Kolose 2:18 - Eipomek18 Anyapmasin yupu atouk, yata nang do nirya sikti, “Kume, narye Allah el si erebuka ulamne ning atouk kum unyake. Ara sikce sik badamnye ati, amu tam kibuka kum yanilanyake. Tonda, Allah el im deice pil don nang, malaikat ati, si kum erenyake. Narye aning-aning ulamne touk kum unyaka ati, sikda malye ninye unyake,” nyabuka malye yupu nyapsikcopura, ‘Anggunce dib nyapsiak’ tenen, kum kekenamlulume. Ayupu atonun ning nyasikce ninye ara, sik dipkoprop kum elilamik bukni, ‘Yuk nang arye, sikda weik nang, tenepsikirye, nun diba tenepnamsiak’ tenen, “Nun eibupu ning, weik mambul ning ani, ani,” nyabuka, yupu pia weika arye lilibuka talye nyaltakanyake. Tonda, Yesus dib tenena kum arye, sik malye tenenyak ning ap, malye wininyak ning ap deice arye, sik kanye talima tapu koubuka, deililalanyakce, pia malye wininyaka ati, deiyok kum upmalyebuk, ‘Nunda, weik mambul ning,’ tenelanyakce, pia talye-talye ninguk tenebuka kanye talima erelanyake. အခန်းကိုကြည့်ပါ။ |
Kolose 2:18
42 ပူးပေါင်းရင်းမြစ်များ
Ayub, nara Allah moubuka tenepnirye, kel bikna ning nirya weik deiyoknye ununa anya arye, anda yata tonye birye, yata ati asipdenutum do? Narye anti, laka nyalikiniba, ‘Elda walwal arye nyalula,’ nyabuka, mandipna kanye bobuka, nyapnutum do? Anda dipkoprob walwalnye anya arye, kel kum bikamincuk, talye nong una kum, yupu uk nyanilyame.
Tonda, anggunce, amutuku isa el si ara, Molok, teleb minyak mek ap, tonda, ‘Nun nong deice likibyeba, tong teleb nyapnamsil’ tenen, tong teleb nyan mek ap, weika arye bobimunce, binuka sik nong deice likdeiplumce Molok si eremunce, talye yolalulume. Tonda, anggunce, ‘Yata isa ton si ereptipyeba, melipsutu do?’ tenen, ninye dopdeiplumba, pia pera mutuku unyak nang dam ati, yupu nyalbalamikce, morolamik. Aninguk kum bukni, sik, ‘Min diamik nang bobanyakak, Sheol mutuku, yuk isa ton aunyak do? Sikce ton melipsiting do?’ tenen, morolamlumba, asing keten nang arye ton dililamik.
Allah Yahweh, weik deice tam erebuka, aning-aning nirya talibuka, Pia Mikip Weik Deiyoknye ulule. Elce nyapsile. Ara, anggun talye-talye yupu nyalulum nabi-nabi nang ara, anggunda pia bicoe. Ara, aminyan talak, Allah arye obuka, kum kipdeipnamsile! Deiyok ara, ani. Ara, Allah arye lengdar mana deice arye, mambul yupu anggun dam kum nyasiliba, anggunce kum elilulume. El yupu kum kekelulum bukni, anggun kanye tenina deice aryuk, tenibuka tilila yupu nyalulume.
El Raja bira, tamubuka el punun nang arye, si kum erelamik ninguk, aninguk si erenamle. Asi erenamle isa ara, ani. Ara, ninye arye cang weik keil arye, antanap dongobuka dolamak cang keil poka noutam, weik asik nirya ati, ‘Aisa elcuk, nunti kalekuka melipsiliba, yuk mutuku nang arye, yanuka kum opnamsiak’ tenen, si erenyak isa siuk, el Raja babye, aisa siuk erenamle. Elce aisa si erena ap, si erebuka kina ap ati, dengna weik ning, pia arenamle. Ara, emas ap, perak ap, yuk urasin teleb dengna weik keil ap, aning nirya boyalirye, aisa si erebuka kina ati arenamle. Ati, el punun nang, si kum erelamik isa ati, si erelirye, teleb ning arenamle.
Aning winipnamluma deiyok ara, sik Moab yala nang arye, ‘Israel yala nang ara, nun mal olan nang atouk unyaka ati, sik deice, ikin ning deipnuyabe,’ tenebik. Tonda, ‘Sik Israel nang ati, malye ulina ati wininamabe,’ tenebik. Ara ‘Akil arebipyeba, sik Israel nang arye, Peor Bahal isa, el si ton erepnamake,’ tenebikce, Midian mutuku kil tonok, el si ara Kosbi, arebikopura, Simri birye akil dobuka, Allah el si eren aik dam boyanmoka deice arye, pia malye kipdeipsike. Akil Kosbi bira, Midian mutuku nang ati, sik ninye deiyok kiamuknye, el kilmu ulamuka atia. Tonda, anggun Israel nang arye, isa si Bahal-Peor el si erelamluma deice arye, uk dina weik ning arepsiseba, ninye weik arye diplume. Ati, akil ap, el dobuknye Simri ap opmalumba, dipmarake. Deiyok ara, ‘Adipmal kil isa si erelamuk touk, anggun Israel nang arye, isa si erepmunyakʼ tenen, Pineas birye akil oplobuke.
Allah el dipkoprop ulul ning ap, el dipkoprop yupu ap ati yaniltalamikce, tilila ninguk talibuka dobolbalamik. Tonda, Allah arye kwepdeiamukba, talye aubuk ning ati, ‘Aning ara nun deiyoknye ati, el amutamuk ubirye, el siuk erebibirye unamap’ tenen, talye awamuk ning ati si erelamik. Winilamikce, dipkoprop aning-aning nirya kwepdeiyamuk deiyoknye, Allah ati bataklamik. Aning-aning nirya kwepdeiamuknye Allah ati, “Se, anda weik mambul ulyamce, anti pia telebe nyakinyabe,” nyabuka, el si erelamting bukni, tukwak ninye arye talye awamuk ning ati si erelamik. Winilamik bukni, wini talak ara, nunce, nun Ni Kopropa Allah ati, wini talak babye doryanamle talak babye, el siuk pia erenamabe. Na Paulus birye nyapsine. ‘Aninguk pia unamap’ tenen, Amin nyapne.
“Amalye nang ati memelonamlulume,” nyapmasina deiyok ara nyapnune. Ara, sik bidamang winin ninguk tenebuka wininyak nang ara, nun Deiyoknye Yesus Kristus ati, diba tenebuka el amu tam unyakce, dipkoprop el pil kum donyake. Aning kum bukni, sik bidamang kanye aryuk tenekirye, sik bidamang patan ninguk tenebuka, malye ulisica ati nyapmasine. Anang arye yuk nang ati, “Se, anda pia telebe,” nyabuka tenepce arye talima lilona ati, namin yupu nyanyake ap, tilila yupu talye nyaltakanyak ning ap deice arye, sik kanye moubuka tenena kum, mitik walwal unyak nang arye, ‘E, aning ara dib nyapmasiak do’ tenen, atilila yupu uk diba tenenyake. Winibuka tilila yupu uk nyasinyaka ati, anang sik dam arye kwarabuka, yukak memelonamlulume.
Yuk ninye ati, pia bicoe tenebuka melilamice ninye ara, sik wininyak ning ton laka nyapnusine. Ara, yuk nang ati, ‘E, sik yata ati sikcuk winimak do?’ tenen, minopce arye yu upliba kum derenyake. Yuk nang ati bico tenenyak nang arye, yuk nang ati, ‘Yata wiribuka meliptinye do?’ tenen, pia nimalye aryuk melinyake. Yuk nang ati, bico tenenyak ninye arye, yuk ninye talinyak ning ap, sik wininyak ning ap, ati, ‘Se, naryuk taliptinirye winiptinye,’ kum tenenyake. Tonda, sikce sik bidamnye ati, “Nunda weik mambul nang unyabe,” nyabuka, kanye erebuka weik yupu nyana ap, dilana ap, kum wininyake. Yuk ninye ati bico tenebikirye, talima areplibuk, unyak ninye ara, kanye talima namin ninyeuk unyake.
Aning ara, tilila ati kum nyapsine. Deiyok ara, anggunda, dib tenena kum, talye tukwak ninguk tenenyak ninye atonun tuba ululume. Anggun kan-kan arye, yu upliba, yupu deice waldana ap, ‘Nun tam ninye ara, telebe, sik otam ninye ara, malye’ tenen, talima wililana ap, tuba winilalulume. Winilulum anya arye, talye dib tenena kum ninye atonun ululum do, kum do, nyapsine. Wini talak umunce, winimunye ning ara, dib tenena kumce, talye-talye unyak ninye winilamak touk ululum do, kum do?
Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Winiryuk nyapmasin yupu nirya ara, ‘Anggun Korintus mutuku ninye kel biknalum’ tenen, asurat noutamak arye, ‘Na Paulus ap, Apolos ap ati, nun bitinye nang arye ara, winipmanto nang unume,’ nyabuka sekeipmasine. Ara, nun peterepnuma deice arye, ‘Allah yupu deice nyasirikce yupu ara, deiyok anye,’ tenebuka kel biklulume. Nun mutuku nang arye, nyanyak yupu ara, ani. ‘Allah el yupu deice arye, nyasilye touk wininamlulume. Anggun tenena deice aryuk, yuk yupu ap, dukdongobuka tabakalongona kume.’ Ayupu nyasilye touk winilulum ning ara, yuk nang ati, “E, anye bira weik mambul bukni, anye bira talinye,” nyabuka tonye erebuka, tonye lungnupdeibuka kum kinamlulume.
Ara, na kayapu, aning ara, talye ning bukni, anggunce, ‘Nun ni koprop anya arye, si erebuka kipnamap’ tenen, tup ning kalibuka arilamak ning ara, yupu nyapnusine. Anggun Allah ati, dib tenelulum ninye arye, “Diptibye do, kum do?” nyabuka, asipdenulum yupu ara, nyapnusine. Aning nirya ati ara, nun nirya kel bikamupe. Bukni, luba kina kume. ‘Nunda weik kel ninye unyabe,’ tenelamak ninye ara, weik kanye erebuka kwalinyake. Wininyak bukni, yuk ninye ati, ‘Bico tenebuka melilanauk unamabe,’ tenelamak ninye ara, yuk nang ati, talima kwa dibuka melibikiba, nun nirya teleb upnin banyabe.
Na kayapu, tenipdenamlume. Sik bik-bik alamak nang ara, ‘Dekne ning dopropnamap’ tenen, ninye yupa weik arye, bik-bik abuka banyak bukni, minop menekuka bilinye binyuk, dekne ning dololule. Aning kum kel bikmalum do? Aning ati anggun babye, ‘Allah arye, dekne ning dipkoprop ning arepnamsil ning ara, dopropnamap’ tenen, pia piribuka teleb ubuka wininamlulume.
Utenyamsise bukni, winira na ilil upnile. Ara, Isa Mutuku Dongonye arye, tenepce arye yupu teleb-teleb kibuka nyabukba, Hawa arye, tilila yupu dib tenebuk touk, ‘Anggun Korintus ninye babye atonun winipnamlum’ tenen, nyapsine. Ara, deiyok kouna talak ara, anggunce yuk yupu tabakuka dib tenena kum arye, dipkoprop Kristus el tonok dib tenyamlum bukni, yuk nang arye, yuk yupu peterepsikca deice arye, ‘Anggun kanye tenen ning deice arye, yuk malye bisik kirikuka bimunyak’ tenen, ilil upnile.
Na ilil upmanil ning ara nyapnusine. Narye anggun dam yanyopura, min arye ‘Winibuka, winibuka winiptinge,’ tenyamse touk kum upmunyopura, malye kanye donamne do? Aning atonun, anggunce nati, ‘Paulus ara, winibuka, winibuka winiptue,’ tenenululum touk kum winipnyopura, anggunce ton malye kanye bopnamnulum do? Tonda, na yanyopura, yupu deice waldana ap, kanye talima wililana ap, yu weik upliba, weik arye yupu nyana ap, yuk-yuk tenelamunce, yuk-yuk kilongona ap, lululina ap, kanye erelana ap, kwalina ap, yuk nang arye, ‘Anang ara, malye nang tenepnamak’ tenen, ‘Malye yupu nyalina ap, winipnamlum do? Na yanamne talak ara, sik Korintus mutuku ninye tuba malye winibicak’ tenen, ilil unulule.
Ara, na kayapu, anyapnusin yupu ara, talye ati kum nyapsine. Kume, nara nun Deiyoknye Kristus, el pil melina deiyoknye ununa deice arye, ayupu nyapdeipnusine. Anggun Yahudi yala kum nang ara, dib tenena kumce, anggun kanye talima noutamak talye-talye tenenyak nang deice arye, malye-malye winilamak touk, anggun Efesus mutuku nang arye, sik talye nang wininyak atonun tuba kum wininamlume.
Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.
Tonda, yata barye yala ning nirya ara, nun ni koproba Allah Yahweh, ‘Elcuk aning winiptinyeʼ tenen, bikilul. Bukni, aning ara, nun kum bikinyabe. Ara duknuning ulule. Allah Yahweh elcuk bikilule. Bukni, Allah elce nunti, “Anggunda, aning ara, wininamlume. Aning ara, pia talibuka kum wininamlume,” nyapdeiamuk ning ara, nun ap, nunce deibibiba, deipdanin banamak nang deice, akunum nyapdeiamsuke. Ati ara, nun nirya arye, aninguk talibuka wininamabe.” Musa birye, sik Israel nang ati nyabuk.
Sik bik-bik abuka ban nang arye, pitin kilin ak bita dinmakirye, ‘Dekna ning dopropnuyap’ tenen, mikip arye, pia pi deibuka, bik-bik abuka balamak atonun unune. Ara, Allah arye, nati, ‘Im deice yalirye, dekna atonun ning dopropnamle,’ tenepnukce, yukupnuke. Yukupnukce, Yesus Kristus ap, na ap, kanye dukdongopnuka anya arye, el ap, neika unyama ati, anyuk tenebuka, pia pi deibuka, pil donune.
Ara, amem yupu atonun yupu peterenyaka deice arye, nyanyake. Ara, “Nun bidamnye tenebibye touk, Allah si erena ara, winibuka, winibuka unamabe,” nyanyake. Tonda, dipkoprop kanye namin kibuka, kum unyak bukni, sikce, “Nun bidamnye yanipdabirye, malye kanye bobuka, pia amu tam atouk ubirye, nun nong ati, ikin ning weik, nun babye, nong deice deipdanamabe,” nyanyake. Ayupu nyabuka ubikcopura, yuk talye ninye eibikirye, nong bol deice ninguk tenebuka, nong noutamak ning moubuka kum tenebikirye, sikce, ‘Se, ara, weik kel arye wininyake,’ teneptinge. Aning talye teneptinge bukni, tukwak ninye arye, sik nong noutamak pataplye ninguk tenebuka, malye-malye ulamak ning ara, ayupu atonun yupu ap, awinin ning deice arye, yupu kum seksutue. Awinin ning deice arye, nun malye winin ning kum, kum kipdeipsute. Anyapmasiak yupu nirya ati ara, talye tukwak ninye arye, “Winina meme,” nyalisinyak yupu ara, “Kum talibuka wininamlulume. ‘Dauplye’ tenen, batakalongonamlulume,” nyapsine.
Ayupu nyapmasina deiyok ara, ‘Kanye pia moupnamlum’ tenen, nyapsine. Deiyok ara, yuk malye nang arye, tilila yupu bukni, weik kel kina atonun yupu deice arye, talye peteresiceura, anggun Kolose mutuku nang arye, ‘Se, ayupu ara, dib nyasinyake’ tenen, mankau kanye arye diba tenepmunce, ‘Yuk malye bisik bimunyak’ tenen, yupu seksine.
Yuk malye nang arye, ‘Sik talima lipdobibyeura, nun tam kipropnamsiyak’ tenen, tilila yupu peterepsica deice arye, mankau kanye arye diba tenebuka, yuk bisik bimunyak ati, anggun kanye pia moubuka unamlulume. ‘Anang arye, nong kum yupu talye peterepsicak’ tenen, anggun kanye moupnamlulume nyapsine. Atilila nang arye nyanyak yupu ara, Kristus el ulul ning deice arye kum nyanyake. ‘Sik talye tukwak ninye, sik kanye deice aryuk,’ tenenyak ning peterenyake. Tonda, ayupu deiyok ara, talye nang bol deice atonun ning, talye tukwak ninye arye, “Aning nun deipkirikdop nang dorapce winilamik touk, aninguk talibuka unamabe,” nyanyak yupu ati nyapne. Tonda sikce, ‘Aning ara, weik mambul mem ning,’ tenebuka, talye yupu aryuk nyaltakanyak yupu uk ulule. Tonda, ayupu ara, Kristus yanina atonun yupu ulule. Anirya ati ara, atilila yupu ara, talye yupu uk ulula anya arye, aning kum kekenamlulume, nyapsine.
Anang ara, utenenyake. ‘Kume, Allah arye, “Wininamlulume, aning ton kum wininamlulume,” nyapdeibukura, Musa sekeiyamsuk yupu ara, nunce peterena deiyok nang atonun unamabe’ tenen, wininyak bukni, dipkoprop ara, sikce, ‘Dipkoprop deiyok ara, ani’ tenen, mikip arye peterenyaka deiyok yupu ap, talye sisiklamak yupu ap ara, sik babye, ton pia walwale. ‘Deiyok ani’ tenen, moubuka kum tenenyake.
Sikti lila yupu peteren nang arye, yuk nang kilapu eibikirye, ‘Se, akilapu ara, dalubuka yoptibye’ tenen, pataplibuk, pia tenenauk unyake. Malye winina pia tuba-tuba wininyakce, sik kanye teniltonauk unyak ninye ara, ‘Nun tam kipropsiting’ tenen, sik nyanyak yupu deice arye, benbenepdongbuka lilonyake. Atilila yupu nyanyak nang ara, ‘Yuk ninye, sik ning weika arye dalubuka doproptibye’ tenena ning ara, weik arye kel kiyamik bikamik. Anang atonun wininyak ninye nirya ara, Allah arye dipkoprop wenebuka oplopnamle.
Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.
Minyuma yayuknye, malye ulirye, kam tuba ululnye birye, ‘Aminyanye birye melipnunil’ tenen, mikip weik aribukba, aminyan tuku pum tam arye, kutukuka tikilyayuk Malinye birye, pia mambul pil weik dolamuk. Amambul pil dolamuka deice arye, sik tukwak mutuku tuba ulamik ninye arye, eltilila nyalamuk yupu nirya dib tenelamik. Tilila ninguk dib tenelamika ati, aminyan talak tikilyayuknye birye nyapdeibukba, tukwak ninye nirya arye, minyuma yayuknye, el urasin atonun ning, sik bidamang taruk arye puturubuka memepdeibik. Ara el kisok tonok ning, ya arye cobuka obik bukni, kum diamukce, el kisok dilauk uamuknye, ‘El ti si erepnamap’ tenen, amalye kam ulul ning el urasin atonun puturupdeibik.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.
ကြော်ငြာတွေ