Aning winibuk ning ati, ninye arye nyanmekba, Israel ninye kekebikce utenebik. ‘Se, nun Raja Salomo wininmal ning ara, elcuk kum tenebuk. Nun ni Allah arye, weik kel kina deiyok ning arebukba, adeice arye Salomo birye, ‘Dipkoprop teleb winina ara ani, diksukum ning ara ani,’ akunum tenebukce, akilapu bitinye ati, yupu teleb ubuka bokipmale,’ tenen, kel kibik. Winibuka tenelamikce, ‘Se nun Raja Salomo bira pia weik mambulnye,’ tenelamikce ilil ulamuk.
Kolose 2:2 - Eipomek2 Apil donuna ara deiyok, bitinye aupmale. Ton ning ara, anggun Kolose mutuku ninye ap, anyapmasin mutuku ninye ap, ‘Sik talima kwa dilakirye, Yesus diba tenebuka pia kanye lamabuka unamak’ tenen, pil donune. ‘Anggun kanye kwa dilamunce, kanye lamabuka unamlulum’ tenen, pil donune. Ara, anggun kanye talima arepdamunce, talima dukdongobuka una ap, bico tenebuka melilana ap, unamluma deice arye, talima kwa dilanamlume. Deiyok bitinye ning ara, ani. Ara, nun ni Allah arye, el mambul yupu duknupdeiamuk ning ara, ‘Dipkoprop moubuka kekeptingce, weik arye kel kipnamak’ tenen, pil dosunune. Weik mambul yupu, duknupdeiamuk yupu ara, Kristus el yupu ati nyapsine. အခန်းကိုကြည့်ပါ။ |
Kolose 2:2
58 ပူးပေါင်းရင်းမြစ်များ
Raja Daud birye, Mazmur yupu deice, mot sekuk. Israel yala nang ara, ‘Allah el si erenamap’ tenen, Yerusalem weik asik domik mutuku welebalamik talak ara, Mazmur yupu mot deice arye nyalamik. Daud birye sekeibuk yupu ara, ani. Yata nang do nirya, olana ap, walana ap kumce, neika unyak talak nirya ara, kanye deibuka, telebuk winilamting toura, pia telebe.
Diksukumuk unamake ati, ton tam ninye arye, yuk tam ninye ati, yu upliba kum olanamake. Teleb kanye bobuka neika uk unamake. Ninye nirya talima dukdongobuka diksukumuk unamake ati, amutuku nirya telebuk unamle. Tonda, amutuku noutamak unamak ninye nirya ara, kanye bokoltona kumce, talye kanye lamapdongobuka unamake.
Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.
Aning kum bukni, yata nang do nirya, sikce ‘E, mambul weik ning ani, mambul weiknye bira ani,’ tenenamak talak ara, sikce anyapnusin ninguk tenenamake. Tonda, tukwak mutuku, talye daulye ning nirya ati, ‘Aning ara, mambule,’ pia kum tenenamlume. Aning nirya kum bukni, anggunce na Allah Yahweh ati, diba tenepnulumce, na ap, na wininye ning ap, moubuka biknamnulum nang ara, angguncuk, ‘E, mambul weik ning ara, Allah Yahweh el uka,’ tenepmunce, aning deice aryuk, kanye pia delinamlume. Ara, anggunce na Allah ati, “E, Allah arye bico tenesilirye, elce, ‘Aning ara wininamlume, winipmunyopura, narye melisinirye, pia teleb kipdeipnamsine,’ nyabuka, nyalin yupu deice arye nyapdeipsuka deice arye, teleb kibuka melisulule. Elce winilye ning nirya ara, diksukum una ap, teleb ning winin deice aryuk, ninye yupu lipsisikuka bokosilirye, tuba-tuba melisulule,” nyaptingce, na si erepnitinge. Nara Allah Yahweh arye, anggunti pia bico tenesinirye, pia kum batakasunune. Narye, anggun tukwak mutuku sirya, im sirya nirya ululum nang ati, melisinye ning nirya ara, bico tenena ap, dip yupu nyana ap, malye winin ning pia kumce, diksukum winin deice arye melisunune. Tonda, na Allah arye, ateleb winin ning nirya ap, ‘Diksukum winin ning nirya ap ara, telebe uka’ tenen, na kanye delinune. Aning ara, na si Allah Yahweh arye ayupu nyapsine, nyabuk.
Yesus arye, ayupu nirya nyabukopura, el li Allah ati moronmaka deice arye ayupu nyabuk. “Naie, anda im deice ap, tukwak mutuku nirya ap, talyamlumce, aning nirya deice tam weik deiyoknye ulyama ati, narye anti, ‘Telebe,’ nyabuka an si erepkine. Tonda, an nyasiminye yupu noutamak ning ara, kel bikna kanam nang ap, weik kel nang ap ati, deiyok dunulul bukni, mitik mapu atonun unyakce, talima mitang arye unyak nang ati, deiyok noutamak ning ara laka kibuka laka nyasilyame.
Allah morobukopura, el yupu kekenmek nang ati ayupu ton nyabuk. Na ni Allah arye, ‘Na mi Yesus, aning-aning nirya talibuka deiyoknye unamle’ tenen, akunum arepnuke. Ninye nirya tonoknye ton, Allah el Mi Koprop arye, el kanye talima noutamak tenelul ning ara, kum kel biktinge. Allah el Mi Koprop kanye talima ulye ning ara, Allah elcuk kel bikilulue. Ninye nirya tonoknye ton, na ni Allah el kanye talima noutamak tenelul ning ara, kum kel biktinge. Na ni Allah, el talima noutamak ulye ning ara, tukwak ninye ton kum bukni, nauk ara, el Mi Koprop arye kel bikinune. Tonda, ‘Narye peterenunba, na ni ulye ning kel kipnamak’ tenen, wibuka deipse nanguk, na ni Allah arye pataplyeba, tenelul ning kel biktinge.
Asipdeyikbuk, Yesus arye tamubuka nyabuk. Allah arye ninye weike lyeplirye, sik kanye talima talinamle nyasunun yupu ara, Allah arye nyapdeiamnuk touk, na mapu anggunti yupu nong laka nyasunune. Bukni, yuk talya ninye ati ara, na yupu dib tenebuka, moubuka kum kekenyaka ati, aninye ati domon yupu arye, nong bola deiceuk nyanune.
Nyabukce ayupu ton nyabuk. “Bukni, na Ni Koprop Allah arye, pil dolye ninguk pil dopnyopura, adeice arye adiparyuk dib tenepnulume. Anggunce nati ara, ‘Talinye binya,’ tenepnutum bukni, ninye kum winipmanto ning, weik mambul pil donuna ara, eipmunce, adeice arye dib tenepnululume. Apil donuna deice arye dib tenepnutumopura, aminyan kel biknamlume. Ara, na Ni Koprop Allah ap, na ap talima dukdongobuka ansinibuka unyame. El ap, na ap ara nun neika. Aning kel kipmunce, moubuka tenenamlume.” Yesus arye nyabuk.
Ura, bol koplobuka pia kam una ara, talye winina kum bukni, ara na areamnulum ninye ap, an ap, ance dopdeipnulumnye Yesus Kristus ap, nun nirya talima dukdongobuka neika una ati nyapne. Aninye nirya arye, nunti diba tenepsikirye, nun bitinye ap, aninye ap, talima dukdongobuka neika ubibya deice arye, pia kam unamake.
Allah arye amambul pil dobuka, el Mi Koprop ati aribuka deiyok ara, ‘Ninye mutuku-mutuku nirya, nati si erebuka, na si kilamniayak atonun, na Mi Koprop ati atonun, si erebuka el si kipnamake’ tenen, yupu bokolina deiyok pil ara, el mi koprop ati aribuk. Ati, yata ninye do nirya, Allah el Mi Koprop ati si erebuka, el si kum kinyak ninye ara, wininyaka deice arye, Allah el babye ati si erebuka, el si kum kinyake. Yesus arye sik Yahudi yala deiyok nang ati nyabuk.
Amutuku dib tenebik nang ara, sik kanye talima imun ulamuk ning ap, sik kanye tenelamik ning ap, neika ansinibuka, sik talima dukdongobuka ulamik. Tonoknye babye ton, el talyamne ning ati, ‘Ara pia na dokola,’ kum tenelamik. Aning pia kum tenelamik bukni, sik talyamik ning nirya melibuka talye arildalamik.
Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.
Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Winibuka tonok-tonok nyapra banamluma deiyok ara, sik Allah yupu peteren nang nirya nyapnin bakiba, anggun bululum ninye nirya moubuka kekepmunyopura, anggun nirya arye, moubuka kel kinamlulume. Tonda, anggun diksukum una ati, “Wininamlum, wininamlum,” nyabuka melibuka nyabikibuk, kekepmunyopura, anggun kanye talima kwa baribuka mikip kilinamsiyake. Aning ati ayupu nyapsine.
Sik dib tenena kumce, talye-talye wininyak ninye tenenyak ning ara, nun dib tenenyap ninye arye, kum talinyake. Sik babye, kanye talima deice tenebikirye, talibuka wininyak ning ara, pia yuke. Ara, Allah arye nunti, bico tenepsukce, el Dib Kanye arepsukbuk, doprobupe. Aning babye, tilila ati kume. Ara, Allah arye talye arisulul ning, pia teleb ning nirya, ‘Moubuka kel bikinamak’ tenen, el Dib Kanye arepsuke.
Winipsuka ati ara, wini talak ara, anggun nirya yala yuk-yuk ninye ululum bukni, Yesus Kristus ap kanye talima dukdongobuka umunya deice arye, anggun nirya ara, nong tonok atonun kibuka, el ap neika ululume. Ati wini talak ara, Allah arye nun diba tenenyap ninye ati tenesulula ara, ani. ‘Sik Yahudi nang ani, Yunani nang ani, kilapu ani, sik bidamang kanye aryuk unyak ninye ani, talye pil dobuka unyak ninye ani, yuk nang arye yo bok deice dekikce, talinyakba, urdemuk pil donyak ninye ani,’ kum tenesulule. Aning kum bukni, nun diba tenenyap ninye ara, Allah arye Yesus Kristus ap, kanye talima dukdongopsuk anya arye, el ap ansinibuka neika atonun unyabe. Nun nirya ara nong tonok atonun unyabe.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Na kayapu, Kristus ap, talima dukdongobuka neika umunye deice arye, anggun kanye talima noutamak melibuka kwa dibuka, mikip weik arisulule. Tonda, Kristus arye anggunti, bico tenebuka melisilya deice arye, anggun talima kwa disulule. Tonda, Allah El Dib Kanye anggun talima ak ulula deice arye, anggun kanye talima tonok kilisiliba, nimalye neika ansinibuka ululume. Tonda, anggun talima noutamak, bico tenelamunce, talima dukdongobuka ululume. Ululumce, nimalye teleb kibuka melilalulume.
Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.
Allah arye nati, “Na yupu petereplyame,” nyapdeipnuk yupu ara, pia mambul yupu bukni, duknuna atonun yupu ara, ‘Deiyok anye’ tenen, kel kum kipmanto yupu nyapdeipnuke. Ara, Allah arye minop talak ulamik ninye nirya ati, ‘Moubuka kel kum kipnamak’ tenen, ayupu nong noutam ning duknupdeiamukba, ‘Deiyok anye,’ kum tenelamik. Bukni wini talak ara, Allah arye, ‘Aninye ara, na tenen ninye unamak’ tenen, wibuka deiyamsukba, elti, dib tenenyap ninye, el mapu ati, ayupu nong noutamak ara, akunum lakak nyalyopura, ‘Deiyok anye’ tenen, moubuka kekenyabe.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Aning nirya laka nyapsuk ning ati ara, Epafras arye, anggunti ayupu nyapsuk talak arye dipdongobuka, atalak ap, aminyan unamsil talak ap, atalak-atalak nirya babye, batakna kum arye, anggun Kolose nang ati, Allah pia morosinyame. ‘Allah arye anggun Kolose ninye ati wininamle’ tenen, morosinyam ning ara, nyapnusiname. Ara, Allah arye anggunti, ‘Wininamake, aning ton kum wininamake,’ tenyamsuk ning nirya ara, ‘Dipkoprop moubuka kel kibikirye, aninguk wininamak’ tenen, morosinyame. Ara, ‘Weik kel kina deiyok ning doprobikirye, kel ninye unamak’ tenen, morosinyame. Tonda, Allah El Dib Kanye arye, el mikip arisilya deice arye, nong bol deice ninguk kum bukni, ‘Pia noutamak deiyok kel ning ton moubuka tenenamak’ tenen, Allah morosinyame.
Aninye ara, Yesus Kristus ati, el dipkoprop yupu kum peterenyake. Nun Deiyoknye Kristus ara, kum tenebikirye, pia yuk kanye bobuka unyake. Yesus Kristus ati diba tenebiceura, Allah el mapu kipdeipsuk ninye nirya ati, Allah arye nyalyeba, Kristus kalekuka melisilya deice arye, Allah tenelamsuk atonun, kanye wisipsilirye, teleb kibuka weik upra banamabe. Winisilya ara, nun nong deiyok ara, kisok usilye touk, tonda nun nong mil-mil arye dukulolongosilye atouk, Kristus arye nun diba tenenyap nang nirya ati, dukdongopsukce, neika kipsukce, nun Weik Deiyoknye usulule.
Ateleb winin ning nirya ara, mitik mambul ulul bukni, weik mambul wininamlum ning ara, nyapnusine. Ara, aning nirya teleb-teleb winimunye talak nirya ara, anggunce yuk ninye ati, pia bico tenebuka, talima arepdamunce, melilanauk wininamlulume. Ateleb winin ning nirya aupsilyopura, bico tenebuka melilanauk winimunyopura, anggun talima teleb ubuka dukdongopsilirye, nong tonok atonun kilisiliba, teleb ubuka neika unamlulume.
Aning atouk, anggunce nati, pia Allah moronamnululume. Ara, ‘Allah min arye duknupdeiamuk bukni, wini talak lakak nyasilye yupu, Allah arye lo areplibuk, Paulus arye Kristus el ninye lyena yupu, mambul yupu peterenamle’ tenen, ‘Allah moronamnulume’ tenen, nyapsine. Kristus el yupu peterelamsa ati, tapu koubuka wenena aik dongopnikba, aunune.
Elce anggunti wiamsuk nang laka ubukura, kel kibupu deiyok ara, nunce anggunti peterelamsupu ura, Allah el laka teleb yupu, ninye lyena yupu anggun dam yayuk talak ara, talye yupu deice aryuk kum yayuke. Aning kumde. Nunce anggunti, Allah el laka teleb yupu peterelamsupu talak nirya ara, Allah El Dib Kanye arye, el mikip weika arye areamsuk ning ap, nunti melilamsukbuk, kanye bokoltona kum aryuk, ‘Ayupu ara, pia dipkoprop upnamle,’ tenelamubu ning ap deice arye peterelamsupu. Ati, nun kele, Allah arye anggunti, ‘Na mapu unamake’ tenen, wiamsuke. Tonda, anggun ap neika ulamubu talak noutamak arye, anggun melina ap, kel kina ap ati, winilamubu ning nirya ara, anggun akunum elilamsulumce kel bikamsulume.
Winibuka tenebuburye, Timotius anggun dam dilyangana ati, dopdeipsupu. Timotius ara, talinye kume. Elda, nun weit atonunye ulule. Tonda, el ap, Allah ap, Kristus el laka teleb yupu dobuka, mutuku-mutuku nirya peterelbana ati, pil neiktoto dodurake. ‘Timotius arye, anggun diba tenemunya ati, kwa dakna ap, mikip kilina ap, upnamsil’ tenen, dobuka dopkwetebupu.
Tonda nun du weit atonun nango, mambul yupu nyalinamsiabe. Ara, sik dipkoprop pil talibuka dona kum arye, talye-talye yupu nyabuka unyak nang ati, “Kanye moupnamlulume,” nyabuka wenenalulume. Ilil-ilil asauk, ulamice nang ati, talima melibuka unamlulume. Tonda, sik mitika aryuk Allah diba tenenyak ning ara, wisina kum ninye ati, melibuka mikip kilinamlulume. Yuk nang nirya ati ning ara, pola wenena kum arye, namin kibuka nimalye arye melinamlulume.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Aning ati ara, tenepce nyana kum bukni, pia diksukumuk ubuka, nun kanye talima noutam, teniltona kum diparyuk, weik arye diba tenebibirye, ‘Allah ap talima dukdongobuka unamap’ tenen, elti, tenenauk unamabe. Tonda, sik minop talak Allah arena deiyok nang arye, malye winin ning kilina ati, ining dobuka likuka delilamik touk, nunce Allah talibuka, el amu tam unyaba, elce, nun kanye talima noutamak ‘Se, nunda malyeuka,’ tenenyap ning kilibuka, diksukumuk kipdeipnamsile. Winisulula ati, el ap neika talima dukdongobuka unamabe. Tonda, sik minop talak Allah arena deiyok nang arye, pil dopnuyik talak, sik nong nirya teleb kibuka mek liklamik touk, nun babye atonun, Allah arye nun kanye talima noutamak, malye ning usilye ning nirya kilipsilirye, teleb kipdeipsilyopura, el dam wekelbinamabe. Wini talak ara, el ap talima dukdongobuka unamabe.
Apil dolulum touk, wini talak arye dipdongobuka doryanamle talak nirya ara, pia pi dobuka, pil teleb ubuka dolamunya ani, sirya dakanamlume. Wininamluma deiyok ara, ‘Allah arye lyepnamsil’ tenen, diba tenebuka dilamunyani, ‘Aminyan ara, dipkoprop nong upnamsile. Allah arye dipkoprop lyepropnamsile’ tenen, pia batakna kumce talibuka unamlulume.
Allah el weik mikip deice arye, nun nirya ati, ‘Aninye ara, bola koplobuka kam pia unamake. Tonda, na Allah unye touk, diksukumuk unamak’ tenen, patapsilye ning nirya ara, akunum areamsuke. Ara, ‘Diksukumuk unamak’ tenen, deiyok ning areamsuka nirya ara, el ap kanye dukdongobuka neika ubirye, el ulul ning nirya kel bikanyaba deice arye, akunum areamsuke. Tonda, tuba arisulule. Allah arye nun nirya ati, nyapsuka ara, ‘Aninye ara na mapu unamake,’ tenenyamsukce, el weik mambule ulula ap, el pia teleb-teleb ubuka dirina weik ulula ap deice arye, akupsukce yukamsukce, wibuka deiamsuke.
Yuk yupu diba tenebuka kum wininamlulum bukni, nun Deiyoknye bira, nun Lyenanye Yesus Kristus kel kibuka el ap, dukdongobuka ululum ning ap, Yesus bico tenepsilirye, talye melisilye ning ap, ‘Weik upnin banamsil’ tenen, pia palibuka pil donamlume. Ara, nun Lyena Deiyoknye Yesus Kristus ati, nun nirya el si weik arye erebibirye, ‘Elda weik mambulnye tenepnamap’ tenen, Allah moronune. Ara, ‘Wini talak babye, aminyan doryanamle talak nirya babye, el siuk weik unamle’ tenen, Allah moronune. Telebe, akunuma. Na Peterus arye nyapsine. Asukum anyuk sekuka deipsine.
Allah ara, aning-aning nirya kel kiyamukce, el weik kele arye tenelul ning ara, pia weik ulule. Nun kanye tenen ning noutamak arye, malye ning usilye bukni, Allah arye, “Kume, nati akunum diba tenebuka na nong deice sik kanye akunum deipnike. Ati, sik talima malye ulul ning ara, tuba-tuba kum tenenamne,” teneplirye, talye kanye dosulule.
‘Yesus Kristus, elda Allah el Mi Koprop ulule’ tenen, lakak kel kina ning ara, winilye ulule. Tonok ning ara, Allah El Dib Kanye arye ayupu nyasulule. Tonda, Yohanes arye Yesus mek dongobuk talak anyapce, Yesus ara, pil dobuka balamuka ani, obikbuk, im deice welebuk ning nirya deice arye ton kel kinyabe.
ကြော်ငြာတွေ