang do, yuk mutuku walwal nang do? Anye bira, elce el bidamnye ati, pil dobuka yo bok dololul do? Yuk nang ati talye pil melinanye ulirye, urdemuk ulul do?” nyabuka, kum asilanamlume. ‘Aning-aning nirya ara, mambul ning,’ pia kum tenenamlulume. Bukni, ‘Weik mambule,’ tenenamlum ning ara, Kristus atia. Elda aning-aning nirya deice eitam weik mambule Deiyoknye ulule. Nun dib tenenyap ninye nirya ara, nun kanye talima noutamak usulule anya arye, nun nirya ara, talima dukdongobuka ansinibuka unyabe. Aninguk tenebuka unamlulume. အခန်းကိုကြည့်ပါ။ |
Kolose 3:11
54 ပူးပေါင်းရင်းမြစ်များ
Allah arye, el amu tam pil melibuka dolulunye, nati nyapnuke. “Na mi anda weik mambul pil dopnamnilam bukni, ‘Aning mitik uplyak’ tenen, weik ikin ning ton nyapnukine. Ara, Israel ninye, sik apu koproba Yakub birye deiamukba dadeipdanin yangalamik ninye ara, yuk pera mutuku yu nang arye, obuka sirya dakikce, tapu koubuka sik mutuku tamubuka bobinamike. Winilamik bukni, ance pil donmaminya ani, aninye tuba tonap, dekenamnululume. Yuk nang arye Israel yala ninye weik tonun, bobinamikba, kum danin balamikba, na Allah arye kalikuka melilamsiba, tuba kam unyak ninye ara, an pil dominya deice arye, aninye dobuka weik tonun, na dam ila tamubuka boyanganamnilyame. Na Allah arye, anti, dirina kina deiyoknye kipdeipkiniba, ance Yahudi yala kum ninye ara kunuknak atonun unyak bukni, anggunce, sik talima dirin kilinamlume. Winipnamluma deice arye, na dirina ara Yahudi yala kum ninye sik deice arepneba, moubuka tenebikirye, nati kel kipnamake. Na dirina sik arepneba, adirina eibikirye, sik kanye deipnamaka deice arye, sikce ninye mutuku-mutuku nirya ap, mutuku sirya im sirya daunyak ninye ap, peterebikiba, kekebuka kel kibikirye, sik malye unyak ning batakicopura, narye ninye weik lyepnamne.” Allah arye nyabuk.
Allah Yahweh arye ninye mutuku-mutuku nirya anggun dinak, el mikip laka kibuka kiklipdebuka, mikip weik pil dopliba eibikirye, kel biknamake. Pia malye ton winina kumnye birye, mikip weik donamle pil ara kum duknupnamle, laka kibuka pil dopliba elinamake. Ati, mutuku sirya im sirya, mutuku-mutuku nirya unyak ninye, nun ni Allah arye ninye lyen ning arepsiliba eibikirye, kel biknamake.
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
Tonda, atuku noutam ara, anggun mutuku koproba, pia ati talebuka unamlume. Tonda, yata mutuku nang do, sik yuk mutuku ninye asik nang arye, sik Israel yala nang dam yanuka neika umunce, atalak tuba aunyak nang arye, sik ap, anggunce sik mapu delilamik nang ap, anggun neika atuku dopropnamlume. Ara, anggun Israel yala nang ap, anggun neika ululum ninye asik nang ap babye, amutuku tuku bokuka deipmunyeba, talebuka unamake. Ara, anggunce, ‘Kume, anang nirya ara, Israel yala nang uka,’ tenamlume. Tonda, anggunce pia tuku dolona ati, ‘Yatanye birye, dan tuku dopropnamleʼ tenen, win ning el si undi donamluma deice arye, anggun ap neika bokmunce dopnamlume. Ara, atuku anggun Israel yala nang nirya arye, tuku wilipnumunye talak ara, anggun kayapu nang, yuk mutuku ninye asik nang bukni, anggun ap neika umunye nang babye, bokuka arenamlume. Winipmunyeba anang nirya ara, sik ap neikauk unamlume.
Winipmanto ara, ninye arye yala teleb ning, tuku telebak dokikiba, teleb ubuka palamle touk, na Allah arye, Israel ninye bobuka, teleb mutuku noutam deipnirye, pia teleb ubuka kalikuka melinamne deice arye, pia telebuk unamake. Minop talak ara, Israel ninye ati, bico tenena kumce bataklamsirye, kum melilamsa ati, ninye yuk nang nirya arye, Israel ninye ati, “Se, Allah arye aninye bico kum tenelula anya arye, sikti, ‘Lo-Ruhama,’ nyanamabe,” nyalamik. Bukni, narye Israel ninye, tonap tuba dobuka, teleb kipdeipnirye, anggunti bico tenenamsine. Aning atonun, minop talak Israel ninye bataklamsiba, yuk ninye nirya arye, sikti, “Se, aninye ara, Allah el mapu dipkoprob kum unyaka anya arye, ‘Lo-Ami,’ ” nyalamik. Minop talak nyalamik bukni, aminyan talak ara, na Allah arye Israel ninye ati, “Dipkoprop wini talak ara, anggunda na mapu koprop ululume,” nyanamsine. Nyapsiniba, anggun Israel ninye arye, nati tamubuka, “Dipkoprop, Allah, anda nun ni Allah ulyame. An tonok usilyama ati, an si uk pia erenamabe,” nyanamake. Allah arye nyabuk.
Tuba tamubuka, teleb kipdeipnamsina deiyok ara, ani. Ara, aminyan talak ara, kam unamak Israel yala ninye arye, Edom mutuku ton tuba upnamle mutuku nirya, dobuka talinamake. Tonda, yata mutuku ninye do nirya, nati, si erenamniyak ninye nirya babye, Israel ninye arye anang nirya talinbikirye, sik deiyok ninye unamake. Aning nirya ara, dipkoprob nong upnamle. Deiyok ara, na Allah Yahweh arye nyapsine ati, anyapmasin yupu nirya ara, dipkoprob nong upnamlarya.” Allah arye nyabuk.
Amutuku yanganamak ninye, sikce nyanamak ning ara, “Yalulume, nun nirya Sion mutuku deice welebibirye, Israel ninye, sik ni Allah Yahweh, el si eren aik dam binuyabe. Winibibiba, elce nun wininamap ning nirya ati, bisik nukunamsile. Winibuka nuksiliba, nun nirya arye, abisikuk dobolbanamabe. Aning nyapmasina deiyok ara, Allah Yahweh el yupu ara, Yerusalem mutuku noutamuk ulula ati, amutuku uk, binuka unamabe. Tonda, Allah Yahweh ara, Sion mutuku deiceuk ulirye, el mapu koproba ati, yupu moubuka peterelule. Ati, Yerusalem mutuku uk, binuka unamabe,” nyabuka nyanamake.
Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.
Na Yesus ara, anggur tapu deiyok atonun unune. Anggun na mapu ara, anggur tapu paplirye, taruk leklamla atonun ululume. Yata ninye do nirya, na ap talima dukdongobuka nauk talibuka unyakba, narye sik talima noutamak tuba unyopura, aninye ara duk weik moupnamle. Bukni, na ap talima dukdongobuka una kum bukni, anggun yuk uk upmunyopura, angguncuk pil teleb ning tonok babye kum doptume. Anggun dem aryuk winipdenamlum ning ara, nong kum upnamle.
An ap, na ap, kanye dukdongobuka unyame. Na ap, nati dib tenenyak ninye ap, dib tenepnamniak ninye ap, talima dukdongobuka unamabe. Naio, ance aninye nirya ati, ‘Teleb kipdeiptumba, talima dukdongobuka, tonok kanye bobuka, pia telebuk neika unamak’ tenen, moropkine. Ara, sik talima wililana kum aniryuk, kanye yuk-yuk bobuka kum unamak bukni, nimalye arye teleb ubuka neika unamake. Winibuka winiptingeopura, dib tenena kum, talye tukwak ninye nirya arye kel kipnamake. Kel biknamaka ara, ani. Ara, ‘E, dipkoprop Allah arye Yesus dopdeibuk,’ tenena ap, tonda, ‘Allah arye Yesus ati kanye talima arelul touk, Allah arye adib tenen ninye ababye, sikti, talima arelule,’ tenena ap, ‘Aning nirya kel biknamak’ tenen, moropkine, naio.” Yesus arye nyabuka morobuk.
Wininmokbuk, amekwen sekdongamuk mutuku ulamik nang arye, akwatima si Paulus taruk topdongobuka kwatinmokak eibikce, sik yuk yupu talipdayik. “Kapal bongobukce, mekwen kum dipmoa ati, tuku tam teleb kibuka yanmo bukni, nun isa arye el si ara, Kwangdakuka Ona Deiyoknye, ‘Anye bira kum kam unamle’ tenen, akwatima arye akunum si topmale. Ara, anye bira ninye onanye ulya arye,” nyabik.
Ura, ninye lyen yupu ara, ninye yala-yala nirya kekebikirye, ‘Dib tenebuka kel kipnamak’ tenen, Allah el laka teleb yupu ara, adiparyuk dobuka peterelbanauk unune. Tonda ton yala ninye babye, ‘Dauplye,’ tenebuka kum bataktinye. Ara Yunani yala ninye babye Yunani yala kum ninye babye, weik kel nang babye, tuba walwal unyak ninye babye, adiparyuk peterelbanune.
Ayupu noutamak arye, “Yata ninye do nirya,” nyabuka ara, talye ati kum nyabuk. Kume, nun Yahudi yala ninye babye, sik Yahudi yala kum ninye babye atonun tenesulule. Nun Weik Deiyoknye Allah, elda tonoknye uka. Ninye mutuku-mutuku nirya atonun, ‘Elce melibuka lyelonamsil’ tenen, el siuk nyabuka, elti, moronyak ninye nirya ara, teleb kibuka weika arye melisulule.
Wini talak diksukum kilisulul ning ara, ani. Ara yata mutuku ninye do nirya atonun, Yesus Kristus ati diba tenebibya deice arye, Allah el kanye aryuk nun malye winin ning kilipsilirye, diksukum ninyeuk kilisulule. Ninye yala yuk-yuk kum wilisulule. Yesus ati diba tenenyak ninye nirya ati ara, Allah arye atonun tenesilirye, ‘Sikda diksukum ninye unyake,’ nyabuka tenesilirye, elcuk teleb kilisulule.
Nun nirya ara, Yahudi yala nang babye, Yahudi yala kum nang babye, yo bok deice dekenyak ninye babye, nun kanye aryuk talye pil dobuka unyap nang babye, nun nirya ati ara, Allah El Dib Kanye tonokuk arepsukbuk, nun talima ak weksuke. Tonda, Allah El Dib Kanye tonok, nun talima ak usulula deice arye, nong tonok kipdeipsukce dukdongopsuke.
Ayupu nirya ara, deiyok aupmala anya arye, sikce yuk mutuku yupu deice nyabiceura, kekeptini bukni, deiyok kum biktinyopura, anang arye nati, ‘Anye bira, yuk mutukunye anya arye, elda ninye asiknye atonun ulule. Nun yupu kum kekeptue,’ tenepnamniyake. Aning atonun narye sik yuk mutuku yupu nyanyak nang ati, ‘Sikda yuk mutuku yupu nyanyak ninye unyake. Na tam nang gume,’ tenepnamne.
Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.
Yesus Kristus ap talima dukdongobuka neika unyaba noutam ara, Allah eipsilirye, el kanye ara, ‘Den bola mouse ning sekna babye, sekna kum babye, mambule pia kume. Aning babye, aning babye nong kum danamle ning atia,’ tenelule. Allah eipsilirye, kanye delinamsil ning ara, tonok ninguk ulule. Ara ani. Yesus ati diba tenenyaba deice arye, yuk ninye ati, ‘Bico’ tenen, melinauk winibibibuk, Allah eipsilirye, a deiceuk kanye delisulule. Mambul ning ara, anyuka. Yuk ning ton kume.
Winipmanto ning ati nyapnusine. Nun taruk ap, yan ap, nong ap, nirya dukdongobuka tonok nonguk unyabbuk, nun nong deice ara, kisok aupsuk touk, nun dib tenenyap ninye nirya ara, Kristus el nong atonun unyabe. Elda, nun kisok atonun, nun deiyoknye usulule. Yata ning do nirya, Yesus aning nirya taliplirye, moubuka sirya daklirye, teleb kililamle atonun, elti, dib tenebibirye, el nong atonun unyap ninye ara, nun teleb kilina ati, nun kanye talima patasilye ning nirya arisilibuk, langdisulule.
Minop talak ara, nun Yahudi yala nang ap, anggun Yahudi yala kum nang ap, neika dukdongobuka una kumce, pia yuk-yuk ulamubu. Bukni, wini talak ara, Kristus el nong tonok dibuk deice arye, nunda insinipdeipsuke. Min arye, nun danatam, anggun dana tam anoutamak ara, weik cang poka atonun uamukba, kanye talima wilipdanamuburye, eipdanmanto kum ulamubu. Winibuka ulamubu bukni, Kristus arye, apoka atonun domsuk ning ara, daklobukce tonok yala nang atonun, akunum dukdongopsuke. Winipsuka ara, Yesus Kristus arye, nun pununa ati, el dipsuk deice arye, lyepsuke.
Nun ap, anggun ap, ‘Nun lik,’ tenelalamuburye, kanye talima wilipdanuka pia yuk-yuk ulamubu. Bukni, Allah arye, “Aning wininamlulume, aning ara, kum wininamlulume,” nyapdeibukba, Musa arye, sekeipsuk yupu ara, mem yupu uamuk ning ara, Yesus dibuka deice arye, akunum sirya dakukce, kum kipdeibuk. Amem yupu weik aubukba, nun Yahudi ninye arye, ayupu talibuka ulamubu bukni, Kristus el nong arepsukce, lyepsuka deice arye, amem yupu nirya kum kipdeipsuke. Winipsuka deiyok ara ani. Ara, ‘Yahudi yala nang ap, Yahudi yala kum nang ap, yuk-yuk unyak bukni, na nong deice arye, aninye nirya kanye talima dukdongopniba, nong tonok atonun kibuka ukirye, winiryuk nang atonun unamake’ tenen, winipsuke. Yesus el nong arepsuk deice arye, akunuma, nun Yahudi yala nang ap, anggun Yunani yala nang ap, el Yesus ap, kanye talima dukdongobuka namin arye, teleb kipdeipsukba, wini talak ansinibuka nun neika unyabe. Wini talak ara, ‘Like,’ kum tenelanyabe. Mangkau kanye bobuka neika dukdongopdanuka unyabe.
Winipsilyopura, anggun dib tenelulum deice arye, Kristus anggun kanye talima noutamak usiliba, el ap, kanye dukdongobuka unamlume. Tonda, weik yo yating tuku pum bisik bilirye, weik neplyopura, ayo lulukna kumce pia teleb tiklamle touk, Allah bico tenepsilirye, melisilye ning noutam ululuma deice arye, ‘Sik yuk nang nirya ati, bico tenebuka melilamunce, pia teleb unamlum’ tenen, Allah morosunune.
Allah arye, duknyamuk bukni, el Dib Kanye arye, laka nyasulul yupu ara, ani. Ara, Allah el laka teleb yupu, ninye lyen yupu kekebuka dib tenebikca deice arye, sik Yahudi yala kum ninye babye, Allah doproplirye, melibuka talinamle. Sik babye, el mapu unamake. Allah arye, Yahudi yala ninye, Israel ninye ati, “Wininamsine,” nyalilamuk ning nirya ara, anggun Yahudi yala kum ninye babye, dolonamlume. Anggun ap, Israel ninye ap, kanye talima dukdongobuka, nong tonok atonun akunum teleb kipdeipsuke. Tonda, Allah arye, “Kristus deice arye, winibuka wininamsine,” nyabuka nyalisilye ning nirya ara, anggun ap, nun ap, neiktotouk dolonamabe. Aning nirya dolonamaba deiyok ara, el laka teleb yupu, ninye lyen yupu dib tenenyap deice arye, arisiliba dolonyabe.
Winibuka tenepmunce, pil teleb ubuka donamluma deiyok ara, nyapnusine. Ara, anggun kele, yatanye do nirya, pil teleb ubuka doplyopura, nun Deiyoknye Yesus arye, anye bira el pil dobuk ning ati, dekna ning arepnamle. Ara, yo bok deice arye, dekikceura, urdem ati, pil don nang babye, sik kanye aryuk pil donyak nang babye atonun, pil donyaka dekna ati, pil dolamaka atonun, Yesus arye, dekna ning arepnamsile.
Yata mikip ning do nirya, ninye deiyok nang ap, yuk yala weik mikip ning nirya ap, isa mikip ap, ninye talima talibuka usilye ning nirya ap ara, Kristus el amutamuk ulule. Elda weik mikipnye ulula anya arye, elce aning-aning nirya malye kibuka, deice tam ulule. Tonda, diba tenena ning ap, talima ap, kanye ap, patapsilye ning nirya ara, Yesus Kristus dukdongobuka neika ululuma deice arye, aning nirya akunum moubuka aupsile. Aning nirya ati ara, tilila yupu peteren nang arye, ‘Yuk bisik dobuka bobisicak’ tenen, pia kanye moubuka unamlulume.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Yata nang do, nirya, sikce, Yesus Kristus elce peterelamuk yupu batakuka, elce kum peterelamuk ning bukni, yuk talye yupu dukdongobuka peterenyak ninye nirya ara, Allah sik talima ak kum ulule. Aning kumopura, yata nang do, nirya, Kristus peterelamuk yupu uk talibuka, dobolbanyak ninye nirya ara, nun ni Allah ap, el Mi Koprop Yesus ap, anggun talima ak ururake, nyapne.